ក្នុងឱកាសនោះ ឧត្តមសេនីយ៍ឯក ឯក សំអូន បានសម្តែងការស្វាគមន៍ចំពោះក្រុមអ្នកសង្កេតការណ៍អាស៊ានប្រចាំកម្ពុជា ក្រោមអាណត្តិដឹកនាំដោយប្រទេសហ្វីលីពីន ព្រមទាំងថ្លែងអំណរគុណយ៉ាងក្រៃលែងចំពោះការប្តេជ្ញាចិត្ត និងកិច្ចខិតខំប្រឹងប្រែងកន្លងមករហូតដល់បច្ចុប្បន្ន ក្នុងការចូលរួមគាំទ្រដល់ការលើកកម្ពស់សន្តិភាព ស្ថិរភាព និងទំនុកចិត្តក្នុងតំបន់ ក្រោមយន្តការអាស៊ាន។ ទន្ទឹមនឹងនេះ ឯកឧត្តមមេបញ្ជាការ ក៏បានជម្រាបជូនប្រតិភូអំពីការវិវត្តថ្មីៗនៃស្ថានភាពព្រំដែនកម្ពុជា-ថៃ ក្នុងភូមិសាស្ត្រយោធភូមិភាគទី៥ ផងដែរ។

ជាការឆ្លើយតប ឧត្តមនាវីត្រី GLENN Z. DIZON ប្រធានបេសកកម្មក្រុមអ្នកសង្កេតការណ៍អាស៊ាន នៃប្រទេសហ្វីលីពីនប្រចាំកម្ពុជា បានថ្លែងអំណរគុណដល់យោធភូមិភាគទី៥ ដែលតែងតែសម្របសម្រួល និងផ្តល់ភាពងាយស្រួលដល់គ្រប់បេសកកម្មក្នុងការចុះសង្កេតការណ៍ ផ្ទៀងផ្ទាត់ និងរាយការណ៍នៅតាមបណ្តោយព្រំដែនកម្ពុជា-ថៃ ក្រោយបទឈប់បាញ់ចូលជាធរមាន។ លោកក៏បានបញ្ជាក់ពីការប្តេជ្ញាចិត្តខ្ពស់ក្នុងការបំពេញបេសកកម្មដ៏មានសារៈសំខាន់នេះ ដើម្បីចុះសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពជាក់ស្តែងតាមបណ្តោយព្រំដែន។

យោងតាមសេចក្តីប្រកាសព័ត៌មានរបស់អ្នកនាំពាក្យក្រសួងការពារជាតិ កម្ពុជាតែងតែផ្តល់ការគាំទ្រពេញទំហឹង និងពង្រឹងតួនាទីដល់ក្រុមអ្នកសង្កេតការណ៍អាស៊ាន (AOT) ក្នុងការធានាការអនុវត្តបទឈប់បាញ់រវាងកម្ពុជានិងថៃ ដើម្បីលើកកម្ពស់តម្លាភាព ការជឿទុកចិត្តគ្នា និងការពារអាយុជីវិតប្រជាពលរដ្ឋ ព្រមទាំងស្វាគមន៍ជានិច្ចចំពោះបណ្តាប្រទេសជាមិត្តក្នុងការបញ្ជូនអ្នកសង្កេតការណ៍ ឬចូលរួមជួយលើកិច្ចការសន្តិភាព។

ជាមួយគ្នានេះ រាជរដ្ឋាភិបាល និងក្រសួងការពារជាតិកម្ពុជា បានបញ្ជាក់ជាថ្មីនូវការប្តេជ្ញាចិត្តយ៉ាងម៉ឺងម៉ាត់ ស្មោះត្រង់ និងប្រកបដោយការទទួលខុសត្រូវខ្ពស់ ក្នុងការគោរព និងអនុវត្តឱ្យបានពេញលេញ ខ្ជាប់ខ្ជួនបំផុតនូវសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) កាលពីថ្ងៃទី២៧ ខែធ្នូ ឆ្នាំ២០២៥, សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ ថ្ងៃទី២៦ ខែតុលា ឆ្នាំ២០២៥ និងកិច្ចព្រមព្រៀងពាក់ព័ន្ធដទៃទៀត ដើម្បីឆ្ពោះទៅរកការធ្វើឱ្យប្រសើរឡើងវិញឆាប់រហ័ស ព្រមទាំងវិលត្រឡប់ទៅរកប្រក្រតីភាព សន្តិភាព និងស្ថិរភាពយូរអង្វែង៕

The post មេបញ្ជាការយោធភូមិភាគទី៥ ជួបពិភាក្សាការងារជាមួយប្រធានបេសកកម្មក្រុមអ្នកសង្កេតការណ៍អាស៊ានប្រចាំកម្ពុជា appeared first on .

