មហាសេដ្ឋីគ្រីបតូ Justin Sun ប្តឹងក្រុមហ៊ុនវិនិយោគរូបិយប័ណ្ណឌីជីថលរបស់គ្រួសារលោក ត្រាំ

ឧកញ៉ាសាមញ្ញ — Fri, 24 Apr 2026 10:11:38 +0000

អ្នកជំនួញ និងត្រូវបានគេស្គាល់ថាជាមហាសេដ្ឋីក្នុងវិស័យគ្រីបតូ លោក Justin Sun បានដាក់ពាក្យបណ្តឹងមួយ ដោយចោទប្រកាន់វេទិការូបិយប័ណ្ណឌីជីថលដែលគាំទ្រដោយគ្រួសាររបស់ប្រធានាធិបតីអាមេរិក លោក ដូណាល់ ត្រាំ ពីបទក្លែងបន្លំ និងរារាំងពីការដកទ្រព្យសម្បត្តិចេញពីវេទិកានោះ។ នេះបើតាមការចុះផ្សាយពីសារព័ត៌មាន AFP។

នៅក្នុងឯកសារតុលាការសហព័ន្ធ San Francisco បានបង្ហាញថាមហាសេដ្ឋីគ្រីបតូមានដើមកំណើតនៅក្នុងប្រទេសចិនរូបនេះ បានអះអាងថាខ្លួនបានទិញយកកាក់ឌីជីថល WLFI មានតម្លៃ ៤៥លានដុល្លារ ដែលបង្កើតឡើងដោយក្រុមហ៊ុន World Liberty Financial របស់គ្រួសារលោក ត្រាំ ក្នុងខែតុលា ឆ្នាំ២០២៤។

ប៉ុន្តែទោះជាយ៉ាងណាក៏ដោយ លោក Sun បានមើលឃើញថាការវិនិយោគរបស់ខ្លួនមានភាពមិនប្រក្រតី ដោយដំបូងឡើយកាក់ WLFI នេះ មិនអាចផ្ទេរចេញពីក្នុងគណនីរបស់លោកបាននោះឡើយ ខណៈតម្លៃរបស់កាក់នេះ បានធ្លាក់ចុះយ៉ាងខ្លាំង ពី ៤៦សេនក្នុងមួយកាក់ មកនៅត្រឹមតែ ៤សេនក្នុងមួយកាក់ប៉ុណ្ណោះ។

មិនតែប៉ុណ្ណោះ លោក Sun ថែមទាំងបានអះអាងទៀតថា ទ្រព្យសកម្ម WLFI របស់លោក ត្រូវបានបង្កកដោយឯកតោភាគីដោយក្រុមហ៊ុន World Liberty Financial ហើយបន្ថែមថាលោកមិនអាចបន្តលក់កាក់ណាមួយរបស់ខ្លួនបាននោះឡើយ គិតរហូតមកដល់បច្ចុប្បន្ន។

ជម្រាបជូនផងដែរថា កន្លងមកលោក Sun ត្រូវបានគេមើលឃើញថាបានបង្កើតភាពជិតស្និទ្ធយ៉ាងខ្លាំងជាមួយគ្រួសាររបស់លោក ត្រាំ ពាក់ព័ន្ធទៅនឹងការវិនិយោគក្នុងវិស័យកាក់ឌីជីថល ជាពិសេសនៅក្នុងក្រុមហ៊ុនដែលមានស្ថាបនិកជាកូនប្រុសរបស់ប្រធានាធិបតីអាមេរិកផ្ទាល់ គឺលោក Donald Trump Jr. និង Eric Trump ៕

The post មហាសេដ្ឋីគ្រីបតូ Justin Sun ប្តឹងក្រុមហ៊ុនវិនិយោគរូបិយប័ណ្ណឌីជីថលរបស់គ្រួសារលោក ត្រាំ appeared first on .

