នាយិកា WFP រំពឹងថា កម្មវិធីជាតិផ្តល់អាហារតាមសាលារៀននៅកម្ពុជា នឹងពង្រីកវិសាលភាពកាន់តែទូលាយ

Kem sinath — Wed, 05 Feb 2025 07:54:59 +0000

គណៈប្រតិភូកម្មវិធីស្បៀងអាហារពិភពលោក ដឹកនាំដោយលោកស្រី ឃ្លែរ ខូណាន់ នាយិកាប្រចាំប្រទេសកម្ពុជានៃកម្មវិធីស្បៀងអាហារពិភពលោក(WFP) បានបង្ហាញក្តីរំពឹងទុកថា កម្មវិធីជាតិផ្តល់អាហារតាមសាលារៀន នឹងបន្តពង្រីកវិសាលភាពកាន់តែទូលាយបន្ថែមទៀត ដើម្បីអភិវឌ្ឍធនធានមនុស្សកម្ពុជាកាន់តែប្រសើរ។

គណៈប្រតិភូកម្មវិធីស្បៀងអាហារពិភពលោក (WFP) ប្រចាំកម្ពុជា ថ្លែងបែបនេះ ត្រូវបានធ្វើឡើងនៅកិច្ចប្រជុំរួមគ្នា ដើម្បីពិភាក្សាពីការបន្តគាំទ្ររបស់រាជរដ្ឋាភិបាលក្នុងគោលដៅធានានិរន្តភាពកម្មវិធីអាហារតាមសាលារៀននៅកម្ពុជា ជាមួយក្រសួងអប់រំ យុវជន និងកីឡា កាលថ្ងៃទី០៤ ខែកុម្ភៈ ឆ្នាំ២០២៥។

កិច្ចប្រជុំនេះ កិច្ចប្រជុំនេះមានគោលបំណង ដើម្បីពិភាក្សាលើសំណើសុំបន្តការគាំទ្រផ្គត់ផ្គង់អង្ករ និងថវិកាពីរាជរដ្ឋាភិបាលកម្ពុជា ដល់កម្មវិធីស្បៀងអាហារពិភពលោក សម្រាប់ការអនុវត្តចាប់ពីឆ្នាំ២០២៤ ដល់ឆ្នាំ២០២៨ ក្រោមគម្រោងកម្មវិធីផ្តល់អាហារតាមសាលារៀន ដោយប្រើប្រាស់កសិផលក្នុងសហគមន៍ ជាមួយចក្ខុវិស័យ អភិវឌ្ឍកុមារកម្ពុជាឱ្យមានកាយសម្បទារឹងមាំ បញ្ញាស្មារតីឆ្លាតវៃ។

ក្នុងឱកាសជំនួបនេះ នាយិកាប្រចាំប្រទេសរបស់កម្មវិធីស្បៀងពិភពលោក បានកោតសរសើរ និងថ្លែងអំណរគុណចំពោះកិច្ចសហប្រតិបត្តិការរបស់ក្រសួងអប់រំកន្លងមក រហូតទទួលបានការគាំទ្រដ៏ច្រើនពីគ្រប់មជ្ឈដ្ឋាន ជាពិសេសតាមរយៈការប្រើប្រាស់កសិផលក្នុងសហគមន៍។លោកស្រី រំពឹងថាកម្មវិធីនេះ នឹងបន្តពង្រីកវិសាលភាពកាន់តែទូលំទូលាយ និងមានប្រសិទ្ធភាពខ្ពស់ ឆ្លើយតបនឹងផែនការយុទ្ធសាស្ត្រអភិវឌ្ឍធនធានមនុស្សរបស់រាជរដ្ឋាភិបាលកម្ពុជា។

ជាការឆ្លើយតប លោក ហង់ជួន ណារ៉ុន រដ្ឋមន្ត្រីក្រសួងអប់រំ ក៏បានថ្លែងអំណរគុណចំពោះការបន្តជួយគាំទ្រផ្នែកបច្ចេកទេស និងរួមចំណែកជំរុញឱ្យកម្មវិធីផ្តល់អាហារតាមសាលារៀនដំណើរការទៅដោយរលូន ខណៈលោកថា ការគាំទ្រនេះ គឺបានផ្តល់អាទិភាពដល់ការវិនិយោគលើមូលធនមនុស្សដែលជាមូលដ្ឋានគ្រឹះ ឈានទៅសម្រេចគោលដៅចក្ខុវិស័យកម្ពុជាឆ្នាំ២០៣០ និង ២០៥០ និងរួមចំណែកដល់ការសម្រេចគោលដៅអភិវឌ្ឍន៍សេដ្ឋកិច្ចសង្គមជាតិប្រកបដោយចីរភាព។