យោងតាមក្រសួងការពារជាតិ ចាប់តាំងពីបទឈប់បាញ់បានចូលជាធរមានកាលពីថ្ងៃទី២៧ ខែធ្នូ ឆ្នាំ២០២៥ មក យោធាថៃបាននិងកំពុងបន្តសកម្មភាពជាច្រើនដែលផ្ទុយនឹងកិច្ចព្រមព្រៀង រួមមាន៖ ការដាក់ពង្រាយទូកុងតឺន័រ រាយបន្លាលួស ជីកប្រឡាយ ធ្វើលេណដ្ឋាន បំផ្លិចបំផ្លាញហេដ្ឋារចនាសម្ព័ន្ធ ផ្ទះសម្បែង ទ្រព្យសម្បត្តិប្រជាពលរដ្ឋ និងការកាន់កាប់ទឹកដីកម្ពុជាដោយខុសច្បាប់នៅតំបន់ច្រកអានសេះ។ សកម្មភាពឯកតោភាគីទាំងនេះ បានរារាំង និងធ្វើឱ្យប្រជាពលរដ្ឋស្លូតត្រង់កម្ពុជាចំនួន ១,១១៤នាក់ ស្មើនឹង ៣៥៧ គ្រួសារ (ក្នុងនោះមានស្ត្រី ៧១១នាក់ និងកុមារ ៥៩៧នាក់) នៅតែមិនទាន់អាចវិលត្រឡប់ទៅរស់នៅលំនៅដ្ឋានដើមរបស់ពួកគេវិញបាននៅឡើយ។

ក្រសួងការពារជាតិ បានគូសបញ្ជាក់យ៉ាងម៉ឺងម៉ាត់នូវជំហររបស់កម្ពុជា ក្នុងការការពារខ្សែព្រំដែនអន្តរជាតិកម្ពុជា-ថៃ ដែលបន្សល់ទុកដោយគណៈកម្មការព្រំដែនឥណ្ឌូចិន-សៀម ដោយឈរលើមូលដ្ឋានច្បាប់អន្តរជាតិ គោលការណ៍ខ្សែព្រំដែនមិនកែប្រែ អនុសញ្ញា និងសន្ធិសញ្ញាបារាំង-សៀម ផែនទី និងកំណត់ហេតុបោះបង្គោលព្រំដែន ព្រមទាំងរាល់កិច្ចព្រមព្រៀងដែលភាគីទាំងពីរបានឯកភាពគ្នានាពេលកន្លងមក។ កម្ពុជាប្រកាសមិនទទួលស្គាល់ជាដាច់ខាតនូវរាល់ការកែប្រែខ្សែព្រំដែនណាដែលកើតចេញពីការប្រើប្រាស់កម្លាំងយោធាឡើយ។

ជាមួយគ្នានេះ រាជរដ្ឋាភិបាល និងក្រសួងការពារជាតិកម្ពុជា បានបញ្ជាក់សារជាថ្មីនូវការប្តេជ្ញាចិត្តប្រកបដោយភាពស្មោះត្រង់ និងសុចរិត ក្នុងការគោរព និងអនុវត្តឱ្យបានពេញលេញ ខ្ជាប់ខ្ជួនបំផុតនូវសេចក្តីប្រកាសរួមនៃកិច្ចប្រជុំពិសេសលើកទី៣ របស់គណៈកម្មាធិការព្រំដែនទូទៅកម្ពុជា-ថៃ (GBC) ថ្ងៃទី២៧ ខែធ្នូ ឆ្នាំ២០២៥, សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជា-ថៃ ថ្ងៃទី២៦ ខែតុលា ឆ្នាំ២០២៥ និងកិច្ចព្រមព្រៀងពាក់ព័ន្ធដទៃទៀត ដើម្បីជំរុញឱ្យស្ថានភាពវិលត្រឡប់ទៅរកប្រក្រតីភាពឡើងវិញឱ្យបានឆាប់រហ័ស៕

The post ក្រុមសង្កេតការណ៍អាស៊ាន ចុះពិនិត្យស្ថានភាពព្រំដែនច្រកអានសេះ ក្រោយយោធាថៃបន្តសកម្មភាពខុសច្បាប់ appeared first on .

