នាវាផ្ទាល់ខ្លួន

នាវាតម្លៃ ៤០០លានដុល្លារ របស់មហាសេដ្ឋីអារ៉ាប៊ីសាអូឌីតម្នាក់ ខូចខាតស្ទើរទាំងស្រុង ក្នុងហេតុការណ៍អគ្គីភ័យមួយ

ឧកញ៉ាសាមញ្ញ — Fri, 05 Jul 2024 00:55:00 +0000

កាលពីព្រឹកថ្ងៃទី២ ខែកក្កដាកន្លងទៅ មានហេតុការណ៍អគ្គីភ័យមួយ បានឆាប់ឆេះយ៉ាងសន្ធោសន្ធៅនៅឯកន្លែងផលិតនាវាកម្សាន្ត Lurssen ដ៏ល្បីល្បាញរបស់ប្រទេសអាល្លឺម៉ង់ ក្នុងទីក្រុង Schacht-Audorf ដោយបានបំផ្លិចបំផ្លាញទីតាំងផលិត រួមជាមួយនាវាដ៏ប្រណីតមួយដែលត្រូវបានគេរាយការណ៍ថាមានតម្លៃរហូតដល់ទៅ ៤០០លានដុល្លារ។ នេះបើតាមការចុះផ្សាយពីសារព័ត៌មាន DMarge។

នាវាដ៏ទំនើប និងប្រណីតបំផុតមានតម្លៃជិតកន្លះពាន់លានដុល្លារ ដែលត្រូវបានឆាបឆេះខ្ទេចខ្ទីស្ទើតែទាំងស្រុង នៅក្នុងហេតុការណ៍អគ្គីភ័យនោះ ត្រូវបានគេរាយការណ៍មកថាជារបស់មហាសេដ្ឋីប្រទេសអារ៉ាប៊ីសាអូឌីតម្នាក់ ដែលមិនត្រូវបានគេបញ្ចេញឈ្មោះឲ្យដឹងនៅឡើយទេ។

គួរឲ្យដឹងផងដែរថា គ្រោះអគ្គីភ័យនេះបានផ្ទុះឡើងនៅវេលាម៉ោងប្រហែល ៩ និង ២០នាទីព្រឹក (ម៉ោងក្នុងស្រុក) បន្ទាប់ពីកម្មករបានឃើញមានផ្សែងហុយ និងក្រោយមកកើតជាអណ្តាតភ្លើងឆាបឆេះយ៉ាងសន្ធោសន្ធៅ នៅក្នុងសាលចតទុកនាវា។

ឧបទ្ទវហេតុនេះបានបន្សល់ទុកនូវផលប៉ះពាល់យ៉ាងខ្លាំងដល់ប្រតិបត្តិការរបស់ក្រុមហ៊ុន Lurssen និងសុវត្ថិភាពរបស់កម្មករ ខណ:មូលហេតុនៃការឆាបឆេះនេះ នៅមិនទាន់ដឹងច្បាស់នៅឡើយ ដោយនឹងរង់ចាំការស៊ើបអង្កេតបន្ត។

ជម្រាបជូនផងដែរថា Lurssen ជាក្រុមហ៊ុនដ៏ល្បីឈ្មោះ និងចំណាស់បំផុតមួយ នៅក្នុងការសាងសង់ប្រភេទនាវាកម្សាន្តដ៏ប្រណីត ជូនដល់មហាសេដ្ឋីលំដាប់កំពូលៗជាច្រើន ដោយក្រុមហ៊ុននេះបានបើកដំណើរការចាប់តាំងពីឆ្នាំ១៨៧៥ មកម្លេះ៕

The post នាវាតម្លៃ ៤០០លានដុល្លារ របស់មហាសេដ្ឋីអារ៉ាប៊ីសាអូឌីតម្នាក់ ខូចខាតស្ទើរទាំងស្រុង ក្នុងហេតុការណ៍អគ្គីភ័យមួយ appeared first on .

