Gotabaya Rajapaksa

ស្ងាត់ៗ! អតីតប្រធានាធិបតីស្រីលង្កា វិលត្រឡប់ចូលស្រុកដល់គេហដ្ឋានទាំងព្រឹកថ្ងៃសៅរ៍នេះ

កូនចៅឧកញ៉ា — Sat, 03 Sep 2022 02:39:32 +0000

សប្ដាហ៍បន្ទាប់ពីរត់ភៀសខ្លួនចេញពីប្រទេស ៧សប្តាហ៍កន្លងទៅដោយសារចិបត្តិសេដ្ឋកិច្ច និងផ្ទុះបាតុកម្មទ្រង់ទ្រាយធំក្នុងប្រទេសស្រីលង្កា ឥឡូវនេះ អតីតប្រធានាធិបតីស្រីលង្កា លោក ហ្គូតាបាយ៉ា រ៉ាចាប៉ាកសា បាននិវត្តន៍ចូលមកប្រទេសវិញហើយទាំងព្រឹកព្រលឹមនាថ្ងៃសៅរ៍នេះ។

សារព័ត៌មាន Reuters នៅព្រឹកថ្ងៃទី៣នេះ ចុះផ្សាយថា លោក រ៉ាចាប៉ាកសា បានធ្វើដំណើរទៅដល់គេហដា្ឋនរបស់លោកក្នុងរដ្ឋធានីកូឡុំបូ។

យ៉ាងណា មកទល់នឹងពេលនេះ លោក រ៉ាចាប៉ាកសា មិនទាន់បកស្រាយដោយផ្ទាល់មាត់នៅឡើយជុំវិញ ថាតើហេតុអ្វីបានជាលោកភៀសខ្លួន ចេញពីប្រទេសកាលពីប៉ុន្មានសប្ដាហ៍ថ្មីៗកន្លងទៅនេះនោះទេ និងតើហេតុអ្វីបានជាសម្រេចចិត្តត្រឡប់ចូលស្រុកវិញនាពេលនេះដែរ។

គួររំលឹកថា បន្ទាប់ពីកើតមានវិបត្តិសេដ្ឋកិច្ច-សង្គមក្នុងប្រទេស លោក រ៉ាចាប៉ាកសា បានចាក់ចេញពីប្រទេសស្រីលង្កា នាពាក់កណ្ដាលខែកក្កដា ឆ្នាំ២០២២នេះ ដោយទៅកាន់ប្រទេសម៉ាល់ឌីវ និងសិង្ហបុរី ក្រោយក្រុមបាតុករសម្រុកចូលការិយាល័យប្រធានាធិបតីរបស់លោក រ៉ាចាបាក់សា។

នៅពេលរត់ភៀសខ្លួនខ្លួន នៅសិង្ហបុរី លោកបានសម្រេចចិត្តលាលែងចេញពីតំណែង ហើយបន្តធ្វើដំណើរទៅកាន់ប្រទេសថៃ ជាទីដែលលោកបានដាក់ញត្តិទៅកាន់ប្រធានាធិបតីស្រីលង្កាសព្វថ្ងៃ គឺលោក រ៉ានីល វីគ្រីមេស៉ីងហ្កេ ដើម្បីជួយសម្រួលឱ្យលោកបានត្រឡប់ចូលស្រុកវិញ។

ខណៈដែលនៅថ្ងៃសៅរ៍ ទី៣ កញ្ញានេះ អតីតប្រធានាធិបតីស្រីលង្កា លោក ហ្គូតាបាយ៉ា រ៉ាចាប៉ាកសា បាននិវត្តន៍ចូលមកប្រទេសវិញហើយ៕

The post ស្ងាត់ៗ! អតីតប្រធានាធិបតីស្រីលង្កា វិលត្រឡប់ចូលស្រុកដល់គេហដ្ឋានទាំងព្រឹកថ្ងៃសៅរ៍នេះ appeared first on .

