នាយករដ្ឋមន្រ្តីអង់គ្លេស

ប្រធានាធិបតីអាមេរិក បំពេញទស្សនកិច្ចទៅអង់គ្លេស មុនចូលរួមកិច្ចប្រជុំកំពូលណាតូ

ឧកញ៉ាសំពៅ — Mon, 10 Jul 2023 07:18:27 +0000

ប្រធានាធិបតីអាមេរិក លោក ចូ បៃដិន បានបំពេញទស្សនកិច្ចទៅកាន់ចក្រភពអង់គ្លេស នាថ្ងៃច័ន្ទ មុនធ្វើដំណើរបន្តទៅកាន់ប្រទេសលីទុយអានី ដើម្បីចូលរួមកិច្ចប្រជុំកំពូលអង្គការណាតូ នាថ្ងៃទី ១១ ខែកក្កដាខាងមុខ។ នេះបើតាមការចុះផ្សាយពីកាសែត Bangkokpost។

ប្រភពដដែលបន្ថែមថា អំឡុងពេលនៅចក្រភពអង់គ្លេស មេដឹកនាំសហរដ្ឋអាមេរិកបានចូលគាល់ព្រះមហាក្សត្រ King Charles III និងនាយករដ្ឋមន្ត្រី Rishi Sunak ដើម្បីជជែកគ្នា ពីកិច្ចសហប្រតិបត្តិការ និងពង្រឹងទំនាក់ទំនងទ្វេភាគី ជាមួយអង់គ្លេស។

បន្ថែមពីនោះ ព្រះមហាក្សត្រអង់គ្លេស និងប្រធានាធិបតី ចូ បៃដិន ក៏បានពិភាក្សាគ្នាអំពីបញ្ហាបម្រែបម្រួលអាកាសធាតុ ហើយនេះក៏ជាការជួបគ្នាលើកដំបូងរវាងមេដឹកនាំអាមេរិក និងស្ដេច King Charles III តាំងពីទ្រង់ឡើងគ្រងរាជ្យផងដែរ។

សូមជម្រាបដែរថា សារនេះក៏ជាការជួបគ្នាលើកទី ០៥ រវាងប្រធានាធិបតី ចូ បៃដិន និងនាយករដ្ឋមន្ត្រីអង់គ្លេស Rishi Sunak ផងដែរ ក្នុងរយៈពេលប៉ុន្មានខែចុងក្រោយនេះ៕

The post ប្រធានាធិបតីអាមេរិក បំពេញទស្សនកិច្ចទៅអង់គ្លេស មុនចូលរួមកិច្ចប្រជុំកំពូលណាតូ appeared first on .

អតីតនាយករដ្ឋមន្ត្រីអង់គ្លេស បន្តកើបលុយបានជាង ១ លានដុល្លារ ទោះអស់តំណែង

ឧកញ៉ាសាមញ្ញ — Thu, 15 Dec 2022 11:55:00 +0000

អតីតនាយករដ្ឋមន្ត្រីអង់គ្លេស លោក Boris Johnson ថ្មីៗនេះ ត្រូវបានគេរាយការណ៍ថា ទទួលបានទឹកប្រាក់ជាង ១ លានផោន (១,២ លានដុល្លារ) ពីប្រាក់ឈ្នួល ដែលទទួលបានពីការចូលរួមនៅក្នុងកម្មវិធីធំៗជាច្រើន សម្រាប់ការថ្លែងសុន្ទរកថារបស់លោក ចាប់តាំងពីអស់តំណែង កាលពីខែកញ្ញាកន្លងទៅ ។ នេះបើយោងតាមសារព័ត៌មាន AFP ។

ដោយសារតែភាពល្បីល្បាញខាងវោហាសាស្រ្ត លោក Johnson ក្នុងរយ:ពេលប៉ុន្មានខែថ្មីៗនេះ ត្រូវបានស្ថាប័នធំៗជាច្រើន អញ្ជើញលោកទៅថ្លែងសុន្ទរកថា នៅឯទីក្រុងញូវយ៉ក សហរដ្ឋអាមេរិក ក៏ដូចជានៅក្នុងកិច្ចប្រជុំកំពូលដែលរៀបចំធ្វើឡើងដោយទូរទស្សន៍ CNN នៅក្នុងប្រទេសព័រទុយហ្គាល់ និងការពិភាក្សាមួយផ្សេងទៀត នៅក្នុងប្រទេសឥណ្ឌាផងដែរ ។