មេធំ Facebook ចាយលុយជាង ៣០០លានដុល្លារ ទិញនាវាផ្ទាល់ខ្លួន ២គ្រឿង

ឧកញ៉ាសំពៅ — Tue, 12 Mar 2024 03:29:20 +0000

មហាសេដ្ឋីអាមេរិក Mark Zuckerberg បានចាយលុយពីហោប៉ៅ ៣៣០លានដុល្លារ ដើម្បីទិញនាវាផ្ទាល់ខ្លួនចំនួនពីរគ្រឿង ដែលមានឈ្មោះថា Launchpad និងនាវាតូចមួយទៀត សម្រាប់ជំនួយដល់នាវាធំនេះ។

យោងតាមការចុះផ្សាយពីសារព័ត៌មាន Yahoo បានបង្ហាញថា នាវា Launchpad របស់មហាសេដ្ឋីអាមេរិក គឺមានប្រវែងដល់ទៅ ១១៨ម៉ែត្រ និងអាចចំណតឧទ្ធម្ភាគចក្រថែមទៀត។

នាវាថ្មីរបស់មហាសេដ្ឋីអាមេរិក ក៏អាចទទួលភ្ញៀវបានច្រើនផងដែរ ដោយមានបន្ទប់គេងសម្រាប់ភ្ញៀវ ២៤នាក់ និងបុគ្គលិកបម្រើការងារលើទីនោះ ដល់ទៅ ៤៨នាក់ ស្របពេលនាវាជំនួយមួយគ្រឿងទៀតមានឈ្មោះថា Wingman ដែលទុកប្រើប្រាស់ សម្រាប់ផ្ទុកឧបករណ៍ជំនួយផ្សេងៗ។

រំលឹកបន្តិចថា នាវាមួយគ្រឿងនេះ ពីដើមឡើយគឺជាកម្មសិទ្ធរបស់មហាសេដ្ឋីរុស្ស៊ី Vladimir Potanin ក៏ប៉ុន្តែវាបានចតចោលនៅកន្លែងចតនាវានៃប្រទេសហូឡង់ជាច្រើនខែ បន្ទាប់ពីសហភាពអឺរ៉ុប ដាក់ទណ្ឌកម្មសេដ្ឋកិច្ចលើក្រុមអ្នកមាន ហើយទើបថ្មីៗនេះប៉ុណ្ណោះ ដែលរដ្ឋាភិបាលហូឡង់ បានសម្រេចលក់វាទៅឲ្យមហាសេដ្ឋី Mark Zuckerberg។

ជម្រាបបន្ថែមថា ទោះជាចាយលុយជាង ៣៣០លានដុល្លារ ទិញនាវាផ្ទាល់ខ្លួន២គ្រឿងក្ដី ក៏ទំហំលុយប៉ុណ្ណឹង ស្មើត្រឹម ០,១៨% នៃទ្រព្យសម្បត្តិសរុប ដែលមេធំ Facebook មានប៉ុណ្ណោះ ពោលប្រមាណ ១៧៩ពាន់លានដុល្លារ ស្របពេលនាវា Launchpad ត្រូវបានគេប៉ាន់ប្រមាណថា ត្រូវការចំណាយប្រាក់ ៣០លានដុល្លារក្នុងមួយឆ្នាំ ដើម្បីថែទាំ និងប្រើប្រាស់វា៕

The post មេធំ Facebook ចាយលុយជាង ៣០០លានដុល្លារ ទិញនាវាផ្ទាល់ខ្លួន ២គ្រឿង appeared first on .

អាមេរិកគ្រោងលក់នាវារឹបអូសពីមហាសេដ្ឋីរុស្ស៊ី យកលុយផ្ដល់ជំនួយទៅអ៊ុយក្រែន

ឧកញ៉ាសំពៅ — Wed, 25 Oct 2023 08:58:00 +0000

រដ្ឋអាជ្ញាររបស់សហរដ្ឋអាមេរិកបានប្រកាសថា មានបំណងលក់នាវាផ្ទាល់ខ្លួនរបស់មហាសេដ្ឋីរុស្ស៊ី Suleiman Kerimov ដែលបានរឹបអូសកាលពីឆ្នាំទៅ ក្នុងតម្លៃប្រមាណ ៣០០លានដុល្លារ ដើម្បីយកប្រាក់ទៅផ្គត់ផ្គង់អ៊ុយក្រែន ក្នុងការធ្វើសង្គ្រាមជាមួយរុស្ស៊ី។

យោងតាមការចុះផ្សាយពីសារព័ត៌មាន MSN បានបង្ហាញថា អាមេរិកនឹងដាក់នាវាដែលមានប្រវែងជាង ១០៦ម៉ែត្រ សម្រាប់ការដេញថ្លៃ ហើយសង្ឃឹមថានឹងទទួលបានទឹកប្រាក់ សម្រាប់ផ្ដល់ជំនួយទៅកាន់សម្ព័ន្ធមិត្តរបស់ខ្លួន។

