កិច្ចប្រជុំប្រវត្តិសាស្ត្ររវាងកម្ពុជា-ថៃ លើកដំបូងក្រោមអនុសញ្ញា UNCLOS នឹងធ្វើនៅសិង្ហបុរី មានផ្សាយបន្តផ្ទាល់ជាភាសាខ្មែរ

រ៉េត សុកធា — Mon, 14 Sep 2026 02:13:55 +0000

កិច្ចប្រជុំលើកដំបូងនៃគណៈកម្មការផ្សះផ្សាក្រោមអនុសញ្ញាអង្គការសហប្រជាជាតិស្តីពីនីតិសមុទ្រ (UNCLOS) រវាងព្រះរាជាណាចក្រកម្ពុជា និងព្រះរាជាណាចក្រថៃ នឹងត្រូវរៀបចំឡើងចាប់ពីថ្ងៃទី១៤ ដល់ថ្ងៃទី១៦ ខែកញ្ញា ឆ្នាំ២០២៦ នេះ នៅប្រទេសសិង្ហបុរី។

នៅក្នុងព្រឹត្តិការណ៍ដ៏សំខាន់នេះ អង្គពិធីនឹងចាប់ផ្តើមសុន្ទរកថាបើកជាផ្លូវការនៅថ្ងៃអង្គារ ទី១៥ ខែកញ្ញា ឆ្នាំ២០២៦ វេលាម៉ោង ៨:០០ ព្រឹក (ម៉ោងនៅកម្ពុជា) ត្រូវនឹងម៉ោង ៩:០០ ព្រឹក (ម៉ោងនៅសិង្ហបុរី)។ សម្រាប់ភាគីកម្ពុជា សុន្ទរកថាបើកនឹងត្រូវថ្លែងដោយ ឯកឧត្តមឧបនាយករដ្ឋមន្ត្រី ប្រាក់ សុខុន។

ដើម្បីឱ្យសាធារណជនបានជ្រាបច្បាស់ និងតាមដានព្រឹត្តិការណ៍នេះ កិច្ចប្រជុំទាំងមូលនឹងត្រូវបើកជាសាធារណៈ ដោយមានការផ្សាយបន្តផ្ទាល់តាមប្រព័ន្ធអ៊ិនធឺណិត (Webcast) ជា ៣ ភាសា រួមមាន ភាសាខ្មែរ អង់គ្លេស និងថៃ ព្រមទាំងមានការផ្សាយបន្តផ្ទាល់តាមរយៈទូរទស្សន៍ជាតិកម្ពុជា (TVK) ផងដែរ៕

The post កិច្ចប្រជុំប្រវត្តិសាស្ត្ររវាងកម្ពុជា-ថៃ លើកដំបូងក្រោមអនុសញ្ញា UNCLOS នឹងធ្វើនៅសិង្ហបុរី មានផ្សាយបន្តផ្ទាល់ជាភាសាខ្មែរ appeared first on .

ក្នុងកិច្ចប្រជុំលើកទី៣៦ នៃរដ្ឋភាគី UNCLOS! កម្ពុជា បញ្ជាក់មូលហេតុច្បាស់ៗក្នុងការជ្រើសរើស ការផ្សះផ្សារដោយបង្ខំ ដោះស្រាយជម្លោះដែនសមុទ្រ កម្ពុជា-ថៃ

រ៉េត សុកធា — Fri, 19 Jun 2026 05:00:58 +0000

ថ្លែងក្នុងកិច្ចប្រជុំលើកទី ៣៦ នៃរដ្ឋភាគីនៃអនុសញ្ញាអង្គការសហប្រជាជាតិស្តីពីច្បាប់សមុទ្រ ឯកឧត្តម កែវ ឈា តំណាងអចិន្ត្រៃយ៍កម្ពុជាប្រចាំ អ.ស.ប.បានសង្កត់ធ្ងន់ថា ដោយសារថៃបានលុបចោលជាឯកតោភាគីនូវអនុស្សរណៈនៃការយោគយល់គ្នាឆ្នាំ ២០០១ (MoU 2001) ដែលជាឧបករណ៍គតិយុត្តិទ្វេភាគីតែមួយគត់ប្រើជាមូលដ្ឋាននៃការដោះស្រាយតំបន់ត្រួតស៊ីគ្នាលើព្រំដែនសមុទ្រនៃប្រទេសកម្ពុជា និងប្រទេសថៃ នោះកម្ពុជាមិនមានជម្រើសណា ក្រៅពីចាប់ផ្តើមដំណើរការផ្សះផ្សារដោយបង្ខំ ក្រោមអនុសញ្ញាអង្គការសហប្រជាជាតិស្តីពីច្បាប់សមុទ្រ។

ក្នុងការឆ្លើយតបទៅនឹងការលើកឡើងរបស់តំណាងថៃ ដែលថា កម្ពុជាមិនចាប់យកការចរចាទ្វេភាគី ហើយបែរជាធ្វើអន្តរជាតិវូបនីយកម្មនៃជម្លោះទ្វេភាគី ឯកឧត្តម យោង ចាន់សុភារ តំណាងអចិន្ត្រៃយ៍រងបានលើកឡើងថា ថៃមិនបានធ្វើនូវអ្វី ដូចដែលខ្លួនបានលើកឡើងនោះទេ។ ថៃបានលើកពីលេស រាប់សិប ដើម្បីបដិសេធការស្នើកោះប្រជុំចរចាទ្វេភាគីក្រោមក្របខ័ណ្ឌអនុស្សរណៈនៃការយោគយល់គ្នា។ ផ្ទុយទៅវិញថៃលុបចោលអនុស្សរណៈឆ្នាំ ២០០១ ជា ឯកតោភាគី ហើយថែមទាំងប្រើកម្លាំងទ័ពរំលោភលើដែនអធិបតេយ្យភាពកម្ពុជាតែម្តង។

ឯកឧត្តម យោង ចាន់សុភារ បានបញ្ជាក់បន្ថែមថា ខណៈកម្ពុជាប្រកាន់ខ្ជាប់នូវការដោះស្រាយជម្លោះដោយសន្តិវិធីជាមួយប្រទេសជិតខាងទាំងអស់ កម្ពុជាជ្រើសរើស ដំណើរការផ្សះផ្សារដោយបង្ខំនេះគឺដើម្បីធានាការការពារ និងការគោរព អធិបតេយ្យ និងសិទ្ធិដែនសមុទ្ររបស់កម្ពុជា។

សូមជម្រាបជូនថា កិច្ចប្រជុំខាងលើនេះ បានប្រព្រឹត្តទៅពីថ្ងៃ ១៥ ដល់ ១៨ មិថុនា ឆ្នាំ២០២៦ នៅទីស្នាក់ការអង្គការសហប្រជាជាតិ បុរីញូវយ៉កដោយមានការចូលរួមពី ១៧១ប្រទេស និងអង្គការតំបន់មួយ ដែលជាសមាជិកនៃអនុសញ្ញាស្តីពីច្បាប់សមុទ្រ UNCLOS៕

The post ក្នុងកិច្ចប្រជុំលើកទី៣៦ នៃរដ្ឋភាគី UNCLOS! កម្ពុជា បញ្ជាក់មូលហេតុច្បាស់ៗក្នុងការជ្រើសរើស ការផ្សះផ្សារដោយបង្ខំ ដោះស្រាយជម្លោះដែនសមុទ្រ កម្ពុជា-ថៃ appeared first on .