Justin Bieber

គ្រាន់តែលក់ប្រែនគ្រឿងសម្អាង ភរិយាតារាចម្រៀង Justin Bieber ឡើងកូដជាមហាសេដ្ឋី

ឧកញ៉ាសាមញ្ញ — Fri, 30 May 2025 09:36:39 +0000

តារាម៉ូដែលអ្នកនាង Hailey Bieber ដែលត្រូវបានគេស្គាល់ថាជាភរិយារបស់តារាចម្រៀងកំពូល Justin Bieber ថ្មីៗនេះ ត្រូវបានគេដាក់ឲ្យជាប់នៅក្នុងបញ្ជីឈ្មោះជាមហាសេដ្ឋី បន្ទាប់ពីបានយល់ព្រមលក់ប្រែនគ្រឿងសម្អាងផ្ទាល់ខ្លួនឈ្មោះថា Rhode នៅក្នុងកិច្ចព្រមព្រៀងមួយ ដែលមានតម្លៃរហូតដល់ទៅ ១ពាន់លានដុល្លារ។ នេះបើតាមការចុះផ្សាយពីសារព័ត៌មាន VN Express។

ម៉ាកយីហោ Rhode នេះ នឹងត្រូវគ្រប់គ្រងជំនួសវិញដោយក្រុមហ៊ុន e.l.f. Beauty ដែលជាអ្នកចែកចាយគ្រឿងសម្អាងធំជាងគេបំផុតមួយ មានមូលដ្ឋាននៅសហរដ្ឋអាមេរិក បន្ទាប់ពីកិច្ចព្រមព្រៀងទិញលក់នេះ ត្រូវបានបញ្ចប់នៅចន្លោះខែកក្កដា និងខែកញ្ញា។

គួរឲ្យដឹងថា Hailey បានបើកដំណើរការម៉ាកយីហោ Rhode របស់ខ្លួននៅទីក្រុង Los Angeles ក្នុងអំឡុងឆ្នាំ២០២២ ដោយសហការគ្នាជាមួយផលិតករភាពយន្ត និងសហគ្រិនល្បីឈ្មោះលោក Michael D. Ratner និងប្រពន្ធរបស់គាត់ គឺលោកស្រី Lauren Ratner ។

ជម្រាបជូនថា ម៉ាកយីហោនេះទទួលបានប្រជាប្រិយភាពយ៉ាងឆាប់រហ័ស ដោយសារតែត្រូវបានជំរុញដោយភាពល្បីល្បាញរបស់ Hailey Bieber ផ្ទាល់ ខណ:អ្នកតាមដានលើបណ្តាញសង្គម Instagram មានជិត ៥៥ លាននាក់ ឯណោះ។ Hailey នឹងបន្តតួនាទីរបស់នាងជាស្ថាបនិក និងជាប្រធានផ្នែកច្នៃប្រឌិតរបស់ Rhode ដដែល បើទោះបីជាអ្នកនាងបានសម្រេចលក់ក្រុមហ៊ុននេះហើយក្តី៕

The post គ្រាន់តែលក់ប្រែនគ្រឿងសម្អាង ភរិយាតារាចម្រៀង Justin Bieber ឡើងកូដជាមហាសេដ្ឋី appeared first on .

អ្នកមានបំផុតនៅអាស៊ី ចាយលុយ ១០លានដុល្លារ ជួល Justin Bieber មកច្រៀងអបអរ មុនពិធីមង្គលការកូនប្រុសពៅរបស់ខ្លួន

ឧកញ៉ាសាមញ្ញ — Wed, 10 Jul 2024 10:55:00 +0000

មហាសេដ្ឋីមានបំផុតនៅអាស៊ី លោក Mukesh Ambani ត្រូវបានគេរាយការណ៍ថា បានចំណាយលុយរហូតដល់ទៅ ១០លានដុល្លារ ជួលកំពូលតារាចម្រៀងសញ្ជាតិកាណាដា Justin Bieber មកច្រៀងក្នុងការប្រគុំតន្រ្តីលក្ខណ:ឯកជនមួយ ដើម្បីអបអរមុនពិធីមង្គលការកូនប្រុសពៅ Anant Ambani។ នេះបើតាមការចុះផ្សាយពីសារព័ត៌មាន VN Express។

ការប្រគុំតន្ត្រីឯកជននេះ ត្រូវបានធ្វើឡើងនៅទីក្រុង Mumbai កាលពីល្ងាចថ្ងៃទី៥ ខែកក្កដា សម្រាប់ជាការជប់លៀងអបអរដល់ Anant Ambani និងគូដណ្តឹង Radhika ព្រមទាំងមានការចូលរួមពីមិត្តភក្តិជិតស្និទ្ធ និងក្រុមគ្រួសាររបស់ពួកគេ ផងដែរ។