ជុំវិញបញ្ហានេះផងដែរ ក្រុមមេធាវីការពារក្ដីរបស់មហាសេដ្ឋីខាងលើបានអះអាងថា អាមេរិករឹបអូសនាវាខុសម្ចាស់ ពោលលោក Kerimov បានផ្ទេរកម្មសិទ្ធទៅកាន់លោក Eduard Khudainatov ដែលជាមហាសេដ្ឋីរុស្ស៊ីផ្សេងទៀត ប៉ុន្តែអាមេរិកមិនចេញមុខបកស្រាយពាក់ព័ន្ធនឹងការលើកឡើងនេះឡើយ។

ជាមួយគ្នានេះ មេធាវីរបស់លោក Khudainatov ក៏បានប្រកាសដែរថា កូនក្ដីរបស់ខ្លួនបានដាក់ពាក្យបណ្ដឹង ទាមទារការគ្រប់គ្រងនាវាមកវិញកាលពីថ្ងៃចន្ទ ប៉ុន្តែសារព័ត៌មាន Reuters បញ្ជាក់ថា ពួកគេមិនអាចរកឃើញពាក្យបណ្ដឹងមួយនេះ នៅលើអ៊ីនធឺណិតឡើយ៕

The post អាមេរិកគ្រោងលក់នាវារឹបអូសពីមហាសេដ្ឋីរុស្ស៊ី យកលុយផ្ដល់ជំនួយទៅអ៊ុយក្រែន appeared first on .

Evergrande លក់នាវាផ្ទាល់ខ្លួនតម្លៃជាង ៣០លានដុល្លារ ដោះស្រាយបញ្ហាបំណុល

ឧកញ៉ាសំពៅ — Fri, 29 Sep 2023 07:57:00 +0000

ក្រុមហ៊ុនជាប់បំណុលច្រើនបំផុតលើលោក China Evergrande Group បានលក់នាវាផ្ទាល់ខ្លួន បានទឹកប្រាក់ប្រមាណ ៣២លានដុល្លារ នាដើមឆ្នាំនេះ ដើម្បីរៀបចំផែនការសងបំណុល ចំពេលម្ចាស់បំណុលកំពុងសម្រុកទារប្រាក់។ នេះបើតាមការចុះផ្សាយពីគេហទំព័រ CNA។

នាវាប្រណីតដែល Evergrande បានលក់គឺមានឈ្មោះថា EVENT មានប្រវែង ៦០ម៉ែត្រ ខណៈកន្លងមកក្រុមហ៊ុននេះ ក៏ធ្លាប់លក់យន្តហោះផ្ទាល់ខ្លួន ៣គ្រឿងផងដែរ។

គួររំលឹកបន្តិចថា កាលពីខែកក្កដា មានសេចក្ដីរាយការណ៍មួយថា Evergande បានលក់យន្តហោះផ្ទាល់ខ្លួន ប្រភេទ Boeing បានទឹកប្រាក់ប្រមាណ ១០០លានដុល្លារ ប៉ុន្តែក្រុមហ៊ុនមិនបានចេញមុខបកស្រាយលំអិតពីបញ្ហានេះឡើយ។

បន្ថែមពីនោះ កាលពីឆ្នាំ២០២១ សារព័ត៌មាន Reuters ក៏ធ្លាប់បានចុះផ្សាយថា ក្រុមហ៊ុនចិនមួយនេះ បានលក់យន្តហោះផ្ទាល់ខ្លួនប្រភេទ Gulfstream បានទឹកប្រាក់ប្រមាណ ៥០លានដុល្លារ ដើម្បីយកមកទប់ទល់នឹងបញ្ហាបំណុលផងដែរ៕

The post Evergrande លក់នាវាផ្ទាល់ខ្លួនតម្លៃជាង ៣០លានដុល្លារ ដោះស្រាយបញ្ហាបំណុល appeared first on .

Lamborghini ផលិតនាវាលំដាប់អភិជន ចំនួនមានកំណត់ រីឯតម្លៃវិញញាក់សាច់

ឧកញ៉ាសំពៅ — Fri, 25 Nov 2022 03:49:00 +0000

ក្រុមហ៊ុន Lamborghini គឺជាក្រុមហ៊ុនផលិតរថយន្តលំដាប់កំពូលមួយលើលោក ដ្បិតបើសិនជានិយាយពីឡានប្រណីត គេនឹកឃើញ Rolls Royce តែបើនិយាយពីឡានស្ព័រ Lamborghini គឺជាជម្រើសតំបូងដែលគ្រប់គ្នានឹកឃើញមុនគេ។

