គិតមកទល់ពេលនេះ ទំនិញដែលកម្ពុជា បាននាំចេញទៅជប៉ុន មានទំហំទឹកប្រាក់ ៦៦៧លានដុល្លារ ខណៈជប៉ុននាំចូលទំនិញមកកម្ពុជាវិញ ក្នុងទំហំទឹកប្រាក់ប្រមាណ ៤៧០លានដុល្លារផងដែរ។នេះបើតាមរបាយការណ៍របស់ក្រុមប្រឹក្សាអភិវឌ្ឍន៍កម្ពុជាកាលពីពេលថ្មីៗនេះ។
ក្នុងនោះ បើតាមក្រុមប្រឹក្សាអភិវឌ្ឍន៍កម្ពុជា បានឲ្យដឹងថា ក្នុងរយៈពេលជាងប្រមាណ៣ទសវត្សរ៍មកនេះ ជប៉ុនបានចូលរួមចំណែកយ៉ាងសំខាន់ក្នុងការជួយអភិវឌ្ឍប្រទេសកម្ពុជាទាំងការផ្ដល់ជំនួយ និងការវិនិយោគ ហើយជប៉ុនក៏ស្ថិតនៅក្នុងចំណោមប្រទេសដែលជាដៃគូវិនិយោគ និងពាណិជ្ជកម្មធំៗរបស់កម្ពុជាផងដែរ។
ជាក់ស្ដែងជិត៣០ឆ្នាំមកនេះ ក្រុមប្រឹក្សាអភិវឌ្ឍន៍កម្ពុជា(CDC) បានអនុម័តគម្រោងវិនិយោគរបស់ជប៉ុនសរុបចំនួន១៤៨គម្រោង មានទុនវិនិយោគជិត៣ពាន់លានដុល្លារ។ហើយបើមើលនៅក្នុងរយៈពេល៨ខែដំបូងនៅឆ្នាំ២០២២ ក្រុមប្រឹក្សាអភិវឌ្ឍន៍កម្ពុជា បានសម្រេចអនុញ្ញាតឲ្យក្រុមហ៊ុនជប៉ុនធ្វើការវិនិយោគលើគម្រោងថ្មីចំនួន៣គម្រោង ក្នុងទុនវិនិយោគ៦,៤លានដុល្លារ។
គួរបញ្ជាក់ថា ទំហំពាណិជ្ជកម្មកម្ពុជា-ជប៉ុន នារយៈពេល ៧ខែក្នុងឆ្នាំ២០២២នេះ មានទំហំទឹកប្រាក់ជាង ១ពាន់លានដុល្លារ កើនឡើង១៦% បើប្រៀបនឹងរយៈពេលដូចគ្នានៅឆ្នាំ២០២១។ ក្នុងនោះ ទំនិញដែលកម្ពុជា បាននាំចេញទៅជប៉ុន មានទំហំទឹកប្រាក់ ៦៦៧លានដុល្លារ ខណៈជប៉ុននាំចូលទំនិញមកកម្ពុជាវិញ ក្នុងទំហំទឹកប្រាក់ប្រមាណ៤៧០លានដុល្លារ។
ក្នុងនោះ ដៃគូវិនិយោគសំខាន់ៗ ដែលបានវិនិយោគនៅកម្ពុជា មានដូចជា ប្រទេសចិន កូរ៉េខាងត្បូង ក៏ដូចជា ប្រទេសជប៉ុន ជាដើម។ ប្រទេសជប៉ុន ក៏ស្ថិតក្នុងចំណោមបណ្ដាប្រទេសដទៃ ដែលចូលរួមយ៉ាងសកម្មក្នុងការរួមចំណែកអភិវឌ្ឍន៍សង្គម និងសេដ្ឋកិច្ចកម្ពុជា៕
