របាយការណ៍វិភាគសង្ខេបអំពីលទ្ធផលចុងក្រោយនៃជំរឿនសេដ្ឋកិច្ច នៅកម្ពុជាឆ្នាំ២០២២ ដែលជាលទ្ធផលចុងក្រោយបន្ទាប់ពីការប្រព្រឹត្តកម្មទិន្នន័យ និងវិភាគទិន្នន័យអស់រយៈពេលជាងមួយឆ្នាំ បានបង្ហាញនៅថ្ងៃទី២៦ ខែធ្នូ ឆ្នាំ២០២៣ថា អង្គភាពសេដ្ឋកិច្ចនៅប្រទេសកម្ពុជាសរុបមានចំនួន ៧៥៣.៦៧០សហគ្រាស ដោយគិតត្រឹមថ្ងៃទី០១ ខែមីនា ឆ្នាំ២០២២ និងមានអ្នកចូលរួមការងារនៅក្នុងអង្គភាពសេដ្ឋកិច្ចមានចំនួន ២.៩៨០.៥៦៩នាក់។ ក្នុងនោះ បុរសមាន ១.១៣៩.២០៧ នាក់ ស្មើនឹង ៣៨,២% និងស្ត្រីមាន ១.៨៤១.៣៦២នាក់ ស្មើនឹង ៦១.៨%។ប្រសិនបើមិនរាប់បញ្ចូលអង្គភាពសេដ្ឋកិច្ចតាមចិញ្ចើមផ្លូវទេ នោះចំនួនអង្គភាពសេដ្ឋកិច្ចទាំងអស់មានប្រមាណ ៦៧៦.៥៩៧ សហគ្រាស និងមានអ្នកចូលរួមការងារសរុប ២.៨៦៤.២៥៦ នាក់។

គួរបញ្ជាក់ថា ការធ្វើជំរឿនសេដ្ឋកិច្ចត្រូវបានរៀបចំធ្វើ២ដងរួចមកហើយ គឺជំរឿនសេដ្ឋកិច្ចទី១នៅឆ្នាំ២០១១ និងជំរឿន​សេដ្ឋកិច្ច​ទី២នៅឆ្នាំ២០២២។

បើប្រៀបធៀបលទ្ធផលចុងក្រោយនៃជំរឿនសេដ្ឋកិច្ចឆ្នាំ២០២២ ទៅនឹងលទ្ធផលនៃជំរឿនសេដ្ឋកិច្ចនៅឆ្នាំ២០១១ ឃើញថាអង្គភាពសេដ្ឋកិច្ចនៅឆ្នាំ២០២២ បានកើនឡើងប្រមាណ ៤៩% ជាមួយនឹងអត្រាកំណើនប្រចាំឆ្នាំ មាន ៣,៧%។នៅកំឡុងពេលដូចគ្នានេះដែរ មានអ្នកចូលរួមការងារបានកើនឡើងដល់ ៧០,៩% ដែលបណ្តាលឱ្យអត្រាកំណើនប្រចាំឆ្នាំមានប្រមាណ ៥% ដែលមានកម្រិតខ្ពស់ជាងអត្រាកំណើនប្រជាជនគួរឱ្យកត់សម្គាល់ ដែលមានប្រមាណ ១,៤% តែប៉ុណ្ណោះ។

ជាមួយគ្នានេះ ចំនួនអង្គភាពសេដ្ឋកិច្ចភាគច្រើនមានម្ចាស់ជាជនជាតិកម្ពុជា ដែលមានប្រមាណ៧៤៧.០១០ សហគ្រាស ស្មើនឹង៩៩,១% នៃអង្គភាពសេដ្ឋកិច្ចសរុបទាំងអស់ រីឯអង្គភាពសេដ្ឋកិច្ចដែលមានម្ចាស់ជាជនជាតិចិនមាន ២.៦០៨ សហគ្រាស ស្មើនឹង០,៣% ម្ចាស់ជាជនជាតិវៀតណាមមានប្រមាណ ១.៥៨១ សហគ្រាស ស្មើនឹង០,២% ម្ចាស់ជាជនជាតិអាស៊ីផ្សេងៗទៀតមាន ១.១៩៨ សហគ្រាស ស្មើនឹង០.២% និងជនជាតិកូរ៉េខាងត្បូងមាន ៤៣៩ សហគ្រាស ស្មើនឹង០.៩% ចំណែកអង្គភាពសេដ្ឋកិច្ចដែលម្ចាស់បរទេសមានភាគហ៊ុនជាមួយកម្ពុជាគឺមានតិចជាង ១% នៅឆ្នាំ២០២២៕

The post ជំរឿនសេដ្ឋកិច្ចឆ្នាំ២០២២៖ អង្គភាពសេដ្ឋកិច្ចសរុបនៅកម្ពុជាមានប្រមាណជាង៧៥ម៉ឺនសហគ្រាស appeared first on .

