«ពងក្នុងសំបុក» របស់មេចុងភៅកម្ពុជាទទួលបានលេខ១ ក្នុងឱកាសតាំងពិព័រណ៍ម្ហូបអាហារអន្តរជាតិ នៅទីក្រុងប៉ារីស

បង្អែម «ពងក្នុងសំបុក» របស់មេចុងភៅ សៅ សុភ័ក្រ្ត មកពីប្រទេសកម្ពុជា ទទួលបានពានរង្វាន់លេខ១ ក្នុងការប្រកួត នាឱកាសតាំងពិព័រណ៍ម្ហូបអាហារអន្តរជាតិ (Village international de la Gastronomie) នៅទីក្រុងប៉ារីស។ នេះបើតាមការឱ្យដឹងពី លោក លុយ ដាវីត ឯកអគ្គរាជទូតកម្ពុជា ប្រចាំប្រទេសបារាំង កាលពីថ្ងៃទី ១៤ ខែកញ្ញា ឆ្នាំ ២០២៥។

លោក លុយ ដាវីត បានឱ្យដឹងថា ការតាំងពិព័រណ៍ម្ហូបអាហារអន្តរជាតិ នាទីក្រុងប៉ារីស បានប្រារព្ធធ្វើឡើង ចាប់ពីថ្ងៃទី ១១ ដល់ថ្ងៃទី ១៤ ខែកញ្ញា ឆ្នាំ ២០២៥ តាមដងទន្លេសែន ទល់មុខ Tour Eiffel ដោយមានការចូលរួមពីប្រទេសចំនួន៦២ មកពីជុំវិញពិភពលោក។

លោកក៏បានសម្តែងនូវមោទភាព ដែលប្រទេសកម្ពុជា ដែលត្រូវបានជ្រើសរើសជាប្រទេសកិត្តិយសក្នុងការតាំងពិព័រណ៍ម្ហូបអាហារអន្តរជាតិមួយនេះ។ នៅក្នុងឱកាសនោះ កម្ពុជាបានដាក់តាំងផលិតផលក្នុងស្រុក មានដូចជា ម្រេចខ្មៅកំពត គ្រាប់ស្វាយចន្ទី ដំណាប់ស្វាយ ស្ករត្នោត នំសម្រន់គ្រប់ប្រភេទ ប្រហុក ក្រមាខ្មែរ និងផលិតផលជាច្រើនទៀត។

លោក លុយ ដាវីត បានគូសបញ្ជាក់ថា មេចុងភៅ សៅ សុភ័ក្រ និងសាលាសណ្ឋគារ និងទេសចរណ៍ ប៉ូល ឌុយប្រ៊ូល (Paul Dubrule) បានចម្អិនម្ហូបខ្មែរបង្ហាញជូនភ្ញៀវអន្តរជាតិបានស្គាល់ និងភ្លក់រស់ជាតិផងដែរ។

គួរបញ្ជាក់ថា ការទទួលពានរង្វាន់លេខ១ របស់ចុងភៅខ្មែរ នេះបង្ហាញឱ្យឃើញពីស្នាដៃចុងភៅដែលជាកូនខ្មែរ ដែលបានខិតខំស្វះស្វាញក្នុងព្រត្តិការណ៍ដ៏អស្ចារ្យមួយនេះ ខណៈក្រសួងទេសចរណ៍កម្ពុជាក៏បានចេញសារអបអរសាទរពីសមិទ្ធិផលនេះផងដែរ៕