ច្បាប់ចរាចរណ៍

ពីថ្ងៃទី១មករានេះតទៅ ចាប់ផ្ដើមអនុវត្តកម្មវិធីដកពិន្ទុបណ្ណបើកបរ និងការបង់ប្រាក់ពិន័យអន្តរការណ៍

ជំទាវឧកញ៉ាស្រីទីន — Sun, 01 Jan 2023 03:30:28 +0000

ចាប់ពីថ្ងៃទី១មករា២០២៣ តទៅ កម្មវិធីដកពិន្ទុបណ្ណបើកបរ និងការបង់ប្រាក់ពិន័យអន្តរការណ៍ ចំពោះអំពើល្មើសច្បាប់ស្ដីពីចរាចរណ៍ផ្លូវគោក នឹងត្រូវអនុវត្ត។ នេះបើតាមសេចក្តីជូនដំណឹងរបស់គណៈកម្មាធិការជាតិសុវត្ថិភាពចររាចរណ៍ផ្លូវគោក កាលពីថ្ងៃទី៣១ ខែធ្នូ ឆ្នាំ២០២២ម្សិលមិញ។

នេះជាយន្តការថ្មីមួយក្នុងគោលបំណងបង្កើនប្រសិទ្ធភាពនៃការរឹតបន្តឹងការអនុវត្តច្បាប់ស្ដីពីចរាចរណ៍ផ្លូវគោក សំដៅកាត់បន្ថយគ្រោះថ្នាក់ចរាចរណ៍ផ្លូវគោកឱ្យបានជាអតិបរមា។

គួររំលឹកថា កម្មវិធីដកពិន្ទុបណ្ណបើកបរ និងការបង់ប្រាក់ពិន័យអន្តរការណ៍នេះ បានដាក់ឱ្យអនុវត្តន៍សាកល្បងកាលពីថ្ងៃទី០១ ខែកញ្ញា ឆ្នាំ២០២២កន្លងទៅ នៅតាមគោលដៅមួយចំនួន ដែលគិតមកទល់ពេលនេះមានរយៈពេល ៤ខែហើយ និងមានបណ្ណបើកបរប្រមាណ ២៣ ០១៥បណ្ណ ត្រូវបានដកពិន្ទុផងដែរ។

ជាមួយគ្នានោះ ច្បាប់ចរាចរណ៍ផ្លូវគោកថ្មីដែលកំពុងពិភាក្សាពីពាគីពាក់ព័ន្ធក៏មានតម្រូវឲ្យអ្នកបើកបរត្រូវធ្វើតេស្តរកសារធាតុញៀន(អ្នកប្រើគ្រឿងញៀន)ផងដែរ៕

The post ពីថ្ងៃទី១មករានេះតទៅ ចាប់ផ្ដើមអនុវត្តកម្មវិធីដកពិន្ទុបណ្ណបើកបរ និងការបង់ប្រាក់ពិន័យអន្តរការណ៍ appeared first on .

អ្នកបើកលើសល្បឿនកំណត់ អាចនឹងត្រូវពិន័យដក៦ពិន្ទុ ពីបណ្ណបើកបរ ចាប់ពីខែកញ្ញានេះ

ឧកញ៉ាដែនដី — Sat, 03 Sep 2022 10:00:33 +0000

ការដកពិន្ទុលើបណ្ណបើកបរយានយន្ត នៅក្នុងប្រទេសកម្ពុជា បានចាប់ផ្តើមអនុវត្តសាកល្បងហើយ ចាប់ពីថ្ងៃទី០១ ខែកញ្ញា ឆ្នាំ២០២២នេះតទៅ ហើយអ្នកដែលបើកបរលើសល្បឿនកំណត់ ចាប់ពី ៥០គីឡូម៉ែត្រក្នុងមួយម៉ោងឡើងទៅ នឹងត្រូវពិន័យដកពិន្ទុពីបណ្ណបើកបរដល់ទៅ ៦ពិន្ទុ ខណៈដែលពិន្ទុសរុបមានត្រឹមតែ ១២ពិន្ទុប៉ុណ្ណោះ។

