Audi

ក្រុមហ៊ុនផលិតរថយន្តខ្នាតយក្សអាល្លឺម៉ង់ Audi គ្រោងកាត់បន្ថយបុគ្គលិកបន្ថែមជិត ៨ពាន់នាក់

ឧកញ៉ាសាមញ្ញ — Wed, 19 Mar 2025 05:10:00 +0000

ក្រុមហ៊ុនផលិតរថយន្តលំដាប់កំពូលរបស់អាល្លឺម៉ង់ អូឌី (Audi) គ្រោងនឹងកាត់បន្ថយចំនួការងារដល់ទៅ ៧ ៥០០ កន្លែងបន្ថែមទៀត នៅក្នុងប្រទេសអាល្លឺម៉ង់ រហូតដល់ឆ្នាំ២០២៩ ក្នុងគោលបំណងសន្សំសំចៃការចំណាយ ចំពេលកំពុងជួបប្រទះការលំបាកខ្លាំងនៅផ្នែកសេដ្ឋកិច្ច និងមានសម្ពាធពីដៃគូប្រកួតប្រជែង។ នេះបើតាមការចុះផ្សាយពីសារ Reuters។

ជុំវិញការកាត់បន្ថយបុគ្គលិករបស់ Audi សារនេះ នឹងផ្តោតទៅលើការងារផ្នែករដ្ឋបាល និងការអភិវឌ្ឍ ពោលគឺស្មើទៅនឹង ៨,៦% នៃកម្លាំងពលកម្មសកលរបស់ខ្លួន ដែលត្រូវបានចាត់ទុកថាជាកិច្ចខិតខំប្រឹងប្រែងចុងក្រោយ នៅក្នុងការព្យាយាមកាត់បន្ថយថ្លៃដើមចំណាយ ដោយក្រុមហ៊ុនផលិតរថយន្តអាល្លឺម៉ង់មួយនេះ។

មិនតែប៉ុណ្ណោះ ក្រុមហ៊ុន Audi ក៏បានបង្ហាញក្តីរំពឹងខ្ពស់ថាផែនការកាត់បន្ថយបុគ្គលិកនេះ អាចនឹងជួយសន្សំបានទឹកប្រាក់ចំនួន ១ពាន់លានអឺរ៉ូ (១,១ពាន់លានដុល្លារ) ក្នុងរយៈពេលជាមធ្យម ចំពេលក្រុមហ៊ុនក៏កំពុងមានផែនការក្នុងការបោះទុនវិនិយោគប្រមាណ ៨ពាន់លានអឺរ៉ូ (៨,៨ពាន់លានដុល្លារ) បន្ថែម ក្នុងរោងចក្រនៅអាល្លឺម៉ង់របស់ខ្លួន សម្រាប់រយ:ពេល ៥ឆ្នាំខាងមុខ ដើម្បីជំរុញផលិតកម្មយានយន្តអគ្គិសនី។

ទន្ទឹមនឹងនេះ នៅក្នុងសេចក្តីថ្លែងមួយ ក្រុមហ៊ុន Audi បានសារភាពថា ៖”លក្ខខណ្ឌសេដ្ឋកិច្ចបច្ចុប្បន្នកំពុងមានការលំបាកកាន់តែខ្លាំងឡើង ខណៈពេលដែលសម្ពាធនៃការប្រកួតប្រជែង និងភាពមិនប្រាកដប្រជាផ្នែកនយោបាយ បានបង្កជាបញ្ហាប្រឈមដ៏ធំធេង”។

ជម្រាបជូនផងដែរថា កាលពីមុនក្រុមហ៊ុន Audi បានកាត់បន្ថយកម្លាំងការងារប្រមាណ ៩ ៥០០ កន្លែង ក្នុងវិស័យផលិតកម្ម គិតចាប់តាំងពីឆ្នាំ២០១៤ មក ដោយមានគោលដៅរក្សាទុកធនធានហិរញ្ញវត្ថុរបស់ខ្លួន ដើម្បីវិនិយោគលើយានយន្តអគ្គិសនីថ្មីៗ និងអាចបង្កើនប្រាក់ចំណេញ ចន្លោះពី ៩% -១១%៕

The post ក្រុមហ៊ុនផលិតរថយន្តខ្នាតយក្សអាល្លឺម៉ង់ Audi គ្រោងកាត់បន្ថយបុគ្គលិកបន្ថែមជិត ៨ពាន់នាក់ appeared first on .

