តាមរយៈទំព័រហ្វេសប៊ុកផ្លូវការរបស់លោក ឃឹម ហ្វីណង់ អនុរដ្ឋលេខាធិការ និងជាអ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កាលពីពេលថ្មីៗនេះបានឱ្យដឹងថា ស្វាយចន្ទីគឺជាកសិផលដែលត្រូវបាននាំចេញច្រើនជាងគេមួយរបស់កម្ពុជា ហើយកម្ពុជាក៏ស្ថិតក្នុងចំណោមប្រទេសដែលផលិតគ្រាប់ស្វាយចន្ទីនាំមុខគេនៅលើពិភពលោកទាំងផ្នែកបរិមាណ និងគុណភាព ក្នុងនោះជាង៩០%នៃផលិតកម្មសំដៅបម្រើឱ្យទីផ្សារនាំចេញទៅក្រៅប្រទេស។

លោកបន្តថា ហេតុដូច្នេះហើយទើបដំណាំស្វាយចន្ទី ត្រូវបានចាត់ទុកជាដំណាំយុទ្ធសាស្ត្រ និងមានសក្តានុពលខ្លាំងចំនួន៤ ដែលត្រូវបានផ្តល់អាទិភាពមុនគេនៅក្នុងការជំរុញ និងរៀបចំចងក្រងឱ្យទៅជាសហគមន៍កសិកម្មទំនើប រួមមានដំណាំស្រូវ បន្លែ ម្រេច និងស្វាយចន្ទី។

របាយណ៍របស់សមាគមស្វាយចន្ទីកម្ពុជា ពេញមួយឆ្នាំ២០២៣ ការនាំចេញគ្រាប់ស្វាយចន្ទីឆៅរបស់កម្ពុជាសម្រេចបាន ៦៥ ៦០០០តោន ថយចុះ ៧.៦% ស្មើនឹងទឹកប្រាក់ប្រមាណ៨៣៧លានដុល្លារថយចុះ ១៦.៩% បើធៀបនឹងរយៈពេលដូចគ្នា កាលពីឆ្នាំ២០២២២។ក្នុងចំណោមគ្រាប់ឆៅដែលបាននាំចេញនេះ ភាគច្រើននាំចេញទៅកាន់វៀតណាម ដែលមានបរិមាណរហូតដល់ ៦១ ៨០០០តោន។

ពាក់ព័ន្ធនឹងការធ្លាក់ចុះនេះ បើតាម លោក អួន ស៊ីឡុត ប្រធានសមាគមស្វាយចន្ទីកម្ពុជាធ្លាប់បានបញ្ជាក់ថា ការធ្លាក់ចុះនៃទិន្នផលគ្រាប់ស្វាយចន្ទីនេះ ដោយសារកត្តារួមផ្សំមួយចំនួនគឺបាត់បង់ដើមឈើមួយចំនួនធំ ក្នុងរយៈពេល៣ឆ្នាំចុះក្រោយនេះ ដោយសារតែការប្រែប្រួលអាកាសធាតុ។ដូច្នេះហើយ ការបាត់បង់ដើមស្វាយចន្ទី ក៏ធ្វើឱ្យមានការបាត់បង់ទិន្នផលស្វាយចន្ទីដែ។លើសពីនោះ ក៏មានការប្រជែងទិញពីសហគ្រាសក្នុងស្រុក ដោយសារតែគោលនយោបាយជាតិស្តីពីស្វាយចន្ទី រដ្ឋាភិបាលបានលើកទឹកចិត្តឱ្យមានការផ្តល់ជាហិរញ្ញប្បទានអនុគ្រោះនានា។

ប៉ុន្តែការនាំចេញធ្លាក់ចុះនេះមិនមែនជាការបង្ហាញពីភាពអវិជ្ជមានទេ ផ្ទុយមកវិញជាការបង្ហាញពីភាពវិជ្ជមានច្រើន ដោយសារតែមានការងើបឡើងពីសហគ្រាសក្នុងស្រុក។ចំពោះការលក់ចេញគ្រាប់ស្វាយចន្ទីឆៅក៏ល្អ យើងកែច្នៃក៏ល្អ អ្វីដែលសំខាន់ឱ្យតែមានទីផ្សារ ប៉ុន្តែអ្វីដែលល្អជាងនេះ នោះគឺយើងអាចកែច្នៃក្នុងស្រុករបស់យើង ហើយយើងអាចផ្តល់តម្លៃបន្ថែមដល់កសិករ។