ឯកឧត្តម ឧបនាយករដ្ឋមន្ត្រី បានសង្កត់ធ្ងន់ថា ការពារជាតិមាតុភូមិមិនមែនជាភារកិច្ចដាច់ដោយឡែករបស់កងទ័ពនោះទេ ប៉ុន្តែវាជាកាតព្វកិច្ចពលរដ្ឋគ្រប់រូប ជាពិសេសស្រទាប់យុវជនដែលជាសសរទ្រូងនៃប្រទេសជាតិ។ ការចូលរួមបំពេញកាតព្វកិច្ចយោធា គឺជាឱកាសដ៏វិសេសវិសាលក្នុងការទទួលបានការបណ្តុះបណ្តាលទាំងកម្លាំងកាយប្រាជ្ញា ស្មារតីស្នេហាជាតិ និងការប្រើប្រាស់បច្ចេកវិទ្យាទំនើបៗក្នុងវិស័យការពារជាតិ។

ទន្ទឹមនឹងការវិវត្តជឿនលឿននៃសកលលោក វិស័យការពារជាតិកម្ពុជាក៏ត្រូវការជាចាំបាច់នូវធនធានមនុស្សដែលមានសមត្ថភាពខ្ពស់ ដើម្បីដើរឱ្យទាន់ការប្រែប្រួល និងឆ្លើយតបបានរាល់ការប៉ុនប៉ងនានាដែលប៉ះពាល់ដល់ស្ថិរភាពសង្គម។

សូមជម្រាបដែរថា ព្រះរាជាណាចក្រកម្ពុជានឹងចាប់ផ្តើមដំណើរការអនុវត្តច្បាប់ស្តីពីកាតព្វកិច្ចយោធា ។ រាជរដ្ឋាភិបាល បានដាក់ចេញនូវគោលការណ៍ឱ្យអនុវត្តច្បាប់នេះជាលើកដំបូង គឺសំដៅកសាងកម្លាំងការពារជាតិឱ្យកាន់តែ មានសមត្ថភាព និងវិន័យដែលជាតម្រូវការរបស់ជាតិ។ ចាប់ពីថ្ងៃទី១ ខែតុលា ឆ្នាំ២០២៦ តទៅ យុវជនដែលមានបំណងចូលបំពេញកាតព្វកិច្ចយោធា អាចទៅទទួលពាក្យស្នើសុំនៅមូលដ្ឋានកងរាជអាវុធហត្ថក្រុង-ស្រុក-ខណ្ឌ។ សូមបងប្អូនយុវជន តាមដានសេចក្តីជូន ដំណឹងផ្លូវការ ដើម្បីស្វែងយល់អំពីលក្ខខណ្ឌ ឯកសារដែលត្រូវត្រៀម និងជំហានបន្តបន្ទាប់ នៃការដាក់ពាក្យ។

The post ឯកឧត្តម ទៀ សីហា៖ ការការពារជាតិ និងបូរណភាពទឹកដី ជាកាតព្វកិច្ចរបស់ប្រជាពលរដ្ឋខ្មែរគ្រប់រូប ក្នុងយុគសម័យបច្ចេកវិទ្យា appeared first on .

តាមរយៈសារលិខិតផ្ញើជូនបងប្អូនប្រជាពលរដ្ឋ និងយុវជន យុវនារី ឯកឧត្តម នាយឧត្តមសេនីយ៍ ទៀ សីហា បានគូសបញ្ជាក់ថា ចាប់ពីថ្ងៃទី១ ខែតុលា ឆ្នាំ២០២៦ តទៅ យុវជនដែលមានបំណងចូលបំពេញកាតព្វកិច្ចយោធា អាចទៅទទួលពាក្យស្នើសុំនៅតាមមូលដ្ឋានកងរាជអាវុធហត្ថក្រុង-ស្រុក-ខណ្ឌ។ ជាមួយគ្នានេះ សូមបងប្អូនយុវជនបន្តតាមដានសេចក្តីជូនដំណឹងផ្លូវការ ដើម្បីស្វែងយល់បន្ថែមអំពីលក្ខខណ្ឌ ឯកសារតម្រូវ និងជំហានបន្តបន្ទាប់នៃការដាក់ពាក្យ។