អតីតប្រធានាធិបតីស្រីលង្កា អាចវិលចូលស្រុកវិញនៅចុងសប្ដាហ៍នេះ

ឧកញ៉ាសំពៅ — Fri, 02 Sep 2022 07:47:41 +0000

លោក Gotabaya Rajapaksa អតីតប្រធានាធិបតីស្រីលង្កា អាចនឹងវិលចូលស្រុកកំណើតវិញ បន្ទាប់ពីធ្វើការរត់ភៀសខ្លួនអស់រយៈពេលជាច្រើនសប្ដាហ៍ ខណៈប្រទេសថៃអាចនឹងជាគោលដៅចុងក្រោយ បើសិនអតីតមេដឹកនាំម្នាក់នេះសម្រេចវិលចូលស្រុកវិញនៅចុងសប្ដាហ៍នេះ។ នេះបើតាមការចុះផ្សាយពី CNA។

ប្រភពដដែលបន្ថែមថា បុរសវ័យ ៧៣ ឆ្នាំទំនងនឹងបញ្ចប់ការស្នាក់នៅប្រទេសថៃ និងវិលត្រឡប់ទៅស្រីលង្កាវិញនៅថ្ងៃសៅរ៍ ទី ៣ កញ្ញាខាងមុខ បន្ទាប់ពីការចំណាយនៅប្រទេសអាស៊ានមានតម្លៃថ្លៃពេក។

“គាត់ (Gotabaya) គឺបានរស់នៅសណ្ឋាគារនៅប្រទេសថៃ ប្រៀបដូចជាអ្នកទោស ហើយបានស្នើសុំវិលចូលស្រុកវិញ ហើយពួកយើងត្រូវបានគេផ្ដល់ដំណឹងថា គាត់នឹងវិលមកវិញនៅព្រឹកព្រលឹមថ្ងៃសៅរ៍នេះ”។ នេះបើតាមសម្ដីរបស់រដ្ឋមន្ត្រីក្រសួងការពារជាតិម្នាក់បានប្រាប់ AFP។

សូមជម្រាបដែរថា ទាក់ទងនឹងដំណឹងនៃការវិលត្រឡប់មកវិញរបស់អតីតប្រធានាធិបតីខាងលើ រដ្ឋាភិបាលស្រីលង្កាក៏បានត្រៀមកម្លាំងដើម្បីការពារសុវត្ថិភាពរបស់អតីតមេដឹកនាំខាងលើផងដែរ ពោលមានទាំងកងការពារ និងរថយន្តត្រៀមចាំទទួលស្រេច។ នេះបើតាមការចុះផ្សាយពី CNA៕

The post អតីតប្រធានាធិបតីស្រីលង្កា អាចវិលចូលស្រុកវិញនៅចុងសប្ដាហ៍នេះ appeared first on .

លឺល្ហៀងៗ អតីតប្រធានាធិបតីស្រីលង្កា អាចវិលចូលស្រុកវិញនាដើមខែក្រោយ

ឧកញ៉ាសំពៅ — Thu, 25 Aug 2022 08:36:07 +0000

អតីតប្រធានាធិបតី Gotabaya Rajapaksa អាចនឹងវិលត្រឡប់ចូលស្រុកកំណើតវិញក្នុងរយៈពេល ២ សប្ដាហ៍ទៀត បន្ទាប់ពីរត់គេចខ្លួនកាលពីខែកក្កដា។ នេះបើតាមប្រភពជិតស្និទ្ធ ២ បានទម្លាយប្រាប់ Reuters កាលពីថ្ងៃទី ២៣ សីហា។

ប្រភពមួយក្នុងចំណោម ២ នោះបានប្រាប់សារព័ត៌មាន Reuters ថា មូលហេតុចំបងមួយដែលអតីតថ្នាក់ដឹកនាំខាងលើសម្រេចចិត្តវិលត្រឡប់មកស្រុកកំណើតវិញ ដោយសារតម្លៃស្នាក់នៅប្រទេសថៃ មានតម្លៃថ្លៃខ្លាំងពេក។

“គាត់ពិតជាចង់ត្រឡប់មកវិញ ប៉ុន្តែផ្នែកសន្តិសុខគឺនៅតែជាបញ្ហាសំខាន់ ហើយក្រុមស៊ើបការណ៍ឲ្យដំបូន្មានលោកថា គួរតែពន្យារពេលត្រឡប់ចូលស្រុកវិញសិន។ គាត់អាចនឹងមកវិញក្នុងរយៈពេល ២ សប្ដាហ៍ ឬលឿនជាងនេះ បើសិនជាមានការរឹតបន្តឹងផ្នែកសុវត្ថិភាព”។ នេះបើតាមសម្ដីរបស់មន្ត្រីស្រីលង្កាបានប្រាប់ Reuters។