ជាមួយគ្នានោះ សមាគមស្វាយចន្ទីកម្ពុជា បានធ្វើការវាយតម្លៃព្យាករណ៍ថា នៅឆ្នាំ២០២៤នេះ តម្លៃគ្រាប់ស្វាយចន្ទីនឹងកើន៥% ចំណែកទិន្នផលកើនរហូតដល់១០%។

គួរបញ្ជាក់ថា កម្ពុជាក៏បានដាក់ចេញនូវគោលនយោបាយជាតិស្តីពី ស្វាយចន្ទី ឆ្នាំ២០២២-២០២៧ ដែលបានដាក់ចេញដោយក្រសួងពាណិជ្ជកម្មកម្ពុជា ដើម្បីជំរុញឲ្យកម្ពុជាក្លាយទៅជាអធិរាជស្វាយចន្ទីផងដែរ៕

The post ស្វាយចន្ទីគឺជាកសិផលដែលត្រូវបាននាំចេញច្រើនជាងគេមួយរបស់កម្ពុជា appeared first on .

លោក តូច ប៊ុនហួរ រដ្ឋលេខាធិការក្រសួងកសិកម្ម រុក្ខាប្រមាញ់និងនេសាទ ថ្លែងនៅក្នុងពិធី បើកដំណើរការទស្សនកិច្ចព័ត៌មាន និងទស្សនកិច្ចសិក្សារបស់ក្រសួងកសិកម្ម រុក្ខាប្រមាញ់និងនេសាទនិងសហភាពអឺរ៉ុប ស្តីពីខ្សែច្រវាក់ផលិតកម្មគ្រាប់ស្វាយចន្ទីកម្ពុជា កាលពីថ្ងៃទី២៩ ខែវិច្ឆិកា ឆ្នាំ២០២៣ថា បច្ចុប្បន្ននេះខេត្តដែលបានដំាដុះដំណាំស្វាយចន្ទីរច្រើនជាងគេគឺមានខេត្តកំពង់ចាម ត្បូងឃ្មុំ កំពង់ធំ ក្រចេះ មណ្ឌលគីរី រតនគីរី ស្ទឹងត្រែង ព្រះវិហារ ឧត្តមានជ័យ សៀមរាប និងកំពង់ឆ្នំា ហើយតារយៈការវាយតម្លៃបានបង្ហាញថាប្រទេសកម្ពុជាមានលក្ខខណ្ឌដី សមស្របសម្រាប់ដំណាំស្វាយចន្ទីរមានប្រមាណ ២លាន៣៨ម៉ឺនហិកតា។

លោក តូច ប៊ុនហួរ គូសបញ្ជាក់ថា« ទោះបីជាអនុវិស័យដំណាំស្វាយចន្ទីទទួលបានលទ្ធផលផ្លែផ្កាគួរជាទីមោទនៈ និងមានការអភិវឌ្ឍរីកចម្រើនគួរឱ្យកត់សម្គាល់ ក៏អនុវិស័យមួយនេះនៅជួបប្រទះបញ្ហាប្រឈមចម្បងៗមួយចំនួនដូចជា៖(១) ផលិតកម្មដំណាំទទួលបានទិន្នផលនិងប្រសិទ្ធភាពសេដ្ឋកិច្ចនៅទាប, (២) ធនធានមនុស្សនិងថវិកាសម្រាប់បម្រើឱ្យការងារស្រាវជ្រាវនិងការផ្ទេរបច្ចេកវិទ្យាផលិតកម្ម និងនវានុវត្តន៍ថ្មីៗនៅមានកម្រិត (៣) កង្វះហេដ្ឋារចនាសម្ព័ន្ធគំាំទ្រផលិតកម្មនិងការកែច្នៃ (៤) ធាតុចូលកសិកម្មមានតម្លៃខ្ពស់ និងថ្លៃដើមផលិតនៅខ្ពស់ (៥ )ការយល់ដឹងអំពីការគ្រប់គ្រង និងប្រើប្រាស់ដីនិងជីវកសិកម្មមិនទាន់ទូលំទូលាយ (៦) តម្លៃកសិផលនៅលើទីផ្សារឡើងចុះ មិនទៀតទាត់ (៧) សហគមន៍កសិកម្មមិនទាន់មានសមត្ថភាពរឹងមំា (៨) ហេដ្ឋារចនាសម្ព័ន្ធ និងភស្តុភារនៅមិនទាន់បង្កើតបានគ្រប់គ្រាន់នៅឡើយ»។

