ភ្នំពេញ, ថ្ងៃទី១៩ ខែតុលា ឆ្នាំ២០២៦ – ធនាគារពាណិជ្ជកម្មក្រៅប្រទេស នៃកម្ពុជា (FTB) បានរៀបចំពិធីចុះហត្ថលេខាដ៏មានសារៈសំខាន់លើ «កិច្ចព្រមព្រៀងស្ដីពីការអនុវត្តគម្រោងហិរញ្ញប្បទានប្រសិទ្ធភាពថាមពល (EERF)» រវាង FTB និង ធនាគារសហគ្រាសធុនតូច និងមធ្យម កម្ពុជា (SME Bank) និង «កិច្ចព្រមព្រៀងស្ដីពីគម្រោងធានាឥណទានសម្រាប់ប្រសិទ្ធភាពថាមពល (EEGS)» រវាង FTB និង សាជីវកម្មធានាឥណទានកម្ពុជា (CGCC)។
គម្រោងនេះបង្កើតឡើងដើម្បីពង្រីកលទ្ធភាពទទួលបានឥណទានដល់សហគ្រាស សម្រាប់ការវិនិយោគលើបច្ចេកវិទ្យា ម៉ាស៊ីន បរិក្ខារ អគារ និងប្រព័ន្ធផលិតកម្មដែលប្រើប្រាស់ថាមពលកាន់តែមានប្រសិទ្ធភាព ក្រោមការគាំទ្រហិរញ្ញវត្ថុ និងបច្ចេកទេសពីធនាគារអភិវឌ្ឍន៍អាស៊ី (ADB) និងក្រសួងរ៉ែ និងថាមពល។
លោក ឌិត សុចល ប្រធាននាយកប្រតិបត្តិធនាគារ FTB បានមានប្រសាសន៍ថា៖«ពិធីចុះហត្ថលេខានាឱកាសនេះ មិនត្រឹមតែឆ្លុះបញ្ចាំងពីកិច្ចសហប្រតិបត្តិការជាយុទ្ធសាស្ត្ររវាងធនាគារ FTB ធនាគារ SME Bank និងសាជីវកម្មធានាឥណទានកម្ពុជា (CGCC) ប៉ុណ្ណោះទេ ប៉ុន្តែក៏បង្ហាញពីការប្ដេជ្ញាចិត្តរួមគ្នារបស់យើងក្នុងការគាំទ្រដល់ការធ្វើទំនើបកម្មសហគ្រាស ការបង្កើនប្រសិទ្ធភាពថាមពល ការលើកកម្ពស់ហិរញ្ញវត្ថុបៃតង និងការអភិវឌ្ឍសេដ្ឋកិច្ចប្រកបដោយចីរភាពនៅកម្ពុជាផងដែរ។»
លោក ជា សុភ័ក្ត អគ្គនាយក នៃធនាគារសហគ្រាសធុនតូច និងមធ្យម កម្ពុជា ម.ក បានមានប្រសាសន៍ថា៖ “គម្រោងហិរញ្ញប្បទានប្រសិទ្ធភាពថាមពល បានត្រៀមថវិកាសរុបចំនួន ២០ លានដុល្លារអាម៉េរិក សម្រាប់ធនាគារដៃគូ ក្នុងនោះរួមមានទាំង ធនាគារ FTB ផងដែរ ដើម្បីយកទៅផ្តល់ហិរញ្ញប្បទានដល់អាជីវកម្ម ដែលវិនិយោគលើប្រសិទ្ធភាពថាមពល។ ជារួម, ក្នុងកិច្ចសហប្រតិបត្តិការនេះធនាគារ FTB ទទួលបន្ទុកក្នុងការស្វែងរកអតិថិជន ពិនិត្យ និងអនុម័តលើសំណើសុំឥណទានរបស់ម្ចាស់អាជីវកម្ម ស្របតាមលក្ខខណ្ឌគម្រោង និងលក្ខណៈវិនិច្ឆ័យតាមគោលការណ៍ផ្តល់ឥណទានផ្ទៃក្នុងរបស់ខ្លួន