តាមរយ:ការងារនេះ បានធ្វើឱ្យលោក Johnson ទទួលបានប្រាក់ឈ្នួល ចាប់ពី ២១៥ ០០០ ផោន ដល់ ២៧៧ ០០០ ផោន (២៦៧ ០០០ ដុល្លារ ដល់ ៣៤៤ ០០០ ដុល្លារ) នៅក្នុងកម្មវិធីនីមួយៗ ។ នេះបើតាមឯកសារផ្លូវការមួយ ដែលបានបង្ហាញដោយគេហទំព័រ របស់សភាចក្រភពអង់គ្លេស ។

រំលឹកផងដែរថា បុរសវ័យ ៥៨ ឆ្នាំរូបនេះ បានសម្រេចចិត្ត ប្រកាសលាលែងចេញពីតំណែង ជានាយរដ្ឋមន្ត្រីរបស់គាត់ បន្ទាប់ពីមានរឿងអាស្រូវជាបន្តបន្ទាប់ ដែលបានធ្វើឱ្យប៉ះពាល់ដល់តំណែងរបស់គាត់យ៉ាងខ្លាំង។ ប៉ុន្តែបច្ចុប្បន្ននេះ លោកនៅតែបន្តធ្វើជាសមាជិកសភា សម្រាប់គណបក្សអភិរក្ស ដែលកំពុងកាន់អំណាចដដែល៕

The post អតីតនាយករដ្ឋមន្ត្រីអង់គ្លេស បន្តកើបលុយបានជាង ១ លានដុល្លារ ទោះអស់តំណែង appeared first on .

នាយករដ្ឋមន្ត្រីអង់គ្លេសថ្មី ប្រកាសផ្តល់កញ្ចប់ ៦០លានដុល្លារឱ្យអ៊ុយក្រែន

ឧកញ៉ាតូច — Sun, 20 Nov 2022 02:32:28 +0000

ក្នុងដំណើរទស្សនកិច្ចនៅប្រទេសអ៊ុយក្រែន នៅចំពោះមុខប្រធានាធិបតី វូឡូឌីមៀ សេលេនស្គី នាយករដ្ឋមន្ត្រីអង់គ្លេស លោក រីហ្ស៉ី ស៊ុនណាក់ បានប្រកាសផ្តល់កញ្ចប់ជំនួយផ្នែកការពារដែនអាកាសថ្មីដែលមានតម្លៃ ៦០លានដុល្លារ ដល់អ៊ុយក្រែន។

ថ្លែងនៅក្នុងសន្និសីទកាសែតជាមួយលោកប្រធានាធិបតី សេលេនស្គី នាទីក្រុងកៀវថា លោក ស៊ុនណាក់ បាននិយាយថា៖ “ថ្ងៃនេះខ្ញុំមកទីនេះ ដើម្បីនិយាយថា ចក្រភពអង់គ្លេសនឹងបន្តឈរជាមួយអ្នករហូតដល់អ៊ុយក្រែនទទួលបានសន្តិភាព សន្តិសុខដែលខ្លួនត្រូវការ និងសមនឹងទទួលបាន”។

យ៉ាងណា សម្រាប់ប្រធានាធិបតីអ៊ុយក្រែន បានសរសើរនិងចាត់ទុកដំណើរទស្សនកិច្ចរបស់នាយករដ្ឋមន្រ្តីអង់គ្លេសថា មានអត្ថន័យ និងមានប្រយោជន៍សម្រាប់ប្រទេសទាំងពីរ។

សូមជម្រាបថា កញ្ចប់ជំនួយផ្នែកការពារដែនអាកាសថ្មីដែលមានតម្លៃ ៦០ លានដុល្លារ នាយករដ្ឋមន្ត្រីអង់គ្លេសប្រកាសផ្តល់កញ្ចប់នោះ រួមមាន កាំភ្លើងយន្តបាញ់យន្តហោះ ១២០ដើម, រ៉ាដា និងឧបករណ៍ប្រឆាំងដ្រូន។

គួររំលឹកថា នាយករដ្ឋមន្ត្រីអង់គ្លេសចំនួនពីររូបហើយបានទៅអ៊ុយក្រែន បន្ទាប់ពីផ្ទុះសង្រ្គាមជាមួយរុស្សុី គឺ លោក ស៊ុនណាក់ និង ប៊ូរីស ចនស៊ុន ដែលទើបផុតអាណត្តិថ្មីៗនេះ៕

The post នាយករដ្ឋមន្ត្រីអង់គ្លេសថ្មី ប្រកាសផ្តល់កញ្ចប់ ៦០លានដុល្លារឱ្យអ៊ុយក្រែន appeared first on .

