ពីទីក្រុងរីយ៉ាដ លោក ផាម មីញជីញ គាំទ្រគំនិតសម្តេចធិបតី ហ៊ុន ម៉ាណែត គម្រោងតភ្ជាប់ផ្លូវល្បឿនលឿនភ្នំពេញ-បាវិត និងបាវិត-ហូជីមិញ និងការតភ្ជាប់ផ្លូវដែក

ឧកញ៉ាកោះក្របី — Fri, 20 Oct 2023 07:30:31 +0000

នាយករដ្ឋមន្ត្រីវៀតណាម ប្រកាសគាំទ្រគំនិតផ្តួចផ្តើមរបស់សម្តេចធិបតី ហ៊ុន ម៉ាណែត ពាក់ព័ន្ធនឹងកិច្ចសហប្រតិបត្តិការទេសចរណ៍ត្រីភាគី ប្រទេសបី គោលដៅតែមួយ (Three Countries One Destination) ក៏ដូចជាគម្រោងនៃការតភ្ជាប់ផ្លូវល្បឿនលឿនភ្នំពេញ-បាវិត និងបាវិត-ហូជីមិញ និងការតភ្ជាប់ផ្លូវដែក។ ការប្រកាសយ៉ាងដូច្នេះរបស់នាយករដ្ឋមន្ត្រីវៀតណាម លោក ផាម មីញជីញ (Pham Minh Chinh) កាលព្រឹកថ្ងៃទី២០ ខែតុលា ក្នុងជំនួបជាមួយសម្តេចមហាបវរធិបតី ហ៊ុន ម៉ាណែត នាយករដ្ឋមន្រ្តី ក្រៅកិច្ចប្រជុំកំពូលអាស៊ាន-ក្រុមប្រឹក្សាសហប្រតិបត្តិការឈូងសមុទ្រ នៅទីក្រុងរីយ៉ាដ ប្រទេសអារ៉ាប៊ីសាអូឌីត។

ក្នុងជំនួបនេះមេដឹកនាំនៃប្រទេសទាំងពីរក្រៅតែពីបានសម្តែងនូវរីករាយនិងសួរទុក្ខគ្នាហើយនោះ លោក ផាម មីញជីញ បានបញ្ជាក់ថា ប្រទេសវៀតណាមកំពុងតែរៀបចំចាំទទួលដំណើរអញ្ជើញបំពេញទស្សនកិច្ចផ្លូវការរបស់សម្តេចធិបតី ទៅកាន់ប្រទេសវៀតណាម នាពេលឆាប់ៗខាងមុខនេះ ។

ក្នុងជំនួបនោះ សម្តេចធិបតីនាយករដ្ឋមន្រ្តីបានរំឭកផងដែរអំពីលទ្ធផលសំខាន់ៗ នៃជំនួបពិភាក្សាជាមួយប្រធានរដ្ឋវៀតណាម ក្នុងឱកាសនៃការចូលរួមក្នុង «វេទិកាខ្សែក្រវាត់ និងផ្លូវ លើកទី៣» នៅរដ្ឋធានីប៉េកាំង កន្លងទៅថ្មីៗនេះ ជាពិសេសការពិភាក្សាអំពីការចរចានៃការតភ្ជាប់ផ្លូវល្បឿនលឿនភ្នំពេញ-បាវិត និងបាវិត-ហូជីមិញ ដែលការតភ្ជាប់នេះ នឹងជួយសម្រួលដល់ការផ្លាស់ប្តូរពាណិជ្ជកម្ម និងទេសចរណ៍ ។

ជាលទ្ធផលនៃជំនួបនេះ ថ្នាក់ដឹកនាំទាំងពីរបានឯកភាពវាយតម្លៃខ្ពស់ចំពោះវឌ្ឍនភាពរីកចម្រើននៃកិច្ចសហប្រតិបត្តិការទ្វេភាគីលើគ្រប់វិស័យ និងគ្រប់កម្រិត ជាពិសេស នាយករដ្ឋមន្ត្រីវៀតណាម បានបញ្ជាក់អំពីការគាំទ្រលើគំនិតផ្តួចផ្តើមរបស់ សម្តេចធិបតី ពាក់ព័ន្ធនឹងកិច្ចសហប្រតិបត្តិការទេសចរណ៍ត្រីភាគី កម្ពុជា-ឡាវ-វៀតណាម ប្រទេសបី គោលដៅតែមួយ (Three Countries One Destination) ក៏ដូចជាគម្រោងនៃការតភ្ជាប់ផ្លូវល្បឿនលឿនភ្នំពេញ-បាវិត និងបាវិត-ហូជីមិញ និងការតភ្ជាប់ផ្លូវដែក។