មន្ត្រីជាន់ខ្ពស់ក្រសួងកសិកម្ម រុក្ខាប្រមាញ់ និងនេសាទ រូបនេះលើកឡើងថា ដើម្បីពិនិត្យដោះស្រាយបញ្ហាប្រឈម និងកង្វល់ពាក់ព័ន្ធនឹងវិនិយោគឯកជន ក៏ដូចជាការគិតគូរសម្របសម្រួលបន្ថែមសម្រាប់វិស័យមួយចំនួន ក្នុងការកាត់បន្ថយថ្លៃធ្វើធុរកិច្ច សំដៅលើកកម្ពស់ភាពប្រកួតប្រជែង និងជំរុញកំណើនសេដ្ឋកិច្ច រាជរដ្ឋាភិបាលបានដោះស្រាយបញ្ហាជាច្រើនជូនវិស័យឯកជន ដែលបានស្នើឡើងលើគ្រប់វិស័យ ហើយបញ្ហាដែលនៅសេសសល់ រាជរដ្ឋាភិបាល ក៏បានសម្រេចដាក់ចេញនូវវិធានការកែទម្រង់មុតស្រួច ជាកញ្ចប់។

ក្នុងនោះវិធានការសម្រាប់ការអភិវឌ្ឍវិស័យកសិកម្ម និងកសិឧស្សាហកម្ម រាជរដ្ឋាភិបាលបានប្រគល់ភារកិច្ចជូនក្រសួងកសិកម្ម រុក្ខាប្រមាញ់និងនេសាទ ៖(១) អនុវត្តប្រកបដោយប្រសិទ្ធភាពនិងការទទួលខុសត្រូវខ្ពស់នៅកម្មវិធីអាទិភាពទំាង៣ ស្ថិតក្នុងកម្មវិធីគោលនយោបាយអាទិភាពទី៥និងទី៦ ដូចជាការដាក់ចេញនៅយន្តការសម្របសម្រួលនិងកម្មវិធីហិរញ្ញប្បទាន, ការដាក់ពង្រាយមន្ត្រីបច្ចេកទេសកសិកម្មនៅគ្រប់ឃុំសង្កាត់ និងការរៀបចំសហគមន៍កសិកម្មទំនើប។ (២) ជំរុញការផលិតគ្រប់ពូជនិងគុណភាពល្អ ទំាងស្រូវនិងបន្លែ ក៏ដូចជាជំរុញឱ្យមានការវិនិយោគពីវិស័យឯកជន ក្នុងការស្រាវជ្រាវ អភិវឌ្ឍន៍ និងផលិតគ្រាប់ពូជ សម្រាប់ផ្គត់ផ្គង់ដល់កសិករឱ្យបានទូលំទូលាយ, (៣) ពន្លឿនការរៀបចំច្បាប់ស្តីពីផលិតកម្មកសិកម្មតាមកិច្ចសន្យា ដើម្បីបង្កើនទំនុកចិត្តរវាងកសិករ និងក្រុមហ៊ុន ប្រមូលទី និង(៤) ក្រសួង ស្ថាប័នត្រូវទទួលអនុវត្តវិធានការដែលបានទទួលការឯកភាពពីសម្តេចធិបតី លើលិខិតរបស់គណៈកម្មាធិការគោលនយោបាយសេដ្ឋកិច្ចនិងហិរញ្ញវត្ថុលេខ ១១០៣ស្តីពីរបាយការណ៍លទ្ធផលនៃកិច្ចប្រជុំពិភាក្សាពី ស្ថានការនំាចេញអង្ករនិងស្វាយចន្ទីកម្ពុជា។

