ទីក្រុងប៉ារីស

ដំណើរទស្សនកិច្ចរបស់លោក អូលីវេ្យ បិច នឹងពង្រឹងដល់កិច្ចសហប្រតិបត្តិការសេដ្ឋកិច្ចរវាងបារាំង-កម្ពុជា

Kem sinath — Tue, 24 Jan 2023 09:26:10 +0000

លោក អូលីវេ្យ បិច (Olivier Becht) រដ្ឋមន្ត្រីប្រតិភូនៃក្រសួងអឺរ៉ុប និងការបរទេសបារាំង ទទួលបន្ទុកពាណិជ្ជកម្មក្រៅប្រទេស ការទាក់ទាញវិនិយោគិន និងជនជាតិបារាំងនៅបរទេស នឹងអញ្ជើញមកបំពេញទស្សនកិច្ចនៅប្រទេសកម្ពុជា នៅថ្ងៃអង្គារ ទី២៤ និងថ្ងៃពុធ ទី២៥ ខែមករា ឆ្នាំ២០២៣នេះ។តាមដំណើរទស្សនកិច្ចរបស់មន្រ្តីជាន់ខ្ពស់រូបនេះ គឺផ្តោតខ្លាំងក្នុងគោលដៅពង្រឹងកិច្ចសហប្រតិបត្តិការសេដ្ឋកិច្ចរវាងប្រទេសបារាំង និងកម្ពុជា។

ដំណើរទស្សនកិច្ចរបស់មន្រ្តីជាន់ជាន់ខ្ពស់រូបនេះ បានធ្វើឡើងបន្ទាប់ជំនួបរវាងសម្តេចនាយករដ្ឋមន្ត្រី ហ៊ុន សែន និងលោកប្រធានាធិបតីបារាំង អេម៉ានុយអ៊ែល ម៉ាក្រុង នៅទីក្រុងប៉ារីស៍ កាលពីថ្ងៃទី១៣ ខែធ្នូ ឆ្នាំ២០២២កន្លងទៅ។

បើតាមស្ថានទូតបារាំងប្រចាំព្រះរាជាណាចក្រកម្ពុជាបានឱ្យដឹងថា អមដំណើរដោយគណៈប្រតិភូធុរជនដឹកនាំដោយសហព័ន្ធធុរកិច្ចបារាំង MEDEF International និង Business France លោក អូលីវេ្យ បិច នឹងជួបពិភាក្សាការងារជាមួយថ្នាក់ដឹកនាំនយោបាយកម្ពុជាជាច្រើនរូប រួមមាន៖ សម្តេចតេជោ ហ៊ុន សែន នាយករដ្ឋមន្រ្តីកម្ពុជា ឯកឧត្តម ប៉ាន សូរស័ក្តិ រដ្ឋមន្ត្រីក្រសួងពាណិជ្ជកម្ម និងឯកឧត្តម សុខ ចិន្តាសោភា រដ្ឋមន្ត្រីប្រតិភូអមនាយករដ្ឋមន្ត្រី និងជាអគ្គលេខាធិការក្រុមប្រឹក្សាអភិវឌ្ឍន៍កម្ពុជា។

ក្នុងដំណើរទស្សនិច្ចនេះដែរ លោករដ្ឋមន្រ្តីប្រតិភូ នឹងមានជំនួបផ្សេងៗជាមួយសហគមន៍បារាំងនៅកម្ពុជា ពិសេសតំណាងសហគមន៍ធុរកិច្ចបារាំងដ៏រស់រវើក។ ប្រជាពលរដ្ឋបារាំងចំនួន៥ ០០០នាក់ ដែលកំពុងរស់នៅកម្ពុជា បានចុះបញ្ជីជាមួយស្ថានទូតបារាំងផងដែរ។

ជាងនេះទៀត លោករដ្ឋមន្ត្រីប្រតិភូ ក៏នឹងចូលរួមពិធីបញ្ចុះបឋមសិលាសាងសង់ឡើងវិញ នូវស្តូបរំលឹកដល់វិញ្ញាណក្ខន្ធយុទ្ធជនពលីកម្ពុជា និងបារាំងនៅក្នុងសង្គ្រាមលោកលើកទី១តាមការសម្រេចរបស់រាជរដ្ឋាភិបាលកម្ពុជា ដែលនឹងប្រព្រឹត្តទៅក្រោមវត្តមានរបស់ឯកឧត្តម ជា សុផារ៉ា រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ និងលោកជំទាវ ភឿង សកុណា រដ្ឋមន្រ្តីក្រសួងវប្បធម៌ និងវិចិត្រសិល្បៈ។