យ៉ាងណា ក្រៅពីរថយន្តក្រុមហ៊ុនខ្នាតយក្សមួយនេះក៏បានផលិតជានាវាឯកជនផងដែរ ដោយទូកកំសាន្តផលិតដោយក្រុមហ៊ុនមានឡូហ្គោរូបគោ មានតម្លៃរហូតដល់ ៤ លានដុល្លារ ហើយចំនួនផលិតក៏មានកំណត់ដូចគ្នាន ពោលផលិតតែ ៦៣ គ្រឿងប៉ុណ្ណោះ។

យោងតាមការចុះផ្សាយពីវេបសាយផ្លូវការរបស់ក្រុមហ៊ុនបានទម្លាយថា នាវានេះគឺមានឈ្មោះថា Technomar Lamborghini 63 ផលិតឡើងជាពិសេស ក្នុងគោលបំណងអបអរគម្រប់ខួបនៃការបង្កើតក្រុមហ៊ុន និងបានយកគម្រូតាមឡាន Sián FKP 37 ដែលជារថយន្តស្ព័រកំពូលតំបូងរបស់ Lamborghini។

មួយតួខ្លួននៃនាវាលំដាប់អភិជននេះ គឺប្រើប្រាស់កាបូនហ្វាយបឺស្ទើរទាំងស្រុង ដែលធ្វើឲ្យវាមានទម្ងន់ស្រាល ត្រឹម ២៤ តោន បើធៀបនឹងនាវាដែលមានទំហំប៉ុនគ្នា។ វាក៏មានបំពាក់មកជាមួយនូវម៉ាស៊ីន MAN V2-2000HP ២ គ្រាប់ ដែលធ្វើឲ្យវាក្លាយជានាវាលឿនបំផុត សម្រាប់ត្រកូល Tecnomar។

The post Lamborghini ផលិតនាវាលំដាប់អភិជន ចំនួនមានកំណត់ រីឯតម្លៃវិញញាក់សាច់ appeared first on .

រដ្ឋាភិបាលអាល្លឺម៉ង់សម្រេចឃាត់នាវាតម្លៃជាង ៦០០ លានដុល្លាររបស់មហាសេដ្ឋីរុស្ស៊ីម្នាក់

ឧកញ៉ាសំពៅ — Thu, 03 Mar 2022 05:25:37 +0000

កាលពីពេលថ្មីៗនេះ រដ្ឋាភិបាលអាល្លឺម៉ង់បានធ្វើការឃាត់ទុកនូវនាវាផ្ទាល់ខ្លួនដ៏ទំនើបដែលមានតម្លៃរហូតដល់ទៅជាង ៦០០ លានដុល្លារ របស់មហាសេដ្ឋីរុស្ស៊ីម្នាក់ដែលមានឈ្មោះថា Alisher Usmanov ខណៈបុគ្គលរូបនេះកំពុងស្ថិតនៅក្រោមគំនាបទណ្ឌកម្មសេដ្ឋកិច្ចដែលសហភាពអឺរ៉ុបកំពុងផ្ដល់ឲ្យមហាសេដ្ឋីរុស្ស៊ី។

បើយោងតាមការចុះផ្សាយពី Forbes បានឲ្យដឹងថា នាវាដែលមានប្រវែងជាង ១៥៦ ម៉ែត្រត្រូវបានរឹបអូសទៅទុកនៅភាគខាងជើងនៃកំពង់ផែ Hamburg ខណៈការរឹបអូសគឺធ្វើឡើងអំឡុងពេលនាវាមួយនេះកំពុងស្ថិតនៅកន្លែងជួសជុល Blohm + Voss កាលពីថ្ងៃពុធ។

បច្ចុប្បន្នសហភាពអឺរ៉ុបកំពុងព្យាយាមដាក់ទណ្ឌកម្មសេដ្ឋកិច្ចទៅកាន់មហាសេដ្ឋីរុស្ស៊ី ប្រមាណ ២៥ នាក់ផ្សេងទៀត សម្រាប់ការឈ្លានពានរបស់រុស្ស៊ីទៅលើប្រទេសអ៊ុយក្រែន។ នេះបើតាមការប្រកាសពីសេចក្ដីសម្រេចចិត្តជាផ្លូវការរបស់សហភាពអឺរ៉ុប។