យ៉ាងណា ប្រធានាធិបតីថ្មី Wickremesinghe បានប្រាប់ប្រភពខាងលើកាលពីសប្ដាហ៍មុនថា មិនបានទទួលដំណឹងអ្វីពីការចង់វិលត្រឡប់ចូលស្រុកកំណើតវិញរបស់អតីតថ្នាក់ដឹកនាំឡើយ ហើយបើសិនជាលោក Rajapaksa វិលមកពិតមែន នោះលោកនឹងត្រូវទទួលទោសទណ្ឌតាមច្បាប់របស់ប្រទេសស្រីលង្កា៕

The post លឺល្ហៀងៗ អតីតប្រធានាធិបតីស្រីលង្កា អាចវិលចូលស្រុកវិញនាដើមខែក្រោយ appeared first on .

នាយករដ្ឋមន្ត្រីថៃ អនុញ្ញាតឲ្យអតីតប្រធានាធិបតីស្រីលង្កាចូលប្រទេសបណ្ដោះអាសន្នប៉ុណ្ណោះ

ឧកញ៉ាសំពៅ — Thu, 11 Aug 2022 08:04:15 +0000

កាលពីថ្មីៗនេះ មានលេចលឺដំណឹងមកថា អតីតប្រធានាធិបតីស្រីលង្កាបានភៀសខ្លួនមកប្រទេសថៃ ហើយនេះគឺជាប្រទេសទី ២ នៅអាស៊ីអាគ្នេយ៍ដែលលោក Gotabaya Rajapaksa បានរត់គេច ក្រោយជម្លៀសខ្លួនពីប្រទេសស្រីលង្កា។

ពាក់ព័ន្ធនឹងការមកដល់ប្រទេសថៃរបស់អតីតមេដឹកនាំរត់គេចខ្លួនម្នាក់នេះ នាយករដ្ឋមន្ត្រីថៃ Prayut Chan-o-cha បាននិយាយកាលពីថ្ងៃពុធម្សិលមិញថា លោកនឹងអនុញ្ញាតឲ្យលោក Gotabaya ស្នាក់នៅទីនេះមួយរយៈពេលខ្លីប៉ុណ្ណោះ ដោយចាត់ទុកជាអំពើមនុស្សធម៌ ទម្រាំអតីតប្រធានាធិបតីស្រីលង្ការកបានទ្រនំថ្មី។ នេះបើតាមការចុះផ្សាយពី Newsfirst។

“នេះគឺជាបញ្ហាមនុស្សធម៌ ហើយពួកយើងបាននិយាយគ្នារួចរាល់ហើយថា វានឹងមិនពាក់ព័ន្ធជាមួយនឹងសកម្មភាពនយោបាយអ្វីទាំងអស់ ហើយគាត់នឹងនៅទីនេះបណ្ដោះអាសន្ន ទម្រាំអាចរកបានប្រទេសដែលទទួលជនភៀសខ្លួន”។ នេះបើតាមសម្ដីរបស់លោក Prayut ប្រាប់ទៅកាន់ Thailand Media។

ដោយឡែក មន្ត្រីការបរទេស Don Pramudwinai ក៏បាននិយាយបន្ថែមថា លោក Gotabaya អាចស្នាក់នៅប្រទេសថៃ បានរយៈពេល ៩០ ថ្ងៃ ដោយសារលោកនៅកាន់លិខិតឆ្លងដែនការទូត។

ទន្ទឹមនឹងនោះ នាយករដ្ឋមន្ត្រីថៃបានដាក់លក្ខខណ្ឌមួយជាមួយអតីតប្រធានាធិបតីស្រីលង្កាថា អាចស្នាក់នៅប្រទេសថៃបណ្ដោះអាសន្នបាន កុំឲ្យតែបង្កភាពវឹកវរនៅទីនោះ ហើយថ្នាក់ដឹកនាំថៃបានទម្លាយថា លោកមិនមានគម្រោងនឹងជួបជាមួយ Gotabaya ឡើយ៕

The post នាយករដ្ឋមន្ត្រីថៃ អនុញ្ញាតឲ្យអតីតប្រធានាធិបតីស្រីលង្កាចូលប្រទេសបណ្ដោះអាសន្នប៉ុណ្ណោះ appeared first on .

