នៅក្នុងកិច្ចប្រជុំកំពូលអាស៊ាន ដែលប្រពឹត្តិធ្វើឡើងនៅទីក្រុងកូឡាឡាំពួរ នាយករដ្ឋមន្ត្រីទីម័រខាងកើត លោក Xanana Gusmao បានប្រកាសនៅថ្ងៃនេះថា ៖”ប្រវត្តិសាស្ត្រត្រូវបានបង្កើតឡើង” ខណៈពេលដែលមេដឹកនាំនៃប្រទេសអាស៊ានទាំង១០ បានធ្វើជាសាក្សីនៃការចុះហត្ថលេខាលើសេចក្តីប្រកាសស្តីពីការទទួលយកទីម័រខាងកើត ឲ្យចូលរួមនៅក្នុងប្លុក។

ទន្ទឹមនឹងនេះ នាយករដ្ឋមន្ត្រីម៉ាឡេស៊ី លោក Anwar Ibrahim ដែលប្រទេសរបស់លោកកំពុងកាន់តំណែងជាប្រធានអាស៊ាន បាននិយាយថា ៖”ការចូលជាសមាជិករបស់ទីម័រខាងកើត គឺជាការបំពេញបន្ថែមនៃគ្រួសារអាស៊ាន ដោយបញ្ជាក់ជាថ្មីនូវវាសនារួមរបស់យើង និងអារម្មណ៍មិត្តភាពយ៉ាងជ្រាលជ្រៅនៅក្នុងតំបន់របស់យើង”។

លោក Anwar បានសង្កត់ធ្ងន់ទៀតថា ៖”នៅក្នុងសហគមន៍នេះ ការអភិវឌ្ឍ និងស្វ័យភាពជាយុទ្ធសាស្ត្ររបស់ទីម័រខាងកើតនឹងត្រូវបានគាំទ្រយ៉ាងរឹងមាំ និងជាអចិន្ត្រៃយ៍”។

គួរឲ្យដឹងថាទីម័រខាងកើតបានក្លាយជាប្រទេសឯករាជ្យនៅឆ្នាំ២០០២ បន្ទាប់ពីបំបែកចេញពីប្រទេសឥណ្ឌូណេស៊ី។ ហើយនៅឆ្នាំ២០១១ ទីម័រខាងកើតបានដាក់ពាក្យសុំចូលរួមអាស៊ានជាលើកដំបូង។ ហើយការសិក្សាជាបន្តបន្ទាប់ត្រូវបានធ្វើឡើងដើម្បីវាយតម្លៃពីការត្រៀមខ្លួនរបស់ប្រទេសនេះ ទាក់ទងនឹងស្ថិរភាពនយោបាយ សមត្ថភាពសេដ្ឋកិច្ច និងការត្រៀមខ្លួនរបស់ស្ថាប័ន។

ជម្រាបជូនថា នៅឆ្នាំ២០២២ អាស៊ានបានផ្តល់ឋានៈជាអ្នកសង្កេតការណ៍ដល់ទីម័រខាងកើត ដែលអនុញ្ញាតឱ្យប្រទេសនេះ ចូលរួមកិច្ចប្រជុំអាស៊ានទាំងអស់ រួមទាំងកិច្ចប្រជុំកំពូលអាស៊ាន និងវេទិកាពាក់ព័ន្ធផងដែរ៕​

The post ទីម័រខាងកើត ចូលជាសមាជិកទី១១ របស់អាស៊ានជាផ្លូវការ ក្រោយពុះពារអស់ ១៤ឆ្នាំ appeared first on .

ពិធីចុះហត្ថលេខាធ្វើឡើងក្នុងជំនួបពិភាក្សាការងាររវាងលោក ចាន់ សុខទី ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានអគ្គនាយកក្រុមហ៊ុនហ្រ្គីនត្រេដ នៃក្រសួងពាណិជ្ជកម្ម ជាមួយនឹងគណៈប្រតិភូមកពីប្រទេសទីម័រលេស្តេ នៅថ្ងៃពុធ ទី១៥ ខែវិច្ឆិកានេះ។

