Central Group

ក្រុមហ៊ុនខ្នាតយក្សថៃ Central Group ក្លាយជាម្ចាស់គ្រប់គ្រងហាងលក់ទំនិញប្រណីត Selfridges នៅអង់គ្លេស

ឧកញ៉ាសាមញ្ញ — Thu, 16 Nov 2023 00:55:00 +0000

កាលពីថ្ងៃពុធ ទី១៥ ខែវិច្ឆិកា ក្រុមហ៊ុនគ្រប់គ្រងហាងលក់ទំនិញធំបំផុតរបស់ប្រទេសថៃ Central Group បានក្លាយជាអ្នកកាន់កាប់ផ្តាច់មុខ ទៅលើហាងលក់ទំនិញប្រណីត Selfridges នៅក្នុងប្រទេសអង់គ្លេស បន្ទាប់ពីដៃគូវិនិយោគរបស់ខ្លួន កំពុងប្រឈមមុខនឹងការបោះបង់សិទ្ធិគ្រប់គ្រង។ នេះបើតាមការចុះផ្សាយពីសារព័ត៌មាន CNA។

ការប្រកាសនេះ ត្រូវបានធ្វើឡើង នៅពេលដែលសហម្ចាស់ Selfridges គឺក្រុមហ៊ុនរបស់អូទ្រីស Signa Group ដែលកាន់កាប់ដោយមហាសេដ្ឋី Rene Benko កំពុងប្រឈមមុខជាមួយនឹងវិបត្តិអចលនទ្រព្យនៅអឺរ៉ុប។

ជុំវិញបញ្ហានេះ លោក Benko នៅក្នុងខែនេះ បានសម្រេចចិត្តបោះបង់សិទ្ធិគ្រប់គ្រងរបស់ក្រុមហ៊ុន Signa ទៅឱ្យអ្នកជំនាញដើម្បីធ្វើការរៀបចំរចនាសម្ព័ន្ធឡើងវិញ ដែលនេះមានន័យថាក្រុមហ៊ុន Central Group ដែលជាកម្មសិទ្ធិរបស់មហាសេដ្ឋីថៃ គឺក្រុមគ្រួសារ Chirativat នឹងជាអ្នកកាន់កាប់ហាង Selfridges ជំនួសវិញ។

គួរឱ្យដឹងថា ក្រុមហ៊ុនCentral Group និងក្រុមហ៊ុនអចលនទ្រព្យ Signa Group របស់លោក Benko បានទិញយកហាង Selfridges ក្នុងឆ្នាំ២០២១ ក្នុងកិច្ចព្រមព្រៀងដែលមានតម្លៃរហូតដល់ទៅ ៥ពាន់លានដុល្លារ។

ជម្រាបជូនថា Selfridges ត្រូវបានបង្កើតឡើងក្នុងឆ្នាំ១៩០៨ ដោយលោក Harry Gordon Selfridge ហើយត្រូវបានគេស្គាល់ថាជាហាងលក់ទំនិញប្រណីតបំផុត នៅ Oxford Street ក្នុងទីក្រុងឡុងដ៍៕

The post ក្រុមហ៊ុនខ្នាតយក្សថៃ Central Group ក្លាយជាម្ចាស់គ្រប់គ្រងហាងលក់ទំនិញប្រណីត Selfridges នៅអង់គ្លេស appeared first on .

ក្រុមហ៊ុនថៃ Central Group គ្រោងចាយលុយជិត ៨០០ លានដុល្លារ ពង្រីកសាខានៅវៀតណាម

ឧកញ៉ាសំពៅ — Tue, 04 Oct 2022 08:45:24 +0000

កាលពីពេលថ្មីៗនេះ ក្រុមហ៊ុន Central Retail ជាបុត្រសម្ព័ន្ធនៃក្រុមហ៊ុនមេ Central Group បានប្រកាសថា ពួកគេនឹងពង្រីកសាខាដែលមានវៀតណាមទ្វេដងក្នុងរយៈពេល ៤ ឆ្នាំខាងមុខ ដែលមានន័យថា Central Retail នឹងពង្រីកពី ៣៤០ សាខារហូតដល់ជាង ៧០០ សាខាត្រឹមឆ្នាំ ២០២៦។

ដោយឡែក Nikkei ក៏បានរាយការណ៍បន្ថែមថា Central Group គ្រោងនឹងចាយលុយប្រហែល ៣០ ពាន់លានបាត ឬប្រមាណ ៧៩០ លានដុល្លារក្នុងគម្រោងពង្រីកខ្លួនលើទីផ្សារវៀតណាម និងរំពឹងថា ពួកគេនឹងក្លាយជាក្រុមហ៊ុនលក់រាយផ្នែកអាហារ និងអចលនទ្រព្យធំបំផុតនៅវៀតណាមទៀតផង។