លឺតម្រុយថា អតីតប្រធានាធិបតីស្រីលង្កាកំពុងភៀសខ្លួន មកប្រទេសជិតខាងកម្ពុជា

ឧកញ៉ាសំពៅ — Wed, 10 Aug 2022 07:42:49 +0000

កាលពីជិតមួយខែមុន អតីតប្រធានាធិបតី Gotabaya Rajapaksa បានភៀសខ្លួនមកប្រទេសសិង្ហបុរី ក្រោយក្រុមបាតុករសម្រុកចូលភូមិគ្រឹះរបស់លោក ទាមទារឲ្យអតីតថ្នាក់ដឹកនាំរូបនេះចុះចេញពីប្រមុខដឹកនាំប្រទេស។

ជាលទ្ធផល លោកបានប្រកាសចុះចេញពីតំណែងតាមរយៈការផ្ញើ E-Mail ទៅកាន់រដ្ឋាភិបាល អំឡុងពេលលោកនៅទីក្រុងសាំងហ្គាពួរ ហើយប្រធានាធិបតីថ្មីដែលបានចូលកាន់តំណែងជំនួសលោកគឺ Ranil Wickremesinghe។

យ៉ាងណា ថ្មីៗនេះ Reuters បានរាយការណ៍មកថា លោក Gotabaya កំពុងត្រៀមភៀសខ្លួនជាបន្ត ខណៈគោលដៅបន្ទាប់គឺជា ប្រទេសថៃ និងជាប្រទេសនៅអាស៊ីអាគ្នេយ៍ទី ២ នៃការគេចខ្លួនរបស់អតីតមេដឹកនាំរូបនេះ។

សូមជម្រាបដែរថា លោក Gotabaya Rajapaksa គឺជាប្រធានាធិបតីតំបូងបំផុតប្រចាំប្រទេសស្រីលង្កា ដែលបានលាលែងតំណែងនៅពាក់កណ្ដាលអាណត្តិ៕

The post លឺតម្រុយថា អតីតប្រធានាធិបតីស្រីលង្កាកំពុងភៀសខ្លួន មកប្រទេសជិតខាងកម្ពុជា appeared first on .

ដល់សិង្ហបុរីភ្លាម លោក Rajapaksa ផ្ញើលិខិតលាលែងតំណែងតាម E-mail ភ្លែត

ឧកញ៉ាសំពៅ — Fri, 15 Jul 2022 02:55:59 +0000

ប្រធានាធិបតី Gotabaya Rajapaksa បានជម្លៀសខ្លួនពីប្រទេសស្រីលង្កា បន្ទាប់ពីក្រុមបាតុករធ្វើការឡោមព័ទ្ធភូមិគ្រឹះរបស់លោក និងទាមទារឲ្យថ្នាក់ដឹកនាំម្នាក់នេះលាលែងពីតំណែងជាក្បាលម៉ាស៊ីននៃប្រទេសស្រីលង្កា។

លោក Rajapaksa បានធ្វើដំណើរមកកាន់ប្រជុំកោះ Maldives ហើយកាលពីថ្ងៃទី ១៤ កក្កដាម្សិលមិញ លោកបានមកដល់ប្រទេសសិង្ហបុរីជាប្រទេសទី ៣ នៃការគេចខ្លួនរបស់លោក ស្របពេលលឺល្ហៀងៗថា គោលដៅបន្ទាប់អាចជាអារ៉ាប៊ីសាអូឌីត។

យ៉ាងណា គ្រាន់តែមកដល់សិង្ហបុរីមិនបានប៉ុន្មានផង ប្រធានាធិបតីរូបនេះបានផ្ញើលិខិតលាលែងតំណែងទៅកាន់រាជរដ្ឋាភិបាលស្រីលង្កា តាមរយៈ E-mail ភ្លាមៗតែម្ដង។ នេះបើតាមការឲ្យដឹងពីការិយាល័យប្រធានសភា។