យោងតាមប្រកាសអន្តរក្រសួងលេខ ១៧៦ ចុះថ្ងៃទី១៤ ខែកញ្ញា ឆ្នាំ២០២១ រវាងក្រសួងមហាផ្ទៃ និងក្រសួងសាធារណការ និងដឹកជញ្ជូន ត្រង់ប្រការ៤ បានបញ្ជាក់ឱ្យដឹងថា ត្រូវកាត់ ១ពិន្ទុ ចំពោះអ្នកបើកបរលើសល្បឿនកំណត់ចាប់ពី ១ ទៅ ១៩ គម/ម៉ និងពិន័យជាប្រាក់ ១២ម៉ឺនរៀល, កាត់២ពិន្ទុ ចំពោះអ្នកលើសល្បឿនចាប់ពី ២០ ទៅ ២៩ គម/ម៉ (ពិន័យប្រាក់ ១៥ម៉ឺនរៀល), កាត់៣ពិន្ទុ ចំពោះអ្នកលើសល្បឿនចាប់ពី ៣០ ទៅ ៣៩ គម/ម៉ (ពិន័យប្រាក់ ១៨ម៉ឺនរៀល), កាត់៤ពិន្ទុ ចំពោះអ្នកលើសល្បឿនចាប់ពី ៤០ ទៅ ៤៩ គម/ម៉ (ពិន័យប្រាក់ ៣០ម៉ឺនរៀល) និងកាត់៦ពិន្ទុ ចំពោះអ្នកបើកបរលើសល្បឿនកំណត់ចាប់ពី ៥០គម/ម៉ ឡើងទៅ (ថែមពិន័យជាប្រាក់ ៣០ម៉ឺនរៀល)។

កន្លងមក ចំពោះការផាកពិន័យលើសល្បឿនកំណត់នេះ បានក្លាយជាក្តីកង្វល់មួយរបស់ប្រជាជនទូទៅ ដែលត្រូវធ្វើដំណើរផ្លូវឆ្ងាយ ដូចជាការធ្វើដំណើរតាមផ្លូវជាតិលេខ៣ ផ្លូវជាតិលេខ៤ ផ្លូវជាតិលេខ៥ ផ្លូវជាតិលេខ៦ និងផ្លូវស្ងាត់មួយចំនួន ដែលមានស្លាកសញ្ញាកំណត់ល្បឿនត្រឹម ៤០ ឬ ៦០ គីឡូម៉ែត្រក្នុងមួយម៉ោង។

សូមបញ្ជាក់ថា តាមប្រកាសខាងលើ បានបញ្ជាក់ឱ្យដឹងថា គោលបំណងនៃការអនុវត្តការដកពិន្ទុលើបណ្ណបើកបរនេះ គឺដើម្បីទប់ស្កាត់ និងកាត់បន្ថយគ្រោះថ្នាក់ចរាចរណ៍បង្កឡើងដោយអំពើល្មើសច្បាប់ស្តីពីចរាចរណ៍ផ្លូវគោក ហើយបើក្នុងករណីអស់ពិន្ទុ នោះបណ្ណបើកបរត្រូវទុកជាមោឃៈ។ បើអ្នកបើកបរមានបំណងចង់បានបណ្ណបើកបរថ្មី ត្រូវរៀនបំប៉ន និងប្រឡងយកបណ្ណបើកបរឡើងវិញ ក្នុងរយៈពេលយ៉ាងតិច ៦ខែ៕

The post អ្នកបើកលើសល្បឿនកំណត់ អាចនឹងត្រូវពិន័យដក៦ពិន្ទុ ពីបណ្ណបើកបរ ចាប់ពីខែកញ្ញានេះ appeared first on .