សម្តេចធិបតីមានប្រសាសន៍ថា ការធ្វើជំរឿនសេដ្ឋកិច្ចឆ្នាំ ២០២២ គឺជាមូលដ្ឋានសំខាន់ណាស់សម្រាប់ប្រទេសកម្ពុជាដើរទៅមុខរយៈពេល១០ទៀត។ដោយក្របខណ្ឌគោលនយោបាយ គឺផ្អែកលើបច្ចុប្បន្នភាពជាក់ស្ដែងនៅលើដី។ការណ៍នេះហើយជាការផ្អែកទៅលើទិន្នន័យជាក់ស្ដែង និងក្របខណ្ឌគោលនយោបាយជាក់លាក់។

បន្ថែមពីនោះ កម្ពុជាអាចធ្វើជំរឿនសេដ្ឋកិច្ចជាតិឆ្នាំ២០២២ ដោយខ្លួនឯង ដែលជាការបង្ហាញឱ្យឃើញនូវសមត្ថភាពរបស់មន្ត្រី។ជាងនេះទៀត ជំរឿនសេដ្ឋកិច្ចជាតិឆ្នាំ២០២២ ជាមូលដ្ឋានសំខាន់ណាស់ សម្រាប់ឱ្យកម្ពុជាដើរទៅមុខ និងសម្រេចផែនការជាតិទាំងឡាយ។

សម្តេចធិបតីនាយករដ្ឋមន្រ្តីក៏បានគូសបញ្ជាក់ថា ទិន្នន័យស្ថិតិបានដើរតួនាទីសំខាន់ ដោយសម្ដេចធិបតីបានផ្ដល់អនុសាសន៍ដល់ក្រសួងផែនការ ក៏ដូចជាក្រសួងពាក់ព័ន្ធត្រូវបន្តលើកកម្ពស់ជំរឿនសេដ្ឋកិច្ច និងការអង្កេតសំខាន់ៗលើជំរឿនសេដ្ឋកិច្ច និងការងារអភិវឌ្ឍន៍សង្គម សេដ្ឋកិច្ចរបស់កម្ពុជា។លើសពីនោះ ត្រូវពិនិត្យឱ្យបានត្រឹមត្រូវលើការប្រមូលទិន្នន័យរបស់ខ្លួន ពីព្រោះទិន្នន័យនោះ គឺជាត្រីវិស័យក្នុងការរៀបចំក្របខណ្ឌគោលនយោបាយជាតិ។

គួរបញ្ជាក់ថា ជំរឿនសេដ្ឋកិច្ចត្រូវបានរៀបចំធ្វើ២ដងរួចមកហើយ គឺជំរឿនសេដ្ឋកិច្ចឆ្នាំ២០១១ និងជំរឿន​សេដ្ឋកិច្ច​ឆ្នាំ២០២២។ជំរឿនសេដ្ឋកិច្ចឆ្នាំ២០២២ ធ្វើឡើងគោលបំណងចងក្រងស្ថិតិមូលដ្ឋានគ្រឹះ​ស្តីពី​អង្គ​ភាពសេដ្ឋកិច្ច និងបង្កើតបញ្ជីមេនៃអង្គភាពសេដ្ឋកិច្ចនៅកម្ពុជា ដែលផ្តល់នូវព័ត៌មាន​សំខាន់ៗ​ស្តីពីស្ថានភាពនៃសកម្មភាព និងរចនាសម្ព័ន្ធសេដ្ឋកិច្ច ដល់អ្នករៀបចំគោលន​យោ​បាយ អ្នករៀបចំផែនការ អ្នកស្រាវជ្រាវ និងអ្នកពាក់ព័ន្ធដទៃទៀតផងដែរ។

លទ្ធផលចុងក្រោយនៃជំរឿនសេដ្ឋកិច្ចនៅកម្ពុជាឆ្នាំ២០២២ បានបង្ហាញថា អង្គភាពសេដ្ឋកិច្ចសរុបទាំងអស់មានចំនួន ៧៥៣ ៦៧០ ដែលកើនឡើង ៤៩%បើធៀបនឹងជំរឿន សេដ្ឋកិច្ចឆ្នាំ២០១១ ដែលមានចំនួន ៥០៥ ១៣៤។ អង្គភាពសេដ្ឋកិច្ចទាំងអស់នៅឆ្នាំ២០២២ មាន ៥២,៥% នៅទីប្រជុំជន និង៦៩,១% ជាអង្គភាពសេដ្ឋកិច្ចដែលមានភាពជាម្ចាស់តំណាងជាស្ត្រី។ អង្គភាពសេដ្ឋកិច្ចទាំងអស់ បានស្រូបយកកម្លាំងពលកម្មសរុបចំនួន ២,៩៨លាននាក់ ក្នុងនោះស្ត្រី ចំនួន ១,៨៤លាននាក់។ ជំរឿនសេដ្ឋកិច្ចឆ្នាំ២០២២ ដែលគ្របដណ្តប់អង្គភាពសេដ្ឋកិច្ចតែក្នុងពីរវិស័យគឺ វិស័យឧស្សាហកម្មមាន ៧% និងវិស័យសេវាកម្ម មាន ៩៣%៕

The post សម្តេចធិបតី ហ៊ុន ម៉ាណែត៖ ជំរឿនសេដ្ឋកិច្ចឆ្នាំ២០២២ មានការកើនឡើងប្រមាណ៥០ភាគរយ appeared first on .