យោងតាមរបាយការណ៍រយៈពេល១០ខែរបស់សមាគមស្វាយចន្ទីកម្ពុជា បង្ហាញថាកម្ពុជាផលិតគ្រាប់ស្វាយចន្ទីឆៅបានជាង៦៥ម៉ឺនតោន គិតជាទឹកប្រាក់ប្រមាណ៨៣១លានដុល្លារអាមេរិក ថយចុះជាង១៦%បើប្រៀបធៀបទៅនឹងរយៈ១០ខែដូចគ្នានឹងឆ្នាំ២០២២៕ អត្ថបទ៖ សារេត

The post មន្ត្រីជាន់ខ្ពស់កសិកម្ម៖ ដំណំាស្វាយចន្ទីជួបប្រទះបញ្ហាប្រឈមចម្បងៗចំនួន៨ appeared first on .

សម្រាប់អ្នកជំនាញខាង GI យល់ឃើញថាគោលនយោបាយជាតិស្តីពីស្វាយចន្ទីឆ្នំា២០២២-២០២៧នឹងចូលរួមជំរុញពាក់ព័ន្ធទៅនិងគុណភាព ការស្វែងរកទីផ្សារនិងពង្រីកទីផ្សារទំាងនៅក្នុងស្រុកនិងអន្តរជាតិ ហើយទាក់ទងការចុះបញ្ជីជាម៉ាកសមូហភាព ឬជា GI ក៏ដោយវាចូលរួមបានតិចឬច្រើនវាអាស្រ័យទៅលើការប្រឹងប្រែងរបស់កម្ពុជា។

លោក សុខ សារ៉ង អ្នកជំនាញខាងម៉ាកសម្គាល់ភូមិសាស្ត្រទំនិញឬហៅថាGI មានប្រសាសន៍ថា«ដោយសារយើងមានដៃគូប្រកួតប្រជែងខ្លំាងពេកនៅក្នុងវិស័យស្វាយចន្ទី ជាពិសេសវៀតណាម។ វៀតណាមគាត់ទទួលទិញវត្ថុធាតុដើមពីយើងគាត់មានកន្លែងកែច្នៃធំៗហើយល្អៗនៅក្នុងប្រទេសរបស់គាត់ដោយមានការវិនិយោគពីរដ្ឋនិងក្រុមហ៊ុនមកពីខាងក្រៅផងគឺមាននៅក្នុងប្រទេសវៀតណាម អ៊ីចឹងកន្លែងនេះយើងពិបាក ហើយវៀតណាមគេមានទីផ្សារលក់ផលិតផលមានសុទ្ធតែអតិថិជនល្អៗនៅលើពិភពលោក ទំាងសហរដ្ឋអាមេរិក ជប៉ុន អឺរ៉ុបនិងប្រទេសអូស្តា្រលីជាដើម»។

បើតាមអ្នកជំនាញខាង GI បើនិយាយពីទីផ្សារ ពេលខ្លះផលិតផលរបស់កម្ពុជាថោកជាងគេ ប៉ុន្តែអ្នកដែលធ្លាប់ទិញផលិតផលពីប្រទេសជិតខាងគេអត់មកយករបស់កម្ពុជា ដោយសារតែគេធ្លាប់រកស៊ីជាមួយគ្នាយូរឆ្នំា មានទំនាក់ទំនងជាមួយគ្នាល្អ ដូចនេះគេមិនងាយងាកមករកផលិតផលយើងទេ តែបើយើងមានគោលនយោបាយវាអាចចូលរួមជួយ គ្រាន់ថាបានតិចឬច្រើន។

