កម្មវិធីនេះ​ត្រូវបានរៀបចំឡើង​ដើម្បី​​​ប្រកាស​ដាក់ឱ្យ​ប្រើប្រាស់​ជាផ្លូវការ​សេវាសាធារណៈ​តាមប្រព័ន្ធឌីជីថល របស់ក្រសួង​រៀបចំដែនដី ចំនួន ២ គឺ៖ ១)ការស្នើសុំសេវាព័ត៌មានសុរិយោដីតាមប្រព័ន្ធអេឡិចត្រូនិក និង ២)ការស្នើសុំសេវាសំណង់​តាម​ប្រព័ន្ធអេឡិចត្រូនិក ក្នុងទិសដៅបង្កើន​គុណភាព និងពង្រីកវិសាលភាព​សេវាសាធារណៈ​ឱ្យ​កាន់តែ​រហ័ស ប្រសិទ្ធភាព និងតម្លាភាព ដោយផ្អែកលើ​មូលដ្ឋានទិន្នន័យ និងការ​ធ្វើបរិវត្តកម្មឌីជីថល។ ទទឹមនេះដែរ ក្រសួងរៀបចំដែនដី បានកសាង​នូវ​ប្រព័ន្ធ​ឌីជីថល​សំខាន់ៗ​ដូចខាងក្រោម៖

១) ការស្នើសុំសេវាសាធារណៈអនឡាញ
២) ចរន្តការរដ្ឋបាលក្រសួងតាមប្រព័ន្ធអេឡិចត្រូនិក
៣) កសាងបណ្ណាល័យឯកសារគតិយុត្តអេឡិចត្រូនិក
៤) ការចុះបញ្ជីដីធ្លីតាមប្រព័ន្ធអេឡិចត្រូនិក
៥) ការរៀបចំថ្នាល់ មជ្ឈមណ្ឌលប្រជាជន (People Center) ដែលជាថ្នាល​ប្រមូលផ្តុំទិន្នន័យ​គ្រប់ប្រភេទ សម្រាប់​ផ្តល់​សេវាដល់ប្រជាពលរដ្ឋកម្ពុជាទូទាំងប្រទេស។

ពិធីខាងលើនេះ ក៏មានការអញ្ជើញចូលរួមពី អ្នកឧកញ៉ា លី ហួរ ប្រធានសមាគមអ្នកអភិវឌ្ឍន៍លំនៅឋានកម្ពុជា, លោក រ័ត្ន សោភ័ណ ប្រធានសមាគមធនាគារនៅកម្ពុជា, លោកស្រី ឌិត នីតា ប្រធានសមាគមមីក្រូហិរញ្ញវត្ថុកម្ពុជា, ឧកញ៉ា វ៉ាន់ ឆាស៍ជួន អនុប្រធាន កាណាឌីយ៉ា គ្រុប, ឧកញ៉ា តាន់ មុនីវណ្ណ អនុប្រធានសភាពាណិជ្ជកម្មកម្ពុជា រួមទាំងថ្នាក់ដឹកនាំ មន្ត្រីរាជការក្រសួង អន្តរក្រសួង វិស័យឯកជន និងភ្ញៀវកិត្តិយសសរុបជាង ១០០០នាក់។

សូមជម្រាបថា តាមប្រសាសន៍លោកឧបនាយករដ្ឋមន្ត្រី សាយ សំអាល់ បានបញ្ជាក់ថា កម្មវិធីប្រកាសសេវាធារណៈ​ឌីជីថល​នេះ​ គឺជាផ្នែកដ៏សំខាន់មួយ នៃចក្ខុវិស័យរបស់លោក ដែលមានពាក្យស្លោក «សេវាគាប់ចិត្ត»។ ដើម្បីអាច​ផ្តល់​សេវាគាប់ចិត្ត​ជូនដល់ប្រជាពលរដ្ឋ​បាន លោកមានគន្លឹះអាទិភាពការងារ​សំខាន់៣ រួមមាន៖ ១)ចុះបញ្ជីឱ្យរួចរាល់​ទូទាំង​ប្រទេស, ២)ដោះស្រាយវិវាទឱ្យបានបញ្ចប់ ដើម្បីឱ្យមានបរិយាកាសគ្មានវិវាទដីធ្លី និង ៣)ការផ្តល់សេវាទំនើបសម្បូរ​បែប៕

The post អ្នកឧកញ៉ា លោក-លោកស្រី ប្រធានសមាគមមួយចំនួន ចូលរួមកម្មវិធីប្រកាសសេវាធារណៈឌីជីថល​របស់ក្រសួងរៀបចំដែនដី appeared first on .