រដ្ឋមន្ត្រីក្រសួងមហាផ្ទៃ ណែនាំសមត្ថកិច្ចពាក់ព័ន្ធកែទម្រង់គុណភាពប្រឡងយកបណ្ណបើកបរ

ឧកញ៉ាតូច — Fri, 19 Aug 2022 00:39:59 +0000

រដ្ឋមន្ត្រីក្រសួងមហាផ្ទៃ ណែនាំដល់មន្ត្រីសមត្ថកិច្ចពាក់ព័ន្ធឱ្យលើកកម្ពស់សុវត្ថិភាពចរាចរណ៍ ផ្លូវគោក ដោយជំរុញបន្ថែមលើការយកចិត្តទុកដាក់បំពេញកិច្ចការសំខាន់ៗ បម្រើដល់ការធ្វើចរាចរណ៍ឲ្យកាន់តែមានសុវត្ថិភាព និងបម្រើដល់ការអភិវឌ្ឍសេដ្ឋកិច្ចជាតិ។

ថ្លែងនៅក្នុងកិច្ចប្រជុំបូកសរុបលទ្ធផលការងារសុវត្ថិភាពចរាចរណ៍ផ្លូវគោកប្រចាំឆមាសទី១ និងលើកទិសដៅ ការងារឆមាសទី២ ឆ្នាំ២០២២ របស់គណៈកម្មាធិការជាតិសុវត្ថិភាពចរាចរណ៍ផ្លូវគោក សម្តេចក្រឡាហោម ស ខេង ឧបនាយក រដ្ឋមន្ត្រី រដ្ឋមន្ត្រីក្រសួងមហាផ្ទៃ បានណែនាំឲ្យសមត្ថកិច្ចពាក់ព័ន្ធពង្រឹងបន្ថែមគុណភាពសាលាបង្រៀនបើកបរដោយផ្ដោតលើ៣ចំណុចដូចជា៖ ការកែទម្រង់ សមត្ថភាពគ្រូ កែទម្រង់ការសិក្សា និងកែទម្រង់គុណភាពនៃការប្រឡងយកបណ្ណបើកបរ។

ទន្ទឹមនឹងនេះ ក៏ត្រូវបង្កើនការអប់រំផ្សព្វផ្សាយច្បាប់ បទដ្ឋានសុវត្ថិភាពចរាចរណ៍ផ្លូវគោក ក៏ដូចជាការអប់រំស្ដីពីបទដ្ឋាននៃការប្រើប្រាស់ផ្លូវ ជាពិសេសផ្លូវល្បឿនលឿន និងផ្លូវឯកទិស (ហាយវ៉េ) ព្រោះវាគឺជាសមិទ្ធផលថ្មី។

លើសពីនេះ ត្រូវរឹតបន្តឹងបន្ថែមឱ្យបានម៉ឺងម៉ាត់ចំពោះរថយន្តដឹកជញ្ជូនលើសទម្ងន់កម្រិតកំណត់ និងរថយន្តដឹកសម្ភារ សំណង់ដែលមិនបានគ្របឱ្យគត់មត់ល្អ។ សម្តេចក្រឡាហោមបន្ថែម។

ជាមួយគ្នានេះដែរ សម្តេចក្រឡាហោម បានជំរុញឲ្យមានការគាំទ្រលើកម្មវិធីដកពិន្ទុបណ្ណបើកបរ ដែលអនុញ្ញាតឱ្យសមត្ថកិច្ចជំនាញអាចធ្វើការស្កេន ដឹងពីបណ្ណបើកបរ ពិតឬក្លែងក្លាយ និងពិន្ទុនៅសល់ក្នុងបណ្ណបើកបរនោះ។

គួររម្លឹកន្តិចថា ប្រព័ន្ធដកពិន្ទុបណ្ណ បើកបរត្រូវបានអភិវឌ្ឍរួចរាល់ និងគ្រោងដាក់ឱ្យដំណើរការសាកល្បងផ្លូវការចាប់ពីថ្ងៃទី០១ ខែកញ្ញា ឆ្នាំ២០២២ ហើយនិងដាក់ឱ្យអនុវត្តពេញលេញជាផ្លូវការនៅដើមឆ្នាំ២០២៣ខាងមុខ ដោយរង់ចាំការសម្រេចលើ ពេលវេលាសមស្របពីរដ្ឋមន្ត្រីក្រសួងមហាផ្ទៃតែប៉ុណ្ណោះ។ នេះបើតាមការបញ្ជាក់ពីលោក ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន៕

The post រដ្ឋមន្ត្រីក្រសួងមហាផ្ទៃ ណែនាំសមត្ថកិច្ចពាក់ព័ន្ធកែទម្រង់គុណភាពប្រឡងយកបណ្ណបើកបរ appeared first on .

