Oxfam

អង្គការ Oxfam ៖ មហាសេដ្ឋីកាន់តែមានឥទ្ធិពលលើនយោបាយ និងកាន់តែមានទ្រព្យសម្បត្តិច្រើន

ឧកញ៉ាសាមញ្ញ — Tue, 20 Jan 2026 09:16:51 +0000

យោងតាមរបាយការណ៍ចុងក្រោយបំផុតរបស់អង្គការសប្បុរសធម៌សកល Oxfam បានបង្ហាញឲ្យដឹងថា ទ្រព្យសម្បត្តិរបស់មហាសេដ្ឋី បានកើនឡើងយ៉ាងខ្លាំងដល់កម្រិតខ្ពស់បំផុតគឺប្រមាណ ១៨,៣ទ្រីលានដុល្លារ ខណៈអ្នកមានៗទាំងនោះ កំពុងស្វែងរកអំណាចនៅក្នុងឆាកនយោបាយ ដើម្បីការពារផលប្រយោជន៍ផ្ទាល់ខ្លួន។

របាយការណ៍ដដែលនេះ បាននិយាយទៀតថា ចំនួនមហាសេដ្ឋីពិភពលោកបានឈានដល់ជាង ៣ ០០០ នាក់ កាលពីឆ្នាំមុន ហើយសរុបជារួមមកពួកគេមើលឃើញទ្រព្យសម្បត្តិកើនឡើង ១៦% ឬប្រមាណ ២,៥ទ្រីលានដុល្លារ។

មិនតែប៉ុណ្ណោះ អង្គការ Oxfam បានបញ្ជាក់ទៀតថា ទ្រព្យសម្បត្តិរបស់មហាសេដ្ឋី បានកើនឡើង ៨១% គិតចាប់តាំងពីឆ្នាំ២០២០ មក និងបានពណ៌នាថាជាទសវត្សដ៏ល្អសម្រាប់មហាសេដ្ឋី ក្នុងការកើបប្រាក់ចំណូលរបស់ពួកគេ។

អង្គការ Oxfam ក៏បាននិយាយផងដែរថា អ្នកមានទ្រព្យសម្បត្តិច្រើនទាំងនោះតែប្រើប្រាស់ទ្រព្យសម្បត្តិរបស់ពួកគេដើម្បីធានាអំណាចក្នុងឆាកនយោបាយ ក៏ដូចជាភាពជាម្ចាស់នៃប្រព័ន្ធផ្សព្វផ្សាយ ជាឧទាហរណ៍ដូចជាការចូលរួមរបស់មហាសេដ្ឋី Elon Musk នៅក្នុងរដ្ឋបាលសហរដ្ឋអាមេរិកនៅដើមឆ្នាំ២០២៥ ក៏ដូចជាភាពជាម្ចាស់របស់មហាសេដ្ឋី Jeff Bezos លើកាសែត The Washington Post និងការទិញយកគេហទំព័រព័ត៌មានបារាំង CNews របស់មហាសេដ្ឋី Vincent Bollore ជាដើម៕

The post អង្គការ Oxfam ៖ មហាសេដ្ឋីកាន់តែមានឥទ្ធិពលលើនយោបាយ និងកាន់តែមានទ្រព្យសម្បត្តិច្រើន appeared first on .

រយៈពេល ៤ឆ្នាំនេះ កំពូលមហាសេដ្ឋីពិភពលោក ៥រូប កើបលុយបាន ១៤លានដុល្លារក្នុងមួយម៉ោង

ឧកញ៉ាសំពៅ — Mon, 15 Jan 2024 03:52:37 +0000

អង្គការ Oxfam បានរាយការណ៍ថា កំពូលមហាសេដ្ឋីមានបំផុតលើលោក ៥រូប មានកំណើនទ្រព្យសម្បត្តិច្រើនជាងឆ្នាំ២០២០ ទ្វេដង ពោលសរុបចំនួនទ្រព្យសម្បត្តិរបស់ពួកគេ គឺមានរហូតដល់ ៨៦៩ពាន់លានដុល្លារ បន្ទាប់ពីសំងំកើបលុយប្រហែល ១៤លានដុល្លារក្នុងមួយម៉ោង រយៈពេល ៤ឆ្នាំមកនេះ។