កិច្ចប្រជុំពិភាក្សានេះ មានការចូលរួមពី លោកឧកញ៉ា តាន់ មុនីវណ្ណ អនុប្រធានសភាពាណិជ្ជកម្មកម្ពុជា, លោកស្រីឧកញ៉ា នួន ពេជ្រសុផល អគ្គនាយករងជាន់ខ្ពស់សភាពាណិជ្ជកម្មកម្ពុជា, លោកស្រី ចន ច័ន្ទលក្ខិណា ភរិយាឧកញ៉ា ហេង ឡុង ជាប្រធានសមាគមសិល្បករខ្មែរ ព្រមទាំងសមាសភាពអញ្ជើញពីអង្គភាពពាក់ព័ន្ធមួយចំនួនទៀត។

បើតាម លោកស្រី ចន ច័ន្ទលក្ខិណា បាន​​បញ្ជាក់​លើ​ទំព័រហ្វេសប៊ុក​​ឱ្យដឹងថា ការពិភាក្សា​នៃ​កិច្ចប្រជុំខាង​លើ​ផ្ដោតសំខាន់​លើរបៀបវារៈចំនួន៣ រួមមាន៖ ១-បង្កើតគណៈកម្មការរៀបចំការបោះឆ្នោត, ២-ពិនិត្យខ្លឹមសារ​លក្ខន្តិកៈសម្រាប់​ការឈរ​ឈ្មោះបោះឆ្នោត និងនីតិវិធីនៃការបោះឆ្នោត។ ៣-កំណត់ពេលវេលា ទីកន្លែង និងសមាសភាពនៃអង្គបោះឆ្នោត។

សមាគមសិល្បករខ្មែរ ត្រូវបានបង្កើតឡើងជាដំបូងនៅក្នុងឆ្នាំ២០០៦ ដោយមានការផ្ដួចផ្ដើមគំនិតរបស់អ្នកស្នេហាវិស័យ​សិល្បៈមួយចំនួន ក្នុងគោលបំណង អភិរក្ស អភិវឌ្ឍន៍ លើកស្ទួយវិស័យសិល្បៈជាតិ និងជួយដោះស្រាយរាល់បញ្ហា​របស់​អ្នកសិល្បៈ ជាពិសេសជួយដល់អ្នកសិល្បៈចាស់ជរា ពិការបាត់បង់សមត្ថភាព និងបាត់បង់ជីវិត និងរួមចំណែកជួយ​ដល់​សង្គមជាតិ។

លោកស្រី ចន ច័ន្ទលក្ខិណា បាន​ឱ្យដឹង​បន្ថែម​ទៀត​ថា មួយរយៈកន្លងមកនេះ សមាគមសិល្បករខែ្មរ ក៍បានដើរតួរនាទី​ដ៏​សំខាន់មួយ ជាសេនាធិកាឱ្យ​ក្រសួងវប្បធម៌ និង វិចិត្រសិល្បៈ ក្នុងការចូលរួមបង្កើតសកម្មភាព​សិល្បៈនានា ដើម្បីការលើក​ស្ទួយនូវវប្បធម៌ជាតិ ក៍ដូចជាការជួយសម្រួលនូវកិច្ចការលំបាកផ្សេងៗមួយចំនួនរបស់សិល្បករ សិល្បការិនីដែលបាន​ជួប​នូវបញ្ហាដូចអ្វីដែលជាគោលការណ៍របស់សមាគមផងដែរ។