មេដឹកនាំអាមេរិក និងអង់គ្លេស ចាប់ដៃគ្នាសន្យាជួយអ៊ុយក្រែន និងប្រកួតប្រជែងជាមួយចិន

ឧកញ៉ាសំពៅ — Wed, 26 Oct 2022 09:54:00 +0000

ក្រោយឡើងកាន់តំណែងជានាយករដ្ឋមន្ត្រីអង់គ្លេសទី ៣ សម្រាប់ឆ្នាំ ២០២២ នេះមិនបានប៉ុន្មានផង លោក Rishi Sunak និងប្រធានាធិបតីអាមេរិក ចូ បៃឌិន បានជួបសំណេះសំណាលគ្នា អំពីបញ្ហាដែលកំពុងកើតមានឡើងជាសកល។

ក្នុងការចរចានោះ មេដឹកនាំប្រទេសទាំង ២ បានសន្យាថា នឹងបន្តជួយផ្គត់ផ្គង់ដល់ប្រទេសអ៊ុយក្រែន ដែលកំពុងជួបវិបត្តិធ្ងន់ធ្ងរ ដោយសារការឈ្លានពានពីរុស្ស៊ី ហើយថ្នាក់ដឹកនាំទាំង ២ រូបក៏បានទម្លាយទៀតថា នឹងត្រៀមខ្លួនប្រកួតប្រជែងជាមួយចិនទៀតផង។

យោងតាមសេចក្ដីថ្លែងការណ៍ចេញដោយសេតវិមានបានឲ្យដឹងថា៖ “ថ្នាក់ដឹកនាំទាំង ២ បានយល់ព្រម ក្នុងការធ្វើការជាមួយគ្នាដើម្បីជួយដល់អ៊ុយក្រែន ក៏ដូចជាទប់ស្កាត់ភាពសាហាវរបស់រុស្ស៊ី ដែលកំពុងតែបង្កចំពោះអ៊ុយក្រែន”។

សូមជម្រាបដែរថា អាមេរិកបានចាត់ទុកចិន ជាដៃគូប្រកួតប្រជែងខ្ពស់បំផុតលើវិស័យភូមិសាស្ត្រនយោបាយ និងឆាកសេដ្ឋកិច្ចអន្តរជាតិ ហើយការដែលអង់គ្លេសប្រកាសចូលរួមចាប់ដៃគ្នា ប្រជែងជាមួយចិនបែបនេះ វារឹតតែធ្វើឲ្យអាមេរិកទទួលបានអារម្មណ៍កក់ក្ដៅមួយកម្រិតទៀត៕

The post មេដឹកនាំអាមេរិក និងអង់គ្លេស ចាប់ដៃគ្នាសន្យាជួយអ៊ុយក្រែន និងប្រកួតប្រជែងជាមួយចិន appeared first on .

ទ្រព្យសម្បត្តិនាយករដ្ឋមន្ត្រីអង់គ្លេសថ្មី មានច្រើនជាងស្ដេច King Charles III ទ្វេដង

ឧកញ៉ាសំពៅ — Wed, 26 Oct 2022 08:56:00 +0000

កាលពីពេលថ្មីៗនេះ សារព័ត៌មាន DailyMail បានចេញផ្សាយថា ទ្រព្យសម្បត្តិរបស់នាយករដ្ឋមន្ត្រី Rishi Sunak និងភរិយា គឺមានច្រើនជាងស្ដេចនៃចក្រភពអង់គ្លេស King Charles III ដល់ទៅទ្វេដង។

ជាការពិត បើសិនជានិយាយពីទ្រព្យសម្បត្តិសរុបរបស់ស្ដេច King Charles III គឺច្បាស់ជាមានច្រើនជាង ប៉ុន្តែបើនិយាយពីទ្រព្យផ្ទាល់ខ្លួនគឺមានតិចជាងកូនប្រសារមហាសេដ្ឋីឥណ្ឌា។

