កំពូលអ្នកមានដាច់គេរបស់ទ្វីបអាហ្រ្វិក លោក Aliko Dangote មានគម្រោងបរិច្ចាគទ្រព្យសម្បត្តិមួយភាគបីរបស់លោកទៅឲ្យអង្គការសប្បុរសធម៌ ដែលជាផ្នែកមួយនៃផែនការបែងចែកទ្រព្យរបស់លោកនាពេលអនាគត។ នេះបើតាមការបង្ហើបរបស់កូនស្រីរបស់លោក គឺលោកស្រី Halima Dangote។
លោកស្រី Halima ដែលជាអ្នកទទួលបន្ទុកលើមូលនិធិសប្បុរសធម៌របស់លោក Aliko Dangote បានបង្ហាញពីការបែងចែកនេះ នៅក្នុងបទសម្ភាសមួយជាមួយ Bloomberg ដោយនិយាយថា មហាសេដ្ឋីលំដាប់កំពូលរូបនេះ បានទទួលការគាំទ្រពីគ្រួសារក្នុងការបរិច្ចាគទ្រព្យសម្បត្តិចំនួន ៣៣% នៃទ្រព្យសរុបរបស់លោកទៅឲ្យអង្គការសប្បុរសធម៌។
យោងតាមសន្ទស្សន៍មហាសេដ្ឋី Bloomberg បានបង្ហាញថា ទ្រព្យសម្បត្តិសរុបរបស់លោក Dangote ត្រូវបានប៉ាន់ប្រមាណថាមានចំនួន៣៥,១ពាន់លានដុល្លារ ដែលនេះមានន័យថាមួយភាគបីនៃទ្រព្យសម្បត្តិបច្ចុប្បន្នរបស់លោកដែលនឹងត្រូវបរិច្ចាគទៅអង្គការសប្បុរសធម៌ នឹងមានចំនួនប្រហែល ១១,៧ពាន់លានដុល្លារ។
យ៉ាងណាមិញ ដោយពន្យល់ពីការសម្រេចចិត្តនេះ លោកស្រី Halima បាននិយាយថា ឪពុករបស់លោកស្រី ចាត់ទុកថាអង្គការសប្បុរសធម៌ជាចំណុចស្នូលនៃការបែងចែកមរតករបស់លោក ហើយបានបញ្ចូលវាទៅក្នុងផែនការស្នងមរតករយៈពេលវែងរបស់គ្រួសារផងដែរ។
គួរជម្រាបជូនងផងដែរថា លោក Aliko Dangote គឺជាស្ថាបនិក ប្រធាន និងជានាយកប្រតិបត្តិនៃក្រុមហ៊ុន Dangote Industries Limited ដែលជាក្រុមហ៊ុនធំជាងគេនៅអាហ្វ្រិកខាងលិច និងមានប្រតិបត្តិការគ្របដណ្តប់លើប្រទេសអាហ្វ្រិកចំនួន ១៧។ ក្រុមហ៊ុននេះកាន់កាប់អាជីវកម្មសំខាន់ៗ និងក្រុមហ៊ុនបុត្រសម្ព័ន្ធដែលគ្របដណ្តប់លើឧស្សាហកម្មសំខាន់ៗជាច្រើន៕