ទោះយ៉ាងណា នាពេលថ្មីៗនេះ លោកស្រី ចន ច័ន្ទលក្ខិណា បានប្រកាសនឹងមិនឈរឈ្មោះជាបេក្ខភាព​សម្រាប់បោះឆ្នោត​ជ្រើសរើសជាប្រធានសមាគមនៅអាណត្តិបន្ទាប់ និងបានធ្វើលិខិតទៅកាន់ក្រសួងវប្បធម៌ និង វិចិត្រសិល្បៈ ដែលជាស្ថាប័ន​អាណាព្យាបាលនូវវិស័យសិល្បៈគ្រប់ទម្រង់ ដើម្បីជួយចាត់តាំងនូវមន្ត្រីជំនាញ​សម្រាប់​ជួយសម្របសម្រួល​នូវយន្តការៀបចំ​ការបោះឆ្នោតនៅពេលខាងមុខឆាប់ៗ និងដើម្បីឱ្យ​មានតម្លាភាព អព្យាក្រឹត្យភាព និង យុត្តិធម៌សម្រាប់​បេក្ខភាពនានា ដែល​មានបំណង​ចង់ចូលរួមឈរឈ្មោះបោះឆ្នោត ជាប្រធានសមាគមនៅអណត្តិក្រោយនេះ។

សូមជម្រាបថា មកទល់បច្ចុប្បន្ន​មាន​បេក្ខភាព​មួយ​ចំនួន​មានបំណង​ឈរ​ឈ្មោះ​​បោះឆ្នោត​ជា​ប្រធានសមាគមសិល្បករខ្មែរ ក្នុងនោះ​ក៏​មាន លោកស្រីអ្នកឧកញ៉ា ម៉ៅ ចំណាន ភរិយារបស់​អ្នកឧកញ៉ា គិត ម៉េង អគ្គនាយកក្រុមហ៊ុន រ៉ូយ៉ាល់ គ្រុប និង​ជា​ប្រធានសភាពាណិជ្ជកម្មកម្ពុជា​ផងដែរ៕

The post ឧកញ៉ាតំណាងសភាពាណិជ្ជកម្មកម្ពុជា ចូលរួមកិច្ចប្រជុំរៀបចំការបោះឆ្នោតជ្រើសរើសប្រធានសមាគមសិល្បករខ្មែរ appeared first on .

គោលបំណង​ធំ​ក្នុង​ពិធីនេះ គឺ​ដើម្បីអបអរសាទរចំពោះការបង្កើត និងការដាក់ឱ្យដំណើរការ​ជាផ្លូវការ​នូវមជ្ឈ​មណ្ឌល​ជាតិនៃមជ្ឈត្តការ​ផ្នែកពាណិជ្ជកម្ម និងដើម្បីផ្តល់ជាលិខិតថ្លែងអំណរគុណជូនដល់ថ្នាក់ដឹងនាំរបស់ ម.ជ.ម ចាប់តាំងពីអាណត្តិដំបូងរហូតដល់បច្ចុប្បន្ននេះ។

ពិធីខាង​លើ​នេះ ក៏មានការអញ្ជើញចូលរួម​ពីសំណាក់តំណាងគណៈមេធាវីនៃព្រះរាជាណាចក្រកម្ពុជា, តំណាង​សាជីវកម្មហិរញ្ញវត្ថុអន្តរជាតិ, តំណាងសភាពាណិជ្ជកម្មអាមេរិក, តំណាងសភាពាណិជ្ជកម្មអឺរ៉ុបនៅកម្ពុជា, តំណាង​មជ្ឈមណ្ឌលមជ្ឈត្តការអន្តរជាតិហុងកុង និងបណ្តារសមាគម ក្រុមហ៊ុនធុរកិច្ចពាក់ព័ន្ធ​ជាច្រើនទៀត​ផងដែរ។

សូម​ជម្រាប​ថា មជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្ម គឺជាស្ថាប័នមិនស្វែងរកប្រាក់​ចំណេញមួយ​ មាន​ទីតាំងស្ថិតនៅក្នុងរាជធានីភ្នំពេញ ហើយត្រូវបានបង្កើតឡើងក្រោមច្បាប់ស្តីពីមជ្ឈត្តការផ្នែកពាណិជ្ជកម្ម នៅ​ឆ្នាំ ២០០៦។ ម.ជ.ម បានចាប់ផ្តើមប្រតិបត្តិការជាផ្លូវការនៅ​ចុង​ឆ្នាំ២០១៣ ដើម្បីផ្តល់ឱ្យសហគមន៍​ពាណិជ្ជករនូវ​យន្តការ​ដោះស្រាយវិវាទ​ពាណិជ្ជកម្មមួយក្រៅប្រព័ន្ធតុលាការ។ បច្ចុប្បន្ន​តួនាទី ម.ជ.ម កាន់តែមាន​សារៈសំខាន់​ខ្លាំង​ឡើង​ ដោយសារមានការកើនឡើងនូវតម្រូវការនៃការដំណោះស្រាយវិវាទ ដែលបណ្តាលមកពីការ​រីកចម្រើន​យ៉ាងឆាប់រហ័សនៃវិស័យសេដ្ឋកិច្ច កំណើនគួរឱ្យកត់សម្គាល់នៃប្រតិបត្តិការពាណិជ្ជកម្ម ក៏ដូចជាកំណើនវិវាទ​ ដែលកើតចេញពីប្រតិបត្តិការទាំង​នោះ៕

