យោងតាមទស្សនាវដ្តី Forbes កាលពីមួយឆ្នាំមុន កំពូលកីឡាវាយកូនបាល់ស្វីសរូបនេះ បានចូលរួមជាមួយបញ្ជីឈ្មោះមហាសេដ្ឋី ជាមួយនឹងទ្រព្យសម្បត្តិសរុបប្រមាណ ១,១ពាន់លានដុល្លារ។

ទ្រព្យសម្បត្តិភាគច្រើនទាំងនោះ មានប្រភពចេញពីភាគហ៊ុន ៣% ដែលលោក Federer កាន់កាប់នៅក្នុងក្រុមហ៊ុន On ចាប់តាំងពីលោកបានចាប់ដៃគូជាមួយក្រុមហ៊ុនសម្លៀកបំពាក់កីឡាដែលកំពុងរីកចម្រើនយ៉ាងឆាប់រហ័សមួយនេះ ក្នុុងឆ្នាំ២០១៩ មក។

យ៉ាងណាមិញ នៅចំណុចមួយ ក្រុមហ៊ុន On ធ្លាប់បានឈានដល់តម្លៃមូលធនទីផ្សារ ១៥ពាន់លានដុល្លារដ៏គួរឱ្យភ្ញាក់ផ្អើល ដែលជំរុញឱ្យតម្លៃភាគហ៊ុនរបស់ Federer ហក់ឡើងលើសពី ៣៧៥លានដុល្លារ។

តែទោះបីជាក្រុមហ៊ុននេះ ទើបតែបានប្រកាសពីការលក់បំបែកកំណត់ត្រាក៏ដោយ លទ្ធផលអាជីវកម្មចុងក្រោយរបស់ខ្លួនបានបរាជ័យក្នុងការបំពេញតាមការរំពឹងទុកខ្ពស់របស់ទីផ្សារ។ នេះបានបង្ខំឱ្យ On បន្ថយការព្យាករអំពីប្រាក់ចំណូលរួមរបស់ខ្លួន។

គួរឲ្យដឹងថា តម្លៃភាគហ៊ុនរបស់ក្រុមហ៊ុនបានធ្លាក់ចុះភ្លាមៗជិត ២០% ក្នុងវគ្គជួញដូរតែមួយនៅថ្ងៃទី១១ ខែសីហា។ ការធ្លាក់ចុះយ៉ាងខ្លាំងនេះ បានធ្វើឲ្យលោក Federer ខាតបង់ទឹកប្រាក់អស់ចំនួន ៥២លានដុល្លារក្នុងរយៈពេលដ៏ខ្លី ដែលធ្វើឲ្យទ្រព្យសម្បត្តិសរុបរបស់លោកបច្ចុប្បន្ននេះ ថយមកនៅត្រឹម ៩៥២លានដុល្លារ និងធ្លាក់ចេញពីតំណែងជាមហាសេដ្ឋីផងដែរ។នេះបើយោងតាមការចុះផ្សាយរបស់ New York Post។

ជម្រាបជូនថា ក្នុងរយៈពេល ២៤ឆ្នាំនៃអាជីពដ៏ជោគជ័យជាមួយនឹងការឈ្នះពានរង្វាន់ចំនួន ១០៣ លោក Federer អាចប្រមូលបានប្រាក់រង្វាន់ពីការប្រកួតសរុបជិត ១៣១លានដុល្លារ និងប្រាក់ចំណូលមុនពន្ធប្រហែល ១ពាន់លានដុល្លារផ្សេងទៀតពីកិច្ចព្រមព្រៀងឧបត្ថម្ភដ៏ច្រើនសន្ធឹកសន្ធាប់ផងដែរ៕

The post ស្តេចវាយ Tennis លោក Roger Federer របូតតំណែងជាមហាសេដ្ឋី appeared first on .