ភ្នំពេញ៖ រដូវកាលកាន់បិណ្ឌ និងភ្ជុំបិណ្ឌ ជាពេលវេលាដ៏មានអត្ថន័យសម្រាប់ពុទ្ធសាសនិកខ្មែរ ដើម្បីឧទ្ទិសកុសលផលបុណ្យជូនបុព្វការីជនដែលបានចែកឋានទៅ។ ក្នុងស្មារតីនេះ ជីប ម៉ុង នឹងរៀបចំពិធីកាន់បិណ្ឌវេនទី៧ រាប់បាត្រព្រះសង្ឃសរុប ១,០០០ អង្គ នៅផ្សារទំនើប ជីប ម៉ុង ២៧១ មេហ្គា ម៉ល ដើម្បីរួមគ្នាធ្វើបុណ្យតាមប្រពៃណីព្រះពុទ្ធសាសនា និងបន្តរក្សាទំនៀមទម្លាប់ដ៏ល្អផូរផង់របស់ខ្មែរ។
ពិធីនេះ នឹងប្រព្រឹត្តទៅនៅថ្ងៃទី០៣ ខែតុលា ឆ្នាំ២០២៦ ដោយមានការចូលរួមពីលោកអគ្គនាយកបន្តវេនទាំង៤ ថ្នាក់ដឹកនាំ និងបុគ្គលិកមកពីពហុពាណិជ្ជកម្មនានារបស់ ជីប ម៉ុង ហើយក៏បើកទូលាយសម្រាប់បងប្អូន ពុទ្ធបរិស័ទ និងសាធារណជនចូលរួមផងដែរ ដើម្បីរួមគ្នាធ្វើបុណ្យ បន្តតម្លៃនៃកតញ្ញូធម៌ និងចូលរួមថែរក្សាវប្បធម៌នេះឱ្យនៅគង់វង្សសម្រាប់ជំនាន់ក្រោយ។
កុសលផលពីពិធីនេះ នឹងត្រូវឧទ្ទិសជូនដល់វីរកងទ័ពដែលបានពលីជីវិត ដើម្បីរំលឹកដល់ការលះបង់ និងសម្តែងការដឹងគុណចំពោះអ្នកដែលបានបំពេញភារកិច្ចដើម្បីជាតិរហូតដល់ដង្ហើមចុងក្រោយ។
ជាក្រុមហ៊ុនដែលបង្កើតឡើងដោយសហគ្រិនខ្មែរ ជីប ម៉ុង តែងតែចូលរួមយ៉ាងសកម្ម ដើម្បីផ្តល់ត្រឡប់ទៅកាន់សង្គមវិញ តាមរយៈការឧបត្ថម្ភ ផ្តល់ជាជំនួយ ឬសកម្មភាពសប្បុរសធម៌ជាច្រើនទៀត។ ផ្សារភ្ជាប់នឹងការបន្តថែរក្សាវប្បធម៌ ទំនៀមទម្លាប់ ក្នុងឱកាសបុណ្យភ្ជុំបិណ្ឌនេះ បងប្អូនសាធារណជនទាំងអស់ អាចចូលរួមពិធីកាន់បិណ្ឌ និងរាប់បាត្រ ដែលនឹងធ្វើឡើងនៅថ្ងៃទី០៣ ខែតុលា ឆ្នាំ២០២៦ ចាប់ពីម៉ោង ៧ព្រឹកតទៅ។
សទ្ធារាប់ពាន់ រួមបុណ្យរួមកុសលតែមួយ — ជួបគ្នានៅផ្សារទំនើប ជីប ម៉ុង ២៧១ មេហ្គា ម៉ល
