ក្រុមហ៊ុនសំបកកង់ឡានខ្មែរម៉ាក Sailun នៅថ្ងៃទី០៨ ខែកុម្ភៈ ឆ្នាំ២០២៦ បានប្រកាសថា ក្រុមហ៊ុននឹងផ្តល់ជូនកាដូដល់អតិថិជនទាំងអស់ ក្នុងឱកាសពិធីបុណ្យចូលឆ្នាំប្រពៃណីជាតិខ្មែរ ខាងមុខនេះ។
តាមរយៈសារខ្លីនៅលើទំព័រហ្វេសប៊ុកផ្លូវការ Sailun Tire Cambodia ក្រុមហ៊ុនបានបញ្ជាក់ដូច្នេះថា៖ “សំបកកង់ខ្មែរម៉ាក Sailun សុំជូនកាដូ ភ្ញៀវរាល់បុណ្យចូលឆ្នាំប្រពៃណីខ្មែរ”។ បន្ទាប់ពីឃើញសារនេះ អ្នកលេងបណ្តាញសង្គមជាច្រើន បានបង្ហាញក្តីរំភើបរីករាយ និងរំពឹងថា ក្រុមហ៊ុនមានការចុះបញ្ចុះថ្លៃ ៥០% ឬទិញពីរថែមពីរជាដើម។ ក្នុងនោះដែរ គណនីហ្វេសប៊ុកមួយ បានលើកឡើងថា “អរគុណច្រើនក្រុមហ៊ុន សម្រាប់ការលើកទឹកចិត្តបុណ្យជាតិយើង”។
ទោះយ៉ាងណា ក្រុមហ៊ុននៅពុំទាន់បង្ហើបឱ្យដឹងពីកាដូដ៏ពិសេសនេះទេ ដោយក្រុមហ៊ុនស្នើសុំរង់ចាំអ៊ុតមើលទាំងអស់គ្នា។
គួររំឭកថា កាលពីថ្ងៃទី ៣ ខែកុម្ភៈ ឆ្នាំ២០២៤ ក្រុមហ៊ុន PICG បានដាក់សម្ពោធសាកល្បងនូវផលិតផលក្នុងស្រុកជាសំបកកង់ឡានម៉ាក Sailun ដែលផលិតមុនគេ ធំជាងគេ ដែលប្រើប្រាស់ជ័រកៅស៊ូខ្មែរមុនគេរហូតដល់ ៩៥ភាគរយ។ អ្វីដែលមិនគួរអោយជឿ និងមិនស្មានដល់នោះគ្រាន់តែមួយយប់មានការបញ្ជាទិញរហូតដល់ជាង ១ មុឺនគ្រាប់ឯណោះ។ ចាប់តាំងពីពេលនោះរហូតមកដល់បច្ចុប្បន្ននេះ ទោះបីក្នុងស្ថានភាពលំបាក ជាពិសេសសង្រ្គាមរវាងខ្មែរ-ថៃ ប្រជាជនខ្មែររឹតតែសម្រុកមកគាំទ្រនូវផលិតផលដ៏ល្អឥតខ្ចោះមួយនេះ ដែលផលិតចេញពីជ័រកៅស៊ូខ្មែរស្ទើរតែ១០០ភាគរយ ដែលដុះលើទឹកដីខ្មែរ រោងចក្រផលិតលើដីខ្មែរ ជួយដល់កសិផលជាតិ ជាផលិតផលជាតិ ជួយគាំទ្រសេដ្ឋកិច្ចជាតិ៕
