ឧស្សាហកម្មផលិតស្ករសរបស់កម្ពុជាកំពុងតែឈានចូលដល់របត់ថ្មីមួយ ដោយសារតែរោងចក្រផលិតស្ករសដ៏ធំទី៣ ស្ថិតនៅក្នុងខេត្តព្រះវិហារ ដែលជាខេត្តជាប់ព្រំដែនមួយនេះត្រូវបានរំពឹងថានឹងចាប់ផ្តើមដំណើរការផលិតកម្មឡើងវិញនៅដើមឆ្នាំ២០២៧ ខាងមុខនេះ។ ការរស់ឡើងវិញនៃរោងចក្រនេះ កើតឡើងបន្ទាប់ពីក្រុមហ៊ុនមកពីទីក្រុងហុងកុងបានសម្រេចចិត្តទិញយក ដោយរោងចក្រនេះត្រូវបានបិទទ្វារ និងទុកចោលអស់រយៈពេលជាង ១០ ឆ្នាំកន្លងមកហើយ។
ជាប្រវត្តិសាស្ត្រ បន្ទាប់ពីឆ្លងកាត់ការខូចខាត និងផលប៉ះពាល់ពីសង្គ្រាមឈ្លានពានរបស់ថៃមកលើកម្ពុជានៅតំបន់ព្រំដែន រោងចក្រផលិតស្ករសនៅក្នុងប្រទេសបានខិតខំងើបឈរ និងមានជីវិតរស់រានឡើងវិញជាបន្តបន្ទាប់។ គួរឱ្យដឹងថា បច្ចុប្បន្ន កម្ពុជាមានរោងចក្រផលិតស្ករសចំនួន ២ ដែលកំពុងដំណើរការយ៉ាងសកម្ម ដោយក្នុងនោះមួយមានទីតាំងនៅខេត្តកំពង់ស្ពឺ និងមួយទៀតស្ថិតនៅខេត្តក្រចេះ។
រោងចក្រទាំងពីរដែលកំពុងដំណើរការនេះ មានសមត្ថភាពផលិតស្ករសបានរហូតដល់ទៅ ១៥ ម៉ឺនតោនក្នុងមួយឆ្នាំ។ មិនតែប៉ុណ្ណោះ ក្រុមហ៊ុនប្រតិបត្តិការក៏កំពុងតែពង្រីកសង្វាក់ផលិតកម្មរបស់ខ្លួនឱ្យកាន់តែធំជាងមុនផងដែរ ដើម្បីឆ្លើយតប និងបំពេញតម្រូវការប្រើប្រាស់នៅក្នុងស្រុកដែលកំពុងមានការកើនឡើងជាលំដាប់។
បើតាមមន្ទីរព័ត៌មានខេត្តបាត់ដំបង បានឱ្យដឹងថា ការគ្រោងបើកដំណើរការឡើងវិញនៃរោងចក្រស្ករសនេះ មិនត្រឹមតែស្រូបយកកម្លាំងពលកម្មផ្ទាល់ក្នុងស្រុករាប់ពាន់នាក់ប៉ុណ្ណោះទេ ប៉ុន្តែថែមទាំងបើកច្រកទីផ្សារកសិកម្មថ្មីមួយទៀត ដល់បងប្អូនប្រជាពលរដ្ឋដែលមានដី អាចដាំដំណាំអំពៅដើម្បីលក់ផ្គត់ផ្គង់រោងចក្រ បង្កើនប្រាក់ចំណូលគ្រួសារឱ្យកាន់តែរឹងមាំ។
គួររំឭកថា រោងចក្រផលិតស្ករសនៅទឹកដីខេត្តព្រះវិហារ បោះទុនដំបូងរបស់ក្រុមហ៊ុនរ៉ូយ ហ្វេង ក្នុងទំហំវិនិយោគមានតម្លៃ៣៦០លានដុល្លារសហរដ្ឋអាមេរិក និងបានសម្ពោធដាក់ឲ្យដំណើរការកាលពីថ្ងៃទី១៩ មេសា ឆ្នាំ២០១៦កន្លងទៅ មានទីតាំងនៅស្រុកឆែប ប៉ុន្តែគ្រាន់តែដំណើរការបាន ៥០ ថ្ងៃដំបូង ក៏ត្រូវផ្អាកផលិតកម្មមួយរយៈធំ ដោយសារកង្វះខាតអំពៅផ្គត់ផ្គង់។
បើតាមរបាយការណ៍ របស់ក្រសួងពាណិជ្ជកម្ម រយៈពេល៩ខែ ឆ្នាំ២០២៦នេះ កម្ពុជាបាននាំចូលស្ករស ក្នុងទំហំទឹកប្រាក់ចំនួន១៦៣លានដុល្លារ កើនឡើង៧៣.៨៦ភាគរយ បើធៀបនឹងរយៈពេលដូចគ្នា នៅក្នុងឆ្នាំ២០២៥ ។ ដោយឡែកចំពោះការនាំចេញវិញ កម្ពុជាបាននាំចេញស្ករ ក្នុងទំហំទឹកប្រាក់ចំនួន១៨.៩លានដុល្លារ ធ្លាក់ចុះ៥៨ភាគរយ បើធៀបនឹងរយៈពេលដូចគ្នា នៅក្នុងឆ្នាំ២០២៥៕
