សិង្ហបុរី នៅតែរក្សាបាននូវចំណាត់ខ្ពស់បំផុតមួយ នៅក្នុងចំណោមទីក្រុងល្អបំផុតនៅលើពិភពលោក ដោយតាមតែពីក្រោយប្រទេសជប៉ុនមួយប៉ុណ្ណោះ នៅក្នុងតំបន់អាស៊ីប៉ាស៊ីហ្វិក។ នេះបើតាមការចុះផ្សាយពីសារព័ត៌មាន VN Express។
យោងតាមរបាយការណ៍ទីក្រុងសកលឆ្នាំ២០២៥ ដែលចេញផ្សាយដោយក្រុមហ៊ុនគ្រប់គ្រងលើផ្នែកប្រឹក្សា Kearney បានបង្ហាញឲ្យដឹងថា សិង្ហបុរី នៅតែបន្តពង្រឹងកេរ្តិ៍ឈ្មោះរបស់ខ្លួន ជាមជ្ឈមណ្ឌលអប់រំអន្តរជាតិដ៏សំខាន់ និងជាអ្នកនាំមុខក្នុងតំបន់ លើការឆ្នៃប្រឌិតទីក្រុង ផងដែរ។
ជុំវិញការចាត់ចំណាត់ថ្នាក់របស់ Kearney នេះ គឺត្រូវបានធ្វើឡើងដោយប្រើប្រាស់ទិន្នន័យដែលមានជាសាធារណៈ ដើម្បីដាក់ពិន្ទុលើទីក្រុងចំនួន ១៥៨ នៅទូទាំងពិភពលោក ផ្នែកតាម សកម្មភាពអាជីវកម្ម ធនធានមនុស្ស ការផ្លាស់ប្តូរព័ត៌មាន បទពិសោធវប្បធម៌ និងការចូលរួមនយោបាយ។
គួរឲ្យដឹងផងដែរថា ទីក្រុងចំនួនប្រាំក្នុងចំណោមទីក្រុងកំពូលទាំង១០ មានទីតាំងនៅអាស៊ីប៉ាស៊ីហ្វិក ដែលត្រូវបានជ្រើសរើសជាប់នៅក្នុងចំណាត់ថ្នាក់នេះ រួមមានទីក្រុងតូក្យូរបស់ប្រទេសជប៉ុន (ជាប់លេខទី៤) សិង្ហបុរី លេខ៥ ទីក្រុងប៉េកាំងរបស់ប្រទេសចិន (លេខ៦) ហុងកុង (លេខ៧) និងសៀងហៃ (លេខ៨)។
ជម្រាបជូនថា ចំពោះទីក្រុងនៅអាស៊ីអាគ្នេយ៍ផ្សេងទៀត ដែលជាប់នៅក្នុងបញ្ជីនេះ រួមមានទីក្រុងបាងកករបស់ប្រទេសថៃនៅចំណាត់ថ្នាក់ទី៣៣ និងទីក្រុង Kuala Lumpur របស់ម៉ាឡេស៊ី នៅក្នុងចំណាត់ថ្នាក់ទី៥៥៕