បើកឡាន Rolls Royce និយាយទូរស័ព្ទភ្លេចខ្លួន ឧកញ៉ាបណ្ឌិត គីម ហ៊ាង អស់លុយ ១២ម៉ឺនរៀល ទាំងព្រលឹម

អ្នកឧកញ៉ាវត្តភ្នំ — Thu, 23 Sep 2021 03:55:39 +0000

ឧកញ៉ាបណ្ឌិត គីម ហ៊ាង ប្រធាន KW Cambodia ដែលតែងតែធ្វើដំណើរទៅណាមកណាដោយបើករថយន្តប្រណិតម៉ាក Rolls Royce ពណ៌ស ដោយខ្លួនឯង កាលពីព្រឹកថ្ងៃទី២៣ ខែកញ្ញា ឆ្នាំ២០២១នេះ រងការផាកពិន័យចំនួន ១២ម៉ឺនរៀល ដោយសារខុសច្បាប់ចរាចរណ៍។

ក្រោយត្រូវប៉ូលិសផាកអស់លុយជាង ១២ម៉ឺនរៀលក្ដៅៗ លោកឧកញ៉ាបណ្ឌិត គីម ហ៊ាង បានបង្ហោះសារពញ្ញាក់អារម្មណ៍ដល់អ្នកលេងបណ្ដាញសង្គម និងម្ចាស់យានយន្តទាំងអស់យ៉ាងដូច្នេះថា៖

1. ច្បាប់ត្រូវបានបង្កើតឡើងដោយមនុស្ស ដើម្បីអោយមនុស្សទាំងអស់អនុវត្តន៌ និងគោរពតាម ដោយស្មើភាពគ្នា!
2. ព្រឹកនេះខ្ញុំបាទ ឧកញ៉ាបណ្ឌិត គីម ហ៊ាង បានបើកឡានផ្ទាល់ខ្លួនប្រភេទ Rolls Royce ផ្លាកលខ KH.1979 ដោយបើកបរ និងនិយាយទូរសព្ទ័ ដែលខុសច្បាប់ចរាចរណ៌ផ្លូវគោក!
3. ខ្ញុំបាទ គីម ហ៊ាង សុខចិត្តទទួលកំហុស ព្រមបង់ការពិន័យ ដោយសន្យាថា ឈប់ធ្វើអញ្ចឹងទៀតហើយ និងសូមអំពាវនាវដល់អ្នកបើកបរទាំងអស់ កុំនិយាយទូរសព្ទ័ ពេលកំពុងបើកបរ ពិសេសប្រយត្ន័មានគ្រោះថ្នាក់ អាចរងការពិន័យ ហើយខ្មាសគេខ្លាំងណាស់ ដូចខ្ញុំបាទ គីម ហ៊ាង!

ប្រធានក្រុមហ៊ុនអចលនទ្រព្យ KW Cambodia និងជាអ្នកជំនាញខាងវិស័យអចលនទ្រព្យជើងចាស់នៅកម្ពុជាដដែលរូបនេះ បន្ថែមទៀតថា៖ “អស់ ១២០ ០០០រៀលទាំងព្រឹក ជារឿងតូច តែខ្ញុំពិតជាខ្មាសគេណាស់ ហើយសូមអោយអ្នកបើកបរទាំងអស់ កុំយកតាមគំរូអាក្រក់នេះ!”។

គួរបញ្ជាក់ បើយោងតាមអនុក្រឹត្យលេខ៣៩ អនក្រ.បក ស្តីពីការកែសម្រួលអនុក្រឹត្យលេខ៤៤ អនក្រ.បក ស្តីពីការពិន័យអន្តរការណ៍ចំពោះអំពើល្មើសនឹងច្បាប់ស្តីពីចរាចរណ៍ផ្លូវគោក រាល់ការប្រើប្រាស់ទូរស័ព្ទដៃពេលកំពុងបើកបរដោយគ្មានឩបករណ៌ភ្ជាប់ទំនាក់ទំនង ត្រូវពិន័យជាប្រាក់៖