The post បណ្ឌិត តាន់ មុនីវណ្ណ តំណាងអ្នកឧកញ៉ា គិត ម៉េង ចូលរួមពិធីខួប១០ឆ្នាំ ការបង្កើតមជ្ឈមណ្ឌលជាតិនៃមជ្ឈត្តការផ្នែកពាណិជ្ជកម្ម appeared first on .

លោកបណ្ឌិត តាន់ មុនីវណ្ណ ​​បាន​បង្ហាញ​ពី​សមិទ្ធផល​ធំៗ​របស់​សភាពាណិជ្ជកម្មកម្ពុជា ​ក្នុង​វេទិការដ្ឋ-ឯកជន លើកទី៤​ ស្តីពី «ការ​អភិវឌ្ឍនគរូបនីយកម្មកម្ពុជា-ជប៉ុន» ​នៅ​ទីស្តីការក្រសួងរៀបចំដែនដី នគរូបនីយកម្ម និង​សំណង់ នា​ព្រឹក​ថ្ងៃ​ព្រហស្បតិ៍​នេះ​ឱ្យ​ដឹង​ថា ចាប់តាំង​ពី​ឆ្នាំ២០០៥ មក​ដល់​បច្ចុប្បន្ន​ សភាពាណិជ្ជកម្មកម្ពុជា ​​មាន​​សភាពាណិជ្ជកម្ម​រាជធានី-ខេត្ត ចំនួន ១៨, បាន​ចុះ​​​អនុស្សរណៈយោគយល់​គ្នា​​ជាមួយ​សមាគម​ក្នុង​ស្រុក និង​សភាពាណិជ្ជកម្ម-សមាគម​អន្តរជាតិ ចំនួន ៣៣។ លោក​បណ្ឌិត បាន​ឱ្យ​ដឹង​ទៀត​ថា សភាពាណិជ្ជកម្មកម្ពុជា ​​មាន​ការិយាល័យ​តំណាង​​​នៅ​ក្រៅ​ប្រទេស​ចំនួន ៧​កន្លែង នៅ​៤ប្រទេស​ (ជប៉ុន១, អូស្ត្រាលី២, កាណាដា២ និង​សហរដ្ឋអាមេរិក១)។ ជាមួយ​គ្នា​នោះ សភាពាណិជ្ជកម្មកម្ពុជា ក៏​មាន​ទំនាក់ទំនង​​យ៉ាង​ជិតស្និត​ជាមួយ​ស្ថាប័ន​អន្តរជាតិ​ជា​ច្រើន​ទៀត​ដូចជា ASEAN-BAC, EABC, GMS-BC, ACMECS-BC, Mekong-Lancang BC, Mekong-Korea BC, ASEAN-ROK BC, ASEAN Manufacturers Network ជាដើម-ល-។

អគ្គនាយករងក្រុមហ៊ុន ម៉ុង ឫទ្ធីគ្រុប បាន​​បន្ត​ថា ស្នាដៃធំៗ​ទាំង​នេះ​ ជា​ការ​​បន្សល់ទុក​របស់​សម្តេចតេជោ ហ៊ុន សែន អតីត​នាយករដ្ឋមន្ត្រី និង​ធ្វើ​ឱ្យ​​កម្ពុជា​យើង​អាច​​​ស្មើមុខស្មើមាត់​លើ​ឆាក​អន្តរជាតិ។ បន្ថែមពី​នោះ ក្រោមការ​ដឹកនាំ​របស់​សម្តេច​ធិបតី ហ៊ុន ម៉ាណែត នាយករដ្ឋមន្ត្រី នៅ​អាណត្តិ​ថ្មី​នេះ ក៏​នឹង​ជំរុញ​សភាពាណិជ្ជកម្ម​កម្ពុជា ឱ្យ​ពង្រីក​​ការិយាល័យ​នៅ​ក្រៅ​ប្រទេស​​​កាន់​តែ​ច្រើន​បន្ថែម​ទៀត។