បញ្ជាក់ដែរថា គិតត្រឹមថ្ងៃពុធកន្លងទៅ មាននាវាផ្ទាល់ខ្លួនរបស់មហាសេដ្ឋីរុស្ស៊ីយ៉ាងតិច ៥ កំពុងចតចោលនៅកោះ Maldives និងប្រជុំកោះនៅមហាសមុទ្រឥណ្ឌា ដែលជាទីតាំងមិនជាប់ពាក់ព័ន្ធជាមួយសហរដ្ឋអាមេរិក ឬតំបន់អឺរ៉ុបណាឡើយ៕

ប្រភព: RT

The post រដ្ឋាភិបាលអាល្លឺម៉ង់សម្រេចឃាត់នាវាតម្លៃជាង ៦០០ លានដុល្លាររបស់មហាសេដ្ឋីរុស្ស៊ីម្នាក់ appeared first on .

ការផលិតនាវា តាមការកុម្ម៉ង់ពីសេដ្ឋីៗឆ្នាំ២០២១ កើនឡើងរាប់ពាន់គ្រឿង

ឧកញ៉ាសំពៅ — Tue, 14 Dec 2021 07:53:06 +0000

វាគឺជារឿងសាមញ្ញដែលមហាសេដ្ឋីម្នាក់ៗ ត្រូវតែមានឧបករណ៍ និងយានយន្តទំនើបៗ ហើយបើសិនជាមិនមានយន្តហោះផ្ទាល់ខ្លួន ក៏នាវាផ្ទាល់ខ្លួនគឺចាំបាច់ត្រូវតែមាន ដើម្បីបង្ហាញពីមុខមាត់នៅក្នុងសង្គមរបស់ពួកវណ្ណៈជាន់ខ្ពស់។

ជាក់ស្ដែង បច្ចុប្បន្នអត្រានៃការផលិតនាវាផ្ទាល់ខ្លួនសម្រាប់បុគ្គលលំដាប់អភិជនមានការកើនឡើងខ្ពស់សឹងមិនគួរឲ្យជឿ ពោលការកុម្ម៉ង់នាវាខ្នាតធំនៅក្នុងឆ្នាំនេះមានការកើនឡើងដល់ទៅ ២៥% បើធៀបទៅនឹងឆ្នាំមុន ពោលគឺដល់ទៅ ១ ២០០ គ្រឿង។

ដោយឡែក សម្រាប់នាវាខ្នាតតូចវិញ គឺកើនឡើងដល់ទៅ ៣០,៥% បើធៀបពីមួយឆ្នាំទៅមួយឆ្នាំ ហើយតួលេខ ១ ២០០ គ្រឿងខាងលើអាចនិយាយបានថាជាចំនួនផលិតច្រើនបំផុត ដោយកាលពីជាងមួយទសវត្សមុននៅឆ្នាំ ២០០៩ នាវាខ្នាតធំ ១ ០០៨ គ្រឿងត្រូវបានផលិត និងចាត់ទុកជាចំនួនច្រើនជាងគេនាពេលនោះ។

បើតាមការអះអាងពី Sky News ក្រុមមហាសេដ្ឋីគឺមានការកើនឡើងខ្ពស់បំផុត បន្ទាប់ពីមានការបង្កើតនូវមន្ទីរពិសោធន៍វិសមភាពពិភពលោកនៅ ឆ្នាំ ១៩៩៥ ជាក់ស្ដែងពួកគេមានកំណើនទ្រព្យសម្បត្តិសរុប ៣,៦ ទ្រីលានដុល្លារកាលពីឆ្នាំទៅ ខណៈបច្ចុប្បន្នគិតត្រឹមពាក់កណ្ដាលខែតុលា កើនលើស ៥ ទ្រីលានដុល្លារហើយ។

បញ្ជាក់ដែរថា ក្នុងចំណោមតួលេខ ១ ២០០ គ្រឿង ក្រុមមហាសេដ្ឋីហាក់ពេញចិត្តជាមួយនាវាដែលផលិតនៅប្រទេសអ៊ីតាលីជាងគេ ដោយបច្ចុប្បន្នមានការកក់នាវាខ្នាតយក្សដែលផលិតនៅអ៊ីតាលីដល់ទៅ ៥២៣ គ្រឿង ខណៈនាវាដែលផលិតនៅចក្រភពអង់គ្លេសមានការបញ្ជាទិញ ៨១ គ្រឿង៕

ប្រភព: luxurylaunches

The post ការផលិតនាវា តាមការកុម្ម៉ង់ពីសេដ្ឋីៗឆ្នាំ២០២១ កើនឡើងរាប់ពាន់គ្រឿង appeared first on .