Foxconn ដែលជាក្រុមហ៊ុនផលិតគ្រឿងអេឡិចត្រូនិកធំជាងគេបំផុតរបស់ពិភពលោក បានបង្ហាញឲ្យដឹងនៅថ្ងៃទី១២ ខែធ្នូនេះថា ខ្លួននឹងវិនិយោគទឹកប្រាក់ចំនួន ១៥,៩ពាន់លានដុល្លារតៃវ៉ាន់ (៥០៩លានដុល្លារ) ដើម្បីសាងសង់ទីស្នាក់ការកណ្តាលនៅទីក្រុង Kaohsuing ភាគខាងត្បូងកោះតៃវ៉ាន់។ នេះបើតាមការចុះផ្សាយពីសារព័ត៌មាន CNA។
ក្រុមហ៊ុន Foxconn បាននិយាយទៀតថា ការសាងសង់នោះនឹងរួមបញ្ចូលទាំងអគារពាណិជ្ជកម្ម និងការិយាល័យចម្រុះ រួមទាំងអគារលំនៅឋានផងដែរ។ ការសាងសង់គ្រោងនឹងចាប់ផ្តើមនៅឆ្នាំ២០២៧ ដោយកំណត់គោលដៅបញ្ចប់ការសាងសង់នៅត្រឹមឆ្នាំ២០៣៣។
មិនតែប៉ុណ្ណោះ ទីស្នាក់ការកណ្តាលនេះនឹងបម្រើជាមជ្ឈមណ្ឌលសំខាន់មួយដែលភ្ជាប់ប្រតិបត្តិការរបស់ខ្លួននៅទូទាំងភាគខាងត្បូងនៃកោះតៃវ៉ាន់ ហើយនៅពេលដែលការសាងសង់ត្រូវបានបញ្ចប់ នោះនឹងមានក្រុមទីក្រុងឆ្លាតវៃ ក្រុមស្រាវជ្រាវ និងអភិវឌ្ឍកម្មវិធី ក្រុមស្រាវជ្រាវ និងអភិវឌ្ឍថ្ម មជ្ឈមណ្ឌលអភិវឌ្ឍបច្ចេកវិទ្យា EV និងក្រុមកម្មវិធី AI ផងដែរ។
ជម្រាបជូនផងដែរថា រដ្ឋាភិបាលទីក្រុង Kaohsiung បាននិយាយថា ការវិនិយោគរបស់ក្រុមហ៊ុន Foxconn នៅក្នុងទីក្រុងនេះមានចំនួនសរុប ២៥ពាន់លានដុល្លារតៃវ៉ាន់ (ឬប្រមាណជាង ៨០០លានដុល្លារ) រួចមកហើយខ ក្នុងរយៈពេលបីឆ្នាំកន្លងមកនេះ៕