មហាសេដ្ឋីគ្រីបតូចិនម្នាក់ ជះលុយជិត ៣០លានដុល្លារ ដើម្បីធ្វើដំណើរ ១០នាទី ទៅកាន់ទីអវកាស

ឧកញ៉ាសាមញ្ញ — Wed, 06 Aug 2025 06:33:47 +0000

មហាសេដ្ឋីគ្រីបតូរបស់ចិន លោក Justin Sun ដែលគេស្គាល់ថាជាអ្នកបង្កើតកាក់ Tron កាលពីពេលថ្មីៗនេះ បានចំណាយដល់ទៅ ២៨លានដុល្លារ ក្នុងការធ្វើដំណើររយ:ពេល ១០នាទី ទៅកាន់ទីអវកាស តាមរយ:រ៉ុក្កែត Blue Origin New Shepard របស់មហាសេដ្ឋី Jeff Bezos។ នេះពើតាមការចុះផ្សាយពីសារព័ត៌មាន VN Express។

បេកសកម្មទៅកាន់លំហរអាកាសរបស់ក្រុមហ៊ុន Blue Origin ដែលត្រូវបានគេស្គាល់ថា NS-34 បានហោះចេញពីរដ្ឋ West Texas នៅម៉ោង ៨:៤៣ នាទីព្រឹក ម៉ោងក្នុងស្រុកកាលពីថ្ងៃអាទិត្យ ហើយបានត្រឡប់មកវិញនៅម៉ោង ៨:៥៣ នាទីព្រឹកថ្ងៃដដែល។ យោងតាមទស្សនាវដ្តី People បានរាយការណ៍ថា ជាមួយនឹងការធ្វើដំណើររយ:ពេលត្រឹមតែ ១០នាទី ក្រុមហ៊ុនបានផ្តល់ឲ្យអតិថិជនរបស់ខ្លួន នូវទស្សនីយភាព និងបទពិសោធដ៏អស្ចារ្យ ទៅកាន់ទីលំហអាកាស។

គួរឲ្យដឹងផងដែរថា លោក Justin Sun ស្ថិតនៅក្នុងចំណោមបុគ្គលល្បីៗឈ្មោះមួយចំនួនទៀត នៅក្នុងការធ្វើដំណើរនេះ។ មែនទែនទៅលោក បានដេញថ្លៃឈ្នះសំបុត្រនេះ តាំងពីឆ្នាំ២០២១ មកម្លេះ ហើយដំបូងឡើយលោកគ្រោងនឹងចូលរួមជាមួយការបាញ់បង្ហោះរបស់ New Shepard លើកដំបូងនៅឆ្នាំនោះ ប៉ុន្តែត្រូវបានពន្យារពេលវិញ ដោយសារការផ្លាស់ប្តូរកាលវិភាគភ្លាមៗ។

ជម្រាបជូនផងដែរថា Blue Origin មិនបានបង្ហាញពីតម្លៃសំបុត្រសម្រាប់ការធ្វើដំណើរទៅកាន់ទីអវកាសរបស់ខ្លួន នាពេលថ្មីៗនេះទេ ប៉ុន្តែយោងតាម Bloomberg និង Space.com បានរាយការណ៍ថា លោក Justin Sun បានបង់ប្រាក់ចំនួន ២៨លានដុល្លារ សម្រាប់កៅអីធ្វើដំណើររបស់លោក។ ទស្សនាវដ្ដី Forbes ប៉ាន់ប្រមាណថាទ្រព្យសម្បត្តិរបស់លោក Justin Sun បច្ចុប្បន្នមានចំនួន ៨,៥ពាន់លានដុល្លារ គិតត្រឹមថ្ងៃទី៤ ខែសីហា៕

The post មហាសេដ្ឋីគ្រីបតូចិនម្នាក់ ជះលុយជិត ៣០លានដុល្លារ ដើម្បីធ្វើដំណើរ ១០នាទី ទៅកាន់ទីអវកាស appeared first on .