ភ្នំពេញ៖ សមាគមឧកញ៉ាកម្ពុជា ទើបតែបានជូនដំណឹងដល់ លោកអ្នកឧកញ៉ា អ្នកឧកញ៉ា និងឧកញ៉ា ជាសមាជិករបស់ខ្លួនអំពីការផ្ដល់ឯកសណ្ឋានផ្លូវការឧកញ៉ា (ឈុតទី២) នាព្រឹកថ្ងៃទី២០ ខែវិច្ឆិកា ឆ្នាំ២០២៥នេះ ដោយបានភ្ជាប់នូវគំរូម៉ូដទាំងសម្រាប់បុរស និងស្ត្រី ដែលនឹងប្រើប្រាស់សម្រាប់កម្មវិធីនានាជាពិសេសកម្មវិធីធុរកិច្ច និងពិធីផ្សេងៗទៀតបន្ថែមពីលើឯកសណ្ឋានផ្លូវការ (ឈុតទី១) ដែលត្រូវបានប្រើប្រាស់សម្រាប់ចូលរួមពិធីបុណ្យជាតិ ពិធីបុណ្យប្រពៃណីជាតិ ក៏ដូចជាពិធីផ្លូវការផ្សេងៗស្របទៅតាមព្រះរាជក្រឹត្យ នស/រកត/១០២៤/១៣០៩ ស្តីពីគោរមងារឧកញ៉ា និងសេចក្តីព្រាងអនុក្រឹត្យស្តីពី ឯកសណ្ឋានផ្លូវការ នៃគោរមវន្តតាមលំដាប់ថ្នាក់។
សូមបញ្ជាក់ថា អនុលោមតាមព្រះរាជក្រឹត្យខាងលើបានបញ្ញត្តិថា សមាគមឧកញ៉ាកម្ពុជា គឺជាដៃគូរបស់រាជរដ្ឋាភិបាលកម្ពុជា លើការងារតំណាងឱ្យគោរមវន្តទាំងអស់នៅក្នុងព្រះរាជាណាចក្រកម្ពុជា ព្រមទាំងជួយរាជរដ្ឋាភិបាលលើការធ្វើបច្ចុប្បន្នភាពបញ្ជីឈ្មោះ និងរៀបចំឯកសណ្ឋានផ្លូវការរបស់គោរមវន្តទាំងអស់នៅក្នុងព្រះរាជាណាចក្រកម្ពុជា ក៏ដូចជាការជំរុញលើកកម្ពស់សេដ្ឋកិច្ច ពាណិជ្ជកម្ម ការវិនិយោគ និងសកម្មភាពផ្សេងទៀត ដើម្បីជាប្រយោជន៍ដល់ជាតិ។
ចំពោះលោកអ្នកឧកញ៉ា អ្នកឧកញ៉ា និងឧកញ៉ា ជាសមាជិក (ជាបុរស) ដែលមិនទាន់បានវាស់ឯកសណ្ឋានផ្លូវការឧកញ៉ា (ឈុតទី២) សូមមេត្តា ទាក់ទងមកក្រុមការងារអគ្គលេខាធិការដ្ឋាន ចាប់ពីថ្ងៃជូនដំណឹងនេះ រហូតដល់ថ្ងៃ៣០ ខែវិច្ឆិកា ឆ្នាំ២០២៥។
អាស្រ័យដូចបានគោរពជម្រាបជូនខាងលើ សូម លោកអ្នកឧកញ៉ា អ្នកឧកញ៉ា និងឧកញ៉ា ដែលមិនទាន់បានវាស់ឯកសណ្ឋានផ្លូវការឧកញ៉ា (ឈុតទី២) មេត្តាជ្រាប និងទំនាក់ទំនងមកក្រុមការងារតាមរយៈ៖
១. កញ្ញា ឡាយ លីណា លេខទូរសព្ទ៖ 085 202 333
២. កញ្ញា ប៉ូ សុគន្ធា លេខទូរសព្ទ៖ 010 643 888
សម្រាប់សមាជិកជាស្ត្រី សមាគមនឹងជូនក្រណាត់ (ផាមួង និងគំរូម៉ូត) សម្រាប់យកទៅកាត់នៅហាងណាមួយដែលខ្លួនពេញចិត្ត។