ទោះជាយ៉ាងណា លិខិតលាលែងតំណែងមួយនោះគឺមិនទាន់អាចប្រកាសជាផ្លូវការនៅឡើយ ដោយត្រូវឆ្លងកាត់ការពិនិត្យម្ដងទៀតសិន មុនពេលសម្រេចជាផ្លូវការនៅពេលឆាប់ៗនេះ៕

The post ដល់សិង្ហបុរីភ្លាម លោក Rajapaksa ផ្ញើលិខិតលាលែងតំណែងតាម E-mail ភ្លែត appeared first on .

លោក Rajapaksa ភៀសខ្លួនទៅប្រទេសទី ៣ ស្របពេលការលាលែងតំណែងមិនទាន់ប្រកាសផ្លូវការ

ឧកញ៉ាសំពៅ — Thu, 14 Jul 2022 06:22:36 +0000

កាលពីពេលថ្មីៗនេះ ប្រធានាធិបតីស្រីលង្កា Gotabaya Rajapaksa បានជម្លៀសខ្លួនទៅកាន់ប្រជុំកោះ Maldives បន្ទាប់ពីក្រុមបាតុករធ្វើការឡោមព័ទ្ធភូមិគ្រឹះរបស់លោក។

យ៉ាងណា យោងតាមការចុះផ្សាយពី Republicworld បានឲ្យដឹងថា បច្ចុប្បន្នថ្នាក់ដឹកនាំខាងលើគឺកំពុងធ្វើដំណើរទៅកាន់ប្រទេសសិង្ហបុរី តាមរយៈយន្តហោះឯកជនមួយដែលទើបនឹងចុះចតនៅ Maldives។

ក្រឡេកទៅមើលស្ថានការណ៍នៅប្រទេសស្រីលង្កាវិញ គឺកំពុងមានសភាពរញ៉េរញ៉ៃនៅឡើយ ដោយក្រុមបាតុករនៅប្រកាន់ជំហរមិនបញ្ឈប់បាតុកម្ម លុះត្រាតែប្រធានាធិបតីប្រកាសលាលែងពីតំណែង។

យោងតាមរបាយការណ៍អាប់ដែតចុងក្រោយពីអ្នកនាំពាក្យលោក Gotabaya បានឲ្យដឹងថា ប្រធានាធិបតីរូបនេះគឺកំពុងរងសំពាធខ្លាំង ហើយការលាលែងពីតំណែងជាផ្លូវការនឹងធ្វើឡើងឲ្យបានកាន់តែឆាប់តាមដែលអាចធ្វើទៅបាន៕

The post លោក Rajapaksa ភៀសខ្លួនទៅប្រទេសទី ៣ ស្របពេលការលាលែងតំណែងមិនទាន់ប្រកាសផ្លូវការ appeared first on .

ស្រីលង្កាប្រកាសដាក់ប្រទេសក្នុងគ្រាអាសន្ន ស្របពេលការជ្រើសរើសថ្នាក់ដឹកនាំថ្មីនឹងធ្វើឡើងនាសប្ដាហ៍ក្រោយ

ឧកញ៉ាសំពៅ — Wed, 13 Jul 2022 07:36:09 +0000

នៅថ្ងៃទី ១៣ កក្កដា ២០២២ នេះ ប្រធានាធិបតីស្រីលង្កា Gotabaya Rajapaksa បានភៀសខ្លួនចេញពីប្រទេសតាមរយៈការជិះយន្តហោះយោធា ទៅកាន់ប្រជុំកោះ Maldives ក្រោយមានការបាតុកម្មទាមទារឲ្យថ្នាក់ដឹកនាំរូបនេះចុះចេញពីតំណែងជាក្បាលម៉ាស៊ីនដឹកនាំប្រទេស។