ខណៈធនាគារ SME ជាអ្នកបញ្ចេញឥណទាន (drawdown) ទៅធនាគារ FTB សម្រាប់ផ្តល់កម្ចីបន្តទៅម្ចាស់អាជីវកម្ម។ ជាមួយគ្នានេះ ដើម្បីបង្កើនលទ្ធភាពទទួលបានហិរញ្ញប្បទានសម្រាប់អាជីវកម្ម ដែលខ្វះទ្រព្យធានា, CGCC នឹងផ្តល់ការគាំទ្រផ្នែកធានាឥណទាន ស្របតាមលក្ខខណ្ឌនៃគម្រោងរបស់ខ្លួន។”
លោក ណូ លីដា អគ្គនាយក CGCC មានប្រសាសន៍ថា “ពិធីចុះហត្ថលេខានាពេលនេះ គឺជាភស្តុតាងដ៏ប្រសើរមួយ នៃការសហការ រវាងស្ថាប័នពាក់ព័ន្ធ ដើម្បីដោះស្រាយបញ្ហារួមគ្នា ដែលរួមមានទាំងស្ថាប័នរដ្ឋ (ក្រសួងរ៉ែ និងថាមពល, CGCC និង SME Bank), ស្ថាប័នឯកជន (FTB Bank) និង ដៃគូអភិវឌ្ឍន៍ (ADB) ក្នុងការរួមគ្នាជំរុញការវិនិយោគលើប្រសិទ្ធភាពថាមពល និងគាំទ្រការអភិវឌ្ឍសេដ្ឋកិច្ចប្រកបដោយចីរភាពនៅកម្ពុជា។ ដើម្បីគាំទ្រដល់ការអនុវត្តគម្រោង EERF នេះ CGCC បានបង្កើត Energy Efficient Guarantee Scheme (EEGS) ក្នុងគោលដៅផ្តល់ការធានាលើកម្ចីសរុប ក្នុងទំហំ ២០លានដុល្លារ។ ការធានារបស់ CGCC ក្រោមគម្រោង EEGS នេះ នឹងដើរតួជាកាតាលីករដ៏សំខាន់ ក្នុងការបង្កើនលទ្ធភាពទទួលបានហិរញ្ញប្បទានរបស់សហគ្រាសធុនតូច និងមធ្យមដែលមានគុណវុឌ្ឍិ ដើម្បីប្រើប្រាស់ជាទុនបង្វិល ឬការវិនិយោគលើគម្រោង ដែលពាក់ព័ន្ធនឹងការបង្កើនប្រសិទ្ធភាពនៃការប្រើប្រាស់ថាមពល និងជួយជំរុញឱ្យមានការផ្តល់ហិរញ្ញប្បទានកាន់តែច្រើនទៅកាន់គម្រោងថាមពលស្អាត និងគម្រោងដែលបង្កើនប្រសិទ្ធភាពថាមពល។”
តាមរយៈគម្រោង EERF នេះ ម្ចាស់អាជីវកម្ម និងសហគ្រាសធុនតូច និងមធ្យម នឹងទទួលបាននូវដំណោះស្រាយហិរញ្ញវត្ថុដែលមានអត្រាការប្រាក់សមរម្យ រយៈពេលឥណទានអំណោយផល និងយន្តការធានាឥណទាន ដែលជួយកាត់បន្ថយតម្រូវការទ្រព្យធានា សម្រួលថ្លៃដើមប្រតិបត្តិការ បង្កើនផលិតភាព និងកាត់បន្ថយការបំភាយឧស្ម័នផ្ទះកញ្ចក់ ព្រមទាំងផ្តល់អាទិភាពដល់សហគ្រាសដែលដឹកនាំដោយស្ត្រីផងដែរ ដើម្បីលើកកម្ពស់សមភាពយេនឌ័រ និងបរិយាបន្នហិរញ្ញវត្ថុ៕