បើយោងតាមសារព័ត៌មាន Straits Times បានបង្ហាញឲ្យដឹងថា Justin Bieber បានលើកយកបទចម្រៀងល្បីៗរបស់ខ្លួនជាច្រើន មកសម្តែងទៅកាន់ភ្ញៀវ VIP រាប់រយនាក់ នៅក្នុងការប្រគុំតន្ត្រីលក្ខណ:ឯកជនដ៏ធំនេះ។

ទន្ទឹមនឹងនេះ ប្រព័ន្ធផ្សព្វផ្សាយរបស់ឥណ្ឌា បានរាយការណ៍ផងដែរថា Justin Bieber បានចំណាយពេលខ្លីប៉ុណ្ណោះក្នុងដំណើរមកកាន់ប្រទេសឥណ្ឌានេះ ដោយក្រោយពីសម្តែងរួច រូបគេបានវិលត្រលប់ទៅកាន់ផ្ទះនៅអាមេរិកវិញភ្លាមៗ ដើម្បីបានជួបជាមួយភរិយា Hailey Bieber ដែលកំពុងពពោះកូនដំបូង។

នេះមិនមែនជារឿងថ្មីនោះឡើយ ដែលមហាសេដ្ឋីកំពូលឥណ្ឌា បានចំណាយលុយច្រើនសន្ធឹកសន្ធាប់ ដើម្បីប្រារព្ធពិធីធំៗជាច្រើន ដោយគូស្នេហ៍មួយគូនេះ បានរៀបចំពិធី Pre-Wedding យ៉ាងប្រណីតបំផុតចំនួនពីរលើករួចមកហើយ ដោយមួយនៅក្នុងប្រទេសឥណ្ឌា កាលក្នុងខែមីនា និងមួយទៀតនៅលើនាវាទេសចរណ៍ដែលធ្វើដំណើរពីប្រទេសអ៊ីតាលី ទៅកាន់ភាគខាងត្បូងនៃប្រទេសបារាំង កាលនៅចុងខែឧសភា។

ជម្រាបជូនផងដែរថា ពិធីមង្គលការដ៏ធំរវាង Anant Ambani និង Radhika Merchant ត្រូវបានកំណត់រៀបចំធ្វើឡើងចាប់ពីថ្ងៃទី១២ ដល់ថ្ងៃទី១៤ ខែកក្កដា ខាងមុខនេះ៕

The post អ្នកមានបំផុតនៅអាស៊ី ចាយលុយ ១០លានដុល្លារ ជួល Justin Bieber មកច្រៀងអបអរ មុនពិធីមង្គលការកូនប្រុសពៅរបស់ខ្លួន appeared first on .

អស់ពី JB ក្រុមហ៊ុន Ferrari ដាក់ឈ្មោះមហាសេដ្ឋីម្នាក់ទៀតក្នុងបញ្ជីខ្មៅក្នុងការទិញរថយន្ត

ឧកញ៉ាសំពៅ — Fri, 27 May 2022 08:14:17 +0000

កាលពីប៉ុន្មានសប្ដាហ៍មុន ក្រុមហ៊ុនផលិតរថយន្តទំនើប Ferrari បានប្រកាសដាក់ឈ្មោះតារាចម្រៀង Justin Bieber ដែលអ្នកគាំទ្រនិយមហៅ JB ក្នុងបញ្ជីខ្មៅក្នុងការទិញរថយន្តបែប Limited Edition និង Exclusive ដោយសារតារាចម្រៀងម្នាក់នេះមិនអាចធ្វើតាមលក្ខខណ្ឌមួយចំនួនរបស់ក្រុមហ៊ុន។

ទើបនឹងដាក់ឈ្មោះ JB ចូលក្នុង Black List មិនបានប៉ុន្មានផង ស្រាប់តែថ្មីៗនេះលឺល្ហៀងៗមកទៀតថា ក្រុមហ៊ុនអ៊ីតាលីបានកំណត់មុខសញ្ញាថ្មីគឺ តារាសម្ដែង Kim Kardashian ដែលមានទ្រព្យសម្បត្តិពាន់លានដុល្លារចូលក្នុងការហាមឃាត់សម្រាប់ការទិញរថយន្តមួយចំនួនផងដែរ។

