មហាសេដ្ឋីអាមេរិកជាច្រើន កំពុងព្យាយាមប្រឹងប្រែងយ៉ាងខ្លាំងដើម្បីទទួលបានកៅអីមួយនៅក្នុងពិធីលៀងសាយភោជន៍ផ្លូវការស្វាគមន៍ប្រធានាធិបតីចិន លោក ស៊ី ជិនពីង មកកាន់ទឹកដីសហរដ្ឋអាមេរិក។ នេះបើតាមការចុះផ្សាយពីសារព័ត៌មាន AFP។
កម្មពិធីទទួលបដិសណ្ឋារកិច្ចនៅសេតវិមានសម្រាប់ប្រធានាធិបតីចិន លោក ស៊ី ជិនពីង នៅក្នុងពេលដ៏ខ្លីខាងមុខនេះ កំពុងក្លាយជា “សំបុត្រដែលមានតម្លៃថ្លៃបំផុត” នៅទីក្រុងវ៉ាស៊ីនតោននាពេលនេះ ខណៈពេលដែលកំពូលអ្នកជំនួញផ្នែកបច្ចេកវិទ្យា និងអ្នកគ្រប់គ្រងមូលនិធិនានាកំពុងប្រកួតប្រជែងគ្នាដើម្បីទទួលបានការគាំទ្រពីសំណាក់ ប្រធានាធិបតី ដូណាល់ ត្រាំ ដើម្បីបានកៅអីមួយនៅតុអាហារ។
យ៉ាងណាមិញ បើយោងតាមកាសែត The NY Post ដោយផ្អែកលើប្រភពដែលស្និទ្ធនឹងរឿងនេះ បានរាយការណ៍ថា បុគ្គលសំខាន់ៗដែលបានរួមដំណើរជាមួយលោក ត្រាំ ទៅកាន់ទីក្រុងប៉េកាំងកាលពីខែឧសភា ដូចជាមហាសេដ្ឋី Elon Musk, ថ្នាក់ដឹកនាំក្រុមហ៊ុន Nvidia លោក Jensen Huang, លោក Stephen Schwarzman មេធំក្រុមហ៊ុន Blackstone និងលោកស្រី Dina Powell នាយកប្រតិបត្តិក្រុមហ៊ុន Facebook សុទ្ធតែកំពុងប្រកួតប្រជែងគ្នាដើម្បីទទួលបានលិខិតអញ្ជើញចូលរួមពិធីជប់លៀងនាថ្ងៃទី២៤ ខែកញ្ញាខាងមុខនេះ។
គួរជម្រាបជូនថា ភាពតានតឹងរវាងអាមេរិក និងចិនកំពុងកើនឡើង ខណៈពេលដែលភាគីទាំងពីរកំពុងប្រជែងគ្នាយ៉ាងស្វិតស្វាញដើម្បីដណ្តើមតំណែងនាំមុខគេលើវិស័យវិទ្យាសាស្ត្រ និងបច្ចេកវិទ្យា។ ទីក្រុងប៉េកាំងព្រួយបារម្ភថាការបន្ធូរបន្ថយការគ្រប់គ្រងលើ AI របស់វ៉ាស៊ីនតោនអាចធ្វើឱ្យបច្ចេកវិទ្យានេះរីកចម្រើនហួសពីការប៉ាន់ស្មាន ខណៈពេលដែលអាមេរិកតែងតែបារម្ភថាចិនអាចចម្លងបច្ចេកវិទ្យាជឿនលឿនរបស់ខ្លួន៕
