អ្នកឧកញ៉ា ទៀ វិចិត្រ បង្ហើបប្រាប់ពីបំណុលមួយដែលខ្លួនសងមិនចេះអស់ ក្នុងមួយជីវិតនេះ

អ្នកឧកញ៉ា ទៀ វិចិត្រ អគ្គនាយកក្រុមហ៊ុន ជីធីវីសុី គ្រុប បានលើកឡើងថា មានបំណុលមួយដែលលោកសងមិន​ចេះអស់ក្នុងមួយជីវិតនេះ គឺគុណឪពុកម្តាយជាទីស្រលាញ់។

កាលពីព្រលប់ថ្ងៃទី១៨ ខែវិច្ឆិកា ឆ្នាំ២០២៥ អ្នកឧកញ៉ា ទៀ វិចិត្រ បានបង្ហោះរូបភាពជួបជុំគ្រួសារនៅលើបណ្តាញ​សង្គមហ្វេសប៊ុក ដោយមានលោកឪពុក នាយឧត្តមសេនីយ៍ ទៀ វិញ រដ្ឋលេខាធិការក្រសួងការពារជាតិ និង​អ្នកម្តាយ, បងប្រុស ឧត្តមនាវីឯក ទៀ សុខា មេបញ្ជាការកងទ័ពជើងទឹក និងជាអគ្គលេខាធិការរង នៃ​គណៈកម្មា​ធិការ​ជាតិ​សន្តិសុខ​លម្ហសមុទ្រ និងបងស្រី លោកជំទាវឧត្តមនាវីត្រី ទៀ លក្ខិណា មេបញ្ជារការរង​កងទ័ពជើងទឹក និងជាប្រធាន​ក្រុមការងារយេនឌ័រកងទ័ពជើងទឹក។ បន្ថែមលើរូបភាព អ្នកឧកញ៉ាអគ្គនាយក បានភ្ជាប់ជាមួយសារ​ដ៏​មានអត្ថន័យបែបនេះថា៖ “មួយជីវិតនេះ បំណុលដែលកូនសងមិនចេះអស់ គឺគុណពុកម្តាយជាទីស្រលាញ់”។

សូមជម្រាបថា អ្នកឧកញ៉ា ទៀ វិចិត្រ ជាអ្នកជំនួញដ៏លេចធ្លោ និងមានឥទ្ធិពលខ្លាំងបំផុតមួយរូប នៅក្នុងទឹកដីខេត្ត​ព្រះសីហនុ និងខេត្តកោះកុង។ លោកត្រូវបានព្រះមហាក្សត្រចេញព្រះរាជក្រឹត្យ ផ្តល់គោរមងារ «ឧកញ៉ា» កាលពី​ថ្ងៃទី៤ ខែមិថុនា ឆ្នាំ២០១៥ និងទទួលបានគោរមងារ «អ្នកឧកញ៉ា» កាលថ្ងៃទី២៦ ខែឧសភា ឆ្នាំ២០២៣។ អ្នកឧកញ៉ា ក៏ជាសហស្ថាបនិកក្រុមហ៊ុន ភីស ភេត្រូលៀម (ខេមបូឌា) (PEACE Petroleum Cambodia), សមាជិក​សមាគមឧកញ៉ាកម្ពុជា និងជាទីប្រឹក្សាសម្តេចតេជោ ហ៊ុន សែន ប្រធានគណបក្សប្រជាជនកម្ពុជា​ផងដែរ៕