DailyMail បានអះអាងថា នាយករដ្ឋមន្ត្រីអង់គ្លេស និងភរិយាមានទ្រព្យសម្បត្តិសរុបប្រហែល ៧៣០ លានផោន ដែលមួយចំណែកធំជាទ្រព្យរបស់ភរិយាដែលជាកូនស្រីម្នាក់គត់របស់មហាសេដ្ឋីឥណ្ឌាមួយរូប ខណៈទ្រព្យសម្បត្តិផ្ទាល់ខ្លួនរបស់ស្ដេច King Charles III មានប្រមាណ ៣៧០ លានផោន។

សូមជម្រាបដែរថា ទ្រព្យសម្បត្តិផ្ទាល់ខ្លួនរបស់ស្ដេច King Charles III គឺមិនរាប់បញ្ចូលពីអចលនទ្រព្យខ្នាតយក្សដូចជា ប្រាសាទ Duchy of Lancaster ដែលត្រូវបានរដ្ឋគ្រប់គ្រងតាំងពីសវទី ១៤ ឡើយ។

ម៉្យាងទៀត មូលហេតុដែលទ្រព្យសម្បត្តិផ្ទាល់ខ្លួនរបស់ស្ដេចអង់គ្លេស មានតិចជាងនាយករដ្ឋមន្ត្រី គឺដោយសារទិន្នន័យនៃតម្លៃអចលនទ្រព្យមួយចំនួនធំរបស់ទ្រង់ គឺមិនត្រូវបានទម្លាយឲ្យដឹងជាសាធារណៈ ដូច្នេះទិន្នន័យដែលបានបង្ហាញខាងលើ អាចនិយាយបានថាជាផ្នែកខ្លះនៃអ្វីដែលទ្រង់មានប៉ុណ្ណោះ៕

The post ទ្រព្យសម្បត្តិនាយករដ្ឋមន្ត្រីអង់គ្លេសថ្មី មានច្រើនជាងស្ដេច King Charles III ទ្វេដង appeared first on .

Rishi Sunak នឹងក្លាយជានាយករដ្ឋមន្ត្រីអង់គ្លេសក្មេងបំផុតប្រចាំប្រវត្តិសាស្ត្រជាង ២០០ ឆ្នាំ

ឧកញ៉ាសំពៅ — Mon, 24 Oct 2022 15:30:14 +0000

លោក Rishi Sunak នឹងក្លាយជានាយករដ្ឋមន្ត្រីកូនកាត់អាស៊ាន-អង់គ្លេសជាលើកដំបូងប្រចាំប្រវត្តិសាស្ត្រ បន្ទាប់ពីគូប្រជែងដែលសេសសល់តែមួយគត់គឺ អ្នកស្រី Penny Mordaunt លែងមានសិទ្ធឈរជាបេក្ខភាពបោះឆ្នោត ក្រោយមិនទទួលបានសម្លេងគាំទ្រគ្រប់គ្រាន់។

យោងតាមការចុះផ្សាយពី BBC បានទម្លាយថា មុនថ្ងៃប្រកាសលទ្ធផលនៅថ្ងៃច័ន្ទ អតីតអគ្គលេខាធិការូបនេះ ទទួលបានសម្លេងគាំទ្រជិត ២០០ ស៊ីដាច់គូប្រជែង Penny Mordaunt។

ការជាប់ឆ្នោតសារនេះ ក៏ជួយឲ្យលោក Sunak ក្លាយជាអ្នកស្នងតំណែងអ្នកស្រី Liz Truss និងបង្កើតប្រវត្តិសាស្ត្រថ្មីមួយ ជានាយករដ្ឋមន្ត្រីអង់គ្លេសក្មេងបំផុតប្រចាំប្រវត្តិសាស្ត្រក្នុងរយៈពេលច្រើនជាង ២០០ ឆ្នាំចុងក្រោយ។

ដោយឡែក សម្រាប់ថ្ងៃចូលកាន់តំណែងវិញគឺនឹងធ្វើឡើងឆាប់ៗ ដោយមានការតែងតាំងដោយផ្ទាល់ពីព្រះមហាក្សត្រ King Charles III ផងដែរ ស្របពេលលោក Sunak នឹងក្លាយជានាយករដ្ឋមន្ត្រីទីបួន បន្ទាប់ពី Theresa May, Boris Johnson និងលោកស្រី Truss ដែលឡើងកាន់អំណាចដោយគ្មានការបោះឆ្នោតសកល។