ឯកឧត្តមឧបនាយករដ្ឋមន្ត្រី បានរំលេចថា ការការពារជាតិមាតុភូមិ និងបូរណភាពទឹកដី គឺជាកាតព្វកិច្ចរបស់ប្រជាពលរដ្ឋខ្មែរគ្រប់រូប។ ក្នុងបរិបទដែលសង្គម និងបច្ចេកវិទ្យាកំពុងប្រែប្រួលយ៉ាងរហ័ស ប្រទេសជាតិចាំបាច់ត្រូវមានកម្លាំងដែលទទួលបានការហ្វឹកហ្វឺន មានចំណេះដឹង ជំនាញ វិន័យ និងសមត្ថភាពខ្ពស់ ដើម្បីធានាការពារអធិបតេយ្យ បូរណភាពទឹកដី ប្រជាជន និងសុខសន្តិភាព។

បន្ថែមលើសពីនេះ ប្រទេសជាតិ និងរាជរដ្ឋាភិបាល ត្រូវការកម្លាំងធនធានមនុស្សប្រកបដោយគុណភាព។ ការចូលរួមបំពេញកាតព្វកិច្ចយោធានឹងផ្តល់ឱ្យយុវជននូវចំណេះដឹង វិន័យ ស្មារតីជួយគ្នា និងការទទួលខុសត្រូវខ្ពស់។ ការហ្វឹកហាត់នេះ មិនត្រឹមតែជួយពង្រឹងកម្លាំងកាយ និងចិត្តគំនិតប៉ុណ្ណោះទេ ប៉ុន្តែថែមទាំងផ្តល់នូវជំនាញ បទពិសោធន៍ បង្កើនទំនុកចិត្ត និងជាមូលដ្ឋានគ្រឹះដ៏ល្អសម្រាប់ការសិក្សា ការងារ និងការរស់នៅក្រោយពេលបញ្ចប់កាតព្វកិច្ចយោធាផងដែរ។

ក្នុងឱកាសនេះដែរ ឯកឧត្តមរដ្ឋមន្ត្រីក្រសួងការពារជាតិ បានអំពាវនាវដល់មាតាបិតា អាណាព្យាបាល និងប្រជាពលរដ្ឋទាំងអស់ ចូលរួមគាំទ្រ ផ្តល់កម្លាំងចិត្ត និងជួយឱ្យយុវជនយល់ច្បាស់អំពីគោលបំណងនៃការអនុវត្តច្បាប់នេះ ព្រោះការគាំទ្រពីក្រុមគ្រួសារ និងសង្គមជាតិមានសារៈសំខាន់បំផុតចំពោះការត្រៀមខ្លួនរបស់យុវជន។ ឯកឧត្តមក៏បានបញ្ជាក់ច្បាស់ថា ដំណើរការជ្រើសរើសនឹងត្រូវអនុវត្តយ៉ាងម៉ឺងម៉ាត់តាមលក្ខខណ្ឌ និងនីតិវិធីដែលបានកំណត់ ដោយធានានូវតម្លាភាព និងស្មើភាពគ្នាជាចម្បង៕

The post ក្រសួងការពារជាតិ ប្រកាសចាប់ផ្តើមអនុវត្តច្បាប់ស្តីពីកាតព្វកិច្ចយោធាជាលើកដំបូង យុវជនអាចទទួលពាក្យចាប់ពីថ្ងៃទី១ ខែតុលា តទៅ appeared first on .