យោងតាមការបកស្រាយពីអ្នកនាំពាក្យក្រុមហ៊ុន Ferrari បានឲ្យដឹងថា ក្រុមហ៊ុនមិនបានហាមបុគ្គលទាំងនោះក្នុងការទិញរថយន្ត Ferrari គ្រប់ប្រភេទឡើយ ពោលគ្រាន់តែពួកគេគ្មានសិទ្ធក្នុងការទិញរថយន្តប្រភេទ Limited Edition ឬប្រភេទ Exclusive ឡើយ ដោយសារបានល្មើសនឹងលក្ខខណ្ឌក្រុមហ៊ុនមួយចំនួន។

បញ្ជាក់ដែរថា Ferrari អាចនិយាយបានថា មិនមែនត្រឹមជាក្រុមហ៊ុនលក់តែផលិតផលឡើយ ពោលគឺពួកគេតែងតែបារម្ភ និងយកចិត្តទុកដាក់ចំពោះកិត្តិយសនៃក្រុមហ៊ុនណាស់ ដ្បិតរាល់ពេលលក់រថយន្តបែប Limited Edition ម្ដងៗ ពួកគេមានសិទ្ធជ្រើសរើសភ្ញៀវ មិនមែនមានលុយចេះតែអាចទិញបានឡើយ៕

ប្រភព: Marca

The post អស់ពី JB ក្រុមហ៊ុន Ferrari ដាក់ឈ្មោះមហាសេដ្ឋីម្នាក់ទៀតក្នុងបញ្ជីខ្មៅក្នុងការទិញរថយន្ត appeared first on .

ទោះមានលុយរយលានដុល្លារក៏ទិញលែងបាន Ferrari ដាក់ឈ្មោះតារាចម្រៀងល្បីម្នាក់ចូលបញ្ជីខ្មៅ

ឧកញ៉ាសំពៅ — Tue, 03 May 2022 08:31:30 +0000

បើនិយាយដល់ឡានទំនើប និងពេញនិយមបំផុតលើលោក Ferrari គឺជាម៉ាកយីហោមួយដែលគ្រប់គ្នាមិនអាចរំលងបានឡើយ ដោយសារក្រុមហ៊ុនមួយនេះផលិតតែឡានស្ព័រដែលមានរូបរាងស្អាតប្រណីត និងបច្ចេកវិទ្យាទំនើបបំផុតប៉ុណ្ណោះ។

ឡាន Ferrari ដែលមានតម្លៃទាបបំផុតគឺប្រហែលជាង ២០ ម៉ឺនដុល្លារផ្អែកតាមទីផ្សារក្រៅប្រទេស ខណៈក្រុមហ៊ុនអ៊ីតាលីមួយនេះក៏មានវិន័យតឹងរ៉ឹងមួយផងដែរ គឺមិនមែនមានលុយចេះតែអាចទិញផលិតផលរបស់ពួកគេបាននោះទេ។

ជាក់ស្ដែង កាលពីពេលថ្មីៗនេះ ក្រុមហ៊ុនអ៊ីតាលីខាងលើបានដាក់ឈ្មោះតារាចម្រៀងកាណាដា Justin Bieber ចូលក្នុងបញ្ជីខ្មៅ ហាមលក់រថយន្តឲ្យបុគ្គលម្នាក់នេះតទៀត បន្ទាប់ពីតារាចម្រៀងល្បីឈ្មោះខាងលើធ្វើខុសវិន័យក្រុមហ៊ុន។

ក្រុមហ៊ុន Ferrari បានចេញវិន័យទៅកាន់អតិថិជនរបស់ពួកគេ ក្នុងការព្យាយាមថែរក្សាសភាពដើមនៃរថយន្ត និងចូលរួមគោរពច្បាប់ចរាចរណ៍ ក៏ប៉ុន្តែ Justin Bieber បានល្មើសនឹងវិន័យខាងលើ ពោលគឺបានចតរថយន្ត Ferrari របស់គេដល់ទៅ ២ សប្ដាហ៍ ទាំងមិនចាំកន្លែងចតយានយន្ត ហើយត្រូវបានភ្នាក់ងារក្រុមហ៊ុនទៅយកឡាននោះមកវិញ។

មិនតែប៉ុណ្ណោះ តារាចម្រៀងខាងលើធ្លាប់បានតុបតែងរថយន្ត Ferrari របស់គេដោយប្ដូរពណ៌រថយន្តទាំងស្រុង និងបានដាក់ដេញថ្លៃលក់ថែមទៀត ដែលនេះគឺល្មើសពីវិន័យដែលក្រុមហ៊ុនបានដាក់ទាំងស្រុង ហើយចាប់តាំងពីមានហេតុការណ៍នោះមក Ferrari បានសម្រេចចិត្តឈប់លក់រថយន្តពួកគេទៅឲ្យ Justin Bieber តទៀតហើយ៕

ប្រភព: Marca

The post ទោះមានលុយរយលានដុល្លារក៏ទិញលែងបាន Ferrari ដាក់ឈ្មោះតារាចម្រៀងល្បីម្នាក់ចូលបញ្ជីខ្មៅ appeared first on .