សូមជម្រាបដែរថា ការបោះឆ្នោតជាសកលនឹងធ្វើឡើងនៅយ៉ាងហោចណាស់ឆ្នាំ ២០២៣ បន្ទាប់ពីក្រុមអភិរក្សនិយមបានឈ្នះសំឡេងភាគច្រើនភ្លូកទឹកភ្លូកដីនៅចុងក្រោយក្នុងឆ្នាំ ២០១៩៕

The post Rishi Sunak នឹងក្លាយជានាយករដ្ឋមន្ត្រីអង់គ្លេសក្មេងបំផុតប្រចាំប្រវត្តិសាស្ត្រជាង ២០០ ឆ្នាំ appeared first on .

Breaking News: លោកស្រី Liz Truss ប្រកាសលាលែងតំណែងជានាយករដ្ឋមន្ត្រីអង់គ្លេស ក្រោយកាន់តំណែងបាន ៤៥ ថ្ងៃ

ឧកញ៉ាសំពៅ — Thu, 20 Oct 2022 13:42:49 +0000

នៅថ្ងៃទី ២០ តុលានេះ លោកស្រី Liz Truss ដែលទើបនឹងជាប់ឆ្នោតជានាយករដ្ឋមន្ត្រីអង់គ្លេសកាលពីថ្ងៃទី ០៦ កញ្ញាកន្លងទៅ បានធ្វើការប្រកាសដ៏ភ្ញាក់ផ្អើលមួយ គឺលាលែងពីតំណែងកំពូលមួយនេះ។ នេះបើតាមការចុះផ្សាយពី Sky News។

ប្រភពដដែលបានបន្ថែមថា ការលាលែងតំណែងមួយនេះ នឹងធ្វើឲ្យលោកស្រីក្លាយជានាយករដ្ឋមន្ត្រីអង់គ្លេស កាន់តំណែងបានខ្លីបំផុតប្រចាំប្រវត្តិសាស្ត្រ។

ហើយការលាលែងតំណែងរបស់លោកស្រី ធ្វើឡើងបន្ទាប់ពីអង់គ្លេសធ្វើកំណែទម្រង់សេដ្ឋកិច្ចនយោបាយថ្មី ក្នុងគោលបំណងកែប្រែស្ថានការណ៍សេដ្ឋកិច្ចដែលអង់គ្លេសកំពុងជួបប្រទះ ប៉ុន្តែវាបែរជាមិនទទួលបានការគាំទ្រពីប្រជាជនឡើយ។

ទន្ទឹមនឹងនោះ លោក Sir Keir Starmer មេដឹកនាំបក្សប្រឆាំង ស្នើសុំឲ្យមានការបោះឆ្នោតមុនកាលកំណត់ ស្របពេលលោក Sir Graham Brady ប្រធានគណៈកម្មាធិការនៃឆ្នាំ 1922 បានប្រកាសថា ការបោះឆ្នោតជ្រើសតាំងនាយករដ្ឋមន្ត្រីថ្មី រំពឹងបញ្ចប់នៅថ្ងៃទី ២៨ តុលា ហើយនាយករដ្ឋមន្ត្រីថ្មីនឹងចូលកាន់តំណែងនៅថ្ងៃទី ៣១ តុលា៕

The post Breaking News: លោកស្រី Liz Truss ប្រកាសលាលែងតំណែងជានាយករដ្ឋមន្ត្រីអង់គ្លេស ក្រោយកាន់តំណែងបាន ៤៥ ថ្ងៃ appeared first on .

លើកដំបូងក្នុងប្រវត្តិសាស្ត្រអង់គ្លេស ដែលតំណែងគណៈរដ្ឋមន្ត្រីកំពូលទាំង ៤ មិនមានបុរសស្បែកស

ឧកញ៉ាសំពៅ — Mon, 26 Sep 2022 01:51:00 +0000

លោកស្រី Liz Truss បានក្លាយជានាយករដ្ឋមន្ត្រីថ្មីរបស់អង់គ្លេស និងជានាយករដ្ឋមន្ត្រីស្រីទី ៣ ប្រចាំប្រវត្តិសាស្ត្រផងដែរ បន្ទាប់ពីលោកស្រីទទួលបានសម្លេងគាំទ្រច្រើនជាងគូប្រជែង Rishi Sunak ច្រើនសន្ធឹក។