ផ្អែកតាមសេចក្តីណែនាំនេះ គ្រប់ស្ថាប័នចំណុះក្រសួង និងកងឯកភាពចំណុះអគ្គបញ្ជាការដ្ឋានទាំងអស់ ត្រូវចាប់ផ្តើមរៀបចំបើកគណនីធនាគារជូនយោធិនក្នុងសាមីអង្គភាពរបស់ខ្លួនភ្លាមៗ ហើយត្រូវបញ្ចប់ឱ្យបានទាំងស្រុងជាស្ថាពរត្រឹមថ្ងៃទី៣០ ខែមិថុនា ឆ្នាំ២០២៧។ ដើម្បីធានាឱ្យសម្រេចបានតាមគោលដៅ គ្រប់កងឯកភាពត្រូវរៀបចំផែនការសកម្មភាពជាក់ស្តែង ដោយជំរុញការបើកគណនីឱ្យបានយ៉ាងតិច ១០% នៃចំនួនទ័ពសរុបជារៀងរាល់ខែ ចាប់ពីខែកញ្ញា ឆ្នាំ២០២៦ នេះតទៅ។

ក្រសួងការពារជាតិបញ្ជាក់ថា គ្រប់កងឯកភាពអាចជ្រើសរើសធនាគារមួយ ឬច្រើនក្នុងចំណោមធនាគារពាណិជ្ជទាំង៨ ដែលបានចុះអនុស្សរណៈនៃការយោគយល់ (MOU) រួមមាន ធនាគារ អេស៊ីលីដា, កាណាឌីយ៉ា, វឌ្ឍនៈ, ពាណិជ្ជកម្មក្រៅប្រទេសនៃកម្ពុជា (FTB), វីង, ABA, ជីប ម៉ុង និងធនាគារ ជេ ត្រាស់ រ៉ូយ៉ាល់។

ដើម្បីឱ្យដំណើរការនេះប្រព្រឹត្តទៅដោយរលូន នាយកដ្ឋានហិរញ្ញវត្ថុ នៃអគ្គនាយកដ្ឋានភស្តុភារ ហិរញ្ញវត្ថុ នឹងរៀបចំកិច្ចប្រជុំផ្សព្វផ្សាយស្តីពីនីតិវិធីអនុវត្តដល់នាយហិរញ្ញវត្ថុ និងជំនាញពាក់ព័ន្ធតាមបណ្តាកងឯកភាព។ ទន្ទឹមនឹងនេះ អគ្គនាយកដ្ឋានភស្តុភារ ហិរញ្ញវត្ថុ ក៏នឹងបង្កើតក្រុមការងារចំពោះកិច្ចមួយ ដើម្បីពិនិត្យ តាមដាន និងសម្របសម្រួលការងារនេះ ដោយតម្រូវឱ្យគ្រប់កងឯកភាពធ្វើរបាយការណ៍បូកសរុបវឌ្ឍនភាពប្រចាំខែ ផ្ញើមកក្រុមការងារចំពោះកិច្ចមុនដាច់ខែនីមួយៗ ដើម្បីរាយការណ៍បន្តជូនថ្នាក់ដឹកនាំ៕

The post អបអរសាទរ! ក្រសួងការពារជាតិ ណែនាំឱ្យរៀបចំបើកគណនីធនាគារជូនយោធិនទូទាំងប្រទេស appeared first on .

ការជ្រើសរើសប្រជាពលរដ្ឋដើម្បីចូលបំពេញកាតព្វកិច្ចយោធា ត្រូវអនុវត្តចំពោះប្រជាពលរដ្ឋខ្មែរដែលមានអាយុ​ចាប់ពី ១៧ឆ្នាំ ដល់ ២៥ឆ្នាំ សម្រាប់ការធ្វើជំរឿន, អាយុ ១៨ឆ្នាំ ដល់ ២៥ឆ្នាំ ដែលត្រូវបំពេញកាតព្វកិច្ចយោធា រយៈពេល ២៤ខែ។ ការចូលបំពេញកាតព្វកិច្ចយោធា ធ្វើឡើងតាមរយៈ ដោយស្ម័គ្រចិត្ត និងតាមការ​ចាប់​ឆ្នោត។

សូមជម្រាបថា យោធិនកំពុងបំពេញកាតព្វកិច្ចយោធាត្រូវទទួលបានប្រាក់ឧបត្ថម្ភប្រចាំខែនិងគោលរបបផ្សេងៗ

