លោកស្រី ឡៃ ស៊ូយៀក ភរិយារបស់ អ្នកឧកញ៉ា ឡាយ លីហួ នៅថ្ងៃទី១៤ ខែមករា ឆ្នាំ២០២៦ ម្សិលមិញនេះ បានបង្ហើបឱ្យដឹងថា គម្រោងភូមិគ្រឹះរបស់ខ្លួន តម្លៃជិត ១០លានដុល្លារ នឹងបញ្ចប់ការសាងសង់នៅចុងឆ្នាំ២០២៦នេះ ខណៈដែលដំបូងឡើយគិតថាសាងសង់ត្រឹមតែ ៥លានដុល្លារប៉ុណ្ណោះ។
លោកស្រីម្ចាស់ប្រេន Miss បានគូសបញ្ជាក់លើទំព័រហ្វេសប៊ុកបែបនេះថា៖ “ជួយជាតិផង ជួយគ្រួសារផង ដើរតាមក្តីស្រមៃ គឺមានន័យណាស់។ គម្រោងភូមិគ្រឹះ នឹងត្រូវបញ្ចប់ចុងឆ្នាំនេះ ទម្រាំហើយក្បែរ ១០លានដុល្លារ ដំបូងថាតែ៥លានដុល្លារ គ្រប់គ្រាន់ហើយ ប៉ុន្តែដល់តែ គិតពី ថ្មម៉ាប កញ្ចក់ គ្រឿងដេគ័រលំដាប់ៗ កម្មង់ក្រៅប្រទេស Home stay ព័ទ្ធ គឺថាគ្រាន់តែគិតក៏ញាក់សាច់។ បើ reviews គឺឆ្ងាញ់ណាស់ ថ្ងៃ២៧បុកគ្រឹះ។ នៅគម្រោង ១៥លានដុល្លារមួយទៀត គឺរៀងស្ពឹកដែរចាស តែស៊ូ ជំនះ ព្រោះខំយូរហើយ អាយុមិនច្រើន តែការគិតមិនខ្ចី ស្រលាញ់ប្រទេសជាតិក៏ឱបក្រសោបគ្រួសារ”។
សូមជម្រាបថា លោកស្រី ឡៃ ស៊ូយៀក គឺជាភរិយា អ្នកឧកញ៉ា ឡាយ លីហួ ស្ថាបនិកហ្គារាស់លក់រថយន្ត H.Y 9999 Auto ដែលត្រូវបានសម្ដេចតេជោ ហ៊ុន សែន ប្រមុខរដ្ឋស្ដីទី ចេញព្រះរាជក្រឹត្យ ត្រាស់បង្គាប់ផ្ដល់គោរមងារជា «អ្នកឧកញ៉ា» នៅថ្ងៃទី៣១ ខែសីហា ឆ្នាំ២០២៤។ លោកស្រី ឡៃ ស៊ូយៀក ជាម្ចាស់ប្រេន Miss ដែលលក់ឡេ និងផលិតផលថែរក្សាសម្រស់ជាច្រើនមុខផងដែរ៕