កំណើនទ្រព្យសម្បត្តិដ៏ច្រើនលើសលុបរបស់មហាសេដ្ឋីដូចជា Elon Musk, Bernard Arnault, Jeff Bezos, Warren Buffet និងលោក Larry Ellison គឺបង្កហានិភ័យដល់វិសមភាពសង្គមជាខ្លាំង ពោលក្នុងរយៈពេល ៤ឆ្នាំនេះ អង្គការ Oxfam ក៏បានបញ្ជាក់ដែរថា ប្រជាជន ៥ពាន់លាននាក់ មានភាពក្រីក្រជាងមុន ប៉ុន្តែមហាសេដ្ឋីនៅតែមានកំណើនទ្រព្យសម្បត្តិហូរហៀរ។

ជាមួយគ្នា អង្គការសប្បុរសធម៌មានមូលដ្ឋានៅទីក្រុងឡុងដ៍ក៏បានអំពាវនាវ ឲ្យមានការស៊ើបអង្កេតលើក្រុមហ៊ុនខ្នាតយក្សរបស់មហាសេដ្ឋីទាំងនោះ ទាក់ទងនឹងការបង់ពន្ធនានា ខណៈបច្ចុប្បន្នក្នុងចំណោមក្រុមហ៊ុនធំៗបំផុតលើលោកចំនួន ១០ មាន ៧ក្រុមហ៊ុនជាកម្មសិទ្ធរបស់ពួកមហាសេដ្ឋី។

បន្ថែមពីនោះ សារព័ត៌មាន Alijazeera ក៏បានរាយការណ៍ដែរថា បើសិនជាកំណើនទ្រព្យសម្បត្តិរបស់ក្រុមមហាសេដ្ឋីនៅតែបន្តបែបនេះ ពិភពលោកនឹងមានបុគ្គលមានទ្រព្យសម្បត្តិលើសពីមួយទ្រីលានដុល្លារ ក្នុងរយៈពេល ១០ឆ្នាំ ប៉ុន្តែការលុបបំបាត់ភាពក្រីក្រ ត្រូវចំណាយពេលរហូតដល់ ២២៩ឆ្នាំ ទើបអាចសម្រេចបាន។

ជម្រាបបន្ថែមថា អង្គការ Oxfam ក៏បានដាក់សំណើទៅកាន់រដ្ឋាភិបាលនៃមហាអំណាចធំៗថា គួរតែមានវិធានការទាមទារពន្ធ ចំពោះក្រុមហ៊ុនមហាសេដ្ឋី ក្នុងចំនួនប្រមាណ ១,៨ទ្រីលានដុល្លារជារៀងរាល់ឆ្នាំ ដើម្បីយកថវិកាទាំងនោះមកដោះស្រាយ និងលុបបំបាត់ភាពក្រីក្រលើពិភពលោក៕

The post រយៈពេល ៤ឆ្នាំនេះ កំពូលមហាសេដ្ឋីពិភពលោក ៥រូប កើបលុយបាន ១៤លានដុល្លារក្នុងមួយម៉ោង appeared first on .