បណ្ឌិត តាន់ មុនីវណ្ណ បាន​បន្ថែម​ដូច្នេះ​ថា៖ “ក្រោមការដឹកនាំ​ដ៏​ឈ្លាសវៃ​​​ប៉ិន​ប្រសប់​​របស់​អ្នកឧកញ៉ា គិត ម៉េង បាន​ធ្វើ​ឱ្យ​តួនាទី​របស់​សភាពាណិជ្ជកម្ម​កាន់​តែ​លេចធ្លោរ​​​ទាំង​នៅ​​ក្នុង​ស្រុក និង​សកម្មភាព​លើ​ឆាក​​អន្តរជាតិ ពិសេស​​កិច្ចសហការ​ជាមួយ​នឹង​ក្រសួង-ស្ថាប័ន​របស់​រាជរដ្ឋាភិបាល ដែល​ការងារ​នេះ​​មាន​វិសាលភាព​ធំ​មែន​ទែន។ ក្រសួងពាក់ព័ន្ធ​និង​វិស័យ​ឯកជន​ត្រូវ​ដើរ​ឱ្យ​ស្រប​ទិស​ជាមួយ​គ្នា ដើម្បី​ជជែក​គ្នាទាំង​​អំពីទិដ្ឋភាព​​ច្បាប់​ និង​ប្រព័ន្ធសេដ្ឋកិច្ចពាណិជ្ជកម្ម​។ ខ្ញុំ​ឃើញ​ប្រទេស​​អាស៊ាន​ខ្លះ សភាពាណិជ្ជកម្ម​មិន​បាន​ធ្វើការ​ជិត​ស្និត​ជាមួយ​រដ្ឋាភិបាល​ទេ ដែល​ពេល​ខ្លះ​ទស្សនៈ​វិស័យ​ឯកជន​របស់​ពួកគេ គឺ​​ផ្ទុយ​ពី​​ទស្សនៈវិស័យ​របស់​រដ្ឋាភិបាល។ សម្រាប់​កម្ពុជា ​​ក្រោមការ​ដឹកនាំ​របស់​សម្តេចធិបតី ហ៊ុន ម៉ាណែត នាយករដ្ឋមន្ត្រី និង​អ្នកឧកញ៉ា គិត ម៉េង ជា​ប្រធាន​សភាពាណិជ្ជកម្ម​កម្ពុជា បាន​ធ្វើ​ឱ្យ​វិស័យរដ្ឋ និង​ឯកជន ​​​ធ្វើការ​ជាមួយ​គ្នា​​កាន់​តែ​​ស្អិត​រមួត​ នៅ​អាណត្តិ​ថ្មី​នេះ”។

តាម​ការ​បញ្ជាក់ពី​លោក​បណ្ឌិត តាន់ មុនីវណ្ណ បច្ចុប្បន្ន​សភាពាណិជ្ជកម្មកម្ពុជា មានសមាជិក​សរុប​ប្រមាណ​ជាង ៧០០០​នាក់។ សភាពាណិជ្ជកម្មកម្ពុជា ​​ត្រូវ​បាន​បង្កើត​ឡើង​ដោយ​ច្បាប់​តាំងពី​ឆ្នាំ១៩៩៥ ដែល​ជា​ស្ថាប័ន​មួយ​មិន​ស្វែងរក​ប្រាក់​ចំណេញ សម្រាប់​តំណាង​​ផល​ប្រយោជន៍​ឯកជន ក្នុង​វិស័យ​ពាណិជ្ជកម្ម ឧស្សាហកម្ម សេវាកម្ម និង​វិស័យ​កសិ-ឧស្សាហកម្ម។ ជាចក្ខុវិស័យ​សម្រាប់​ឆ្នាំ២០២៤​ សភាពាណិជ្ជកម្មកម្ពុជា ​​ចង់​ក្លាយ​ខ្លួន​ជា​សភា​ពាណិជ្ជកម្ម​ល្អ​ជាងគេ​បំផុត ក្នុង​ចំណោម​ប្រទេស​តំបន់​អាស៊ាន លើ​ការ​ជំរុញ​ភាព​ប្រកួត​ប្រជែង និង​កំណើន​ពាណិជ្ជកម្ម​កាន់​តែ​ខ្ពស់៕