មិនតែប៉ុណ្ណោះ ក្រុមហ៊ុនខ្នាតយក្សប្រចាំប្រទេសថៃថែមទាំងសម្លឹងឃើញផលប្រយោជន៍ធំមួយទៀត គឺបង្កើនប្រាក់ចំណូលរហូតដល់ ១០០ លានបាតក្រោយការពង្រីកខ្លួន ខណៈបច្ចុប្បន្នប្រាក់ចំណូលរបស់ពួកគេនៅវៀតណាមមានប្រហែល ៣៨,៦ លានបាត។

សូមជម្រាបដែរថា Central Group បានបោះជំហានចូលក្នុងទីផ្សារប្រទេសវៀតណាមជាលើកដំបូងតាំងពី ១០ ឆ្នាំមុន ហើយមកទល់ពេលនេះពួកគេមានក្រុមហ៊ុនបុត្រសម្ព័ន្ធនៅទីនោះ ១០ យីហោដូចជា Go! Mall, Nguyen Kim, SuperSports និង Top Market ដែលលក់ទំនិញស្ទើរគ្រប់មុខតាំងពីម្ហូបអាហារ រហូតដល់គ្រឿងអេឡិចត្រូនិក៕

The post ក្រុមហ៊ុនថៃ Central Group គ្រោងចាយលុយជិត ៨០០ លានដុល្លារ ពង្រីកសាខានៅវៀតណាម appeared first on .

ក្រុមហ៊ុនលក់រាយធំបំផុតរបស់ថៃ ត្រៀមបោះទុនបន្ថែមជិត ១,៣ ពាន់លានដុល្លារ ពង្រីកហាងនៅទ្វីបអឺរ៉ុប

ឧកញ៉ាសាមញ្ញ — Wed, 07 Sep 2022 09:55:00 +0000

ក្រុមហ៊ុនលក់ទំនិញរាយដ៏ធំបំផុតរបស់ប្រទេសថៃ Central Group ថ្មីៗនេះ បាននិយាយថា ខ្លួនគ្រោងនឹងពង្រីកការបោះជំហានរបស់ក្រុមហ៊ុន នៅក្នុងទ្វីបអឺរ៉ុបបន្ថែមទៀត ជាមួយនឹងការវិនិយោគទឹកប្រាក់ ១,៣ ពាន់លានអឺរ៉ូ (ប្រហែល ១,២៨ ពាន់លានដុល្លារ) ក្នុងរយ:ពេល ៥ ឆ្នាំខាងមុខ សម្រាប់ការបង្កើតហាងថ្មីៗ និងធ្វើឱ្យមានប្រសើឡើង លើពាណិជ្ជកម្មអេឡិចត្រូនិកផងដែរ ។ នេះបើយោងតាមការចុះផ្សាយពីកាសែត Bangkok Post ។

បើយោងតាម អ្នកនាំពាក្យក្រុមហ៊ុនបាននិយាយថា ក្រុមហ៊ុន Central បានត្រៀមថវិកាចំនួន ៩០០ លានអឺរ៉ូ ដើម្បីវិនិយោគក្នុងគម្រោងហាងថ្មី ចំនួន ៣ នៅក្នុងប្រទេសអាល្លឺម៉ង់ អូទ្រីស និងស្វីស ដោយបូករួមទឹកប្រាក់បន្ថែមចំនួន ៣៧៥ លានអឺរ៉ូ ដែលនឹងត្រូវបានបែងចែកក្នុងរយៈពេល ៥ ឆ្នាំខាងមុខ ដើម្បីធ្វើឱ្យប្រសើរឡើងនូវហាង ដែលមានស្រាប់។

លើសពីនេះ ក្រុមហ៊ុន បាននិយាយថាផែនការផ្សេងទៀត ក៏រួមបញ្ចូលផងដែរ នូវការពង្រីកលើការលក់ ក្នុងពាណិជ្ជកម្មអេឡិចត្រូនិក ( E-Commerce ) របស់ខ្លួន នៅក្នុងទ្វីបអឺរ៉ុប ពីកម្រិតនៃការលក់សរុបបច្ចុប្បន្ន ១៧% ឬក្នុងទំហំទឹកប្រាក់ ១ ពាន់លានអឺរ៉ូ ។