ដូចខាងក្រោម៖

ក- ប្រាក់ឧបត្ថម្ភប្រចាំខែក្នុងម្នាក់ចំនួន៤០០០០០(បួនសែន)រៀល។

ខ- គោលរបបផ្សេងៗត្រូវទទួលបានដូចយោធិនអាជីពរួមមាន៖

-ប្រាក់ម្ហូបប្រចាំថ្ងៃ

-ប្រាក់អាហារបំប៉នបន្ថែមពេលហ្វឹកហាត់

-ប្រាក់បំណាច់ឧបត្ថម្ភគ្រួសារនិងកូន

-របបអង្ករប្រចាំថ្ងៃ

-របបឯកសណ្ឋានប្រយុទ្ធនិងបរិក្ខារចាំបាច់មួយចំនួន។

សូមអានខ្លឹមសារលម្អិតនៃអនុក្រឹត្យដូចខាងក្រោម៖

The post រាជរដ្ឋាភិបាល ចេញអនុក្រឹត្យស្តីពីការអនុវត្តច្បាប់កាតព្វកិច្ចយោធា អ្នកជាប់កាតព្វកិច្ចយោធាទទួលបាន​ប្រាក់ឧបត្ថម្ភប្រចាំខែក្នុងម្នាក់ចំនួន ៤០ម៉ឺនរៀល appeared first on .

នៅថ្ងៃទី២២ ខែកក្កដាកន្លងទៅ សភាតំណាងរាស្ត្រសហរដ្ឋអាមេរិក បានអនុម័តច្បាប់អនុញ្ញាតការពារជាតិ (NDAA) សម្រាប់ឆ្នាំសារពើពន្ធ២០២៧ ដោយមានសំឡេងគាំទ្រ ២១៦ និងប្រឆាំង ២១២។

បន្ថែមពីលើការស្នើថវិកាការពារជាតិកំណត់ត្រាចំនួន ១,១៥ទ្រីលានដុល្លារ សេចក្តីព្រាងច្បាប់នេះក៏រួមបញ្ចូលទាំងបទប្បញ្ញត្តិមួយដើម្បីប្តូរឈ្មោះ “ក្រសួងការពារជាតិ” ទៅជា “ក្រសួងសង្គ្រាម” ដើម្បីធ្វើឲ្យការសម្រេចចិត្តរបស់រដ្ឋបាលលោក ដូណាល់ ត្រាំ មានភាពស្របច្បាប់។

នៅក្នុងសន្និសីទសារព័ត៌មានកាលពីឆ្នាំមុន រដ្ឋមន្ត្រីក្រសួងការពារជាតិលោក Pete Hegseth ធ្លាប់បានពន្យល់ថា រដ្ឋបាលលោក ត្រាំ បានស្នើឲ្យមានការប្តូរឈ្មោះទៅជាក្រសួងសង្គ្រាម ពីព្រោះខ្លួនចង់បង្កើតអ្នកចម្បាំង មិនមែនគ្រាន់តែជាអ្នកការពារនោះទេនោះឡើយ។

គួរជម្រាបជូនថាក្រសួងសង្គ្រាម គឺជាឈ្មោះដើមរបស់ក្រសួងការពារជាតិសហរដ្ឋអាមេរិក រហូតដល់ប្រធានាធិបតី Harry Truman បានចុះហត្ថលេខាលើច្បាប់សន្តិសុខជាតិក្នុងឆ្នាំ១៩៤៧ ដោយរៀបចំរចនាសម្ព័ន្ធយោធាឡើងវិញ និងប្តូរឈ្មោះស្ថាប័ននេះ៕​

The post សភាតំណាងរាស្ត្រអាមេរិកយល់ព្រមប្តូរឈ្មោះក្រសួងការពារជាតិទៅជាក្រសួងសង្គ្រាមវិញ appeared first on .

តាមរយៈសេចក្ដីប្រកាសព័ត៌មាន ក្រសួងការពារជាតិ បានបញ្ជាក់ថា ចំពោះឧបទ្ទវហេតុនៃការផ្ទុះគ្រាប់បែកនេះ គណៈបញ្ជាការនៅជួរមុខ និងក្រុមអ្នកជំនាញកំពុងបន្តធ្វើការស៊ើបអង្កេតយ៉ាងយកចិត្តទុកដាក់បំផុត ដើម្បីស្វែងរកការពិតជូនដល់កងកម្លាំង និងសាធារណជនរបស់យើង។