ប្រធានសមាគមស្វាយតចន្ទីកម្ពុជាយល់ស្របទៅនិងការលើកឡើងរបស់អ្នកជំនាខាងម៉ាកសម្គាល់ភូមិសាស្ត្រទំនិញ ប៉ុន្តែលោកថាកម្ពុជាមានសក្តានុពលនៅត្រង់ថាមានស្វាយចន្ទីជារបស់ខ្លួន។ មានន័យថាកម្ពុជាអត់មានយកស្វាយចន្ទីមកពីប្រទេសផ្សេង។

លោក អួន ស៊ីឡុត ប្រធានសមាគមស្វាយចន្ទីកម្ពុជាមានប្រសាសន៍ថា« នៅពេលអនាគតបើសិនយើងខិតខំប្រឹងប្រែងហើយយើងកំណត់លាភបកាពី១ទៅ៣%នោះ ខ្ញុំគិតថាយើងអាចធ្វើទៅរួច។ប៉ុន្តែមកដល់សព្វថ្ងៃនេះមិនអាចប្រជែងជាមួយវៀតណាមបានទេទៅលើការកែច្នៃគ្រាប់ស្វាយចន្ទី ព្រោះវៀតណាមក៏មានវត្ថុធាតុដើមច្រើនមកពីអាហ្វិចខាងលិច។ជាក់ស្តែងណាស់កម្ពុជាមិនអាចប្រកួតប្រជែងជាមួយវៀតណាមបានទេ ទៅលើគ្រាប់ស្វាយចន្ទីពាក់កណ្តាលសម្រេច។ តែបើសិនជាយើងអាចទុកបាន ពិសេសពូជស្វាយចន្ទីM-23របស់កម្ពុជាយើងអាចកែច្នៃនៅក្នុងស្រុក យើងនឹងមានអាទិភាពបន្តិចទៅលើវៀតណាម»។

លោកលើកឡើងថាបើសិនជាស្វាយចន្ទីនៅថ្ងៃខាងមុខអាចក្លាយជាម៉ាកសម្គាល់ភូមិសាស្ត្រទំនិញគឺជារឿងមួយដែលល្អ ហើយកាន់តែមំាមួននិង កាន់តែខ្លំាង នៅពេលផ្សព្វផ្សាយទៅកាន់ពីភពលោកកាន់តែទូលំទូលាយ ព្រោះស្វាយចន្ទីមិនមែននៅគ្រប់ប្រទេសអាចដំាដុះបានទេមានប្រហែលតែ៤ទៅ១០ប្រទេសដែលអាចដំាបាន មាននៅអាហ្វិកខាងលិច ប្រទេសនៅអាស៊ីអាគ្នេយ៍និងប្រទេសឥណ្ឌាប៉ុណ្ណោះ។ ម្លោះហើយការចុះបញ្ជីស្វាយចន្ទីនិងការធ្វើអត្តសញ្ញាណបញ្ជាក់ទីតំាងគឺជារឿងមួយដ៏ល្អសម្រាប់កសិឧស្សាហកម្មឬកសិពាណិជ្ជកម្មទៅលើដំណាំស្វាយចន្ទី។

លោក អួន ស៊ីឡុត លើកឡើងថា«កន្លងមកសមាគមស្វាយចន្ទីកម្ពុជាជួយជំរុញឱ្យក្រសួងកសិកម្ម រុក្ខាប្រមាញ់និងនេសាទចុះបញ្ជីស្វាយចន្ទីដើម្បីសម្គាល់វាជារបស់យើង ព្រោះប្រទេសជិតខាងយើងមួយចំនួនបានយកស្វាយចន្ទីកម្ពុជាទៅប្តូរឈ្មោះ ប៉ុន្តែឥលូវយើងបានចុះបញ្ជីបាន៤ក្នុងចំណោម៧ពូជនៅក្នុងនោះមានពូជM-23,H-09,M-10និងពូជIM-4»។
បើតាមប្រធានសមាគមស្វាយចន្ទីកម្ពុជា នៅលើទីផ្សារនេះបើគិតទៅលើពាក្យបច្ចេកទេសww180 និងww160 វៀតណាមពឹងផ្អែកទំាងស្រុកទៅលើពូជស្វាយចន្ទីM-23របស់កម្ពុជា ព្រោះពូជនេះជាពូជប្រណិត បើសិនយើងអាចផលិតកែច្នៃនៅក្នុងស្រុកបានខ្ញុំគិតថាយើងមានប្រៀបនៅលើទីផ្សារ តែបច្ចុប្បន្ននេះយើងមិនទាន់មានប្រៀបនៅឡើយទេទាមទារកសាងមូលដ្ឋានគ្រឹះមិនតិចជាង១០ឆ្នំាទៀតទេទើបអាចប្រកួតប្រជែងបានខ្លះជាមួយវៀតណាម៕

