អ្នកឧកញ៉ា គិត ម៉េង អញ្ជើញចុះ MoU ៤ចំណុច រវាងសភាពាណិជ្ជកម្មកម្ពុជា និងសម្ព័ន្ធសហគ្រាសបារាំង លើការពង្រឹងទំនាក់ទំនង ពាណិជ្ជកម្ម និងវិនិយោគ

ជុំវិញ​ឧកញ៉ា

ក្នុងក្របខ័ណ្ឌនៃជំនួបសហគ្រិនហ្វ្រង់កូហ្វូន (REF) ដែលប្រារព្ធឡើងស្របពេលជាមួយកិច្ចប្រជុំកំពូលហ្វ្រង់កូហ្វូនី​លើកទី២០ នៅរាជធានីភ្នំពេញ សភាពាណិជ្ជកម្មកម្ពុជា និងសម្ព័ន្ធសហគ្រាសបារាំង បានចុះហត្ថលេខាជាផ្លូវការ​លើអនុស្សរណៈនៃការយោគយល់គ្នា (MoU) ស្តីពីការពង្រឹង និងពង្រីកកិច្ចសហប្រតិបត្តិការពាណិជ្ជកម្ម និងវិនិយោគទ្វេភាគី។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

ពិធីចុះហត្ថលេខាដ៏មានសារៈសំខាន់នេះ បានប្រព្រឹត្តទៅក្រោមអធិបតីភាពរបស់ថ្នាក់ដឹកនាំជាន់ខ្ពស់​នៃស្ថាប័ន​ទាំងពីរ គឺ អ្នកឧកញ៉ា គិត ម៉េង ប្រធានសភាពាណិជ្ជកម្មកម្ពុជា និង លោក ប៉ាទ្រីក ម៉ាទីន (Patrick Martin) ប្រធានសម្ព័ន្ធសហគ្រាសបារាំង ព្រមទាំងមានការអញ្ជើញចូលរួមធ្វើជា​សាក្សីពីសំណាក់មន្ត្រីជាន់ខ្ពស់​រាជរដ្ឋាភិបាលកម្ពុជា តំណាងស្ថានទូតបារាំង អ្នកវិនិយោគ និងធុរជនជាតិ-អន្តរជាតិយ៉ាងច្រើនកុះករ។

អនុស្សរណៈនៃការយោគយល់គ្នានេះ ត្រូវបានបង្កើតឡើងក្នុងគោលបំណងបង្កើតយន្តការ​សហប្រតិបត្តិការ​ជាក់ស្តែង និងរយៈពេលវែងរវាងវិស័យឯកជននៃប្រទេសទាំងពីរ ដោយផ្តោតលើសសរស្តម្ភសំខាន់ៗចំនួន៤ ដែលរួមមាន៖

១.ការផ្លាស់ប្តូរព័ត៌មានសេដ្ឋកិច្ច និងកាលានុវត្តភាពវិនិយោគ៖ ដោយភាគីទាំងពីរនឹងសម្របសម្រួល​ការចែករំលែកទិន្នន័យទីផ្សារ បទប្បញ្ញត្តិពាណិជ្ជកម្ម និងគម្រោងវិនិយោគសក្តានុពល ដើម្បីផ្តល់ភាពងាយស្រួល​ដល់ក្រុមហ៊ុនបារាំងដែលមានបំណងមកបណ្តាក់ទុននៅកម្ពុជា ក៏ដូចជាក្រុមហ៊ុនកម្ពុជា​ដែលចង់ពង្រីកទីផ្សារទៅ​កាន់ប្រទេសបារាំង និងសហភាពអឺរ៉ុប។

២.ការរៀបចំបេសកកម្មធុរកិច្ច និងវេទិកាផ្គូផ្គងអាជីវកម្ម (B2B)៖ ដោយស្ថាប័នទាំងពីរ នឹងសហការគ្នារៀបចំ​ដំណើរទស្សនកិច្ចសិក្សា ពិព័រណ៍ពាណិជ្ជកម្ម និងជំនួបផ្គូផ្គងអាជីវកម្មដោយផ្ទាល់រវាងសហគ្រាសធុនតូច មធ្យម ដើម្បីជំរុញការបង្កើតក្រុមហ៊ុនបណ្តាក់ទុនរួមគ្នា។