ស្រុកខ្មែរអាហារមួយពេលចាយច្រើនបំផុត ៥ ដុល្លារ តែសេដ្ឋីស្រុកគេ អាហារមួយពេលអស់ខ្ទង់ម៉ឺនដុល្លារក៏មាន

ឧកញ៉ាសំពៅ — Tue, 13 Jul 2021 06:58:14 +0000

ចំណីអាហារពិតណាស់ប្រាកដជាមានសារៈសំខាន់ ហើយជាពិសេសសម្រាប់បុគ្គលល្បីៗតែម្ដង ដែលពួកគេមានការយកចិត្តទុកដាក់ខ្លាំងបំផុតសម្រាប់ការហូបចុកនេះ។

តទៅនេះ គឺជាបញ្ជីឈ្មោះបុគ្គលល្បីៗ ៥ រូបដែលចាយលុយពេញដៃសម្រាប់ការចំណាយលើថ្លៃម្ហូបអាហារ៖

1/ Justin Bieber

កាលពីឆ្នាំ ២០១៤ E! News បានរាយការណ៍ថា គ្រាន់តែទៅមើលកុន Bieber ចាយលុយ ២៤១ ដុល្លារសម្រាប់អាហារសម្រន់ ហើយក្នុងឆ្នាំដដែលនោះ គេចាយអស់ ២៤០ ដុល្លារបន្ថែមទៀតគ្រាន់តែញាំអាហារសម្រន់បែបម៉ិកស៊ីកូ។ តែអ្វីដែលគួរឲ្យភ្ញាក់ផ្អើលបំផុតនោះគឺ មានម្ដង Justin Bieber ចាយលុយ ១ ម៉ឺនដុល្លារ សម្រាប់ការខ្ចប់អាហារបែបចិន។

2/ Mike Tyson

អតីតកីឡាប្រដាល់រូបនេះត្រូវបានគេរាយការណ៍មកថា ក្នុងមួយឆ្នាំ លោកចាយអស់មិនក្រោម ២០ ម៉ឺនដុល្លារឡើយសម្រាប់ថ្លៃហូបចុក តែមិនមែនសម្រាប់ខ្លួនឯងឡើយ តែដើម្បីសម្រាប់សត្វចិញ្ចឹមគឺ ខ្លា Bengal ៣ ក្បាល។ យ៉ាងណាមិញ E! News រាយការណ៍មកថា Mike Tyson ឈប់ចិញ្ចឹមខ្លាទាំងនោះទៀតហើយ ព្រោះតែការចំណាយលើពួកវាអស់ច្រើនពេក និងដោយសារមាឌរបស់ពួកវាកាន់តែធំឡើងៗ។

3/ Mark Cuban

លោកគឺជាមហាសេដ្ឋីតែមួយរូបគត់នៅក្នុងបញ្ជីឈ្មោះមួយនេះ ដោយមានម្ដង កាលពីឆ្នាំ ២០១១ លោកបានធ្វើពិធីជប់លៀងមួយ ហើយ Fox Sports រាយការណ៍ថា គ្រាន់តែថ្លៃចំណាយលើម្ហូបអាហារនាល្ងាចនោះ មហាសេដ្ឋីរូបនេះ ចាយអស់ ១១ ម៉ឺនដុល្លារ ខណៈ ៩ ម៉ឺនដុល្លារ គឺសម្រាប់តម្លៃស្រាសំប៉ាញមួយដបដែលមានឈ្មោះថា Ace of Spades Champagne ហើយគាត់ថែមទាំងបានឲ្យប្រាក់ធីប ២ ម៉ឺនដុល្លារសម្រាប់បុគ្គលិកទីនោះផងដែរ។

4/ Beyonce

តារាចម្រៀង Beyonce គឺជាបុគ្គលម្នាក់មិនញញើតក្នុងការចំណាយប្រាក់ឡើយ ពោលបើឃើញស្រឡាញ់ពេញចិត្តគឺទិញយកតែម្ដង ជាក់ស្ដែងអ្នកនាងក៏ជាអ្នកស្រឡាញ់សុខភាពខ្លាំងផងដែរដោយមានដល់ទៅចុងភៅផ្ទាល់ខ្លួនដើម្បីតាមដានរបបអាហាររបស់អ្នកនាងឲ្យមានតុល្យភាព។