សម្រាប់ការឡើងកាន់តំណែងថ្មីថ្មោងនេះ ស្ត្រីមានឥទ្ធិពលខាងលើបានបង្កើតប្រវត្តិសាស្ត្រថ្មីស្រឡាងមួយទៀតសម្រាប់ចក្រភពអង់គ្លេស គឺលើកដំបូងក្នុងប្រវត្តិសាស្ត្រដែលតំណែងគណៈរដ្ឋមន្ត្រីកំពូលទាំង ៤ របស់អង់គ្លេស មិនមានបុរសស្បែកសជាអ្នកគ្រប់គ្រង។ នេះបើតាមការចុះផ្សាយពី Reuters។

ប្រភពដដែលបានបន្ថែមថា សម្រាប់តំណែងកំពូលបង្អស់ជានាយករដ្ឋមន្ត្រីគឺគ្រប់គ្រងដោយលោកស្រី Liz Truss ហើយលោកស្រីក៏បានតែងតែលោក Kwasi Kwarteng ជារដ្ឋមន្ត្រីហិរញ្ញវត្ថុស្បែកខ្មៅតំបូងប្រចាំអង់គ្លេស។

ដោយឡែកតំណែងបន្ទាប់ គឺលោកស្រីបានប្រគល់ជូន James Cleverly ដែលបានធ្វើឲ្យលោកក្លាយជារដ្ឋមន្ត្រីការបរទេសស្បែកខ្មៅជាលើកដំបូងប្រចាំអតីតសមាជិក EU មួយនេះផងដែរ។

សម្រាប់អ្នកស្នងតំណែងរបស់លោកស្រី Priti Patel ជារដ្ឋមន្ត្រីមហាផ្ទៃ គឺជាអ្នកស្រី Suella Braverman ដែលនឹងគ្រប់គ្រងលើផ្នែកអន្តោប្រវេសន្ត និងប៉ូលិស។

សូមបញ្ជាក់ដែរថា អស់រយៈពេលជាច្រើនទសវត្សដែលតំណែងសំខាន់ៗប៉ុន្មានខាងលើគឺតែងតែជាទំនួលខុសត្រូវរបស់បុរសស្បែកស សម្រាប់គណៈរដ្ឋមន្ត្រីអង់គ្លេស ប៉ុន្តែសម្រាប់សតវត្សទី ២១ នេះវិញ ការរើសអើងពណ៌សម្បុរ និងពូជសាសន៍ លែងជាបញ្ហាហើយ អ្វីដែលសំខាន់គឺសមត្ថភាព និងចក្ខុវិស័យក្នុងការដឹកនាំប្រទេសតែប៉ុណ្ណោះ៕

The post លើកដំបូងក្នុងប្រវត្តិសាស្ត្រអង់គ្លេស ដែលតំណែងគណៈរដ្ឋមន្ត្រីកំពូលទាំង ៤ មិនមានបុរសស្បែកស appeared first on .

បេក្ខភាព ២ រូបចុងក្រោយ សម្រាប់ការបោះឆ្នោតនាយករដ្ឋមន្ត្រីអង់គ្លេសនឹងសម្រេចនៅយប់នេះ

ឧកញ៉ាសំពៅ — Wed, 20 Jul 2022 09:18:01 +0000

ការបោះឆ្នោតជ្រើសរើសនាយករដ្ឋមន្ត្រីថ្មីនៃចក្រភពអង់គ្លេសកំពុងខិតកាន់តែកៀកនឹងបញ្ចប់ ពោលការប្រកាសសម្រេចជាផ្លូវការនឹងធ្វើឡើងនៅថ្ងៃទី ៥ ខែកញ្ញា ខណៈបេក្ខភាព ២ រូបចុងក្រោយនឹងត្រូវប្រកាសនៅរាត្រីយប់នេះ។

យោងតាមការចុះផ្សាយពី CNA បានទម្លាយឲ្យដឹងថា បេក្ខភាព ២ រូបចុងក្រោយនឹងត្រូវប្រកាសនៅម៉ោង ១៥:០០ (ម៉ោងក្នុងស្រុក) ដែលត្រូវនឹងម៉ោង ២០:០០ នៅកម្ពុជា ខណៈនេះគឺជាការប្រកួតដ៏ស្វិតស្វាញរវាងរដ្ឋមន្ត្រីការបរទេស Liz Truss និង Penny Mordaunt ស្របពេលលោក Rishi Sunak គឺជាបេក្ខភាពជួរមុខ។