នាយកប្រតិបត្តិរបស់ក្រុមហ៊ុន លោក Tos Chirathivat បាននិយាយថា យើងនឹងពង្រីកភាពជាដៃគូជាមួយ នឹងម៉ាកយីហោប្រណីតៗ នៅក្នុងទីក្រុងទេសចរណ៍ធំៗ របស់អឺរ៉ុប និងជំរុញឱ្យមានវត្តមានពាណិជ្ជកម្មអេឡិចត្រូនិករបស់ក្រុមហ៊ុន នៅក្នុងទ្វីបអឺរ៉ុប តាមរយ:គេហទំព័រ Selfridges.com របស់យើង ។

ទន្ទឹមនឹងនេះ ក្រុមហ៊ុន Central បាននិយាយនៅក្នុងសេចក្តីថ្លែងការណ៍មួយថា ការលក់សរុបរបស់ខ្លួន នឹងកើនឡើងដល់ ៦,៧ ពាន់លានអឺរ៉ូ ឬស្មើនឹងប្រមាណ ៦,៦៧ ពាន់លានដុល្លារ នៅឆ្នាំ ២០២២ នេះ ៕

The post ក្រុមហ៊ុនលក់រាយធំបំផុតរបស់ថៃ ត្រៀមបោះទុនបន្ថែមជិត ១,៣ ពាន់លានដុល្លារ ពង្រីកហាងនៅទ្វីបអឺរ៉ុប appeared first on .

អ្នកមានដាច់គេនៅថៃចាប់ដៃជាមួយ Signa Holding ទិញយកក្រុមហ៊ុនតម្លៃជាង ៥ ពាន់លានដុល្លារ ពីមហាសេដ្ឋីកាណាដា

ឧកញ៉ាសំពៅ — Tue, 28 Dec 2021 03:11:52 +0000

កាលពីពេលថ្មីៗនេះ មានដំណឹងមកថា ក្រុមហ៊ុន Central Group ដែលកំពុងគ្រប់គ្រងពីសំណាក់គ្រួសារត្រកូល Chirathivat ដែលជាគ្រួសារមានទ្រព្យច្រើនបំផុតប្រចាំប្រទេសថៃ បានសហការចាប់ដៃគូជាមួយក្រុមហ៊ុន Signa Holding នៃប្រទេសអូទ្រីសក្នុងការទិញយកក្រុមហ៊ុន Selfridges & Co. ពីគ្រួសារត្រកូល Weston។

ក្រុមហ៊ុនលក់ទំនិញខាងលើដែលធ្លាប់ជាកម្មសិទ្ធរបស់មហាសេដ្ឋីកាណាដា មានទីតាំងលក់រហូតដល់ ១៨ សាខា រាប់បញ្ចូលទាំងសាខានៅលើផ្លូវ Oxford Street ដែលនៅចំកណ្ដាលទីក្រុងឡុងដ៍ និងជាទីប្រជុំជនកកកុញផងដែរ ហើយវាក៏នឹងរាប់បញ្ចូលទាំងសាខាក្រៅប្រទេសដូចជានៅហូឡង់ អៀរឡង់ និងសាខាផ្សេងៗទូទាំងចក្រភពអង់គ្លេស។

ដោយឡែក Central Group បានប្រកាសនៅលើគេហទំព័រផ្លូវការរបស់ពួកគេអំពីការទិញយកក្រុមហ៊ុនខាងលើ ដោយមិនបានបញ្ចេញព័ត៌មានទាក់ទងនឹងផ្នែកហិរញ្ញវត្ថុច្បាស់លាស់ឡើយ។

តែបើតាមការចុះផ្សាយពី Bloomberg បានឲ្យដឹងថា គ្រួសារមហាសេដ្ឋីត្រកូល Weston ទំនងជាសម្រេចចិត្តលក់ Selfridges ក្នុងតម្លៃប្រមាណ ៤ ពាន់លានផោន ឬ ៥,៤ ពាន់លានដុល្លារអាមេរិក។

នាពេលដ៏ខ្លីខាងមុខ Selfridges នឹងបញ្ចូលសាខារបស់ពួកគេជាមួយនឹង Central Group ក៏ដូចជាសាខារបស់ Signa ដែលមានស្រាប់នៅហាងលក់សម្ភារៈ និងគ្រឿងអលង្ការទូទាំងប្រទេសអ៊ីតាលី ដាណឺម៉ាក ស្វីស អាល្លឺម៉ង់ និងអូទ្រីស ខណៈគេជឿថាបើបូកសរុបចំណូលកាលពីឆ្នាំ ២០១៩ ក្រុមហ៊ុនខាងលើទទួលបានជិត ៦ ពាន់លានដុល្លារ ហើយអាចនឹងកើនដល់ច្រើនជាង ៨ ពាន់លានដុល្លារត្រឹមឆ្នាំ ២០២៤៕

ប្រភព: Forbes

The post អ្នកមានដាច់គេនៅថៃចាប់ដៃជាមួយ Signa Holding ទិញយកក្រុមហ៊ុនតម្លៃជាង ៥ ពាន់លានដុល្លារ ពីមហាសេដ្ឋីកាណាដា appeared first on .