ក្រសួងពាណិជ្ជកម្ម បានឲ្យដឹងថា កិច្ចពិភាក្សាការងារនេះ បានធ្វើឡើងក្នុងគោលបំណងដើម្បីស្វែងយល់ពីសក្តានុពលក្នុងកិច្ចសហប្រតិបត្តិការធ្វើពាណិជ្ជកម្មអង្ករ រវាងក្រុមហ៊ុនហ្រ្គីនត្រេដ និងចរចាពីលក្ខខណ្ឌបច្ចេកទេស ក្នុងការនាំចេញទៅប្រទេសទីម័លេស្តេផងដែរ។

លោក ចាន់ សុខទី បានបញ្ជាក់ថា នេះជាការបើកច្រកទីផ្សារថ្មីបន្ថែមទៀតសម្រាប់កម្ពុជា ក្នុងវិស័យស្រូវអង្ករ ហើយកម្ពុជាដែលមានក្រសួងពាណិជ្ជកម្មជាសេនាធិការនឹងបន្តខិតខំស្វែងរកទីផ្សារថ្មីៗបន្ថែមទៀតលើវិស័យនេះ។

សូមជម្រាបថា កាល​ពី​រសៀលថ្ងៃទី​២០ ខែតុលា កម្ពុជា និងទីម័រខាងកើត បានចុះកិច្ចព្រមព្រៀងលើឯកសារសំខាន់ចំនួន០២ ក្នុងនោះមានកិច្ចព្រមព្រៀងស្ដីពីសេវាដឹកជញ្ជូនផ្លូវអាកាស និងអនុស្សារណៈយោគយល់គ្នាស្ដីពីការធ្វើពាណិជ្ជកម្មអង្ករ។​​ ការចុះហត្ថលេខានេះ ធ្វើឡើង​បន្ទាប់ពីបានមានជំនួបទ្វេភាគីរួចរវាងសម្ដេចតេជោ ហ៊ុន សែន អតីត​នាយករដ្ឋមន្ត្រី និងលោក ចូហ្សេ ម៉ានូអែល រ៉ាមូស អរតា (Jose Ramos-Horta) ប្រធានាធិបតីទីម័រខាងកើត​ នៅវិមានសន្តិភាព៕

The post ប្រទេសទីម័រលេស្តេ សម្រេចចិត្តទិញអង្ករពីកម្ពុជាចំនួន ៤០០០តោនជាលើកដំបូង appeared first on .

ពិធីប្រគល់សញ្ញាបត្របណ្ឌិតកិត្តិយស​នេះ ធ្វើឡើងនៅសាកលវិទ្យាល័យ ប៊ែលធីអន្តរជាតិ ក្រោមអធិបតីភាព លោក ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា។

ការ​សម្រេច​ប្រគល់សញ្ញាបត្របណ្ឌិតកិត្តិយស​​​ដល់​​ប្រធានាធិបតីទីម័រខាងកើត​​នាពេលនេះ គឺ​បន្ទាប់ពី​មាន​ការ​វាយតម្លៃ​ពី​កក្រុមប្រឹក្សាវិទ្យាសាស្ត្រ នៃ​សាកលវិទ្យាល័យ ប៊ែលធី អន្តរជាតិ កាលពី​ថ្ងៃទី​២៩ ខែ​កញ្ញា ឆ្នាំ២០២២ ​​និង​ដោយ​មើល​ឃើញ​ពី​ប្រវត្តិ ស្នាដៃ សមិទ្ធផល និង​គុណ​សម្បត្តិ​ជា​ច្រើន​ឥត​គណនា​ររបស់លោក José Ramos-Horta ​​ដែលមាន​តម្លៃ​ជា​សកល​ក្នុង​កិច្ចការ​អប់រំ និង​ភាព​ជា​អ្នកដឹកនាំ ដើម្បី​សន្តិភាព និង​ការ​អភិវឌ្ឍ​ ក្នុង​រយៈពេល​ជាង​ ៤​ទសវត្សរ៍​កន្លង​មក​នេះ ដែល​ជា​គំរូ​មួយ​ដ៏​ល្អ​ដល់​យុវជន​ជំនាន់​ក្រោយ៕ រូបភាព AKP

The post ឧកញ៉ា លី ឆេង ប្រគល់សញ្ញាបត្រកិត្តិយសជូនប្រធានាធិបតីទីម័រខាងកើត appeared first on .