អត្ថបទ៖សារេត

The post កម្ពុជាអាចដណ្តើមយកចំណែកទីផ្សារស្វាយចន្ទីខ្លះៗបានទេ ពីវៀតណាមនៅថ្ងៃអនាគត? appeared first on .

លោក ប៉ែន វណ្ណរិទ្ធ ប្រធានមន្ទីរកសិកម្មរុក្ខាប្រមាញ់ និងនេសាទខេត្តកំពង់ធំ បានលើកឡើងថា « ស្របតាមប្រសាសន៍របស់សម្តេចតេជោ ហ៊ុនសែន ក្នុងពិធីបុណ្យទន្លេនៅក្នុងខេត្តកំពង់ធំនេះ សម្តេច ថាជម្រុញឱ្យកម្ពុជាឱ្យក្លាយជាប្រទេសអធិរាជស្វាយចន្ទី ហើយខ្ញុំជឿថា យើងអាចធ្វើបានដោយសារយើងមានផ្ទៃដីសក្តានុពល បានដំាដុះរួចហើយនៅតែយើងជម្រុញឱ្យមានរោងចក្រកែច្នៃមកដល់ថែមទៀត និងរកទីផ្សារនៅខាងក្រៅបាន គឺអាចនាំចេញបានហើយ»។

ស្រដៀងគ្នានេះដែរ ប្រធានសហគមន៍ស្វាយចន្ទីកម្ពុជា សាខាខេត្តកំពង់ធំ លោក ណុក ប៊ុនថន បានឱ្យដឹងថា«បើតាមខ្ញុំគិតកម្ពុជាអាចទៅរួចនៅក្នុងរយៈពេល៥ទៅ១០ឆ្នំាទៀតនៅពេលខាងមុខ ពីព្រោះការផ្គត់ផ្គង់វត្ថុធាតុដើមគ្រាប់ស្វាយចន្ទីរបស់យើងមានច្រើនជាងគេ នៅលើពិភពលោក គ្រាន់តែកម្ពុជាខ្វះខាតការកែច្នៃគ្រាប់ស្វាយចន្ទីសម្រាប់ធ្វើការនំាចេញ ខណៈនៅពេលសព្វថ្ងៃកម្ពុជាជាអធិរាជដែលមានស្វាយចន្ទីច្រើនរួចទៅហើយ»។

ពាក់ព័ន្ធនិងដំណំាស្វាយចន្ទី បើយោងតាមប្រធានមន្ទីរកសិកម្ម រុក្ខាប្រមាញ់ និងនេសាទ ខេត្តកំពង់ធំ គូសបញ្ជាក់ថា ដំណំាស្វាយចន្ទី ជាដំណំាដែលមានសក្តានុពល ហើ់យនៅក្នុងខេត្តកំពង់ធំ ដែលមានដីដំាដុះស្វាយចន្ទី មានជាង១៥ម៉ឺនហិកតាហើយមកដល់សព្វថ្ងៃនេះ មានផ្ទៃដីដែលអាចប្រមូលផលបានមានប្រមាណ១០ម៉ឺនហិកតា ដែលផ្តល់ទិន្នផលជាមធ្យមពី១៣ម៉ឺន ទៅ១៥ម៉ឺនតោន នៅក្នុងមួយឆ្នំា ហើយគ្រាប់ស្វាយចន្ទីភាគច្រើននាំចេញទៅក្រៅប្រទេស។