ការភៀសខ្លួនរបស់ថ្នាក់ដឹកនាំរូបនេះ កើតមានឡើងតែប៉ុន្មានម៉ោងមុនពេលប្រកាសលាលែងពីតំណែងជាផ្លូវការប៉ុណ្ណោះ ហើយបច្ចុប្បន្នការិយាល័យនាយករដ្ឋមន្ត្រីបានប្រកាសដាក់ប្រទេសក្នុងគ្រាអាសន្នផងដែរ។ នេះបើតាមការចុះផ្សាយពីសារព័ត៌មានក្រៅស្រុកធំៗជាច្រើន។

ទន្ទឹមនឹងនោះ ប្រធានសភា Mahinda yapa Abeywardena បានទម្លាយនៅក្នុងសេចក្ដីថ្លែងការណ៍មួយថា សភានឹងបើកកិច្ចប្រជុំមួយនៅថ្ងៃសុក្រសប្ដាហ៍នេះ ហើយការបោះឆ្នោតជ្រើសរើសប្រធានាធិបតីថ្មី នឹងធ្វើឡើង ៥ ថ្ងៃបន្ទាប់ពីបញ្ចប់ការប្រជុំមួយនោះ។

សូមជម្រាបដែរថា ការជម្លៀសខ្លួនចេញពីប្រទេសស្រីលង្ការបស់លោក Gotabaya ប្រៀបដូចជាកិច្ចបញ្ចប់ការគ្រប់គ្រងឆាកនយោបាយនៃប្រទេសស្រីលង្ការបស់ត្រកូល Rajapaksa ក្នុងរយៈពេល ២ ទសវត្សចុងក្រោយអញ្ចឹង៕

The post ស្រីលង្កាប្រកាសដាក់ប្រទេសក្នុងគ្រាអាសន្ន ស្របពេលការជ្រើសរើសថ្នាក់ដឹកនាំថ្មីនឹងធ្វើឡើងនាសប្ដាហ៍ក្រោយ appeared first on .

ប្រធានាធិបតីស្រីលង្កា ភៀសខ្លួនចេញពីប្រទេសដោយជិះយន្តហោះយោធា

ឧកញ៉ាសំពៅ — Wed, 13 Jul 2022 05:30:13 +0000

យោងតាមការចុះផ្សាយពី BBC បានឲ្យដឹងថា លោក Gotabaya Rajapaksa បានភៀសខ្លួនចេញពីប្រទេសស្រីលង្កាតាមរយៈការជិះយន្តហោះយោធា ទៅកាន់ប្រជុំកោះ Maldives ជាមួយភរិយា និងកងការពារ ២ រូបផ្សេងទៀត។

យ៉ាងណា ប្រភពជិតស្និទ្ធមួយបានទម្លាយប្រាប់ BBC បន្ថែមថា ប្រធានាធិបតីរូបនេះនឹងមិននៅប្រជុំកោះ Maldives តែមួយកន្លែងឡើយ ពោលគឺមានបំណងហោះទៅកាន់ប្រទេសទី ៣ នៅពេលដ៏ខ្លីខាងមុខ។

ដោយឡែក បងប្រុសរបស់លោក អតីតមន្ត្រីហិរញ្ញវត្ថុ Basil Rajapaksa ក៏បានជម្លៀសខ្លួនពីប្រទេសផងដែរ និងត្រូវបានគេរាយការណ៍មកថា កំពុងធ្វើដំណើរទៅកាន់សហរដ្ឋអាមេរិក។

សូមជម្រាបដែរថា កាលពីប៉ុន្មានថ្ងៃមុន ក្រុមបាតុករបានធ្វើការឡោមព័ទ្ធភូមិគ្រឹះរបស់ថ្នាក់ដឹកនាំរូបនេះ បន្ទាប់ពីចោទប្រកាន់ថា នយោបាយដឹកនាំប្រទេសរបស់ត្រកូល Rajapaksa បានធ្វើឲ្យស្រីលង្កាធ្លាក់ក្នុងរណ្ដៅសេដ្ឋកិច្ចធ្ងន់ធ្ងរ៕

The post ប្រធានាធិបតីស្រីលង្កា ភៀសខ្លួនចេញពីប្រទេសដោយជិះយន្តហោះយោធា appeared first on .

