រយៈពេល២សប្តាហ៍ ខែធ្នូ ឆ្នាំ២០២៣នេះ ក្រុមប្រឹក្សាអភិវឌ្ឍន៍កម្ពុជា ហៅកាត់ថា CDC បានអនុម័ត គម្រោងវិនិយោគចំនួន ១៥ ក្រោមទុនប្រមាណជាង ២៤៧លានដុល្លារ។នេះបើតាមរបាយការណ៍របស់ CDC នៅថ្ងៃទី២០ ខែធ្នូនេះ។
របាយការណ៍ខាងលើ បានឱ្យដឹងថា គិតត្រឹមរយៈពេល២សប្តាហ៍ ខែធ្នូ ឆ្នាំ២០២៣នេះ CDC បានសម្រេចចេញវិញ្ញាបនបត្រចុះបញ្ជីគម្រោងវិនិយោគ ១៥ ដែលមានទុនវិនិយោគសរុបប្រមាណជាង ២៤៧លានដុល្លារ និងអាចបង្កើតការងារបានប្រមាណជាង ១៦,០០០កន្លែង។
បើតាម CDC គម្រោងវិនិយោគដែលទទួលបានការអនុម័តនោះរួមមាន គម្រោងអភិវឌ្ឍស្ថានីយផលិតអគ្គិសនីដើរដោយថាមពលពន្លឺព្រះអាទិត្យអានុភាព ១៥០មេហ្គាវ៉ាត់ ជាមួយប្រព័ន្ធផ្ទុកថាមពលអគ្គិសនីនៅខេត្តពោធិ៍សាត់, គម្រោងបង្កើតរោងចក្រកាត់ដេរសម្លៀកបំពាក់, រោងចក្រផលិតសម្ភារៈវេចខ្ចប់កេសកាតុង និងថង់ប្លាស្ទិក, រោងចក្រផលិតស្បែកជើង និងគ្រឿងបន្សំស្បែកជើង, រោងចក្រផលិតសម្ភារៈសត្វចិញ្ចឹម, រោងចក្រផលិតសម្ភារៈតុបតែងគេហដ្ឋាន, រោងចក្រផលិតអំពូលភ្លើង សម្ភារៈប្រើប្រាស់ក្នុងផ្ទះជាដើម។
សូមជម្រាបជូនថា ក្នុងឆមាសទី១ ឆ្នាំ២០២៣នេះ ក្រុមប្រឹក្សាអភិវឌ្ឍន៍កម្ពុជា បានអនុម័តគម្រោងថ្មី និងគម្រោងពង្រីកផលិតកម្មចំនួន ១១៣គម្រោង ដែលមានទុនវិនិយោគសរុបប្រមាណ ១.១ប៊ីលានដុល្លារ និងអាចបង្កើតការងារបានចំនួន ១២២ពាន់កន្លែង។ ក្នុងចំណោមគម្រោងវិនិយោគទាំង ១១៣នេះ គម្រោងចំនួន១០២ ស្ថិតនៅក្នុងវិស័យឧស្សាហកម្ម, គម្រោងចំនួន៧ ស្ថិតនៅក្នុងវិស័យកសិកម្ម និងកសិ-ឧស្សាហកម្ម, គម្រោងចំនួន៣ ស្ថិតនៅក្នុងវិស័យទេសចរណ៍ និងគម្រោងចំនួន១ ស្ថិតនៅក្នុងវិស័យហេដ្ឋារចនាសម្ព័ន្ធ និងផ្សេងៗ៕
