យោងតាមប្រព័ន្វផ្សព្វផ្សាយរបស់អ៊ីរ៉ង់ បានរាយការណ៍ថា ប្រទេសនេះកំពុងចរចាដើម្បីអនុញ្ញាតឲ្យកប៉ាល់ដឹកទំនិញរបស់អឺរ៉ុបឆ្លងកាត់ច្រកសមុទ្រ Hormuz ប៉ុន្តែចំពោះលទ្ធផលទៅជាយ៉ាងណា នៅមិនទាន់ច្បាស់លាស់នៅឡើយទេ។
ទូរទស្សន៍រដ្ឋអ៊ីរ៉ង់ IRIB បានរាយការណ៍នៅថ្ងៃទី១៧ ខែឧសភាថា បន្ទាប់ពីកប៉ាល់ចិន ជប៉ុន និងប៉ាគីស្ថានបានឆ្លងកាត់ច្រកសមុទ្រ Hormuz ដោយសុវត្ថិភាព ដោយមានការអនុញ្ញាតពីកងទ័ពជើងទឹកអ៊ីរ៉ង់ ប្រទេសអឺរ៉ុបជាច្រើនឥឡូវនេះកំពុងស្វែងរកការយល់ព្រម សម្រាប់កប៉ាល់របស់ពួកគេ ដើម្បីធ្វើដំណើរលើផ្លូវសមុទ្រនេះផងដែរ។
លោក Ebrahim Azizi ប្រធានគណៈកម្មាធិការសន្តិសុខជាតិ និងគោលនយោបាយការបរទេសរបស់សភាអ៊ីរ៉ង់ បាននិយាយនៅថ្ងៃដដែលនោះថា ទីក្រុងតេអេរ៉ង់បានរៀបចំយន្តការសម្រាប់គ្រប់គ្រងចរាចរណ៍នៅក្នុងច្រកសមុទ្រ Hormuz ឡើងវិញ ហើយនឹងប្រកាសវាក្នុងពេលឆាប់ៗនេះ។ ក្រោមយន្តការនេះ មានតែកប៉ាល់មកពីប្រទេសដែលសហការណ៍ជាមួយអ៊ិរ៉ង់ប៉ុណ្ណោះ ដែលនឹងទទួលបានអត្ថប្រយោជន៍។
គួរជម្រាបជូនថា ក្នុងរយៈពេលប៉ុន្មានថ្ងៃថ្មីៗនេះ អ៊ីរ៉ង់ បានអនុញ្ញាតឱ្យនាវារាប់សិបគ្រឿង រួមទាំងនាវាមកពីប្រទេសចិន ឆ្លងកាត់ច្រកសមុទ្រ Hormuz បន្ទាប់ពីប្រទេសជាច្រើនបានឈានដល់កិច្ចព្រមព្រៀងលើពិធីសារសម្រាប់ការគ្រប់គ្រងច្រកសមុទ្ររបស់ខ្លួន៕