រយៈពេល ២ឆ្នាំ ក្រុមអ្នកមានបំផុតមួយក្ដាប់តូច សំងំកើបលុយសរុបរហូត ២៦ ទ្រីលានដុល្លារ

ឧកញ៉ាសំពៅ — Mon, 16 Jan 2023 04:37:36 +0000

ក្រុមអ្នកមានបំផុតប្រហែល ១% បានសំងំកើបលុយប្រហែល ២/៣ នៃទ្រព្យសម្បត្តិសរុបដែលបានកើនឡើងរយៈពេល ២ ឆ្នាំ គិតចាប់ពីឆ្នាំ ២០២០ មកទល់ចុងឆ្នាំ ២០២២ និងមានតម្លៃប្រមាណ ៤២ ទ្រីលានដុល្លារអាមេរិក។

ទំហំទ្រព្យសម្បត្តិដ៏មហាសាលនេះ គឺវាច្រើនជាងទ្វេដងជាមួយនឹងប្រាក់ចំណូលនៃប្រជាជនទូទាំងសកលលោក ៩៩% ដែលរស់នៅក្នុងកម្រិតជីវភាពក្រខ្សត់។ នេះបើតាមការចុះផ្សាយពី Oxfam។

ប្រភពដដែលបន្ថែមទៀតថា តាំងពីផ្ទុះជំងឺរាតត្បាតកូវីដ ១៩ មក ក្រុមអ្នកមានមួយក្ដាប់តូចសំងំកើបផលប្រយោជន៍ជាច្រើន ខណៈអ្នកក្រកាន់តែក្រ ពោលរយៈពេល ១០ ឆ្នាំចុងក្រោយនេះ ទឹកប្រាក់ ១០០ ដុល្លារដែលរកបាន មាន ៣៤ដុល្លារ ហូរចូលហោប៉ៅអ្នកមាន និង ៥ ដុល្លារធ្លាក់ទៅកាន់ក្រុមមនុស្សដែលមានជីវភាពមធ្យម ៥០%។

នេះក៏មានន័យថា រយៈពេល ១០ ឆ្នាំនេះ ក្រុមអ្នកមានមួយក្ដាប់តូចប្រមាណ ១% នៃប្រជាជនសរុប គឺទទួលបានផលចំណេញច្រើនជាង មនុស្សទូទៅជិត ៧ ដងឯណោះ។

គិតតាំងពីឆ្នាំ ២០២០ មក ក្រុមមហាសេដ្ឋីបានកើបលុយសរុប ២៦ ទ្រីលានដុល្លារ ខណៈ ១៦ ទ្រីលានដុល្លារទៀត គឺសរុបប្រាក់ចំណូលនៃប្រជាជនសរុបទូទាំងពិភពលោក ហើយនេះក៏មានន័យថា មហាសេដ្ឋីម្នាក់កើនលុយប្រហែល ១,៧ លានដុល្លារ រាល់ពេលប្រជាជនក្រីក្រម្នាក់មានចំណូល ១ ដុល្លារប៉ុណ្ណោះ។

មិនតែប៉ុណ្ណោះ រយៈពេល ២ ឆ្នាំនេះ ទំហំទ្រព្យសម្បត្តិរបស់មហាសេដ្ឋីបានកើនឡើង ២,៧ ពាន់លានដុល្លារជារៀងរាល់ថ្ងៃ ហើយវាក៏បានបង្កើតកំណត់ត្រាប្រចាំទសវត្ស ទាំងចំនួន និងទំហំទ្រព្យសម្បត្តិមហាសេដ្ឋី មានការកើនឡើងទ្វេដងសម្រាប់រយៈពេល ១០ ឆ្នាំចុងក្រោយ។

សម្រាប់ក្នុងឆ្នាំ ២០២២ នេះទៀតសោត មហាសេដ្ឋីដែលរកស៊ីលើវិស័យចំណីអាហារ និងថាមពល ទទួលបានផលចំណេញច្រើនបំផុត ហើយ Oxfam បានរាយការណ៍ថា ក្រុមហ៊ុនប្រមាណ ៩៥ ទទួលបានផលចំណេញទ្វេដង ប្រមាណ ៣០៦ ពាន់លានដុល្លារ ហើយ ២៥៧ ពាន់លានដុល្លារ បានហូរចូលហោប៉ៅម្ចាស់ភាគហ៊ុនធំៗ៕

The post រយៈពេល ២ឆ្នាំ ក្រុមអ្នកមានបំផុតមួយក្ដាប់តូច សំងំកើបលុយសរុបរហូត ២៦ ទ្រីលានដុល្លារ appeared first on .