៣.ការផ្ទេរបច្ចេកវិទ្យា និងនវានុវត្តន៍៖ ដោយជំរុញកិច្ចសហការ​លើវិស័យអាទិភាព ដូចជា បច្ចេកវិទ្យាឌីជីថល ថាមពលស្អាត ហេដ្ឋារចនាសម្ព័ន្ធ កសិ-ឧស្សាហកម្ម ទេសចរណ៍ និងសុខាភិបាល តាមរយៈការចែករំលែ​កបទពិសោធន៍ និងជំនាញបច្ចេកទេសពីសហគ្រាសបារាំង។

៤.ការគាំទ្រសហគ្រិនភាព និងការបណ្តុះបណ្តាលធនធានមនុស្ស៖ ដោយមានកិច្ចសហការគ្នា​ទៅលើកម្មវិធី​អភិវឌ្ឍន៍សមត្ថភាពធុរជនវ័យក្មេង និងសហគ្រិនស្ត្រី ដើម្បីលើកកម្ពស់ស្តង់ដារអភិបាលកិច្ចសាជីវកម្ម និងភាព​ប្រកួតប្រជែងក្នុងតំបន់។

ថ្លែងក្នុងឱកាសពិធីចុះហត្ថលេខានេះ អ្នកឧកញ៉ា គិត ម៉េង បានសម្តែងនូវក្តីសោមនស្សរីករាយ និងវាយតម្លៃខ្ពស់​ចំពោះកិច្ចសហប្រតិបត្តិការជាមួយសម្ព័ន្ធសហគ្រាសបារាំង ដែលជាស្ថាប័នតំណាងឱ្យក្រុមហ៊ុនធំៗ និងឈានមុខគេ​របស់ប្រទេសបារាំង។ អ្នកឧកញ៉ាបានបញ្ជាក់ថា៖ «ការចុះហត្ថលេខានៅថ្ងៃនេះ គឺជាសក្ខីភាពថ្មី​មួយទៀតដែលបង្ហាញពីទំនុកចិត្តខ្ពស់របស់វិនិយោគិនបារាំង និងសហគមន៍ហ្វ្រង់កូហ្វូន មកលើបរិយាកាស​វិនិយោគដ៏អំណោយផល ស្ថិរភាពនយោបាយ និងសក្តានុពលសេដ្ឋកិច្ចរបស់កម្ពុជា។ សភាពាណិជ្ជកម្មកម្ពុជា ត្រៀមខ្លួនជាស្រេចក្នុងការធ្វើជាដៃគូដ៏រឹងមាំ ដើម្បីជួយសម្របសម្រួល និងតភ្ជាប់ធុរជន​បារាំងជាមួយឱកាស​វិនិយោគជាក់ស្តែងនៅកម្ពុជា ក៏ដូចជាការប្រើប្រាស់កម្ពុជាជាច្រកទ្វារទៅកាន់ទីផ្សារអាស៊ាន»។

ជាមួយគ្នានេះ លោក Patrick Martin ក៏បានគូសបញ្ជាក់អំពីចំណាប់អារម្មណ៍​យ៉ាងខ្លាំងរបស់សហគ្រាស​បារាំង​ចំពោះកំណើនសេដ្ឋកិច្ចដ៏ឆាប់រហ័សរបស់កម្ពុជា ជាពិសេសការអភិវឌ្ឍហេដ្ឋារចនាសម្ព័ន្ធ និងការផ្លាស់ប្តូរឌីជីថល​ផងដែរ។ លោកបានលើកឡើងថា៖ «កម្ពុជា គឺជាដៃគូសេដ្ឋកិច្ចដ៏មានសក្តានុពលនៅក្នុងតំបន់អាស៊ីអាគ្នេយ៍។ តាមរយៈកិច្ចព្រមព្រៀងជាមួយសភាពាណិជ្ជកម្មកម្ពុជានាពេលនេះ សហគ្រាសបារាំងនឹងមានយន្តការ​កាន់តែ​ច្បាស់លាស់ និងរហ័សរហួនក្នុងការស្វែងរកដៃគូអាជីវកម្ម ដើម្បីរួមចំណែកដល់ការអភិវឌ្ឍប្រកបដោយចីរភាព និងនវានុវត្តន៍នៅកម្ពុជា»៕