ម៉ូតូ ត្រូវពិន័យជាប្រាក់ ៨០ ០០០ រៀល
រថយន្តធុនស្រាល ត្រូវពិន័យជាប្រាក់ ១២០ ០០០ រៀល
រថយន្តធុនធ្ងន់ ត្រូវពិន័យជាប្រាក់ ២២៥ ០០០ រៀល

អានអត្ថបទ៖ លោកឧកញ៉ា គីម ហ៊ាង៖ ចំណុច ៥ នាំឲ្យកម្ពុជា អាចដើរលឿនជាងប្រទេសក្នុងតំបន់អាស៊ានត្រឹមឆ្នាំ២០៥០

The post បើកឡាន Rolls Royce និយាយទូរស័ព្ទភ្លេចខ្លួន ឧកញ៉ាបណ្ឌិត គីម ហ៊ាង អស់លុយ ១២ម៉ឺនរៀល ទាំងព្រលឹម appeared first on .

សម្តេច ស ខេង ដាក់ចេញគោលការណ៍ចំនួន៤ ដើម្បីកាត់បន្ថយគ្រោះថ្នាក់ចរាចរណ៍ផ្លូវគោក

កូនចៅឧកញ៉ា — Fri, 27 Mar 2020 06:26:21 +0000

ភ្នំពេញ ៖ សម្តេចក្រឡាហោម ស ខេង ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ នៅថ្ងៃទី២៧ ខែមីនា ឆ្នាំ២០២០ បានដាក់ចេញនូវបទបញ្ជាចំនួន ៤ ដើម្បីទប់ស្កាត់ និងកាត់បន្ថយគ្រោះថ្នាក់ចរាចរណ៍ផ្លូវគោក សំដៅការពារអាយុជីវិតរបស់ប្រជាពលរដ្ឋ ដោយសម្រេចប្រកាសរឹតបន្តឹងការអនុវត្តច្បាប់ស្តីចរាចរណ៍ផ្លូវគោកចាប់ពីឆ្នាំ២០២០នេះតទៅ។

សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ និងជាប្រធានគណៈកម្មាធិការជាតិសុវត្ថិភាពចរាចរណ៍ផ្លូវគោក បានដាក់ចេញនូវបទបញ្ជាចំនួន៤ចំណុច សំខាន់ៗ ដើម្បីកាត់បន្ថយគ្រោះថ្នាក់ចរាចរណ៍នៅកម្ពុជា។ បទបញ្ជាទាំងបួនរួមមាន៖ ទី១.ប្រជាពលរដ្ឋអ្នកប្រើប្រាស់ផ្លូវទាំងអស់មេត្តាយោគយល់ចំពោះការប្រកាន់យកវិធានការច្បាប់ដ៏តឹងរ៉ឹង ចំពោះបទល្មើសចរាចរណ៍ ផ្លូវគោក ដើម្បីចៀសវាងពីការប្រឈមចំពោះផ្លូវច្បាប់ គឺត្រូវគោរពអនុវត្តច្បាប់ស្តីពីចរាចរណ៍ផ្លូវគោកឱ្យបានល្អខ្ជាប់ខ្ជួន ដើម្បីការពារអាយុជីវិតខ្លួនឯងផ្ទាល់ ភាពសុខដុមរមនា ក្នុងក្រុមគ្រួសារ ការពារទ្រព្យសម្បត្តិរបស់បងប្អូន និងដើម្បីរួមគ្នាលើកកម្ពស់កិត្តិយស សេចក្តីថ្លៃថ្នូរបស់ប្រទេសជាតិ។

ទី២.ក្រសួង-ស្ថាប័នពាក់ព័ន្ធ អាជ្ញាធរ កងកម្លាំងមានសមត្ថកិច្ចគ្រប់លំដាប់ថ្នាក់ អង្គការជាតិ អន្តរជាតិ និងប្រព័ន្ធផ្សព្វផ្សាយនានា បន្តអប់រំផ្សព្វផ្សាយច្បាប់ស្តីពីចរាចរណ៍ផ្លូវគោក និងកម្រិតនៃការពិន័យអន្តរការណ៍ចំពោះអំពើល្មើសទៅនឹងច្បាប់ស្តីពីចរាចរណ៍ផ្លូវគោកឱ្យបានទូលំទូលាយនិងជាប់ជាប្រចាំ។