Oxfam ស្នើរដ្ឋាភិបាលឲ្យទារពន្ធ ៩៩% ពេលនេះមហាសេដ្ឋីជាង ១០០នាក់ដាក់ពាក្យតវ៉ា

ឧកញ៉ាសំពៅ — Mon, 24 Jan 2022 11:09:34 +0000

កាលពីពេលកន្លងទៅ អង្គការសប្បុរសធម៌ពិភពលោក Oxfam ធ្លាប់បានស្នើឲ្យរដ្ឋាភិបាលទារពន្ធពីមហាសេដ្ឋីមានបំផុតលើពិភពលោក ៩៩% សម្រាប់ការទិញវ៉ាក់សាំង និងជួយដោះស្រាយបញ្ហាសេដ្ឋកិច្ចសម្រាប់ប្រទេសជាង ៨០ ដែលកំពុងជួបវិបត្តិសេដ្ឋកិច្ច ដោយសារការរាតត្បាតកូវីដ-១៩។

គម្រោងទាពន្ធនេះ មហាសេដ្ឋី និងសេដ្ឋីច្រើនជាង ១០០ នាក់មកពី ៩ ប្រជាជាតិបាននាំគ្នាដាក់ញត្តិតវ៉ាលើការតំឡើងថ្លៃពន្ធទៅលើបុគ្គលមានទ្រព្យសម្បត្តិស្ដុកស្ដម្ភដូចជាពួកគេ ដោយបានអះអាងថា ការដំឡើងពន្ធនេះគឺជារឿងអយុត្តិធម៌សម្រាប់ប្រព័ន្ធពន្ធដារជុំវិញពិភពលោក។

ជាក់ស្ដែង ភាពខុសគ្នារវាងអ្នកមាននិងអ្នកក្រ កាន់តែខិតឆ្ងាយទៅៗ បើទោះជាកំពុងជួបវិបត្តិកូវីដ-១៩ ក្ដី ដោយចំណូលជាមធ្យមរបស់គ្រួសារមានជីវភាពលំបាក ៤០% ទូទាំងពិភពលោកនៅឆ្នាំ ២០២១ គឺធ្លាក់ចុះ ៦,៧% មុនមានការរាតត្បាត។

ស្របពេលដែលអ្នកមានវិញ គឺនៅតែបន្តកើបលុយឥតឈប់ឈរ ជាក់ស្ដែងទ្រព្យសម្បត្តិមហាសេដ្ឋីមានបំផុតលើលោកទាំង ១០ រូប មានការកើនឡើងយ៉ាងតិចទ្វេដង ខណៈទ្រព្យសម្បត្តិរបស់ Elon Musk គឺកើនដល់ទៅ ១ ០០០% តាំងពីខែមីនា ២០២០។

ដោយឡែក គម្លាតជីវភាពរបស់ប្រជាជនអាមេរិកមានសភាពយ៉ាប់យ៉ឺនតាំងពីរដ្ឋបាល Trump ប្រកាសកាត់បន្ថយពន្ធសាជីវកម្ម ៤០% ស្របពេលសហគ្រាសធំៗជាច្រើនមិនបានធ្វើការបង់ពន្ធ។

បើតាមការចុះផ្សាយពី Bloomberg បានឲ្យដឹងថា កាលពីឆ្នាំទៅការបន្ធូរបន្ថយពន្ធរបស់រដ្ឋបាល Trump បានធ្វើឲ្យអ្នកមានកាន់តែមាន ហើយធ្វើឲ្យចំណូល IRS ដែលបានមកពីពន្ធដារខាតបង់ជាងពាក់កណ្ដាល ពោលធ្លាក់ពី ២០ ពាន់លានដុល្លារ មកត្រឹម ៩ ពាន់លានដុល្លារកាលពីឆ្នាំ ២០២០៕

ប្រភព: yahoo

The post Oxfam ស្នើរដ្ឋាភិបាលឲ្យទារពន្ធ ៩៩% ពេលនេះមហាសេដ្ឋីជាង ១០០នាក់ដាក់ពាក្យតវ៉ា appeared first on .