ក្រុមហ៊ុនរថយន្ត Audi គ្រោងចាក់លុយវិនិយោគ ១ពាន់លានដុល្លារនៅម៉ិកស៊ិក

ឧកញ៉ាសំពៅ — Thu, 13 Jun 2024 09:02:00 +0000

ក្រុមហ៊ុនរថយន្តអាល្លឺម៉ង់ Audi នឹងបណ្ដាក់ទុនប្រមាណ ១ពាន់លានដុល្លារ សម្រាប់គម្រោងផលិតរថយន្តអគ្គិសនី នៅក្នុងរដ្ឋ Puebla នៃប្រទេសម៉ិកស៊ិក។ នេះបើតាមការចុះផ្សាយពីសារព័ត៌មាន CNA។

គម្រោងវិនិយោគថ្មីរបស់ក្រុមហ៊ុន Audi ក៏នឹងបង្កើនឱកាសការងារដល់ប្រជាជនក្នុងតំបន់ប្រហែល ៥០០កន្លែងថែមទៀត ខណៈបច្ចុប្បន្ន Audi ក៏មានរោងចក្ររថយន្តមួយស្រាប់ក្នុងតំបន់នោះ ដែលមានបុគ្គលិកប្រហែល ៥០០០នាក់។

គួរជម្រាបដែរថា ក្រុមហ៊ុន Audi នៅម៉ិកស៊ិក គឺបានរៀបចំដំឡើងឧបករណ៍សំខាន់ផ្សេងៗ ដើម្បីសាងសង់រោងចក្រផលិតរថយន្តអគ្គិសនីជាបណ្ដើរៗហើយ ស្របពេលអាជ្ញាធរក្នុងតំបន់បានអះអាងថា ផែនការរបស់ Audi នេះ នឹងធ្វើឲ្យម៉ិកស៊ិក ក្លាយជាមជ្ឈមណ្ឌលរថយន្តអគ្គិសនីថ្មីមួយនាពេលអនាគត៕

The post ក្រុមហ៊ុនរថយន្ត Audi គ្រោងចាក់លុយវិនិយោគ ១ពាន់លានដុល្លារនៅម៉ិកស៊ិក appeared first on .

ណែនាំឲ្យស្គាល់ក្រុមហ៊ុនផលិតរថយន្តរកចំណូលបានច្រើនបំផុតលើលោក សម្រាប់ឆ្នាំ ២០២២

ឧកញ៉ាសំពៅ — Thu, 29 Sep 2022 13:40:00 +0000

ក្រុមហ៊ុន Tesla គឺជាក្រុមហ៊ុនផលិតរថយន្តធំជាងគេលើលោក បើផ្អែកតាមមូលធនរបស់ក្រុមហ៊ុនយក្សមួយនេះ ប៉ុន្តែបើនិយាយពីរឿងរកប្រាក់ចំណូលប្រចាំឆ្នាំវិញ Tesla មិនមែនជាអ្នករកប្រាក់បានច្រើនជាងគេឡើយ។

យោងតាមរបាយការណ៍ចុះផ្សាយដោយ Testndrive បានឲ្យដឹងថា ក្រុមហ៊ុនដែលរកចំណូលបានច្រើនបំផុត គិតត្រឹមខែឧសភា ២០២២ គឺក្រុមហ៊ុនជប៉ុន Toyota ឯណោះទេ ខណៈក្រុមហ៊ុនគ្រប់គ្រងដោយ Elon Musk ស្ថិតនៅលេខរៀងទី ៦។

ខាងក្រោមនេះគឺជាបញ្ជីឈ្មោះក្រុមហ៊ុនផលិតរថយន្តទាំង ១០ ដែលរកចំណូលបានច្រើនបំផុតគិតត្រឹមខែឧសភា ២០២២ ផ្អែកតាមទិន្នន័យចុះផ្សាយដោយ Testndrive៖

1/ Toyota រកចំណូលបានប្រហែល ៥៩,៤៧ ពាន់លានដុល្លារ

2/ Mercedes Benz រកចំណូលបានប្រហែល ៥៨,២ ពាន់លានដុល្លារ

3/ Volkswagen រកចំណូលបានប្រហែល ៤៧,០២ ពាន់លានដុល្លារ

4/ BMW រកចំណូលបានប្រហែល ៤០,៤៤ ពាន់លានដុល្លារ

5/ Porche រកចំណូលបានប្រហែល ៣៤,៣២ ពាន់លានដុល្លារ

6/ Tesla រកចំណូលបានប្រហែល ៣១,៩៨ ពាន់លានដុល្លារ

7/ Honda រកចំណូលបានប្រហែល ៣១,៣៦ ពាន់លានដុល្លារ

8/ Ford រកចំណូលបានប្រហែល ២២,៦៧ ពាន់លានដុល្លារ

9/ Volvo រកចំណូលបានប្រហែល ១៧,៧៥ ពាន់លានដុល្លារ

10/ Audi រកចំណូលបានប្រហែល ១៧,១៨ ពាន់លានដុល្លារ៕

The post ណែនាំឲ្យស្គាល់ក្រុមហ៊ុនផលិតរថយន្តរកចំណូលបានច្រើនបំផុតលើលោក សម្រាប់ឆ្នាំ ២០២២ appeared first on .