ឆ្លៀតក្នុងឱកាសនេះ ក្រសួងការពារជាតិ នៃព្រះរាជាណាចក្រកម្ពុជា សូមបញ្ជាក់សាជាថ្មីនូវការប្តេជ្ញាចិត្តដ៏រឹងមាំរបស់ខ្លួន ក្នុងការគោរព និងអនុវត្តយ៉ាងម៉ឺងម៉ាត់ ស្មោះត្រង់ ប្រកបដោយការទទួលខុសត្រូវខ្ពស់ក្នុងការគោរព និងអនុវត្តយ៉ាងពេញលេញ និងខ្ជាប់ខ្ជួនបំផុតនូវសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) ថ្ងៃទី២៧ ខែធ្នូ ឆ្នាំ២០២៥, សេចក្តីថ្លែងការណ៍រួមស្តីពីកិច្ចព្រមព្រៀងសន្តិភាពរវាងកម្ពុជានិងថៃ ថ្ងៃទី២៦ ខែតុលា ឆ្នាំ២០២៥ និងកិច្ចព្រមព្រៀងពាក់ព័ន្ធផ្សេងទៀត ដើម្បីឆ្ពោះទៅការវិលត្រឡប់ទៅរកប្រក្រតីភាពឡើងវិញ និងការសម្រេចបាននូវសន្តិភាព និងស្ថិរភាពយូរអង្វែង៕

The post ក្រសួងការពារជាតិ បាននិងកំពុងបន្តស៊ើបអង្កេតករណីផ្ទុះគ្រាប់បែកនៅតំបន់ចំការស្វាយចន្ទី ដែលបណ្ដាលឱ្យយោធិនកម្ពុជារងរបួស៤នាក់ appeared first on .

ការប្ដេជ្ញាចិត្ដនេះធ្វើឡើងនៅក្នុងឱកាសដែលឧត្តមសេនីយ៍ឯក រ៉ាត់ ដារ៉ារ័ត្ន ទទួលជួបសម្តែងការគួរសម និងពិភាក្សាការងារជាមួយ លោក Jürg Montani កាលពីថ្ងៃទី១ ខែកក្កដា ឆ្នាំ២០២៦។

ក្នុងជំនួបនេះ លោករដ្ឋលេខាធិការ បានថ្លែងអំណរគុណយ៉ាងជ្រាលជ្រៅចំពោះ ICRC ដែលបានបន្តផ្តល់ការគាំទ្រយ៉ាងសកម្មដល់កម្ពុជា ជាពិសេសការសម្របសម្រួលយ៉ាងសកម្មប្រកបដោយផ្លែផ្កា ក្នុងការឈានទៅដោះលែងវីរកងទ័ពកម្ពុជាចំនួន ១៨រូប ដែលត្រូវបានភាគីថៃចាប់ខ្លួនដោយខុសច្បាប់នាពេលកន្លងមក ហើយ នេះគឺជាការរួមចំណែកដ៏មានសារៈសំខាន់របស់ ICRC។

ជាការឆ្លើយតប លោក Jürg Montani បានបង្ហាញពីការពេញចិត្តក្នុងការចូលរួមចំណែក សម្របសម្រួល និងបានគូសបញ្ជាក់ពីការប្តេជ្ញាចិត្តរបស់ ICRC ក្នុងការបន្តគាំទ្រ និងការពង្រឹងកិច្ចសហប្រតិបត្តិការជាមួយកម្ពុជា ឱ្យកាន់តែរឹងមាំបន្ថែមទៀត។

បន្ថែមពីនេះ លោករដ្ឋលេខាធិការ ក៏បានជម្រាបជូនអំពីស្ថានការណ៍តាមបណ្តោយព្រំដែនកម្ពុជា-ថៃ និងបានបញ្ជាក់ជាថ្មីនូវជំហរយ៉ាងម៉ឺងម៉ាត់របស់ក្រសួងការពារជាតិ ក្នុងការដោះស្រាយបញ្ហាព្រំដែនដោយសន្តិវិធី ផ្អែកលើច្បាប់អន្តរជាតិ និងអនុលោមតាមអនុសញ្ញា សន្ធិសញ្ញា និងកិច្ចព្រមព្រៀងនានាដែលមានស្រាប់រវាងកម្ពុជា និងថៃ។

