ក្រុមហ៊ុន កាណាឌីយ៉ា អុីនវេសមិន ហូលឌីង ភីអិលស៊ី (Canadia Investment Holding) ដែលមានលោកអ្នកឧកញ៉ា ពុង ឃាវសែ ជាប្រធានក្រុមប្រឹក្សាភិបាលក្រុមហ៊ុន នៅថ្ងៃទី១៦ ខែមីនា ឆ្នាំ២០២៦ បានបង្ហាញថា ធនាគារចំនួនពីរ ដែលជាបុត្រសម្ព័ន្ធរបស់ខ្លួន មានទ្រព្យសកម្មជាង ១០ពាន់លានដុល្លារ ដែលធានាបាននូវទំនុកចិត្តក្នុងការផ្តល់សេវាកម្មហិរញ្ញវត្ថុនៅកម្ពុជា។
តាមរយៈបណ្តាញសង្គម ក្រុមហ៊ុនបានបញ្ជាក់ថា ជាងបីទសវត្សរ៍នៃឧត្តមភាពផ្នែកហិរញ្ញវត្ថុ ភាពជឿជាក់ និងទំនុកចិត្ត ក្រុមហ៊ុន កាណាឌីយ៉ា អុីនវេសមិន ហូលឌីង ភីអិលស៊ី តាមរយៈក្រុមហ៊ុនបុត្រសម្ព័ន្ធរបស់ខ្លួន រួមមានធនាគារ កាណាឌីយ៉ា និងធនាគារប្រៃសណីយ៍កម្ពុជា បានបន្តអភិវឌ្ឍ និងថែរក្សាកេរ្តិ៍ឈ្មោះដ៏រឹងមាំ ក្នុងការផ្តល់សេវាហិរញ្ញវត្ថុប្រកបដោយភាពជឿជាក់ និងទំនុកចិត្តខ្ពស់នៅក្នុងវិស័យធនាគារនៃព្រះរាជាណាចក្រកម្ពុជា។
ជាមួយនឹងទ្រព្យសកម្មសរុបលើសពី ១០ ពាន់លានដុល្លារ ក្រុមហ៊ុនមានមូលដ្ឋានហិរញ្ញវត្ថុ និងស្ថានភាពដើមទុនដ៏រឹងមាំ គាំទ្រដោយមូលនិធិគ្រប់គ្រាន់ អភិបាលកិច្ចប្រកបដោយស្តង់ដារខ្ពស់ និងការប្តេជ្ញាចិត្តយូរអង្វែង ក្នុងការគាំទ្រការអភិវឌ្ឍប្រព័ន្ធហិរញ្ញវត្ថុនៅកម្ពុជា ព្រមទាំងបន្តបម្រើតម្រូវការដែលកំពុងរីកចម្រើនរបស់អតិថិជនយ៉ាងមានប្រសិទ្ធភាព។
ក្រុមហ៊ុនមានទំនុកចិត្តយ៉ាងមុតមាំលើភាពធន់ និងស្ថិរភាពនៃវិស័យធនាគារនៅកម្ពុជា ក្រោមការដឹកនាំរបស់ ធនាគារជាតិនៃកម្ពុជា។ ជាមួយគ្នានេះផងដែរ ក្រុមហ៊ុនសូមលើកទឹកចិត្តសាធារណជនឱ្យពឹងផ្អែកលើប្រភពព័ត៌មានដែលមានភាពច្បាស់លាស់ និងអាចជឿទុកចិត្តបាន ដើម្បីរួមចំណែកថែរក្សាទំនុកចិត្ត និងភាពថ្លៃថ្នូរនៃប្រព័ន្ធហិរញ្ញវត្ថុជាតិ។
សូមជម្រាបថា ចាប់ផ្តើមពីការបង្កើត ធនាគារកាណាឌីយ៉ា (Canadia Bank) ក្នុងទសវត្សរ៍ឆ្នាំ ១៩៩០ លោកអ្នកឧកញ៉ា ពុង ឃាវសែ បានខឹតខំប្រឹងប្រែងពង្រឹងប្រព័ន្ធធនាគារនៅកម្ពុជា និងបានភ្ជាប់ទំនាក់ទំនងឱ្យប្រសើរវិញទៅកាន់ទីផ្សារក្នុងតំតំបន់ និងអន្តរជាតិ។ ជាមួយនឹងជំនាញ និងបទពិសោធន៍ដ៏ច្រើនក្នុងវិស័យធនាគារ និងហិរញ្ញវត្ថុ បច្ចុប្បន្នលោកបានអភិវឌ្ឍបន្តនូវរចនាសម្ព័ន្ធរបស់ Canadia Group ដោយមាន Canadia Investment Holding ដែលជាក្រុមហ៊ុនបុត្រសម្ព័ន្ធហិរញ្ញវត្ថុ និង OCIC ក្រុមហ៊ុនអភិវឌ្ឍលើវិស័យហេដ្ឋារចនាសម្ព័ន្ធ អចលនទ្រព្យ សុខាភិបាល និងអប់រំ ដោយផ្តោតសំខាន់លើអតិថិជន និងសហគមន៍ទាំងមូលផងដែរ៕