ជុំវិញការអញ្ជើញមកដល់នេះ ឧកញ៉ាញ៉ូវ សូមលើកយកប្រវត្តិទាក់ទងខ្លះៗអំពីប្រធានាធិបតិទីម័រឡេស្តេ លោក ចូហ្សេ មកបង្ហាញជូនឱ្យដឹង ដូចខាងក្រោម ៖

លោក ចូហ្សេ ម៉ានូអែល រ៉ាមូស បានកើតនៅថ្ងៃទី ២៦ ខែធ្នូ ឆ្នាំ ១៩៤៦ នៅឯទីក្រុង Dili ប្រទេសទីម័រខាងកើត ខណ:លោកត្រូវបានគេស្គាល់ថាជាកសម្មជននយោបាយមួយរូប ដែលទទួលបានពានរង្វាន់ណូបែលសន្តិភាព នៅឆ្នាំ ១៩៩៦ សម្រាប់កិច្ចខិតខំប្រឹងប្រែងរបស់លោក ដើម្បីនាំយកមកនូវសន្តិភាព និងឯករាជ្យដល់ប្រទេសទីម័រខាងកើត ដែលធ្លាប់ជាផ្នែកមួយនៃទឹកដីរបស់ប្រទេសព័រទុយហ្គាល់ និងស្ថិតក្រោមការគ្រប់គ្រងរបស់ឥណ្ឌូនេស៊ី ចាប់ពីឆ្នាំ ១៩៧៥ ដល់ ១៩៩៩ ។

គួរឱ្យដឹងថា លោក ចូហ្សេ ធ្លាប់បានបម្រើការជានាយរដ្ឋមន្ត្រីនៃប្រទេសទីម័រខាងកើត ចន្លោះឆ្នាំ ២០០៦ ដល់ឆ្នាំ ២០០៧ និងឡើងធ្វើជាប្រធានាធិបតី ចាប់ពីឆ្នាំ ២០០៧ ដល់ឆ្នាំ ២០១២ ។

លោក ចូហេ្ស មានឈាមជ័រជាអ្នកនយោបាយមួយរូប ដោយឪពុករបស់លោក គឺជាជនជាតិព័រទុយហ្គាល់ ដែលត្រូវបានគេនិរទេសមកកាន់ប្រទេសទីម័រខាងកើត សម្រាប់ការចូលរួមក្នុងចលនាបះបោរប្រឆាំង នឹងមេដឹកនាំផ្តាច់ការ លោក Antionio Salazar ។

នៅក្រោយពីបញ្ចប់ការសិក្សាផ្នែកច្បាប់នៅសហរដ្ឋអាមេរិក លោក ចូហ្សេ បានត្រលប់មកកាន់ប្រទេសទីម័រខាងកើត ដើម្បីចូលរួមក្នុងចលនាទាមទារឯករាជ្យ ហើយសកម្មភាពរបស់គាត់ បាននាំមកនូវភាពខឹងសម្បារយ៉ាងខ្លាំង ពីសំណាក់មេដឹកនាំព័រទុយហ្គាល់ និងត្រូវបានគេបង្ខំឱ្យភៀសខ្លួន ទៅកាន់ប្រទេសម៉ូសំប៊ិក នៅក្នុងឆ្នាំ ១៩៧០។

យ៉ាងណាក៏ដោយ លោក ចូហ្សេ បានវិលត្រលប់មកកាន់ទឹកដីទីម័រខាងកើតម្តងទៀត នៅក្នុងឆ្នាំ ១៩៧២ ដោយបានចូលដៃជាមួយក្រុមគាំទ្រឯករាជ្យ Fretilin ក្នុងសង្គ្រាមស៊ីវិលទីម័រខាងកើត។ រហូតដល់ថ្ងៃទី ២៨ ខែវិច្ឆិកា ឆ្នាំ ១៩៧៥ ក្រុម Fretilin ក៏ទទួលបានជ័យជម្នះ និងគ្រប់គ្រងទៅលើរដ្ឋាភិបាល ហើយបានប្រកាសឯករាជ្យរបស់ទីម័រខាងកើត ក្នុងពេលនោះតែម្តង។

បន្ទាប់ពីនោះ លោក ចូហ្សេ ត្រូវបានតែងតាំងជារដ្ឋមន្ត្រីការបរទេស តែទោះជាយ៉ាងណាក៏ដោយ ប្រាំបួនថ្ងៃក្រោយមក ឥណ្ឌូនេស៊ីបានចូលឈ្លានពានទឹកដីទីម័រខាងកើត ហើយបានបង្ខំឱ្យលោក ចូហ្សេ ត្រូវបាននិរទេសខ្លួនជាថ្មីម្តងទៀត។

