ពិធីប្រគល់ត្រាជូនប្រធានក្រុមប្រឹក្សាភិបាលអាណត្តិថ្មី CAMFEBA និងពិធីលៀងសាយភោជន៍អបអរសាទរមហាសនិ្នបាតប្រចាំឆ្នាំ បានប្រារព្វធ្វើឡើងកាលល្ងាចថ្ងៃទី២៤ ខែកក្កដា ឆ្នាំ២០២៥ ក្រោមអធិបតីភាព ឯកឧត្តម ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ ព្រមទាំង ឯកឧត្តម លោកជំទាវ លោក លោកស្រី ដែលជាតំណាងក្រសួង និងថា្នក់ដឹកនាំនៃបណ្តាសហគ្រាស-គ្រឹះស្ថាន អង្គការក្រៅរដ្ឋាភិបាល សហជីព និងសមាគមពាណិជ្ជកម្មនានានៅក្នុងប្រទេសប្រមាណជា ២០០នាក់។

ថ្លែងក្នុងមតិសំណេះសំណាល ឯកឧត្តមរដ្ឋមន្ត្រី ហេង សួរ បានកោតសរសើរ និងវាយតម្លៃខ្ពស់ចំពោះ CAMFEBA ដែលបានរក្សាបាននូវភាពរីកចម្រើនរឹងមាំ និងទទួលបានការទុកចិត្តពីវិនិយោគិន ក៏ដូចជាពីសមាជិករបស់ខ្លួនគួរជាទីមោទនៈ។ ជាមួយគ្នានេះផងដែរ ឯកឧត្តមរដ្ឋមន្ត្រីក៏បានសម្ដែងនូវការអបអរសាទរចំពោះ លោកឧកញ៉ា សុខ ពិសិដ្ឋ ដែលបានជាប់ឆ្នោតជាប្រធានក្រុមប្រឹក្សាភិបាលរបស់ CAMFEBA សម្រាប់អាណត្តិថ្មីនេះ និងព្រមទាំងអញ្ជើញចូលរួមជាសាក្ខីភាពដ៏ខ្ពង់ខ្ពស់ ក្នុងពិធីប្រគល់ និងទទួលត្រាសម្រាប់ប្រធានក្រុមប្រឹក្សាអាណត្តិថ្មីផងដែរ។

ឯកឧត្តមរដ្ឋមន្ត្រីបានបញ្ជាក់បន្ថែមថា លទ្ធផលនានាដែលសម្រេចបានរហូតមកដល់ពេលនេះ គឺបង្ហាញយ៉ាងច្បាស់ពីការខិតខំប្រឹងប្រែង និងការចូលរួមចំណែកប្រកបដោយស្មារតីទទួលខុសត្រូវរបស់ CAMFEBA ក្នុងនាមជាតំណាងភាគីនិយោជក។ CAMFEBA បានចូលរួមយ៉ាងសកម្មក្នុងការលើកកម្ពស់ និងធ្វើឱ្យប្រសើរឡើងនូវលក្ខខណ្ឌការងារ សុខដុមរមនាក្នុងទំនាក់ទំនងវិជ្ជាជីវៈ របបសន្តិសុខសង្គម ក៏ដូចជាការអប់រំបណ្តុះបណ្តាលបច្ចេកទេស និងវិជ្ជាជីវៈនៅក្នុងយន្តការត្រីភាគីនានា ដូចជាគណៈកម្មការប្រឹក្សាការងារ គណៈកម្មការជាតិសុខភាព និងសុវត្ថិភាពការងារ ក្រុមប្រឹក្សាជាតិប្រាក់ឈ្នួលអប្បបរមា ក្រុមប្រឹក្សាភិបាលនៃបេឡាជាតិសន្តិសុខសង្គម និងគណៈកម្មការជាតិបណ្តុះបណ្តាល។

ទន្ទឹមនឹងនេះ CAMFEBA ក៏បានដើរតួនាទីយ៉ាងសំខាន់ក្នុងនាមជាសហប្រធានក្រុមការងារផ្នែកទំនាក់ទំនងវិជ្ជាជីវៈ (ក្រុមការងារទី៨) ក្នុងភាពជាដៃគូរវាងរដ្ឋ-ឯកជន ដោយផ្តល់កិច្ចសហប្រតិបត្តិការយ៉ាងល្អជាមួយក្រសួងការងារ និងបណ្តុះបណ្តាលវិជ្ជាជីវៈក្នុងការស្វែងរកដំណោះស្រាយប្រកបដោយប្រសិទ្ធភាពចំពោះបញ្ហាប្រឈមនានាជូននិយោជក និងកម្មករនិយោជិត ដើម្បីកែលម្អសុខដុមរមនាក្នុងទំនាក់ទំនងវិជ្ជាជីវៈ។