ក្រៅពីនេះ លោកអូលីវេ្យ បិច ក៏នឹងទៅពិនិត្យដំណើរការសាងសង់រោងចក្រប្រព្រឹត្តកម្មទឹកស្អាតបាក់ខែង ដែលទទួលបានហិរញ្ញប្បទានពីទីភ្នាក់ងារបារាំងសម្រាប់ការអភិវឌ្ឍ (AFD) ធនាគារវិនិយោគអឺរ៉ុប និងសហភាពអឺរ៉ុប ខណៈនៅខេត្តសៀមរាបវិញ លោកក៏នឹងទស្សនាប្រាសាទអង្គរ ជាពិសេសការដ្ឋានជួសជុលប្រាសាទមេបុណ្យខាងលិច ដែលផ្តល់ហិរញ្ញវត្ថុដោយប្រទេសបារាំងថែមទៀត។

គួរបញ្ជាក់ដែរថា តាមរយៈដំណើរទស្សនកិច្ចនេះដែរ លោកអូលីវេ្យ បិច ក៏បង្ហាញពីការប្តេជ្ញាចិត្តកាន់តែខ្លាំងឡើងៗរបស់ប្រទេសបារាំងនៅតំបន់អាស៊ាន ដែលឆ្លុះបញ្ចាំងឱ្យឃើញតាមរយៈការចូលរួមរបស់លោកប្រធានាធិបតីបារាំងក្នុងកិច្ចប្រជុំកំពូលប្រទេស G20 កាលពីចុងឆ្នាំ២០២២នៅកោះបាលី និងកិច្ចប្រជុំសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) នៅទីក្រុងបាងកក។ ដោយលោកចាត់ទុកថា អាស៊ីអាគ្នេយ៍ គឺជាតំបន់សំខាន់មួយនៃយុទ្ធសាស្រ្តបារាំងនៅឥណ្ឌូប៉ាស៊ីហ្វិក ដោយសារតំបន់នេះគឺជាទីតាំងរស់រវើកជាងគេបំផុតក្នុងពិភពលោកបើនិយាយពីទិដ្ឋភាពសេដ្ឋកិច្ច ដោយមានអត្រាកំណើនខ្ពស់ ហើយអាស៊ានគឺជាដៃគូពាណិជ្ជកម្មលំដាប់ទី៣របស់សហភាពអឺរ៉ុប៕ អត្ថបទ៖ ពិសី

The post ដំណើរទស្សនកិច្ចរបស់លោក អូលីវេ្យ បិច នឹងពង្រឹងដល់កិច្ចសហប្រតិបត្តិការសេដ្ឋកិច្ចរវាងបារាំង-កម្ពុជា appeared first on .

ព្រលានយន្តហោះអន្តរជាតិខេត្តព្រះសីហនុ និងចាប់ផ្តើមពង្រីកខ្លួនបន្ថែមទៀតនៅឆ្នាំក្រោយ

Kem sinath — Fri, 16 Dec 2022 08:14:56 +0000

ក្នុងកំឡុងទស្សនកិច្ចផ្លូវការនៅទីក្រុងប៉ារីស ប្រទេសបារាំង ពេលថ្មីៗនេះ សម្តេចតេជោនាយករដ្ឋមន្ត្រី ហ៊ុន សែន ជួបជំនួបដាច់ដោយឡែកជាមួយលោក នីកូឡាស ណូតេប៉ែត អគ្គនាយកក្រុមហ៊ុន Vinci Airports របស់បារាំង ដែលអភិវឌ្ឍគម្រោងអាកាសយានដ្ឋានជាង ៥០ ជុំវិញពិភពលោក។

សេចក្តីប្រកាសព័ត៌មានរបស់ក្រសួងការបរទេសកម្ពុជា កាលពីថ្ងៃទី១៥ ខែធ្នូ បានឲ្យដឹងថា ជំនួបរវាងសម្តេចតេជោ ហ៊ុន សែន និងអគ្គនាយកក្រុមហ៊ុន Vinci Airports បានពិភាក្សាលើគម្រោងពង្រីកទ្រង់ទ្រាយធំលើព្រលានយន្តហោះ អន្តរជាតិ ខេត្តព្រះសីហនុ ដែលគ្រោងនឹងចាប់ផ្តើមនៅដើមឆ្នាំ២០២៣ ខាងមុខនេះ។

