សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា កាលល្ងាចថ្ងៃទី៨ ខែតុលា ឆ្នាំ២០២៥ បានស្នើឱ្យរាជរដ្ឋាភិបាល និងអាជ្ញាធរគ្រប់លំដាប់ថ្នាក់ កម្ចាត់ចោលមន្ត្រីនិងឈ្មួញ ដែលនៅបន្តលួចនាំទំនិញថៃចូល ក្នុងពេលព្រំដែននៅបិទ។ សំណើរបស់ប្រធានព្រឹទ្ធសភាបែបនេះ បន្ទាប់ពីផ្ទុះមានករណីនាំចូលទំនិញជាច្រើនតោនពីថៃមកកម្ពុជា។
សម្ដេច ហ៊ុន សែន តាមរយៈបណ្ដាញសង្គមផ្ទាល់ខ្លួន បានបញ្ជាក់បន្ថែមថា ការបន្ដលួចនាំទំនិញពីថៃចូលមកកម្ពុជា ធ្វើឱ្យអ្នកជិតខាងមើលងាយកម្ពុជាថាអត់ទំនិញគេមិនបាន។ ហេតុនេះអ្នកដែលលួចនាំទំនិញចូលនេះសម្ដេចថា ប្រសិនបើសម្ដេចនៅធ្វើនាយករដ្ឋមន្ត្រីដូចពេលមុន សម្ដេចនឹងចេញបញ្ជាចាប់ខ្លួនឬដកចេញពីមន្ត្រីតែម្តង។ តែទោះជាមិនកាន់តួនាទីជានាយករដ្ឋមន្ដ្រី ប្រធានព្រឹទ្ធសភាកម្ពុជាបានផ្ដាំផ្ញើថា “សូមកុំគិតថាឆ្មាមិននៅកណ្តុរឡើងរាជ្យឱ្យសោះ”។
សំណើរបស់សម្ដេចតេជោ ហ៊ុន សែន ខាងលើ ទទួលបានការគាំទ្រពីប្រជាពលរដ្ឋកម្ពុជាយ៉ាងច្រើន ហើយពលរដ្ឋកម្ពុជាក៏ចង់ឃើញរាជរដ្ឋាភិបាល វែកមុខមន្ដ្រីដែលពាក់ព័ន្ធផងដែរ។
សូមជម្រាបថា បន្ទាប់ពីមានបញ្ហាជម្លោះព្រំដែនកម្ពុជា-ថៃ រាជរដ្ឋាភិបាលកម្ពុជា និងថៃ បានចាត់វិធានការទៅវិញទៅមកជាបន្តបន្ទាប់ ក្នុងនោះរួមទាំងការបិទព្រំដែនដីគោក និងហាមឃាត់ការនាំចូលទំនិញពីប្រទេសថៃផងដែរ។ ទោះយ៉ាងណា មួយរយៈចុងក្រោយនេះ ក៏នៅមានមន្ត្រីនិងឈ្មួញមួយចំនួន លួចនាំចូលសាច់បង្កករាប់តោន មកដល់រាជធានីភ្នំពេញ ហើយថ្មីៗនេះក៏បែកធ្លាយថាឈ្មួញលួចនាំចូលទុរេនពីថៃទៀតផងដែរ៕