ជាលទ្ធផល ភាគីទាំងពីរបានវាយតម្លៃខ្ពស់ចំពោះកិច្ចសហប្រតិបត្តិការជិតស្និទ្ធរវាងកងយោធពលខេមរភូមិន្ទ និង ICRC ព្រមទាំងបានបញ្ជាក់ជាថ្មីនូវការប្តេជ្ញាចិត្តរួមគ្នាក្នុងការគាំទ្រដល់ការគោរពច្បាប់អន្តរជាតិ រួមទាំងច្បាប់មនុស្សធម៌អន្តរជាតិ (IHL) ដើម្បីឆ្លើយតបទៅនឹងតម្រូវការផ្នែកមនុស្សធម៌ ព្រមទាំងរួមចំណែកលើកកម្ពស់សន្តិភាព ស្ថិរភាព និងសុវត្ថិភាពនៅក្នុងតំបន់៕

The post ក្រសួងការពារជាតិ និង ICRC ប្តេជ្ញាចិត្តរួមគ្នាគាំទ្រការគោរពច្បាប់អន្តរជាតិ ដើម្បីលើកកម្ពស់សន្តិភាព សុវត្ថិភាពក្នុងតំបន់ appeared first on .

តាមរយៈសេចក្ដីប្រកាសព័ត៌មាន ចុះនៅថ្ងៃទី២៣ ខែមិថុនា ក្រសួងការពារជាតិ បញ្ជាក់ជាថ្មីថា កម្ពុជាមិនទទួលស្គាល់ជាដាច់ខាតនូវការកែប្រែខ្សែព្រំដែនណាមួយដែលកើតចេញពីការប្រើប្រាស់កម្លាំងនោះឡើយ។ ការណ៍នេះ បានគូសបញ្ជាក់ពីភាពចាំបាច់ជាដាច់ខាត ក្នុងការចាប់ផ្តើមកិច្ចការវាស់វែងខ័ណ្ឌសីមាដោយគណៈកម្មការចម្រុះខ័ណ្ឌសីមាព្រំដែនគោក (JBC) កម្ពុជា-ថៃ ឱ្យបានឆាប់បំផុត ស្របតាមកិច្ចព្រមព្រៀងដែលមានស្រាប់ដូចមានចែងនៅក្នុងចំនុចទីបីនៃសេចក្តីប្រកាសរួមនៃកិច្ចប្រជុំពិសេសលើកទី៣ នៃគណៈកម្មាធិការព្រំដែនទូទៅកម្ពុជា-ថៃ (GBC) ថ្ងៃទី២៧ ខែធ្នូ ឆ្នាំ២០២៥ ដើម្បីអនុញ្ញាតឱ្យប្រជាពលរដ្ឋស៊ីវិលស្លូតត្រង់របស់កម្ពុជាអាចវិលត្រលប់ទៅលំនៅដ្ឋានវិញដោយមិនមានការរារាំង ព្រមទាំងដោយសុវត្ថិភាព និងកិត្តិយស។

កម្ពុជាតែងតែផ្តល់ការគាំទ្រយ៉ាងពេញទំហឹងដល់ក្រុមអ្នកសង្កេតការណ៍អាស៊ាន (AOT) ព្រមទាំងសង្កត់ធ្ងន់ទៅលើសារៈសំខាន់មិនអាចខ្វះបានក្នុងការពង្រឹងតួនាទី និងអាណត្តិរបស់ AOT ដើម្បីផ្ទៀងផ្ទាត់ និងធានាការអនុវត្តបទឈប់បាញ់ ក៏ដូចជាវិធានការនានាដែលបានឯកភាពគ្នារវាងកម្ពុជានិងថៃឱ្យបានពេញលេញ និងប្រកបដោយប្រសិទ្ធភាព សំដៅលើកកម្ពស់តម្លាភាព គណនេយ្យភាព និងការជឿទុកចិត្តគ្នាទៅវិញទៅមក និងតែងតែស្វាគមន៍ដល់បណ្តាប្រទេសជាមិត្តដែលមានបំណងក្នុងការចូលរួមជួយលើកិច្ចការនេះបន្ថែមទៀត៕

The post ក្រុម CLG បន្ដសម្របសម្រួលជូនក្រុមអ្នកសង្កេតការណ៍អាស៊ាន ចុះសង្កេតការណ៍ ផ្ទៀងផ្ទាត់ និងរាយការណ៍អំពីស្ថានភាពព្រំដែននៅភូមិព្រៃចាន់ appeared first on .