លោក ហេង សួរ រដ្ឋមន្រ្តីក្រសួងការងារ និងបណ្តុះបណ្តាលវិជ្ជាជីវៈ បានលើកទឹកចិត្តដល់សមាគមជនជាតិខ្មែររស់នៅប្រទេសជប៉ុន (CAJ) ឱ្យបន្តពង្រីកកិច្ចសហប្រតិបត្តិការ និងពង្រឹងតួនាទីជាស្ពានតភ្ជាប់រវាងកម្ពុជា និងជប៉ុន ក្នុងទិសដៅទាក់ទាញការវិនិយោគ និងគាំពារពលរដ្ឋខ្មែរ។ ការថ្លែងនេះធ្វើឡើងក្នុងជំនួបសម្តែងការគួរសម និងពិភាក្សាការងារជាមួយ លោក ហៃ វណ្ណា ប្រធានសមាគម CAJ នាព្រឹកថ្ងៃទី៣ ខែវិច្ឆិកា ឆ្នាំ២០២៦ នៅទីស្ដីការក្រសួង។
ក្នុងឱកាសនោះ លោករដ្ឋមន្ត្រីបានកោតសរសើរសមាគម CAJ ដែលបានចុះបញ្ជីជាអង្គការមិនមែនរដ្ឋាភិបាល (NPO) ស្របច្បាប់នៅជប៉ុន ដែលជាមូលដ្ឋានរឹងមាំក្នុងការកសាងទំនុកចិត្ត ព្រមទាំងបានសម្របសម្រួលឱ្យមានជំនួបការងាររវាងក្រសួង និងក្រុមហ៊ុន TOKO Electrical Construction Co., Ltd. ផងដែរ។
លោករដ្ឋមន្ត្រីបានផ្តល់អនុសាសន៍ថា ការធ្វើការជាមួយដៃគូជប៉ុនទាមទារនូវ «ពេលវេលា ភាពច្បាស់លាស់ ភាពស្មោះត្រង់ និងតម្លាភាព» ដោយសមាគមត្រូវបន្តកសាងទំនុកចិត្តជាជំហានៗ និងពង្រីកបណ្តាញទំនាក់ទំនងជាមួយថ្នាក់ដឹកនាំ និងសមាជិកសភាជប៉ុនគ្រប់កម្រិត ដើម្បីទាក់ទាញការវិនិយោគមកកាន់កម្ពុជាឱ្យកាន់តែមានប្រសិទ្ធភាព។
ជាការឆ្លើយតប លោក ហៃ វណ្ណា បានថ្លែងអំណរគុណចំពោះការគាំទ្រ និងអនុសាសន៍ណែនាំដ៏មានតម្លៃ ព្រមទាំងបានប្តេជ្ញាចិត្តខិតខំបំពេញតួនាទីជាស្ពានតភ្ជាប់ ជួយដោះស្រាយបញ្ហាប្រឈម និងជំរុញឱ្យបងប្អូនខ្មែរនៅជប៉ុនបន្តរក្សាអត្តសញ្ញាណ វប្បធម៌ និងប្រពៃណីជាតិឱ្យបានល្អប្រសើរ ដើម្បីជាឧត្តមប្រយោជន៍សម្រាប់កម្ពុជា៕