លោក ណុក ប៊ុនថន បានឱ្យដឹងថា «សម្រាប់កសិករដំាដុះស្វាយចន្ទី ប្រសិនពួកគាត់មានការស្វែងយល់ពីបច្ចេកទេសថែទំា និងចេះសន្សំសំចៃទៅលើការចំណាយរបស់គាត់ ខ្ញុំគិតថាគាត់មានកម្រិតជីវភាពល្អប្រសើរ តែចំពោះកសិករដែលមិនចេះសន្សំសំចៃការចំណាយរបស់ខ្លួនមិនបានល្អ ពួកគាត់នៅមានបញ្ហាហិរញ្ញវត្ថុនៅឡើយ ហើយទិន្នផលស្វាយចន្ទីដែលទទួលបាននៅមានកម្រិត»។

បើតាមប្រធានសហគមន៍ សម្រាប់ប្រជាកសិករដែលមានការយល់ដឹងពីបច្ចេកទេសដំាដុះ និងការថែទំាស្វាយចន្ទីបានល្អ គាត់អាចរកប្រាក់ចំណូលជាមធ្យមពី១១០០ទៅ១២០០ដុល្លារអាមេរិកក្នុងផ្ទៃដីមួយហិកតា ខណៈកសិករខ្វះការយល់ដឹងពីបច្ចេកទេសរកប្រាក់ចំណេញពីការដំាដុះស្វាយចន្ទីរបស់ខ្លួនបានតិចតួចក្នុងមួយរដូវៗទន្ទឹមនិង សហគមន៍ស្វាយចន្ទីកម្ពុជាសាខាខេត្តកំពង់មានសមាជិកពេញសិទ្ធជាង៣០០នាក់។

លោក ណុក ប៊ុនថន បន្តថា ក្នុងវិស័យស្វាយចន្ទី នៅថ្ងៃអនាគតខ្ញុំគិតថា នឹងជួយបង្កើនជីវភាពប្រជាកសិករ ដោយសារតែដំណំាស្វាយចន្ទី ជាដំណាំងាយស្រួលដំដុះ និងមិនសូវមានការលំបាកក្នុងការថែទំាច្រើនដូចទៅនិងដំណំាផ្សេងទៀត និងម្យ៉ាងទៀតងាយស្រួលក្នុងការប្រមូលផលទុកដាក់ បើសិនជាកសិករមិនចង់លក់គ្រាប់ស្វាយចន្ទីស្រស់ទៅឱ្យឈ្មួញ។

លោក លើកឡើងថា បញ្ហាប្រឈមនៅក្នុងដំណំាស្វាយចន្ទី មានដូចការប្រែប្រួលអាកាសធាតុ កង្វះខាតនៅការកែច្នៃគ្រាប់ស្វាយចន្ទីនៅក្នុងស្រុក កសិករមិនទទួលបានកម្រៃបន្ថែមនៅពេលកសិករលក់គ្រាប់ស្វាយចន្ទីនៅសើម។ប៉ុន្តែបើសិននៅពេលខាងមុខ មានរោងចក្រខ្នាតធំចូលមកនៅក្នុងខេត្តកំពង់ធំច្រើន ខ្ញុំគិតថាវាជួយដោះស្រាយបញ្ហាប្រឈមមួយចំនួនបាន ហើយអាចប្រកួតប្រជែងតម្លៃនៅទីផ្សារខាងក្រៅបាន និងជួយបង្កើនជីវភាពប្រជាកសិករដំាដុះស្វាយចន្ទីបានមួយកម្រិតថែមទៀត៕

អត្ថបទ៖សារេត

The post កម្ពុជាអាចក្លាយជាប្រទេសអធិរាជស្វាយចន្ទីបានដែរឬទេនៅថ្ងៃអនាគត? appeared first on .

