យោងតាមក្រសួងពាណិជ្ជកម្ម កាលពីថ្ងៃទី១៥ ខែមករា បាននិយាយថា សហរដ្ឋអាមេរិក និងតៃវ៉ាន់ បានឈានដល់កិច្ចព្រមព្រៀងពាណិជ្ជកម្មមួយ ដើម្បីផលិតបន្ទះឈីប និងសាងសង់រោងចក្រផលិតបន្ទះឈីបថ្មីៗបន្ថែមទៀត នៅលើទឹកដីសហរដ្ឋអាមេរិក។ នេះបើតាមការចុះផ្សាយពីសារព័ត៌មាន CNBC។
ជាផ្នែកមួយនៃកិច្ចព្រមព្រៀងនេះ ក្រុមហ៊ុនផលិតបន្ទះឈីប និងបច្ចេកវិទ្យាតៃវ៉ាន់ នឹងបោះទុនវិនិយោគទឹកប្រាក់យ៉ាងហោចណាស់ ២៥០ពាន់លានដុល្លារ លើសមត្ថភាពផលិតរបស់ខ្លួន នៅសហរដ្ឋអាមេរិក ស្របពេលរដ្ឋភិបាលរបស់តៃវ៉ាន់ ក៏នឹងធានានូវការផ្តល់ឥណទានចំនួន ២៥០ពាន់លានដុល្លារ សម្រាប់ក្រុមហ៊ុនទាំងនេះផងដែរ។
យ៉ាងណាមិញ ជាថ្នូរទៅនឹងការវិនិយោគដ៏ធំនេះ សហរដ្ឋអាមេរិក នឹងបន្ធូរបន្ថយការដាក់ពន្ធលើតៃវ៉ាន់មកនៅត្រឹម ១៥% ពោលគឺបានធ្លាក់ចុះពីកម្រិត ២០% ហើយប្តេជ្ញានឹងមិនយកពន្ធបដិការទៅលើឱសថទូទៅ គ្រឿងផ្សំឱសថ គ្រឿងបន្លាស់យន្តហោះ និងធនធានធម្មជាតិមួយចំនួនទៀតនោះឡើយ។
ជម្រាបជូនផងដែរថា ក្នុងចំណោមនោះ ក្រុមហ៊ុន Taiwan Semiconductor Manufacturing Co. (TSMC) ដែលជាក្រុមហ៊ុនផលិតបន្ទះឈីបលំដាប់កំពូលរបស់ពិភពលោក បានទិញដីបន្ថែម ដើម្បីពង្រីករោងចក្ររបស់ខ្លួននៅក្នុងរដ្ឋអារីហ្សូណា ដែលជាផ្នែកមួយនៃកិច្ចព្រមព្រៀងនេះ។ នេះបើតាមការលើកឡើងរបស់រដ្ឋមន្ត្រីក្រសួងពាណិជ្ជកម្ម លោក Howard Lutnick៕