ក្រៅពីនេះ ថ្នាក់ដឹកនាំនៃប្រទេសទាំងពីរ ក៏បានឯកភាពពង្រឹង និងពង្រីកកិច្ចសហប្រតិបត្តិការលើវិស័យសំខាន់ៗមួយចំនួនទៀត ដូចជា វិស័យ ការពារជាតិ, សន្តិសុខ, និងការអនុវត្តច្បាប់ជាដើម៕

The post ពីទីក្រុងរីយ៉ាដ លោក ផាម មីញជីញ គាំទ្រគំនិតសម្តេចធិបតី ហ៊ុន ម៉ាណែត គម្រោងតភ្ជាប់ផ្លូវល្បឿនលឿនភ្នំពេញ-បាវិត និងបាវិត-ហូជីមិញ និងការតភ្ជាប់ផ្លូវដែក appeared first on .

គម្រោងផ្លូវល្បឿនលឿនទី២ ភ្នំពេញ-បាវិត នឹងបើកការសាងសង់ នៅថ្ងៃស្អែកនេះហើយ

Kem sinath — Tue, 06 Jun 2023 09:08:29 +0000

គម្រោងផ្លូវល្បឿនលឿន ភ្នំពេញ-បាវិត ដែលជាគម្រោងផ្លូវល្បឿនលឿនទី២ នៅក្នុងប្រទេសកម្ពុជា បន្ទាប់ពីផ្លូវល្បឿនលឿន ភ្នំពេញ-ក្រុងព្រះសីហនុ នឹងបើកការដ្ឋានសាងសង់ជាផ្លូវការនៅថ្ងៃទី ០៧ ខែមិថុនា ឆ្នាំ២០២៣នេះ។ពិធីសម្ពោធ បើកការសាងសង់នេះ ធ្វើឡើងក្រោមអធិបតីភាពដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជាផងដែរ។

គួរបញ្ជាក់ផងដែរថា គម្រោងផ្លូវល្បឿនលឿន ភ្នំពេញ-បាវិត មានប្រវែងសរុបប្រមាណ ១៣៥ គីឡូម៉ែត្រ មាន៤គន្លង ឆ្លងកាត់ខេត្តចំនួន៣ រួមមាន ខេត្តកណ្តាល ព្រៃវែង និងខេត្តស្វាយរៀង។ គម្រោងផ្លូវល្បឿនលឿននេះ អាចនឹងត្រូវចំណាយថវិកាប្រមាណ ១,៣៥ពាន់លានដុល្លារ ត្រូវបានវិនិយោគដោយក្រុមហ៊ុន សាជីវកម្មស្ពាន និងថ្នល់ចិន (CRBC) ក្រោមទម្រង់វិនិយោគសាងសង់-ប្រតិបត្តិការ-ផ្ទេរ (Build-Operate-Transfer) ហៅកាត់ថា BOT ដូចគ្នាទៅនឹងគម្រោងផ្លូវល្បឿនលឿនភ្នំពេញ-ក្រុងព្រះសីហនុដែរ ដោយក្រុមហ៊ុនធ្វើប្រតិបត្តិការរយៈពេល៥០ឆ្នាំ មុនពេលផ្ទេរជូនរាជរដ្ឋាភិបាល។

ផ្លូវល្បឿនលឿនភ្នំពេញ-បាវិត នឹងតភ្ជាប់ជាមួយគម្រោងផ្លូវល្បឿនលឿនហូជីមិញ-ម៉ុកបៃ របស់ប្រទេសវៀតណាម ដែលរំពឹងថារួចរាល់តំណាលគ្នា។បើតាមការគ្រោងទុក គម្រោងផ្លូវល្បឿនលឿន ភ្នំពេញ-បាវិត អាចនឹងបញ្ចប់ការសាងសង់នៅចុងឆ្នាំ២០២៦ ឬដើមឆ្នាំ២០២៧ខាងមុខ៕

The post គម្រោងផ្លូវល្បឿនលឿនទី២ ភ្នំពេញ-បាវិត នឹងបើកការសាងសង់ នៅថ្ងៃស្អែកនេះហើយ appeared first on .