ប្រធានាធិបតីអាមេរិក លោក ដូណាល់ ត្រាំ កាលពីថ្ងៃទី១៨ ខែសីហា បានបង្ហោះរូបភាពផែនទីនៃច្រកសមុទ្រ Hormuz ជាមួយនឹងចំណងជើងថា ‘ទឹកដីអាមេរិកថ្មី’ នៅលើវេទិកាប្រព័ន្ធផ្សព្វផ្សាយសង្គម Truth Social របស់លោក។ នេះបើតាមការចុះផ្សាយពីសារព័ត៌មាន AFP។
នៅក្នុងការបង្ហោះសារជាបន្តបន្ទាប់ លោក ត្រាំ ថែមទាំងបាននិយាយទៀតថា គ្មានការចរចាណាមួយជាមួយអ៊ីរ៉ង់កំពុងដំណើរការ ឬកំណត់ពេលច្បាស់លាស់នោះទេ ហើយសហរដ្ឋអាមេរិក នៅតែបន្តអនុវត្តការបិទផ្លូវសមុទ្ររបស់ខ្លួនយ៉ាងពេញលេញប្រឆាំងនឹងប្រទេសនេះដដែលនេះ។
យ៉ាងណាមិញជុំវិញការបង្ហោះទាំងនេះ ត្រូបានធ្វើឡើងត្រឹមតែមួយថ្ងៃប៉ុណ្ណោះ បន្ទាប់ពីប្រធានាធិបតីអាមេរិករូបនេះ បានបំផុសគំនិតថា ការដាក់ច្រកសមុទ្រ Hormuz ជាទឹកដីអាមេរិក នឹងក្លាយជាគំនិតដ៏អស្ចារ្យមួយ។
ច្រកសមុទ្រ Hormuz ដែលមានទីតាំងស្ថិតនៅចន្លោះប្រទេសអ៊ីរ៉ង់ និងអូម៉ង់ មានប្រវែង ១៦១ គីឡូម៉ែត្រ ដោយចំណុចតូចចង្អៀតបំផុតរបស់វាមានទទឹង ៣៣ គីឡូម៉ែត្រ ច្រកសមុទ្រនេះត្រូវបានបិទស្ទើរតែទាំងស្រុងចាប់តាំងពីការផ្ទុះឡើងនៃជម្លោះនៅមជ្ឈិមបូព៌ាមក។
គួរជម្រាបជូនផងដែរថា សហរដ្ឋអាមេរិក និងអ៊ីរ៉ង់ បានចុះហត្ថលេខាលើអនុស្សរណៈនៃការយោគយល់គ្នាមួយនៅពាក់កណ្តាលខែមិថុនា ដែលរួមបញ្ចូលបទប្បញ្ញត្តិដើម្បីស្តារសកម្មភាពសមុទ្រនៅក្នុងច្រកសមុទ្រ Hormuz ឡើងវិញ។ ប៉ុន្តែទោះជាយ៉ាងណាក៏ដោយ ការមិនចុះសម្រុងគ្នាលើការកិច្ចចរចាបន្តបន្ទាប់ បាននាំឱ្យមានការដួលរលំនៃបទឈប់បាញ់នេះវិញ៕