ដោយបានតាំងទីលំនៅ នៅទីក្រុងស៊ីដនី ប្រទេសអូស្ត្រាលី លោក ចូហ្សេ បានចូលទៅសិក្សានៅមហាវិទ្យាល័យនៃសាកលវិទ្យាល័យ New South Wales ។ ហើយនៅទីនោះ លោកបានពុះពារយ៉ាងខ្លាំង ដើម្បីក្លាយជាសកម្មជនដ៏មានឥទ្ធិពលមួយរូប សម្រាប់ទីម័រខាងកើត ក្នុងឆាកអន្តរជាតិ រហូតក្រោយមក គាត់ក្លាយជាឯកអគ្គរដ្ឋទូតពិតប្រាកដរបស់ទីម័រខាងកើត ប្រចាំអង្គការសហប្រជាជាតិ (UN)។ គាត់បាននិយាយប្រឆាំងនឹងការរំលោភសិទ្ធិមនុស្ស របស់កងកម្លាំងយោធាឥណ្ឌូនេស៊ី និងបានផ្សព្វផ្សាយផែនការសន្តិភាព ដើម្បីបញ្ចប់អំពើហិង្សានៅក្នុងប្រទេសរបស់គាត់។

លុះដល់ឆ្នាំ ១៩៩៩ លោក ចូហេ្ស បានវិលត្រលប់មកកាន់ទឹកដីប្រទេសទីម័រខាងកើតវិញ បន្ទាប់ពីក្រុមប្រឹក្សាសន្តិសុខអង្គការសហប្រជាជាតិ បានបង្កើតរដ្ឋបាលអន្តរកាល របស់អង្គការសហប្រជាជាតិ នៅទីម័រខាងកើត។

លោក ចូហ្សេ បានបន្តជំរុញឱ្យមានការអភ័យទោស និងការផ្សះផ្សា ហើយត្រូវបានតែងតាំងជារដ្ឋមន្ត្រីការបរទេសរបស់ទីម័រខាងកើតក្នុងឆ្នាំ ២០០០។ គាត់បានបន្តធ្វើការក្នុងការិយាល័យនោះ បន្ទាប់ពីទីម័រខាងកើត ទទួលបានអធិបតេយ្យភាពពេញលេញ ក្នុងឆ្នាំ ២០០២។

រហូតដល់ខែឧសភា ឆ្នាំ ២០០៧ លោក ចូហ្សេ ត្រូវបានគេបោះឆ្នោតឱ្យឡើងកាន់តំណែងជាប្រធានាធិបតី ដោយទទួលបានសំឡេងឆ្នោតគាំទ្រជិត ៧០% ឯណោះ។ តែនៅឆ្នាំបន្ទាប់គាត់បានរងរបួសយ៉ាងធ្ងន់ធ្ងរ បន្ទាប់ពីត្រូវបានបាញ់ប្រហារ ដោយពួកឧទ្ទាម នៅខាងក្រៅផ្ទះរបស់គាត់ ក្នុងទីក្រុង Dili ប្រទេសទីម័រខាងកើត។ គាត់​បាន​ជា​សះស្បើយវិញ ហើយ​វិលមក​បម្រើ​ការងារពេញ​មួយ​អាណត្តិ​របស់​គាត់៕

The post លោក ចូហ្សេ ម៉ានូអែល រ៉ាមូស មានប្រវត្តិតស៊ូមិនធម្មតា មុនឡើងកាន់តំណែងប្រធានាធិបតីទីម័រខាងកើត appeared first on .

ប្រធានាធិបតីទីម័រ​ខាង​កើត​រូប​នេះ​ បាន​​ដឹក​នាំ​គណៈប្រតិភូ​ជាន់​ខ្ពស់​ ​មក​ដល់​រាជធានីភ្នំពេញ​ហើយ នៅ​ម៉ោង​ប្រមាណ ​​៩:៥០​នាទី​ព្រឹក ​នា​ថ្ងៃ​ពុធ​នេះ ដើម្បី​បំពេញ​ទស្សនកិច្ច​ផ្លូវ​រដ្ឋ​នៅ​កម្ពុជា ចាប់ពី​ថ្ងៃទី​១៩ ដល់​ថ្ងៃទី​២១ ខែ​តុលា ឆ្នាំ២០២២។ ដំណើរ​ទស្សនកិច្ច​នេះ ធ្វើ​ឡើង​តប​តាម​ការ​អញ្ជើញ​​របស់​ព្រះករុណា​ព្រះបាទ​សម្តេច នរោត្តម សីហមុនី ព្រះមហាក្សត្រ​កម្ពុជា។