The post បណ្ឌិត តាន់ មុនីវណ្ណ សរសើរអ្នកឧកញ៉ា គិត ម៉េង ដែលដឹកនាំសភាពាណិជ្ជកម្មកម្ពុជា ឱ្យទទួលបានសមិទ្ធផលធំៗជាច្រើន appeared first on .

លោកបណ្ឌិត តាន់ មុនីវណ្ណ អគ្គនាយករងក្រុមហ៊ុន ម៉ុងឬទ្ធី គ្រុប បានឱ្យដឹងថា មកដល់សព្វថ្ងៃនេះTechnology ឬជំនាញបច្ចេកវិទ្យាមិនប្រើកម្លាំងទេ ហើយនៅគ្រប់វិទ្យាល័យទាំងអស់ លោកបណ្ឌិតសូមអំពាវនាវដល់ប្អូនៗទាំងអស់ ឱ្យរៀនមុខវិជ្ជាTechnology ឬបច្ចេកវិទ្យា។

លោកបណ្ឌិត សង្កត់ធ្ងន់ថា៖ “មកដល់ម៉ោងនេះខ្ញុំមិននឹកស្មាន ហើយខ្ញុំជឿថាអ្នកមិនមានTechnology នៅរយៈពេល៥ឆ្នំាឬ១០ឆ្នំាក្រោយនឹងដឹងថាខ្លួនឯងជាបុគ្គលបែបណា?សូម្បីតែនៅពេលនេះសម្រាប់ SMEs ឬក្រុមហ៊ុនធំៗក៏ដោយ អ្នកណាដើរមិនទាន់Technologyទេ ក្រុមហ៊ុនទាំងនោះនឹងដើរថយក្រោយទាំងអស់”។

លោកបណ្ឌិតគូលើកឡើងថាTechnologyមានពីរ ក្នុងនោះមានជំនាញ Technology និងមួយទៀត គឺEcosystem។ បច្ចេកវិទ្យាអុីចឹង សព្វថ្ងៃ ខ្មែរជំនាញបច្ចេកវិទ្យានៅមានកម្រិត ហើយបើនិយាយដល់ Ecosystem បច្ចេកវិទ្យាមិនទាន់ទៅរួចនៅឡើយនោះទេ។ អគ្គនាយករងក្រុមហ៊ុនម៉ុងឬទ្ធី រូបនេះបន្តថា នៅពេលបោះឆ្នោតថ្នាក់ជាតិរួចហើយ តាមរយៈនៃការជជែកគ្នាជាមួយមន្ត្រីជាន់ខ្ពស់ក្រសួងសេដ្ឋកិច្ច និងហិរញ្ញវត្ថុ លើកឡើងថា រាជរដ្ឋាភិបាលនិងគាំទ្រមូលនិធិ ១០០% ទៅលើក្រុមហ៊ុនឯកជន សម្រាប់បណ្តុះបណ្តាលជំនាញ។

ពាក់ព័ន្ធនិងបច្ចេកវិទ្យានេះដែរ បើយោងតាមមន្ត្រីជាន់ខ្ពស់ ក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ ថាបច្ចុប្បន្នសិស្សនិស្សិតកម្ពុជា កំពុងមានការចាប់អារម្មណ៍ច្រើន ហើយនៅថ្ងៃអនាគត កម្ពុជានឹងមានធនធានមនុស្សលើផ្នែកបច្ចេកវិទ្យាកាន់តែច្រើនថែមទៀត ដើម្បីចូលរួមអភិវឌ្ឍសង្គម និងសេដ្ឋកិច្ចជាតិ។