ក្រុមហ៊ុនរបស់មហាសេដ្ឋីថៃម្នាក់ ទិញយកហាងប្រណីត Selfridges ក្នុងតម្លៃជាង ៥ ពាន់លានដុល្លារ

ឧកញ៉ាសាមញ្ញ — Fri, 24 Dec 2021 04:41:51 +0000

ហាងលក់ទំនិញធំជាងគេរបស់ថៃ Central Group បានព្រមព្រៀងទិញយកហាងទំនិញប្រណីត Selfridges ដ៏ល្បីល្បាញនៅចក្រភពអង់គ្លេស ក្នុងតម្លៃប្រមាណ ៤ ពាន់លានផោន ឬប្រហែលជាង ៥ ពាន់លានដុល្លារ ។

ជាក់ស្តែង នេះបើតាមការឲ្យដឹងពីប្រភពព័ត៌មាន Rerters ដែលបាននិយាយទៀតថា ការប្រកាសជាផ្លូវការនៃកិច្ចព្រមព្រៀងដ៏ធំនេះ ប្រហែលជាត្រូវធ្វើឡើងនៅថ្ងៃព្រហស្បតិ៍ទី ២៣ ធ្នូម្សិលមិញ។

គួរឲ្យដឹងផងដែរថា ម្ចាស់ហាង Selfridges បច្ចុប្បន្ន ដែលជាក្រុមគ្រួសារអ្នកជំនួញ Weston ជនជាតិកាណាដា គឺបានព្រមព្រៀងលក្ខខណ្ឌនានា ជាមួយ Central កាលពីចុងខែវិច្ឆិកាមកម្លេះ។ យ៉ាងណានេះបើតាមរបាយការណ៍នៅក្នុងកាសែត The Times ដែលបានចុះផ្សាយ នៅថ្ងៃទី ២ ធ្នូកន្លងទៅ។

មិនតែប៉ុណ្ណោះ ប្រភពខាងលើបានបន្ថែមទៀតថា Central Retail Corp Pcl ដែលជាបុត្រសម្ព័ន្ធរបស់ Central Group នឹងមានសិទ្ធចូលកាន់ភាគហ៊ុនមួយផ្នែក ក្នុងក្រុមហ៊ុនហាង Selftridges ប៉ុន្តែកំពុងតែស្ថិតនៅក្នុងការពិចារណានៅឡើយ ។

ប៉ុន្តែទាំង Central Group និង Selfridges មិនទាន់បានធ្វើការឆ្លើយតប ចំពោះសំណើសុំឲ្យបញ្ជាក់បន្ថែមជុំវិញកិច្ចព្រមព្រៀងនេះ ពីសំណាក់សារព័ត៌មាន Reuters នៅឡើយនោះទេ ។

បញ្ជាក់ផងដែរថា Central Group ដែលជាកម្មសិទ្ធិរបស់គ្រួសារមហាសេដ្ឋី Chirathivat មានវត្តមាននៅក្នុងទ្វីបអឺរ៉ុបតាំងពីឆ្នាំ ២០១១ មក ខណ:កាលពីឆ្នាំមុន ខ្លួនបានទិញយកហាងទំនិញប្រណីតរបស់ប្រទេសស្វីស Globus និងអចលនទ្រព្យផ្សេងទៀត ក្នុងការបណ្តាក់ទុនរួមគ្នា ជាមួយក្រុមហ៊ុន Signa របស់ប្រទេសអូទ្រីស នៅក្នុងតម្លៃ ១ ពាន់លានដុល្លារ ៕

លើសពីនេះ ក្រុមហ៊ុនខាងលើ ក៏កាន់កាប់ហាង La Rinascente របស់អ៊ីតាលី , ហាង Illum របស់ដាណឺម៉ាក និង KaDewe ក្នុងប្រទេសអាល្លឺម៉ង់ផងដែរ ស្របពេលនៅអាស៊ី Central Group បានបើកដំណើរការហាងរបស់ខ្លួនជាច្រើនកន្លែង នៅប្រទេសវៀតណាម ៕

ប្រភព: Bangkok Post

The post ក្រុមហ៊ុនរបស់មហាសេដ្ឋីថៃម្នាក់ ទិញយកហាងប្រណីត Selfridges ក្នុងតម្លៃជាង ៥ ពាន់លានដុល្លារ appeared first on .