អតីតរដ្ឋមន្ត្រីហិរញ្ញវត្ថុ Sunak គឺនៅខ្វះតែ ២ សំឡេងប៉ុណ្ណោះ ដើម្បីធានាកៅអីជុំចុងក្រោយ ខណៈ Truss ត្រូវការ ៥ សំឡេង ស្របពេល Mordaunt ខ្វះតែ ៦ សំឡេង។

សូមជម្រាបដែរថា ក្នុងកាលៈទេសៈមួយនេះ ចក្រភពអង់គ្លេសអាចនឹងមានប្រវត្តិសាស្ត្រថ្មី ដ្បិតបើសិនជាលោក Sunak ជាប់ឆ្នោត នោះលោកនឹងក្លាយជានាយករដ្ឋមន្ត្រីអង់គ្លេសកាត់អាស៊ីតំបូងបំផុត ខណៈបើ Truss ឬ Mordaunt ជាប់ឆ្នោត នោះអង់គ្លេសនឹងមាននាយករដ្ឋមន្ត្រីជាស្ត្រីទី ៣ ក្នុងប្រវត្តិសាស្ត្រ៕

The post បេក្ខភាព ២ រូបចុងក្រោយ សម្រាប់ការបោះឆ្នោតនាយករដ្ឋមន្ត្រីអង់គ្លេសនឹងសម្រេចនៅយប់នេះ appeared first on .

សេដ្ឋីប្រាក់វាល់លានដុល្លារ បដិសេធមិនបរិច្ចាគលុយកន្លះលានផោន បើ Boris Johnson គ្មានឈ្មោះបោះឆ្នោត

ឧកញ៉ាសំពៅ — Wed, 20 Jul 2022 07:52:20 +0000

បច្ចុប្បន្ន ការបោះឆ្នោតជ្រើសរើសនាយករដ្ឋមន្ត្រីថ្មីនៃចក្រភពអង់គ្លេសកំពុងប្រព្រឹត្តឡើង បន្ទាប់ពីលោក Boris Johnson ប្រកាសថា នឹងចុះចេញពីតំណែង ក្រោយមានបញ្ហារកាំរកូសក្នុងជួររដ្ឋាភិបាល ក៏ដូចជារឿងអាស្រូវជាច្រើន។

ទាក់ទងនឹងការជ្រើសនាយករដ្ឋមន្ត្រីថ្មីនៃចក្រភពអង់គ្លេសនេះផងដែរ សេដ្ឋីប្រាក់វាល់លានដុល្លារ Peter Cruddas បានទម្លាយឲ្យដឹងថា លោកមានបំណងបរិច្ចាគទឹកប្រាក់ប្រមាណ ៥០០ ០០០ ផោន ប៉ុន្តែគម្រោងអាចនឹងប្រែប្រួល ដោយសារលោក Johnson លែងកាន់តំណែង។

ប្រាប់ទៅកាន់ Sunday Times ស្ដេចត្រាញ់នៃទីក្រុងឡុងបាននិយាយ៖ “ខ្ញុំមានបំណងចង់បរិច្ចាគទឹកប្រាក់ ៥០០ ០០០ ផោននៅឆ្នាំនេះ ប៉ុន្តែវាអាចនឹងមិនកើតឡើង លុះត្រាតែពួកគេផ្ដល់ឱកាសឲ្យ Boris ឈរឈ្មោះជាបេក្ខភាពបោះឆ្នោតនាយករដ្ឋមន្ត្រី”។

សូមជម្រាបដែរថា Boris Johnson និង Peter Cruddas គឺមានទំនាក់ទំនងមិនធម្មតា ដោយសារកាលពីឆ្នាំទៅនាយករដ្ឋមន្ត្រីរូបនេះ បានតែងតាំងសេដ្ឋីអង់គ្លេសជាសមាជិកសភាទី ២ នៃជួររដ្ឋាភិបាល ដែលទទួលបានគោរមងារ “Lords” បើទោះជាមានការជំទាស់ពីគណៈកម្មការតែងតាំងតំណែងក្ដី៕

The post សេដ្ឋីប្រាក់វាល់លានដុល្លារ បដិសេធមិនបរិច្ចាគលុយកន្លះលានផោន បើ Boris Johnson គ្មានឈ្មោះបោះឆ្នោត appeared first on .