ស្ងាត់ៗ លោក ត្រាំ បញ្ចេញទឹកអប់ថ្មីឈ្មោះ “ជ័យជម្នះ” ដាក់លក់ក្នុងតម្លៃជិត ៣០០ដុល្លារ

ឧកញ៉ាសាមញ្ញ — Tue, 01 Jul 2025 05:33:21 +0000

ប្រធានាធិបតីអាមេរិក លោក ដូណាល់ ត្រាំ កាលពីពេលថ្មីៗនេះ បានបញ្ចេញដាក់លក់ទឹកអប់ថ្មីមួយប្រភេទឈ្មោះថា “ជ័យជម្នះ” ជាមួយរូបរាងដបត្រូវបានបានរចនាឡើងយ៉ាងពិសេស និងថែមទាំងមានហត្ថលេខារបស់លោក ត្រាំ ផងដែរ ដែលត្រូវបានដាក់លក់នៅក្នុងតម្លៃ ២៤៩ដុល្លារ សម្រាប់ចំណុះ ១០០ មីលីលីត្រ។ នេះបើតាមការចុះផ្សាយពីសារព័ត៌មាន Theo Huffington Post។

លោក ត្រាំ បានណែនាំទឹកអប់ថ្មីនេះ នៅលើបណ្តាញសង្គម Truth Social របស់ខ្លួន ដោយសរសេរថា៖” ទឹកអប់ Trump បានមកដល់ហើយ! វាមានឈ្មោះថា ’Victory 45-47′ តំណាងឲ្យជ័យជំនះ កម្លាំង និងជោគជ័យ ទាំងបុរស និងស្ត្រី”។

គួរឲ្យដឹងថា ទឹកអប់ថ្មីនេះ មានជម្រើសទាំងសម្រាប់បុរស និងនារី ដែលត្រូវបានដាក់លក់នៅក្នុងតម្លៃ ២៤៩ដុល្លារ សម្រាប់ដបមានចំណុះ ១០០ មីលីលីត្រ និងបញ្ចុះតម្លៃ ៥០% សម្រាប់ការបញ្ជាទិញចាប់ពី ២ ដបឡើងទៅ។

យ៉ាងណាមិញ ជុំវិញការដាក់ឈ្មោះទឹកអប់ ’Victory 45-47′ នេះ គឺតំណាងឲ្យអាណត្តិប្រធានាធិបតីទាំងពីរលើករបស់លោក ត្រាំ ហើយអ្វីកាន់តែពិសេសនោះ គឺដបទឹកអប់ ត្រូវបានរចនាឡើងជាមួយរូបរាងរបស់លោក ត្រាំ ស្រោបដោយពណ៌មួយតួខ្លួនតែម្តង ជាមួយនឹងការចុះហត្ថលេខាផ្ទាល់របស់លោក ផងដែរ។

ជម្រាបជូនថា លោក ត្រាំ បានចាប់ផ្តើមលក់ផលិតផលជាច្រើនដែលមានម៉ាកសញ្ញាផ្ទាល់ខ្លួនរបស់លោក។ ហើយកាលពីពេលថ្មីៗនេះ ក្រុមហ៊ុន Trump Fragrances របស់លោក ក៏បានបញ្ចេញដាក់លក់ស្បែកជើងTrump Sneakers និង Bibles ក៏ដូចជាទឹកអប់ដែលបង្ហាញពីលោក ត្រាំ លើកដៃជាសញ្ញា និងភ្ជាប់មកជាមួយពាក្យថា “ប្រយុទ្ធ ប្រយុទ្ធ ប្រយុទ្ធ” ដែលសំដៅទៅលើការប៉ុនប៉ងធ្វើឃាតលោក ក្នុងអំឡុងខែកក្កដា ឆ្នាំ២០២៤ កន្លងទៅផងដែរ៕

The post ស្ងាត់ៗ លោក ត្រាំ បញ្ចេញទឹកអប់ថ្មីឈ្មោះ “ជ័យជម្នះ” ដាក់លក់ក្នុងតម្លៃជិត ៣០០ដុល្លារ appeared first on .

ថៃ កំពុងមានគម្រោងទាក់ទាញក្រុមហ៊ុនផលិតទឹកអប់បរទេស ឲ្យកាន់តែច្រើនបន្ថែមទៀត

ឧកញ៉ាសាមញ្ញ — Wed, 20 Mar 2024 00:55:00 +0000

យោងតាមសហព័ន្ធឧស្សាហកម្មថៃ (FTI) បានបង្ហាញឲ្យដឹងថា ឧស្សាហកម្មគ្រឿងសំអាងក្នុងប្រទេសរបស់ខ្លួនកំពុងត្រូវបានជំរុញយ៉ាងខ្លាំង ដោយសារតែការកើនឡើងនៃការវិនិយោគបរទេស នៅក្នុងការផលិតគ្រឿងក្រអូប និងទឹកអប់របស់ប្រទេសថៃ។ នេះបើតាមការចុះផ្សាយពីសារព័ត៌មាន VNA។

លោកស្រី Ketmanee Lertkitcha ប្រធានផ្នែកសុខភាព និងសម្រស់របស់ FTI បាននិយាយថា ប្រទេសថៃ មានសក្តានុពលខ្ពស់ក្នុងការក្លាយជាមជ្ឈមណ្ឌលសម្រាប់វិស័យសុខភាព និងសម្រស់ ដោយសារតែក្លិនផ្កាដ៏ពិសេសរបស់ប្រទេសថៃ កំពុងមានតម្រូវការខ្ពស់នៅទូទាំងពិភពលោក ដែលនេះអាចជាកត្តាដ៏គួរឲ្យទាក់ទាញសម្រាប់ក្រុមហ៊ុនបរទេសជាច្រើន ដែលកំពុងស្វែងរកការវិនិយោគលើការផលិតទឹកអប់។

លោកស្រី Ketmanee បានបន្ថែមទៀតផងដែរថា វត្ថុធាតុដើមដ៏សម្បូរបែបរបស់ថៃ បានធ្វើឲ្យប្រទេសរបស់ខ្លួនក្លាយជាទីតាំងដ៏ល្អបំផុត សម្រាប់ការអភិវឌ្ឍលើឧស្សាហកម្មផ្នែកសុខភាព និងសម្រស់។

គួរឲ្យដឹងថា ទីផ្សារគ្រឿងសម្អាងនៅប្រទេសថៃ ត្រូវបានចាត់ទុកថាមានចំណែកធំជាងគេបំផុតនៅតំបន់អាស៊ាន ដោយកាលពីឆ្នាំមុន តម្លៃទីផ្សារបានកើនឡើងជាង ១១% និងឈានដល់ចំនួន ២៦០ពាន់លានបាត (៧,២ពាន់លានដុល្លារ) ឯណោះ។

ជម្រាបជូនបបន្ថែមទៀតថា ប្រទេសថៃ បានធ្វើការនាំចេញផលិតផលថែរក្សាសម្រស់ប្រមាណ ៦០% ខណ:ចំនួនដែលនៅសេសសល់ត្រូវបានដាក់លក់ក្នុងស្រុក។ ហើយចំពោះការនាំចេញផលិតផលថែរក្សាសម្ផស្ស បានឈានដល់តម្លៃ ៨៦ពាន់លានបាត កាលពីឆ្នាំមុន។ នេះបើយោងតាមការបញ្ជាក់ពីលោកស្រី Ketmanee៕

The post ថៃ កំពុងមានគម្រោងទាក់ទាញក្រុមហ៊ុនផលិតទឹកអប់បរទេស ឲ្យកាន់តែច្រើនបន្ថែមទៀត appeared first on .