ក្តៅ! ប្រធានាធិបតីស្រីលង្កា ត្រូវបានហាមឃាត់ នៅឯព្រលានយន្តហោះ ខណ:ព្យាយាមរត់គេចខ្លួន

ឧកញ៉ាសាមញ្ញ — Tue, 12 Jul 2022 06:39:47 +0000

យោងតាមប្រភពច្បាស់ការមួយ បាននិយាយនៅថ្ងៃអង្គារនេះថា ប្រធានាធិបតីរបស់ប្រទេសស្រីលង្កា លោក Gotabaya Rajapaksa ត្រូវបានបុគ្គលិកអន្តោប្រវេស៍ នៅឯព្រលានយន្តហោះហាមឃាត់ អំឡុងពេលដែលលោកព្យាយាមរត់គេចខ្លួន នៅចំពេលស្ថានភាពសេដ្ឋកិច្ចនៅក្នុងប្រទេស កាន់តែអាក្រក់ទៅៗ ។

ជាការពិតណាស់ លោក Rajapaksa បានសន្យាថា នឹងលាលែងចេញពីតំណែង រួមទាំងព្រមទទួលការផ្លាស់ប្តូរអំណាចដោយសន្តិភាពផងដែរ បន្ទាប់ពីមានការតវ៉ាយ៉ាងខ្លាំង ប្រឆាំងទៅនឹងការដឹកនាំរបស់លោក ជុំវិញការដែលធ្វើឱ្យប្រទេសធ្លាក់ចូលទៅក្នុងវិបត្តិសេដ្ឋកិច្ចធ្ងន់ធ្ងរបំផុតមិនធ្លាប់មាន ពីមុនមក ។

យ៉ាងណា បើយោងតាមមន្ត្រីស្រីលង្កា បាននិយាយថា មេដឹកនាំវ័យ ៧៣ ឆ្នាំរូបនេះ បានរត់ភៀសខ្លួន ចេញពីលំនៅដ្ឋានរបស់លោក ក្នុងទីក្រុង Colombo ដើម្បីធ្វើដំណើរឆ្ពោះទៅកាន់ទីក្រុងឌុយបៃ មុនពេលដែលក្រុមបាតុកររាប់ម៉ឺននាក់ បានសម្រុកចូលទៅកាន់ផ្ទះរបស់លោក កាលពីថ្ងៃសៅរ៍ ។

គួរឱ្យដឹងថា នៅក្នុងនាមជាប្រធានាធិបតី លោក Rajapaksa ទទួលបានអភ័យឯកសិទ្ធិពីការចាប់ខ្លួន ហើយគាត់ត្រូវបានគេជឿជាក់ថា មានបំណងចង់ចេញទៅខាងក្រៅប្រទេស មុនពេលចុះចេញពីតំណែង ដើម្បីគេចវេសពីលទ្ធភាព ដែលអាចឈានទៅដល់ការឃុំខ្លួន ។

ប៉ុន្តែ អំឡុងពេលព្យាយាមឡើងយន្តហោះ ប្រធានាធិបតីរូបនេះ ត្រូវបានក្រុមមន្ត្រីអន្តោប្រវេសន៍ បដិសេធមិនព្រមផ្តល់ជូនសេវាកម្ម VIP សម្រាប់លិខិតឆ្លងដែនរបស់លោកនោះឡើយ ខណ:ពេលដែលលោក Rajapaksa ទទូចថានឹងមិនប្រើប្រាស់សេវាកម្ម នៅកន្លែងសារធាណ:នោះឡើយ ដោយសារតែខ្លាច រងការវាយប្រហារ ដោយអ្នកដំណើរស្រីលង្កាផ្សេងទៀត ។

បញ្ជាក់ផងដែរថា Rajapaksa និងភរិយារបស់លោក បានចំណាយពេលមួយយប់នៅឯមូលដ្ឋានយោធាមួយ ក្បែរអាកាសយានដ្ឋានអន្តរជាតិ បន្ទាប់ពីបានខកខានជើងហោះហើរចំនួនបួន សម្រាប់នាំយកលោកទៅកាន់ប្រទេសអារ៉ាប់រួម ៕

The post ក្តៅ! ប្រធានាធិបតីស្រីលង្កា ត្រូវបានហាមឃាត់ នៅឯព្រលានយន្តហោះ ខណ:ព្យាយាមរត់គេចខ្លួន appeared first on .