ដំណើរទស្សនកិច្ចនេះ ភាគី​កម្ពុជា-ទីម័រខាងកើត​ នឹងចុះហត្ថលេខា លើឯកសារទ្វេភាគីដ៏មានសារសំខាន់​ចំនួនពីរ រួមមាន៖ កិច្ចព្រមព្រៀងសេវាកម្មអាកាសចរណ៍ និងអនុស្សរណៈនៃការយោគយល់ ស្តីពី​ពាណិជ្ជកម្ម​ស្រូវរវាងប្រទេសទាំងពីរ ដើម្បីបន្តពង្រឹង និងធ្វើឱ្យកាន់តែស៊ីជម្រៅបន្ថែមទៀត នូវទំនាក់ទំនង និងកិច្ចសហប្រតិបត្តិការទាំងនៅក្នុងក្របខ័ណ្ឌទ្វេភាគី និងពហុភាគី ដើម្បីផលប្រយោជន៍ទៅវិញទៅមក។

តាមសេចក្តីប្រកាសព័ត៌មាន​របស់​ក្រសួង​ការបរទេស និង​សហប្រតិបត្តិការ​អន្តរជាតិ ​​បាន​ឱ្យ​ដឹង​ថា កន្លង​ទៅ ភាគីទាំងពីរ បានពិភាក្សាគ្នាពីបញ្ហាទ្វេភាគីទាំងក្នុងតំបន់ និងអន្តរជាតិ ដែលជាប្រយោជន៍រួម ដោយ​បាន​ឯកភាពគ្នាថា នឹងពង្រឹងកិច្ចសហប្រតិបត្តិការទ្វេភាគី លើវិស័យពាណិជ្ជកម្ម វិនិយោគ ទេសចរណ៍ ការអប់រំ និងអភិវឌ្ឍធនធានមនុស្ស។

យ៉ាងណាមិញ ភាគីទាំងពីរ​ ក៏បានកត់សម្គាល់ឃើញថា ទំហំពាណិជ្ជកម្មទ្វេភាគីរវាងប្រទេសទាំងពីរ​ស នៅ​មាន​កម្រិតទាបនៅឡើយ និងបានឯកភាពគ្នាជំរុញឱ្យពិនិត្យលទ្ធភាព នៃការបង្កើនសកម្មភាព សេដ្ឋកិច្ច និងពាណិជ្ជកម្មទ្វេភាគី តាមរយៈការអនុវត្តកិច្ចព្រមព្រៀង ស្តីពីកិច្ចសហប្រតិបត្តិការ រវាងសភាពាណិជ្ជកម្ម​នៃប្រទេសទាំងពីរ​ ដែលមានស្រាប់ ខណៈទំហំពាណិជ្ជកម្មកម្ពុជា និងប្រទេសទីម័រខាងកើត មានប្រមាណ ៣០ ម៉ឺនដុល្លារក្នុង ១ឆ្នាំៗ។

សូមជម្រាបជូន​ថា ក្នុង​ដំណើរទស្សនកិច្ចនេះ ​​សាកលវិទ្យាល័យ ប៊ែលធី អន្តរជាតិ នឹងរៀបចំកម្មវិធីប្រគល់​សញ្ញាបត្រ​បណ្ឌិត​កិត្តិយស ផ្នែករដ្ឋបាលអប់រំ និងភាពជាអ្នកដឹកនាំ (Honorary Doctorate Degree in Educational Administration and Leadership – EAL) ជូនឯកឧត្តមបណ្ឌិត José Ramos-Horta ​​ផង​ដែរ ​ដែល​កម្មវិធី​នឹងប្រព្រឹត្តទៅក្រោមអធិបតីភាព ឯកឧត្តម​បណ្ឌិត​សភាចារ្យ ហង់ជួន ណារ៉ុន រដ្ឋមន្រ្តីក្រសួងអប់រំ យុវជន និងកីឡា នាថ្ងៃទី២១ ខែតុលា ឆ្នាំ២០២២ នៅសាល​សន្និសីទនៃសាកល​វិទ្យាល័យ ប៊ែលធី អន្តរជាតិ (ទីតាំងទី២-ស្ពានអាកាសចោមចៅ)៕

The post ប្រធានាធិបតីទីម័រ នឹងចុះកិច្ចព្រមព្រៀងសេវាកម្មអាកាសចរណ៍ និងពាណិជ្ជកម្មស្រូវ ជាមួយកម្ពុជា appeared first on .

