រដ្ឋាភិបាល​អាល្លឺម៉ង់​សម្រេច​ឃាត់​នាវា​តម្លៃ​ជាង ៦០០​ លាន​ដុល្លារ​របស់​មហាសេដ្ឋី​រុស្ស៊ី​ម្នាក់

អន្តរជាតិ

កាលពី​ពេលថ្មីៗនេះ រដ្ឋាភិបាល​អាល្លឺម៉ង់​បាន​ធ្វើ​ការ​ឃាត់​ទុក​នូវ​នាវា​ផ្ទាល់ខ្លួន​ដ៏​ទំនើប​ដែល​មាន​តម្លៃ​រហូត​ដល់​ទៅ​ជាង ៦០០ លាន​ដុល្លារ របស់​មហាសេដ្ឋី​រុស្ស៊ី​ម្នាក់​ដែល​​មាន​ឈ្មោះ​ថា Alisher Usmanov ខណៈ​បុគ្គល​រូបនេះ​កំពុង​ស្ថិតនៅ​ក្រោម​គំនាប​ទណ្ឌកម្ម​សេដ្ឋកិច្ច​ដែល​សហភាព​អឺរ៉ុប​កំពុង​ផ្ដល់​ឲ្យ​មហាសេដ្ឋី​រុស្ស៊ី។

សូមចុច Subscribe Channel Telegram Oknha news គ្រប់សកម្មភាពឧកញ៉ា សេដ្ឋកិច្ច ពាណិជ្ជកម្ម និងសហគ្រិនភាព

បើ​យោង​តាម​ការ​ចុះផ្សាយ​ពី Forbes បាន​ឲ្យ​ដឹងថា នាវា​ដែល​មាន​ប្រវែង​ជាង ១៥៦ ម៉ែត្រ​ត្រូវបាន​រឹបអូស​ទៅ​ទុក​នៅ​ភាគ​ខាងជើង​នៃ​កំពង់ផែ Hamburg ខណៈ​ការ​រឹបអូស​គឺ​ធ្វើឡើង​អំឡុងពេល​នាវា​មួយនេះ​កំពុង​ស្ថិត​នៅ​កន្លែង​ជួសជុល Blohm + Voss កាលពី​ថ្ងៃពុធ។

បច្ចុប្បន្ន​សហភាព​អឺរ៉ុប​កំពុង​ព្យាយាម​ដាក់​ទណ្ឌកម្ម​សេដ្ឋកិច្ច​ទៅ​កាន់​មហាសេដ្ឋី​រុស្ស៊ី​ ប្រមាណ ២៥ នាក់​ផ្សេងទៀត សម្រាប់​ការ​ឈ្លានពាន​របស់​រុស្ស៊ី​ទៅ​លើ​ប្រទេស​អ៊ុយក្រែន។ នេះ​បើតាម​ការ​ប្រកាស​ពី​សេចក្ដី​សម្រេចចិត្ត​ជាផ្លូវការ​របស់​សហភាព​អឺរ៉ុប។

បញ្ជាក់​ដែរ​ថា គិត​ត្រឹម​ថ្ងៃពុធ​កន្លង​ទៅ មាន​នាវា​ផ្ទាល់ខ្លួន​របស់​មហាសេដ្ឋី​រុស្ស៊ី​យ៉ាងតិច ៥ កំពុង​ចតចោល​នៅ​កោះ Maldives និង​ប្រជុំកោះ​នៅ​មហាសមុទ្រ​ឥណ្ឌា ដែល​ជា​ទីតាំង​មិនជាប់ពាក់ព័ន្ធ​ជាមួយ​សហរដ្ឋអាមេរិក ឬ​តំបន់អឺរ៉ុប​ណាឡើយ៕

ប្រភព: RT