លោកឧបនាយករដ្ឋមន្ត្រីថា ក្រសួង ប្តេជ្ញាចិត្តបន្តពង្រឹងពង្រីកកិច្ចសហប្រតិបត្តការឱ្យកាន់តែល្អប្រសើរឡើង ក្នុងគោលដៅធានាឱ្យបានថាកុមារគ្រប់រូបមានឱកាសទទួលបានសុខភាព និងអាហារប្រកបដោយជីវជាតិតាមសាលារៀន។

គួរបញ្ជាក់ដែរថា កម្មវិធីស្បៀងអាហារពិភពលោក នៅដំណាក់កាលដំបូងត្រូវបានបង្កើតឡើងសម្រាប់រយៈពេល ៤ឆ្នាំ (២០២២-២០២៥) ដើម្បីចង្អុលបង្ហាញដល់ការផ្លាស់ប្តូរភាពជាម្ចាស់មានលក្ខណៈជាប្រព័ន្ធពេញលេញលើការអនុវត្ត និងគ្រប់គ្រងកម្មវិធីជាតិផ្តល់អាហារតាមសាលារៀនដល់ក្រសួងអប់រំ ជាមួយជំនាញដែលអាចបន្តពង្រីកកម្មវិធីនេះបន្ថែមទៀតរហូតដល់ឆ្នាំ២០៣០ និងបន្តទៅឆ្នាំខាងមុខ៕អត្ថបទ៖ ហ្សាលីន

The post នាយិកា WFP រំពឹងថា កម្មវិធីជាតិផ្តល់អាហារតាមសាលារៀននៅកម្ពុជា នឹងពង្រីកវិសាលភាពកាន់តែទូលាយ appeared first on .

អត្រាប្រជាជនប្រឈមនឹងអសន្តិសុខស្បៀងអាហារ កើនច្រើនគួរឲ្យបារម្ភនៅឆ្នាំ ២០២២

ឧកញ៉ាសំពៅ — Thu, 25 Aug 2022 13:52:00 +0000

ចំនួនប្រជាជនដែលកំពុងប្រឈមនឹងអសន្តិសុខស្បៀងអាហារធ្ងន់ធ្ងរទូទាំងពិភពលោកបានកើនដល់ចំណុចគួរឲ្យបារម្ភ ពោលគឺកើនឡើងលើសទ្វេដងបើធៀបនឹងឆ្នាំ ២០១៩ ដល់ទៅ ៣៤៥ លាននាក់។ នេះបើតាមទិន្នន័យផ្ដល់ឲ្យដោយកម្មវិធីស្បៀងអាហារពិភពលោក WFP។

មុនមានការរាតត្បាតជំងឺកូវីដ ១៩ ប្រជាជនប្រមាណ ១៣៥ លាននាក់គឺបានជួបប្រទះនឹងបញ្ហាកង្វះស្បៀងអាហារធ្ងន់ធ្ងរ ហើយមកទល់ពេលនេះតួលេខបានកើនឡើងខ្ពស់គួរឲ្យបារម្ភ បណ្ដាលមកពីកត្តាបម្រែបម្រួលអាកាសធាតុ និងសង្គ្រាម។ នេះបើតាមសម្ដីប្រធានផ្នែកតាមតំបន់ WFP បានប្រាប់ Reuters។

ប្រភពដដែលបានបង្ហើបថា តំបន់មជ្ឈិមបូព៌ា និងអាហ្វ្រិកខាងជើង គឺទទួលរងផលប៉ះពាល់ខ្លាំងបំផុត ដោយសារសង្គ្រាមរវាងរុស្ស៊ី និងអ៊ុយក្រែន ដ្បិតតំបន់ ២ នេះពឹងផ្អែកខ្លាំងលើការនាំចូលស្បៀងអាហារតាមរយៈផ្លូវសមុទ្រ Black Sea។

សូមជម្រាបដែរថា WFP រាល់ថ្ងៃគឺអាចមានលទ្ធភាពជួយដល់មនុស្សប្រមាណ ១៣ លាននាក់ក្នុងចំណោម ១៦ លាននាក់ដែលកំពុងត្រូវការអាហារ ប៉ុន្តែជំនួយទាំងអស់គឺមិនអាចរ៉ាប់រងបានទាំងស្រុងឡើយ ដ្បិតអង្គការមួយនេះក៏កំពុងខ្វះខាតថវិកាផងដែរ។

ដូច្នេះហើយទើបកន្លងមក WFP តែងតែទទូចជារឿយៗដល់ក្រុមមហាសេដ្ឋីមានលុយហូរហៀរដូចជា Elon Musk, Jeff Bezos ជាដើម ក្នុងការជួយដោះស្រាយបញ្ហាកង្វះស្បៀងអាហារជុំវិញពិភពលោកមួយនេះ ប៉ុន្តែលទ្ធផលមិនសូវបានផ្លែផ្កាឡើយ៕

The post អត្រាប្រជាជនប្រឈមនឹងអសន្តិសុខស្បៀងអាហារ កើនច្រើនគួរឲ្យបារម្ភនៅឆ្នាំ ២០២២ appeared first on .