អគ្គនាយកដ្ឋានពន្ធដារប្រកាសដល់ម្ចាស់យានយន្តដែលមិនទាន់ប្រកាសបង់ពន្ធក្នុងឆ្នាំ២០២២នេះ រួសរាន់យកចិត្តទុកដាក់គោរពកាតព្វកិច្ចសារពើរពន្ធទាន់តាមពេលវេលា ជៀសវាងការឃាត់យានយន្តតាមដងផ្លូវតម្រូវឱ្យបង់ប្រាក់ជាយថាហេតុ។
យោងតាមពន្ធដារខាងលើ បានឱ្យដឹងបន្ថែមថា មន្រ្តីពន្ធដារ រួមសហការជាមួយអាជ្ញាធរមានសមត្ថកិច្ចថ្នាក់ក្រោមជាតិ នឹងចុះត្រួតពិនិត្យការប្រកាសបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទប្រចាំឆ្នាំ២០២២ នៅតាមគោលដៅមួយចំនួនលើកំណាត់ផ្លូវសំខាន់នៃរាជធានី-ខេត្ត ចាប់ពីថ្ងៃទី ១៥ ខែមករា ឆ្នាំ២០២៣ តទៅ។
នៅក្នុងនោះផងដែរ ករណីដែលម្ចាស់យានយន្តគ្រប់ប្រភេទខកខានមិនបានប្រកាសបង់ពន្ធ អាចប្រកាសបង់ពន្ធ បង់ប្រាក់ពិន័យតាមច្បាប់ជាធរមាននៅអគ្គនាយកដ្ឋានពន្ធដារ ឬសាខាពន្ធដារខេត្ត ខណ្ឌ ឬតាមរយៈធនាគារមួយចំនួនដូចជា ធនាគារកាណាឌីយ៉ា ក.អ ធនាគារអេស៊ីលីដា ភីអិលស៊ី ធនាគារប្រៃសណីយ៍កម្ពុជា ក.អ ធនាគារវឌ្ឍនៈ អាស៊ីចំកាត់ (ABA) ធនាគារពាណិជ្ជកម្មក្រៅប្រទេសនៃកម្ពុជា ឬតាមរយៈកម្មវិធី GDT Taxpayer App សម្រាប់យានយន្តដែលធ្លាប់បានប្រកាសបង់ពន្ធលើមធ្យោបាយដឹកជញ្ជូន និងយានជំនិះគ្រប់ប្រភេទកន្លងមក។
អគ្គនាយកដ្ឋានពន្ធដារសង្ឃឹម និងជឿជាក់យ៉ាង មុតមាំថា ម្ចាស់យានយន្តទាំងអស់ នឹងយកចិត្តទុកដាក់ គោរពកាតព្វកិច្ចសារពើពន្ធ និងរួសរាន់ អញ្ជើញទៅប្រកាសបង់ពន្ធ បានគ្រប់ៗគ្នា និងបានទាន់ពេលវេលា ស្របតាមបទប្បញ្ញត្តិនៃច្បាប់ ដើម្បីចៀសវាងនូវការឃាត់យានយន្ត តាមដងផ្លូវ តម្រូវឱ្យបង់ប្រាក់ពន្ធ ដោយប្រការណាមួយជាយថាហេតុ ៕