Audi ចាប់ដៃជាមួយក្រុមហ៊ុនបង្កើតថ្មីនៅអាស៊ី គ្រោងផលិតរ៉ឺម៉កកង់បីឥណ្ឌា

ឧកញ៉ាសំពៅ — Mon, 20 Jun 2022 05:56:58 +0000

ក្រុមហ៊ុន Audi មានឈ្មោះល្បីរន្ទឺ លើវិស័យផលិតរថយន្តបែបទំនើប និងស៊ីវិល័យ ជាពិសេសគឺបច្ចេកវិទ្យាជំនាន់ចុងក្រោយតែម្ដង ហើយថ្មីៗនេះពួកគេបានចូលរួមជាមួយក្រុមហ៊ុនបង្កើតថ្មីមួយ ដើម្បីគ្រោងផលិតរ៉ឺម៉កកង់បីឥណ្ឌា។

យោងតាមការចុះផ្សាយពី Timesofindia បានឲ្យដឹងថា រ៉ឺម៉កកង់បីឥណ្ឌាដែលជាគម្រោងផលិតឡើងដោយក្រុមហ៊ុន Nunam នោះ នឹងបំពាក់ដោយអាគុយដែលប្រើប្រាស់លើរថយន្តអគ្គិសនីរបស់ Audi ស្របពេលគ្រោងការណ៍យក្សមួយនេះក៏នឹងអាចផ្ដល់ឱកាសការងារដល់ប្រជាពលរដ្ឋប្រចាំតំបន់ ជាពិសេសគឺស្ត្រីផងដែរ។

ជាការពិត រ៉ឺម៉កកង់បីគឺជាមធ្យោបាយធ្វើដំណើរដ៏ពេញនិយមមួយនៅប្រទេសឥណ្ឌា ប៉ុន្តែរ៉ឺម៉កទាំងនោះ សុទ្ធតែដំណើរការដោយអាគុយចាក់ទឹកអាស៊ីត ដែលងាយនឹងធ្វើឲ្យម៉ាស៊ីនឆាប់ខូចគុណភាព និងប្រើប្រាស់មិនសូវបានល្អ។

ដោយសម្លឹងឃើញពីតម្រូវការប្រចាំថ្ងៃបែបនេះ Nunam ក៏មានគំនិតបង្កើតរ៉ឺម៉កកង់បីដែលប្រើប្រាស់ដោយថាមពលអគ្គិសនីវិញ ដែលអាចប្រើប្រាស់បានយូរជាង និងមានថាមពលបានវែងជាង ស្របពេល Audi បង្ហើបថា គម្រោងមួយនេះក៏នឹងជួយកាត់បន្ថយការបំភាយឧស្ម័នពុលពីការបើកបររ៉ឺម៉កផងដែរ។

យ៉ាងណា គម្រោងការណ៍ខាងលើបច្ចុប្បន្ន កំពុងស្ថិតនៅការសិក្សានៅឡើយ ស្របពេលកាលបរិច្ឆេទនៃការផលិតជាក់លាក់ក៏មិនទាន់បង្ហើបអោយដឹងច្បាស់ដូចគ្នា៕

The post Audi ចាប់ដៃជាមួយក្រុមហ៊ុនបង្កើតថ្មីនៅអាស៊ី គ្រោងផលិតរ៉ឺម៉កកង់បីឥណ្ឌា appeared first on .

Audi

ក្រុមហ៊ុនផលិតរថយន្តខ្នាតយក្សអាល្លឺម៉ង់ Audi គ្រោងកាត់បន្ថយបុគ្គលិកបន្ថែមជិត ៨ពាន់នាក់

ក្រុមហ៊ុនរថយន្ត Audi គ្រោងចាក់លុយវិនិយោគ ១ពាន់លានដុល្លារនៅម៉ិកស៊ិក

ណែនាំឲ្យស្គាល់ក្រុមហ៊ុនផលិតរថយន្តរកចំណូលបានច្រើនបំផុតលើលោក សម្រាប់ឆ្នាំ ២០២២

Audi ចាប់ដៃ​ជាមួយ​ក្រុមហ៊ុន​បង្កើត​ថ្មី​នៅ​អាស៊ី គ្រោង​ផលិត​រ៉ឺម៉ក​កង់បី​ឥណ្ឌា​

Audi ចាប់ដៃជាមួយក្រុមហ៊ុនបង្កើតថ្មីនៅអាស៊ី គ្រោងផលិតរ៉ឺម៉កកង់បីឥណ្ឌា