សម្តេចតេជោនាយករដ្ឋមន្ត្រី បានគូសបញ្ជាក់ថា ក្នុងរយៈពេលប្រមាណ១០ឆ្នាំមកនេះ ពោលចាប់តាំងពីកម្ពុជាធ្វើប្រធានអាស៊ាននៅឆ្នាំ២០១២ សម្តេចបានខិតខំប្រឹងប្រែងជំរុញឱ្យប្រទេសទីម័រក្លាយជាសមាជិកអាស៊ាន។ មកដល់ពេលនេះ សម្តេចតេជោ សង្ឃឹមថា នឹងមានការគាំទ្រប្រទេសទីម័រខាងកើតចូលជាសមាជិកអាស៊ាន ដែលអាចប្រកាសនៅចុងឆ្នាំ២០២២នេះ ហើយនឹងចូលជាសមាជិកពេញសិទ្ធិនៅឆ្នាំ២០២៣។

ពាក់ព័ន្ធនឹងដំណឹងនេះផងដែរបានធ្វើឱ្យប្រធានាធិបតីប្រទេសទីម័រខាងកើត និងគណៈប្រតិភូ សម្តែងនូវក្តីរំភើបយ៉ាងខ្លាំង ហើយសូមថ្លែងអំណរគុណសម្តេចតេជោ ហ៊ុន សែន យ៉ាងជ្រាលជ្រៅចំពោះកិច្ចខិតខំប្រឹងប្រែងសម្របសម្រួលឱ្យប្រទេសទីម័រខាងកើតក្លាយជាសមាជិកអាស៊ាននាពេលខាងមុខ។

លោក José Ramos Horta បានលើកឡើងថា សម្តេចតេជោ ហ៊ុន សែន ប្រៀបដូចជាម្ចាស់របស់ប្រទេសទីម័រខាងកើតផងដែរ។

សូមបញ្ជាក់ថា ទីម័រខាងកើត ជាប្រទេសវ័យក្មេងមួយក្នុងតំបន់អាស៊ី បានទទួលឯករាជ្យ ពីប្រទេសឥណ្ឌូនេស៊ីកាលពីថ្ងៃទី២០ ខែឧសភា ឆ្នាំ២០០២។ ការចូលជាសមាជិកអាស៊ានមិនត្រឹមតែមានសារៈសំខាន់ជាយុទ្ធសាស្ត្រ ក្នុងបរិបទនៃការប្រកួតប្រជែង ភូមិសាស្ត្រនយោបាយរវាងមហាអំណាចប៉ុណ្ណោះទេ ថែមទាំងសម្រាប់ការសម្រេចក្ដីសុបិន របស់បិតាស្ថាបនិកអាស៊ាន ក្នុងការបង្រួបបង្រួមប្រទេសទាំងអស់ នៅក្នុងតំបន់អាស៊ីអាគ្នេយ៍ ក្រោមឆ័ត្រអាស៊ានផងដែរ៕

The post សំណុំរឿងចូលសមាជិកអាស៊ាន ប្រធានាធិបតី Horta ចាត់ទុកសម្តេច ហ៊ុន សែន ប្រៀបដូចជាម្ចាស់របស់ប្រទេសទីម័រខាងកើត appeared first on .

លោក Ramos-Horta បានជួបជាមួយប្រធានាធិបតីឥណ្ឌូនេស៊ី លោក Joko Widodo ក្នុងដំណើរទស្សនកិច្ចផ្លូវរដ្ឋ លើកដំបូងទៅកាន់ប្រទេសជិតខាងមួយនេះ ចាប់តាំងពីលោក ត្រូវបានបោះឆ្នោតជ្រើសរើស កាលពីខែមេសា សម្រាប់អាណត្តិទីពីររបស់ខ្លួន ក្នុងនាមជាប្រធានាធិបតីទីម័រខាងកើត ។