ក្នុងជំនួបដដែលនេះ សម្តេចតេជោ ហ៊ុន សែន បានអបអរសាទរដល់ក្រុមហ៊ុន Vinci Airports ដែលនាពេលបច្ចុប្បន្ននេះ ទទួលបានកិច្ចសន្យាសម្បទានគ្រប់គ្រងព្រលានយន្តហោះជាង៥០ នៅក្នុងទ្វីបអាស៊ី អឺរ៉ុប និង អាមេរិក ដោយសារបានប្រើប្រាស់គម្រូកិច្ចសន្យាសម្បទាននៅកម្ពុជាដែលកិច្ចសន្យាដំបូងគេបង្អស់ និងគម្រោងពង្រីកទ្រង់ទ្រាយធំព្រលានយន្តហោះ អន្តរជាតិ ខេត្តព្រះសីហនុ ដែលនឹងចាប់ផ្តើមនៅដើមឆ្នាំ២០២៣ខាងមុខ។

ជាមួយគ្នានេះ អគ្គនាយកក្រុមហ៊ុន Vinci Airports លោក នីកូឡាស ក៏បានថ្លែងអំណរគុណយ៉ាងជ្រាលជ្រៅរាជរដ្ឋាភិបាលកម្ពុជា ដែលតែងតែផ្តល់សេចក្តីទុកចិត្តដល់ក្រុមហ៊ុន Vinci ចំពោះភាពជាដៃគូឈ្នះឈ្នះជាមួយនឹងរាជរដ្ឋាភិបាល ចាប់តាំងពីទសវត្សរ៍ឆ្នាំ១៩៩០រហូតមកទល់នឹងពេលបច្ចុប្បន្នផងដែរ។

គួររំលឹកថា នៅដើមខែធ្នូ ឆ្នាំ២០២១កន្លងទៅ សម្ដេចតេជោ ហ៊ុន សែន បានគូសបញ្ជាក់ថា ដោយសារតែមិនអាចឆ្លើយតបនឹងកំណើនអភិវឌ្ឍកម្ពុជា ទើបតម្រូវសាងសង់ព្រលានយន្តហោះថ្មីនៅខេត្តកណ្តាល និងសៀមរាប ហើយពង្រីកព្រលាននៅខេត្តព្រះសីហនុ។

ក្នុងដំណើរអញ្ចើញពិនិត្យវឌ្ឍនភាពគម្រោងសាងសង់ ព្រលានយន្តហោះអន្តរជាតិភ្នំពេញថ្មី ខេត្តកណ្តាល សម្ដេចតេជោ ហ៊ុន សែន បានបញ្ជាក់យ៉ាងដូច្នេះថា «ព្រលានយន្ដហោះនៅទីក្រុងភ្នំពេញ មិនអាចទ្រទ្រង់ការរីកចម្រើនទៅអនាគតបានទេ យើងអាចទប់ត្រឹមតែ ការហោះហើរផ្ទៃក្នុង ការដឹកទំនិញមួយភាគ និងកងទ័ពជើងអាកាស ដែលនៅទីនោះ ហើយនៅសៀមរាបក៏ដូចគ្នា មិនអាចទេ»។

សម្ដេចតេជោនាយករដ្ឋមន្ត្រី បញ្ជាក់ថា កម្ពុជា ត្រូវការទទួលយន្ដហោះធុនធំ ដើម្បីចុះនៅខេត្តសៀមរាប ប៉ុន្ដែចុះមិនបាននោះទេ ព្រោះទាក់ទងជាមួយ នឹងសុវត្ថិភាពអង្គរវត្ដ។ ដូច្នេះហើយ បានត្រូវកសាងអាកាសយានដ្ឋានអន្តរជាតិសៀមរាបអង្គរថ្មី មួយទៀត។

ទន្ទឹមគ្នានេះ សម្ដេចតេជោ ហ៊ុន សែន បានបញ្ជាក់ទៀតថា ថ្ងៃក្រោយការហោះហើរអាចចុះចតនៅភ្នំពេញ, នៅខេត្តសៀមរាប និងអាចចុះចតនៅខេត្តព្រះសីហនុ ដោយយន្ដហោះធុនធំគ្រប់ខ្នាតទាំងអស់៕

The post ព្រលានយន្តហោះអន្តរជាតិខេត្តព្រះសីហនុ និងចាប់ផ្តើមពង្រីកខ្លួនបន្ថែមទៀតនៅឆ្នាំក្រោយ appeared first on .