សូមជម្រាបថា ក្រុមប្រឹក្សាភិបាលរបស់ CAMFEBA សម្រាប់អាណត្តិទី១១ ថ្មីនេះ គឺមានសមាសភាពដូចជា៖ ឧកញ៉ា សុខ ពិសិដ្ឋ ជាប្រធាន, ឧកញ៉ា ណាង សុធី, ឧកញ៉ា ស គីណាល់, ឧកញ៉ា កាង ឡេង, ឧកញ៉ា សុង សារ៉ន និងលោក-លោកស្រី ជាអនុប្រធាន ចំនួន ៧រូប ព្រមទាំងសមាជិក សមាជិកាក្រុមប្រឹក្សាភិបាល ចំនួន ៧រូបផ្សេងទៀត សរុបទាំងអស់ចំនួន ១៥រូប។ CAMFEBA អាណត្តិទី១១ មានរយៈពេល ៣ឆ្នាំ ចាប់ពីឆ្នាំ២០២៥ ដល់ឆ្នាំ២០២៧៕

The post ឧកញ៉ា សុខ ពិសិដ្ឋ ជាប់ឆ្នោតជាប្រធាន CAMFEBA និងឧកញ៉ា ៤រូបទៀត ជាប់ជាអនុប្រធាន appeared first on .

ក្នុងការបោះឆ្នោតជ្រើសតាំងសមាជិកក្រុមប្រឹក្សាភិបាល កាលពីថ្ងៃទី២៩ ខែវិច្ឆិកា ឆ្នាំ២០២២ បានរកឃើញសមាសភាពអនុប្រធានចំនួន ៨រូបទៀត គឺ ឧកញ៉ាបណ្ឌិត ណាង សុធី, លោក ស គីណាល់, លោកស្រី សាន់ដ្រា ដាមីកូ, លោក សុខ ឡោ, លោកស្រី អេង សុភាព, លោក កាំង ឡេង,  លោក Antoine FONTAINE, លោក Arnaud DARC ខណៈដែលលោកស្រី ជ្រា ដាលីយ៉ា ជាប់ឆ្នោតជាអគ្គលេខធិការ លោកស្រី ឡេង សុម៉ាលី ហិរញ្ញិក។

ទន្ទឹមនឹងនោះ លោក ម៉េតធ្យូ រ៉េនដល, លោក សុង សារ៉ន, លោកស្រី VAN Porphin,  លោក ម៉ៅ សាវិន សមាជិកក្រុមប្រឹក្សាភិបាល។ ចំណែកឯលោក ម៉ៅ សាវិន ជំនួសឧកញ៉ា វ៉ាន់ ស៊ូអៀង ដោយស្នើសុំលាលែងពីតំណែងសមាជិកក្រុមប្រឹក្សាភិបាលអាណត្តិថ្មី។

សូមជម្រាបថា សហព័ន្ធនិយោជក និងសមាគមពាណិជ្ជកម្មកម្ពុជា CAMFEBA គឺជាសហព័ន្ធ និយោជកឯករាជ្យមួយដែលមានទស្សនៈវិស័យបង្រួបបង្រួមនិយោជក និង​វិស័យឯកជនក្នុងប្រទេសកម្ពុជាឲ្យស្ថិតនៅក្រោមដំបូលតែមួយ តាមរយៈការធ្វើជាតំណាង និងកិច្ចសហប្រតិបត្តិការដ៏មានប្រសិទ្ឋិភាពជាមួយរាជរដ្ឋាភិបាលកម្ពុជា និងស្ថាប័នពាក់ព័ន្ធទាំងថ្នាក់ជាតិ និងអន្តរជាតិ ដើម្បីធ្វើឲ្យកម្ពុជាក្លាយជាប្រទេសដែលមានភាពទាក់ទាញពីសំណាក់អ្នកវិនិយោគជាតិ និងអន្តរជាតិ ព្រមទាំងមានការប្រកួតប្រជែងខ្លាំងបំផុតនៅក្នុងតំបន់ និងនៅលើពិភពលោក។

គួររំលឹកផងដែរថា CAMFEBA ត្រូវបានបង្កើតឡើងក្នុងឆ្នាំ ២០០០ និង បានទទួលស្គាល់ដោយដៃគូរសហការទាំងក្នុង និងក្រៅប្រទេសថាជាអង្គការតែមួយគត់ ដែលតំណាងឲ្យនិយោជកគ្រប់វិស័យទាំងអស់នៅក្នុងប្រទេសកម្ពុជា។ គិតមកដល់បច្ចុប្បន្ននេះ CAMFEBA តំណាងឱ្យសហគ្រាសជាង២៥០០ ក្រុមហ៊ុន។ លើសពីនេះ CAMFEBA បានផ្ដល់នូវភាពជាតំណាង និងសេវាកម្មយ៉ាងទូលំទូលាយទៅឱ្យសមាជិកតាមរយៈសេវាប្រឹក្សាយោបល់បញ្ហាការងារ និងពាណិជ្ជកម្ម ការចែកចាយ និងផ្សព្វផ្សាយព័ត៌មាន ការបណ្ដុះបណ្ដាល និងការអភិវឌ្ឍន៍ ការតស៊ូមតិ ការផ្ដល់សេវាឯកសារគតិយុត្ដិ ការស្រាវជ្រាវ និងបោះពុម្ពផ្សាយ៕

The post ឧកញ៉ា សុខ ពិសិដ្ឋ ជាប់ប្រធានថ្មី CAMFEBA ជំនួសឧកញ៉ា វ៉ាន់ ស៊ូអៀង appeared first on .