រដ្ឋាភិបាលកម្ពុជាសម្រេចបន្តជំរុញការអនុវត្តគោលនយោបាយស្តីពីការធ្វើចំណាកស្រុកការងារសម្រាប់កម្ពុជា ឆ្នាំ ២០១៩-២០២៣ និងបទដ្ឋានគតិយុត្តពាក់ព័ន្ធ ដើម្បីការពារ និងលើកកម្ពស់សិទ្ធិ និងផលប្រយោជន៍របស់កម្មករ រួមទាំងការការពារសង្គមក្នុងពេលកំពុងធ្វើការ និងត្រឡប់មកផ្ទះវិញ។ នេះបើតាមរបាយការណ៍លទ្ធផលការងារឆ្នាំ២០២១ និងទិសដៅការងារឆ្នាំ២០២២ របស់ក្រសួងការងារបណ្តុះបណ្តាល និងវិជ្ជាជីវៈ ដែលចេញផ្សាយកាលពីថ្ងៃសុក្រម្សិលមិញ។
ការដាក់ចេញនូវការបន្តជំរុញអនុវត្តគោលនយោបាយនេះ បន្ទាប់ពីក្រសួងការងាររកឃើញពលករចំណាកស្រុកខ្មែរដែលទៅធ្វើការនៅបរទេស បានផ្ញើប្រាក់ត្រឡប់មកក្រុមគ្រួសាររបស់ពួកគេ នៅស្រុកកំណើតយ៉ាងហោចណាស់១លាន៣សែននាក់ បានចាក់បញ្ចូលទឹកប្រាក់ត្រឡប់មកកម្ពុជាវិញ ប្រមាណ៣ពាន់លានដុល្លារនៅក្នុងមួយឆ្នាំៗ។
គួររម្លឹកថា គិតមកដល់ពេលបច្ចុប្បន្ននេះ ពលករកម្ពុជាដែលកំពុងធ្វើការនៅបរទេស មានចំនួនសរុបជាង ១លាន៣សែននាក់។ បើតាមក្រសួងការងារ សម្រាប់ប្រាក់ចំណូលពីក្រៅប្រទេសរបស់ក្រុមពលករខ្មែរនេះ រួមចំណែកមួយផ្នែកដល់កំណើនសេដ្ឋកិច្ចជាតិ ជាពិសេសដល់ការទ្រទ្រង់ជីវភាពរបស់គ្រួសារពួកគេនៅកម្ពុជា។
ទន្ទឹមនឹងនេះ ក្រសួងការងារក៏បានប្តេជ្ញាថានឹងពង្រឹង និងពង្រីកវិសាលភាពក្នុងការផ្ដល់សេវាការងារ និងព័ត៌មានទីផ្សារការងារ ព្រមទាំងការផ្ដល់ប្រឹក្សាយោបល់ការងារ អាជីព ដើម្បីធ្វើការផ្គូផ្គង និងឆ្លើយតបបាននូវតម្រូវការកម្លាំងពលកម្មតាមទីផ្សារការងារ ដោយបង្កើនភាពជាដៃគូជាមួយវិស័យឯកជន៕