Oxfam ស្នើឲ្យទារពន្ធមហាសេដ្ឋី ៩៩% សម្រាប់ទិញវ៉ាក់សាំងកូវីដ ១៩

ឧកញ៉ាសំពៅ — Tue, 18 Jan 2022 08:52:48 +0000

ដូចបានដឹងរួចមកហើយថា ចាប់តាំងពីមានការរាតត្បាតជំងឺកូវីដ ១៩ មក សេដ្ឋកិច្ចទូទាំងពិភពលោកបានបង្ហាញសញ្ញាអវិជ្ជមានជាខ្លាំង តែងាកទៅមើលអត្រាកំណើនមហាសេដ្ឋីវិញ គឺនៅតែមានការកើនឡើងឥតឈប់ឈរ។

បើតាមរបាយការណ៍ពីអង្គការក្រៅរដ្ឋាភិបាលមួយបានបង្ហាញពីវិសមភាពសង្គម ដោយមហាសេដ្ឋីមានបំផុតទាំង ១០ រូបលើលោកបានបង្កើនទំហំទ្រព្យសម្បត្តិរបស់ពួកគេទ្វេដង អំឡុងពេលមានការរាតត្បាតជំងឺកូវីដ ១៩ តាំងពីឆ្នាំ ២០២០ មក ស្របពេលប្រជាជនយ៉ាងតិច ១៦០ លាននាក់បានធ្លាក់ចូលរណ្ដៅភាពក្រីក្រ។

អ្វីដែលនឹកស្មានមិនដល់ គឺបន្ទាប់ពីមានការរាតត្បាតកូវីដ ១៩ រៀងរាល់ ២៦ ម៉ោងម្ដង តែងលេចនូវវត្តមានមហាសេដ្ឋីម្នាក់។ នេះបើតាមការចុះផ្សាយពី World Economic Forum កាលពីថ្ងៃច័ន្ទកន្លងទៅ។

ដូច្នេះហើយ Oxfam ដែលជាអង្គការសប្បុរសធម៌អន្តរជាតិ បានបង្ហាញថា ទ្រព្យសម្បត្តិរបស់មហាសេដ្ឋីមានបំផុតទាំង ១០ រូបនោះ បើសិនជាបូកបញ្ចូលគ្នាគឺ ច្រើនជាងប្រជាជនក្រីក្រដល់ទៅ ៣,១ ពាន់លាននាក់ ហើយបើសិនជាក្នុងមួយថ្ងៃចាយ ១ លានដុល្លារ ក៏ត្រូវការពេលដល់ទៅ ៤១៤ ឆ្នាំ ទើបចាយទ្រព្យពួកគេអស់។

ស្របពេលនោះផងដែរ NGO បានបន្ថែមថា គម្រោងការស្នើសុំទារពន្ធ ៩៩% នេះ គឺរាប់ត្រឹមទំហំប្រាក់ចំណូលដែលពួកមហាសេដ្ឋីរកបានអំឡុងពេលរាតត្បាតកូវីដ ១៩ ប៉ុណ្ណោះ ហើយប្រាក់ពន្ធនោះទៀតសោត គឺយកមកទិញវ៉ាក់សាំងផ្គត់ផ្គង់ប្រជាជនទូទាំងពិភពលោក ដោះស្រាយវិបត្តិបម្រែបម្រួលអាកាសធាតុ និងបរិច្ចាគដល់អង្គការប្រឆាំងអំពើហិង្សាជាង ៨០ ប្រទេស៕

ប្រភព: plenglish

The post Oxfam ស្នើឲ្យទារពន្ធមហាសេដ្ឋី ៩៩% សម្រាប់ទិញវ៉ាក់សាំងកូវីដ ១៩ appeared first on .