ទី៣.ដាក់ចេញនូវបទបញ្ជាដល់ថ្នាក់ដឹកនាំ និងមន្ត្រីនគរបាលចរាចរណ៍ទូទាំងប្រទេសត្រូវរឹតបន្តឹងការអនុវត្តច្បាប់ស្តីពីចរាចរណ៍ផ្លូវគោកប្រកបដោយភាពម៉ឺងម៉ាត់ដាច់ខាត មិនយោគយល់ និងត្រូវអនុវត្តឱ្យបានត្រឹមត្រូវទៅតាមនិតិវិធីច្បាប់នូវរាល់បទល្មើសចរាចរណ៍ផ្លូវគោកប្រកបដោយតម្លាភាព ស្មើរភាព និងមិនរើសអើង ហើយត្រូវសហការស្រាវជ្រាវតាមចាប់ខ្លួនជនបង្កគ្រោះថ្នាក់ចរាចរណ៍ផ្លូវគោក ដែលគេចខ្លួន យកមកផ្តន្ទាទោសតាមច្បាប់ឱ្យបានជាដាច់ខាត។

ទី៤.ថ្នាក់ដឹកនាំនគរបាលចរាចរណ៍ត្រូវរៀបចំផែនការសកម្មភាព និងរៀបចំកម្លាំង ដើម្បីតាមដាន ពិនិត្យ និងគាំទ្រប្រតិបត្តិការអនុវត្តច្បាប់របស់មន្ត្រីនគរបាលចរាចរណ៍ក្រោមឱវាទរបស់ខ្លួន ដើម្បីធានាអំពីភាពត្រឹមត្រូវនៃការអនុវត្តច្បាប់របស់មន្ត្រីនគរបាលចរាចរណ៍ទាំងអស់ ព្រមទាំងត្រូវពង្រឹងអាកប្បកិរិយា សីលធម៌ វិន័យ ឱ្យស័ក្តិសមជាមន្ត្រី អនុវត្តច្បាប់ប្រកបដោយគុណធម៌ និងមនសិកាវិជ្ជាជីវៈ។ ត្រូវផ្តល់រង្វាន់តាមការកំណត់របស់រដ្ឋជាមួយការលើកសរសើរចំពោះអង្គភាព និងមន្ត្រីមានស្នាដៃនិងត្រូវដាក់វិន័យឱ្យបានម៉ឺងម៉ាត់ចំពោះមន្ត្រីអសកម្មឬ មន្ត្រីដែលប្រព្រឹត្តផ្ទុយពីក្រមសីលធម៌វិជ្ជាជីវៈ។

សម្តេចក្រឡាហោមបញ្ចេញបទបញ្ជាទាំង៤ចំណុចនេះ នៅក្នុងពិធីផ្សព្វផ្សាយអនុក្រឹត្យលេខ ៣៩ អនក្រ.បក ចុះថ្ងៃទី១៧ ខែមីនា ឆ្នាំ២០២០ ស្ដី «ពីការកែសម្រួលអនុក្រឹត្យលេខ ៤៤ អនក្រ.បក ចុះថ្ងៃទី២១ ខែមីនា ឆ្នាំ២០១៧» ស្ដី «ពីការពិន័យ អន្តរការណ៍ចំពោះអំពើល្មើសនឹងច្បាប់ស្ដីពីចរាចរណ៍ផ្លូវគោក» នៅព្រឹកថ្ងៃទី ២៧ ខែមីនា ឆ្នាំ ២០២០។ ជាមួយគ្នានេះ សម្តេចក្រឡាហោម បានសម្តែងការកោតសរសើរមន្រ្តីគ្រប់ស្ថាប័នពាក់ព័ន្ធទាំងអស់ ដែលបានខិតខំប្រឹងប្រែងធ្វើការយ៉ាងមមាញឹក ដើម្បីពង្រឹងច្បាប់ និងកាត់បន្ថយបញ្ហាគ្រោះថ្នាក់ចរាចរណ៍នេះ៕