ដោយឡែក គេដឹងថា ក្នុងមួយខែៗ គ្រាន់តែចាយទៅលើចុងភៅម្នាក់នោះ Beyonce ដកលុយពីកាបូបប្រមាណ ៧ ៥០០ ដុល្លារ ហើយនៅមានអ្នកចាំតាមដានរបបអាហារដែលទទួលបានខ្ពស់បំផុត ៤ ០០០ ដុល្លារទៀតផង។

5/ Shaquille O’Neal

Shaquille O’Neal ឬត្រូវគេហៅថា Shaq គឺជាបុគ្គលម្នាក់ដែលមានការចាយវាយធំសម្បើម ដោយមានម្ដងនោះ គ្រាន់តែទៅទិញឥវ៉ាន់នៅ Walmart លោកចាយអស់ ៧ ម៉ឺនដុល្លាររហូតធ្វើឲ្យក្រុមសន្តិសុខផ្ទាល់ខ្លួនមានការភាន់ច្រឡំស្មានតែគេលួចកាតធនាគាររបស់លោកថែមទៀត។

សម្រាប់ការហូបចុកវិញ Shaq ក៏ដៃទូលាយដូចគ្នាដោយក្នុងមួយខែ លោកចាយអស់ ១២ ៧៧៥ ដុល្លារសម្រាប់ចំណីអាហារ។ ហើយបើមើលទៅលើការចំណាយផ្សេងៗទៀត គឺអាចឲ្យប្រិយមិត្តចំហមាត់បាន ដោយអតីតកីឡាករបាល់បោះ ចាយអស់ជាង ៧០ ម៉ឺនដុល្លារក្នុងមួយខែ ដោយ ជាង ១០ ម៉ឺនដុល្លារសម្រាប់ដំណើរកម្សាន្ត ៤៦ ៥០០ ដុល្លារសម្រាប់ថ្លៃមើលថែកូន ២៣ ៩៥០ ដុល្លារសម្រាប់សំលៀកបំពាក់ ៦០ ៤១៧ សម្រាប់ការទិញកាដូ ២៤ ៣០០ ដុល្លារសម្រាប់ថ្លៃប្រេងឥន្ធនៈ និងជាង ៤០ ម៉ឺនដុល្លារសម្រាប់ការទូទាត់ប្រាក់កម្ចីទិញផ្ទះ ៣ កន្លែង៕

ប្រភព: Cheatsheet

The post ស្រុកខ្មែរអាហារមួយពេលចាយច្រើនបំផុត ៥ ដុល្លារ តែសេដ្ឋីស្រុកគេ អាហារមួយពេលអស់ខ្ទង់ម៉ឺនដុល្លារក៏មាន appeared first on .

Justin Bieber

គ្រាន់តែលក់ប្រែនគ្រឿងសម្អាង ភរិយាតារាចម្រៀង Justin Bieber ឡើងកូដជាមហាសេដ្ឋី

អ្នកមានបំផុតនៅអាស៊ី ចាយលុយ ១០លានដុល្លារ ជួល Justin Bieber មកច្រៀងអបអរ មុនពិធីមង្គលការកូនប្រុសពៅរបស់ខ្លួន

អស់​ពី JB ក្រុមហ៊ុន Ferrari ដាក់​ឈ្មោះមហាសេដ្ឋី​ម្នាក់​ទៀត​​ក្នុង​បញ្ជី​ខ្មៅ​ក្នុង​ការ​ទិញ​រថយន្ត

ទោះ​មាន​លុយ​រយ​លាន​ដុល្លារ​ក៏​ទិញ​លែង​បាន Ferrari ដាក់​ឈ្មោះ​តារា​ចម្រៀង​ល្បី​ម្នាក់​ចូល​បញ្ជី​ខ្មៅ

អស់ពី JB ក្រុមហ៊ុន Ferrari ដាក់ឈ្មោះមហាសេដ្ឋីម្នាក់ទៀតក្នុងបញ្ជីខ្មៅក្នុងការទិញរថយន្ត

ទោះមានលុយរយលានដុល្លារក៏ទិញលែងបាន Ferrari ដាក់ឈ្មោះតារាចម្រៀងល្បីម្នាក់ចូលបញ្ជីខ្មៅ