ជាមួយគ្នានេះផងដែរ លោក Ramos-Horta បាននិយាយថា ៖ ” ទីម័រខាងកើត ដែលជាផ្នែកមួយនៃតំបន់អាស៊ីអាគ្នេយ៍ បានបំពេញនូវតម្រូវការជាច្រើន ដែលចាំបាច់សម្រាប់ដំណើរការសេដ្ឋកិច្ច និងលទ្ធិប្រជាធិបតេយ្យ ដូច្នេះទីម័រខាងកើតស័ក្តិសមក្លាយជាសមាជិកអាស៊ាន ប្រកបដោយប្រ​សិទ្ធិ​ភាព” ។

ប្រធានាធិបតីទីម័រខាងកើតរូបនេះ បានសង្កត់ធ្ងន់ទៀតថា ប្រទេសវ័យក្មេងរបស់លោក អាចចូលរួមនៅក្នុងសមាជិកអាស៊ានបាន នៅពេលដែលឥណ្ឌូនេស៊ី ឡើងកាន់តំណែងជាប្រធានអាស៊ាន នៅឆ្នាំក្រោយ ខណ:ប្រទេសដីកោះមួយនេះ បានដាក់ពាក្យចូលរួមជាសមាជិក នៅក្នុងឆ្នាំ ២០១១ មកម្លេះ ហើយបច្ចុប្បន្នមានឋាន:ជាអ្នកសង្កេតការណ៍ ។

ទន្ទឹមនឹងនេះ ដោយថ្លែងនៅវិមានប្រធានាធិបតី ក្នុងទីក្រុង Bogor ភាគខាងត្បូងនៃទីក្រុងហ្សាកាតា ប្រធានាធិបតីឥណ្ឌូនេស៊ី លោក Widodo បាននិយាយថា ប្រទេសរបស់លោក បានបណ្តាក់ទុនចំនួន ៨១៨ លានដុល្លារ នៅក្នុងប្រទេសទីម័រខាងកើត ដែលភាគច្រើនផ្តោតទៅក្នុងអាជីវកម្មថាមពល ធនាគារ និងទំនាក់ទំង ។

បន្ថែមពីនេះ យោងតាមទិន្នន័យផ្លូវការមួយរបស់ឥណ្ឌូនេស៊ី បានបង្ហាញថា ទំហំពាណិជ្ជកម្មទ្វេរភាគីរវាងប្រទេសទំាំង ២ មានតម្លៃប្រហែល ២៥០ លានដុល្លារ កាលពីឆ្នាំមុន ។

គួរឱ្យដឹងថា នៅក្នុងអំឡុងឆ្នាំ ២០២០ ឥណ្ឌូនេស៊ី បានបង្កើតទំហំពាណិជ្ជកម្មជាមួយប្រទេសទីម័រខាងកើត ជាមួយនឹងការនាំចេញគ្រឿងឧបភោគបរិភោគ (៦៦,៧ លានដុល្លារ)​ , ការដឹកជញ្ជូន (៣០,៨ លាដុល្លារ) និងផលិតផលគីមី (១៨,២ លានដុល្លារ) ។

ដោយឡែកសម្រាប់ការនាំចេញរបស់ទីម័រខាងកើត មកកាន់ប្រទេសឥណ្ឌូនេស៊ីវិញ ក៏មានការកើនឡើងដូចគ្នា ជាមួយនឹងការនាំចេញផលិផលបន្លែ (២,២៨ លានដុល្លារ) , លោហ:ធាតុ (៩១ ៣០០ ដុល្លារ) និងគ្រឿងឧបភោគបរិភោគ (៥១ ៦០០​ ដុល្លារ) ។

ជាងនេះទៅទៀត នៅក្នុងកិច្ចប្រជុំទ្វេភាគី គណៈប្រតិភូនៃប្រទេសទាំងពីរ បានចុះហត្ថលេខាលើអនុស្សរណៈនៃការយោគយល់គ្នា ចំនួន ៤ ស្តីពីវិស័យកសិកម្ម ការដឹកជញ្ជូនឆ្លងកាត់ព្រំដែន ស្តង់ដារ និងម៉ែត្រក្រឡា ព្រមទាំងកិច្ចសហប្រតិបត្តិការពាណិជ្ជកម្មផងដែរ ៕

The post ទីម័រខាងកើត រំពឹង​ក្លាយ​ជា​សមាជិក​អាស៊ាន​ពេញសិទ្ធ ពេលដៃគូពាណិជ្ជកម្មក្លាយជាប្រធានអាស៊ាន appeared first on .