ក្នុងបទសម្ភាសន៍នេះ លោក ចិន្តា បានលើកឡើងថា លោកបានចាប់ផ្ដើមដាំស្វាយចន្ទីតាំងពីឆ្នាំ ២០១៧ ដោយការចំណាយលើការដាំស្វាយចន្ទីនេះ ចាយទុនត្រឹមតែ ១លានរៀលប៉ុណ្ណោះ ដែលលោកទទួលចំណូលមកវិញខ្ទង់ ២៥០០ដុល្លារអាមេរិកក្នុងមួយរដូវ។ ខណៈមួយហិចតា ប្រមូលផលគ្រាប់បាន ២តោនជាង លោកចិន្ដាបញ្ជាក់បន្ថែម។

លោកបន្តថា កូនស្វាយចន្ទីដែលដាំ លោកនាំយកមកពីខេត្តកំពង់ចាម ដែលកូន ១ដើមតម្លៃ ១៧០០រៀល ក្នុងមួយហិចតា ដាំចំនួន ១០០ដើម ហើយកូន ៦០០ដើម ដាំដុះលើផ្ទៃដីសរុប ៦ ហិចតា។

កសិករវ័យ ២៩ឆ្នាំរូបនេះ បានបង្ហើបថា ក្នុងការដាំស្វាយចន្ទីមានផលវិបាកខ្លះដែរ ដូចជាបញ្ហាអាកាសធាតុប្រែប្រួល បញ្ហាប្រមូលផលមិនទាន់តម្លៃទីផ្សារ ប៉ុន្តែលោកមិនដែលបោះបង់ការងារកសិកម្មរបស់លោកទេ ដោយចាប់ផ្ដើមរៀនសិក្សាបច្ចេកទេសដាំ ការរើសថ្នាំការពារ និងតាមដានអ្នកមានបច្ចេកទេសតាមប្រព័ន្ធមេឌៀផ្សេងៗ ទើបមានភាពជោគជ័យលើការងារមួយនេះ។

ទន្ទឹមនឹងការលើកឡើងនេះ លោកបន្ថែមថា កត្តាដែលធ្វើឱ្យលោកទទួលបានជោគជ័យនេះ គឺដោយសារកត្តាជីវភាពគ្រួសារជាចម្បង និងការស្រលាញ់ចូលចិត្តដោយខិតខំប្រឹងប្រែង ជាពិសេសទៅថ្ងៃអនាគត លោកនឹងពង្រឹកផ្ទៃដីដាំដុះដំណាំបន្ថែមតាមដែលអាចធ្វើបាន។ ហើយលោកក៏បានផ្ដាំផ្ញើទៅប្រជាកសិករខ្មែរ ដែលកំពុងប្រកបរបរកសិកម្មទាំងអស់ថា សូមកុំឆាប់ជឿគេលឿនពេកក្នុងការអំពាវនាវលក់ថ្នាំការពារដំណាំ ដោយគ្រាន់តែឮថាថ្នាំល្អៗ ប៉ុន្តែត្រូវរៀនសង្កេតមើលប្រភេទថ្នាំឱ្យបានច្បាស់លាស់មុនជាវមកប្រើប្រាស់។

គួរបញ្ជាក់ផងដែរថា បច្ចុប្បន្ននេះ ស្វាយចន្ទីកម្ពុជាកំពុងមានកេរ្តិ៍ឈ្មោះល្បី និងត្រូវបានទទួលស្គាល់ពីទីផ្សារលើទំហំគ្រាប់ រសជាតិ កម្រិតកាកសំណល់កសិកម្មទាប និងសរីរាង្គតាមបែបប្រពៃណី ដែលផលិតផលស្វាយចន្ទីរបស់កម្ពុជា អាចទាញយកចំណែកទីផ្សារពិភពលោករួមមាន សហរដ្ឋអាមេរិក អាល្លឺម៉ង់ ហូឡង់ ចិន ចក្រភពអង់គ្លេស បារាំង អូស្ត្រាលី សហភាពអារ៉ាប់រួម និងប្រទេសជប៉ុន។ នេះបើយោងតាមសេចក្ដីប្រកាសព័ត៌មានស្ដីពី លទ្ធផលនៃសម័យប្រជុំពេញអង្គគណៈរដ្ឋមន្ត្រី កាលពីថ្ងៃទី១៣ ខែមករា ឆ្នាំ២០២៣៕

The post ចាយដើមទុន ១លានរៀលដាំស្វាយចន្ទី កើបលុយបាន ២៥០០ដុល្លារអាមេរិកក្នុងមួយរដូវ appeared first on .