យោងតាមសេចក្តីជូនដំណឹងរបស់ក្រសួងប្រៃសណីយនិងទូរគមនាគមន៍ បានសម្រចលុបចោលអាជ្ញាបណ្ណសេវាបញ្ញើឆាប់រហ័សអន្តរជាតិ របស់ប្រតិបត្តិករប្រៃសណីយ៍ចំនួន ២។ បើតាមសេចក្តីប្រកាសរបស់ក្រសួងបានបញ្ជាក់ថា ការសម្រេចលុបអាជ្ញាបណ្ណសេវាបញ្ញើឆាប់រហ័សអន្តរជាតិក្រុមហ៊ុនទាំងពីរ បន្ទាប់បានដាក់ពាក្យស្នើសុំឈប់ធ្វើអាជីវកម្ម។ ក្រុមហ៊ុនប្រតិបត្តិករទាំងពីរនោះគឺ ក្រុមហ៊ុន 56B-LINK SUPPLY CHAIN MANAGEMENT CO., LTD. និង ក្រុមហ៊ុន KH TRANSPORTATION EXPRESS CO., LTD.។
ក្រោយប្រកាសសម្រេចលុបចោល ក្រសួងក៏បានណែនាំដល់ប្រតិបត្តិករទាំងពីរខាងលើនេះ ឱ្យបំពេញកាតព្វកិច្ចទទួលខុសត្រូវចំពោះបុគ្គលិក អតិថិជន និងតតិយជន ស្របតាមច្បាប់និងបទប្បញ្ញត្តិជាធរមាន ក្នុងករណីមានការតវ៉ាជាយថាហេតុពាក់ព័ន្ធនឹងការលុបអាជ្ញាបណ្ណនេះ។
ក្រសួងបានណែនាំដល់ប្រតិបត្តិករប្រៃសណីយ៍ទាំងអស់ ឱ្យគោរពតាមច្បាប់ស្តីពីវិស័យ ប្រៃសណីយ៍ និងលិខិតបទដ្ឋានគតិយុត្តពាក់ព័ន្ធជាធរមាន ក៏ប៉ុន្តែមានប្រតិបត្តិករមួយចំនួននៅតែមិនអនុវត្ត ឬអនុវត្តមិនទាន់បានពេញលេញស្របតាមច្បាប់ ឬលក្ខខណ្ឌនៃអាជ្ញាបណ្ណនៅឡើយ។ ដូចនេះ ក្នុងករណី ប្រតិបត្តិករនៅតែបន្តគេចវេសមិនអនុវត្តតាមច្បាប់ និងមិនគោរពលក្ខខណ្ឌនៃអាជ្ញាបណ្ណ ប្រតិបត្តិករ នោះនឹងត្រូវប្រឈមនឹងការព្យួរអាជ្ញាបណ្ណជាបណ្តោះអាសន្ន ឬលុបអាជ្ញាបណ្ណ។
តាមរយៈចំណាត់ការដោយគ្មានលើកលែងនេះ ក្រសួងបានណែនាំប្រតិបត្តិករប្រៃសណីយ៍ទាំងអស់អនុវត្តឱ្យបានពេញលេញតាមច្បាប់លិខិត បទដ្ឋានគតិយុត្ត និងលក្ខខណ្ឌនៃអាជ្ញាបណ្ណ និងសូមសាធារណជនទាំងអស់មេត្តាជ្រាបជាព័ត៌មាន។
គួរបញ្ជាក់ថា កន្លងទៅនេះ និយ័តករទូរគមនាគមន៍កម្ពុជា ធ្លាប់បានចាត់វិធានការបិទខ្ទប់ឈ្មោះដែន ដែលដំណើរការល្បែងឆ្នោតខុសច្បាប់ជាបន្តបន្ទាប់។ ប៉ុន្មានថ្ងៃមុនេះ និយ័តករទូរគមនាគមន៍កម្ពុជា (ន.ទ.ក.) បានចាត់វិធានការបិទខ្ទប់វេសាយសរុបចំនួន១៥ ដែលកំពុងដំណើរការល្បែងឆ្នោតខុសច្បាប់ នៅក្នុងប្រទេសកម្ពុជា និងធ្លាប់បានចាត់វិធានការបិទខ្ទប់ឈ្មោះដែន ដែលដំណើរការល្បែងឆ្នោតខុសច្បាប់ចំនួន ២៥ រួចមកហើយ កាលពីខែមករា។
និយ័តករទូរគមនាគមន៍កម្ពុជា ដោយបានការសហការជាមួយអគ្គស្នងការដ្ឋាននគរបាលជាតិ និងអាជ្ញាធរពាក់ព័ន្ធ លុបបំបាត់រាល់ឈ្មោះដែន ដែលធ្វើប្រតិបត្តិការ និងផ្តល់សេវាល្បែងស៊ីសងអនឡាញ និងល្បែងឆ្នោត ដែលផ្ទុយច្បាប់ និងសារាចរណែនាំរបស់រាជរដ្ឋាភិបាល ស្តីពីការពង្រឹងការ គ្រប់គ្រងអាជីវកម្មល្បែងភ្នាល់តាមម៉ាស៊ីនអេឡិចត្រូនិច តាមរយៈអ៊ីនធឺណិតអនឡាញក្នុង និងក្រៅប្រទេសគ្រប់ប្រភេទ ព្រមទាំងឈ្មោះដែនផ្សេងទៀតទាំងឡាយណា ដែលធ្វើប្រតិបត្តិការខុសច្បាប់ ក្នុងគោលដៅចូលរួមថែរក្សាការពារសន្តិសុខ សណ្តាប់ធ្នាប់សាធារណៈ និងរបៀបរៀបរយក្នុងសង្គម៕