លោកជំទាវ ជា រដ្ឋា អនុរដ្ឋលេខាធិការក្រសួងឧស្សាហកម្ម វិទ្យាសាស្ត្រ បច្ចេកវិទ្យា និងនវានុវត្តន៍ មានប្រសាសន៍ថា កម្ពុជាសព្វថ្ងៃនារីចូលចិត្តបច្ចេកវិទ្យាច្រើនណាស់ ព្រោះសិស្សដែលជានារីពួកគាត់ពូកែខាងមុខវិជ្ជាគណិតវិទ្យាច្រើន ដែលកាលពីមុនមានប្រហែល ១៦%ទេ ដែលរៀនខាង Stem ហើយក្រសួង បានចាប់ផ្តើមជួយផ្សព្វផ្សាយបន្ថែម ដើម្បីឱ្យពួកគាត់ដឹងថារៀនផ្នែកបច្ចេកវិទ្យា វាមានសារសំខាន់យ៉ាងណាខ្លះ ក្នុងការផ្តល់អត្ថប្រយោជន៍នៅពេលអនាគត។

លោកជំទាវ បន្តថា៖ “យើងឃើញថា កូនសិស្សដែលបានរៀននៅក្នុងវិស័យបច្ចេកវិទ្យា បានកើនឡើងដល់ ៣០%។ ប៉ុន្តែ នៅក្នុងផែនទីបង្ហាញផ្លូវរបស់យើងសម្រាប់ឆ្នាំ ២០៣០ គឺយើងចង់បាននិស្សិតដែលបានបញ្ចប់ការសិក្សាពីមហាវិទ្យាល័យឱ្យបាន ៤០% ដើម្បីឱ្យមានធាតុចូលជាច្រើនរវាងស្ត្រី និងបុរស។ ពិសេស គោលនយោបាយឆ្នាំ ២០៥០ និងមានការបណ្តុះបណ្តាលបច្ចេកវិទ្យាពីក្មេងឡើងទៅ ដើម្បីឱ្យកម្ពុជាសម្បូរ ទៅដោយធនធានមនុស្ស ដែលមានការចេះដឹងនៅក្នុងវិស័យបច្ចេកវិទ្យា បានកាន់តែច្រើន ក្នុងការចូលរួមអភិវឌ្ឍន៍សង្គម និងសេដ្ឋកិច្ចកម្ពុជា” ៕ អត្ថបទ៖ សារេត

The post បណ្ឌិត តាន់ មុនីវណ្ណ៖ ក្រុមហ៊ុនណា អភិវឌ្ឍន៍មិនទាន់បច្ចេកវិទ្យាអាជីវកម្មនឹងដើរថយក្រោយទាំងអស់ appeared first on .

លោកបណ្ឌិត តាន់ មុនីវណ្ណ អគ្គនាយករងក្រុមហ៊ុន ម៉ុងឬទ្ធី គ្រុប និងជាបុគ្គលល្បីមួយរូបនៅក្នុងសង្គម បានមើលឃើញថាសហគ្រិនជោគជ័យឬលេចធ្លោនៅក្នុងអាជីវកម្មរវាងបុរសនិងស្ត្រីនៅពេលបច្ចុប្បន្នមានភាពប្រហាក់ប្រហែលគ្នាតែទៅថ្ងៃខាងមុខផ្អែកលើគោលនយោបាយគំាំទ្រហិរញ្ញវត្ថុរបស់រាជរដ្ឋាភិបាលនឹងជំរុញឱ្យស្ត្រីមានឱកាសជោគជ័យកាន់តែច្រើនថែមទៀត។

លោកបណ្ឌិត តាន់ មុនីវណ្ណ មានប្រសាសន៍ថា «សហគ្រិនជោគជ័យរវាងបុរសនិងស្ត្រីនៅពេលសព្វថ្ងៃនេះ ខ្ញុំគិតថាវាមានប្រហាក់ប្រហែលគ្នា ហើយបើសិនយើងមើលទៅនៅក្នុងគោលការណ៍របស់រាជរដ្ឋាភិបាល ពិសេសនៅក្នុងគោលការណ៍ហិរញ្ញវត្ថុផ្សេងៗ គេមានការគំាំទ្រច្រើនទៅលើស្ត្រី។ អ៊ីចឹងបើយើងមើលទៅលើការជំរុញ ការគំាំទ្រនិងការអប់រំ រួមទំាងគោលនយោបាយគាំទ្រហិរញ្ញវត្ថុរបស់រាជរដ្ឋាភិបាលថែមទៀតនោះខ្ញុំគិតថាសហគ្រិនស្ត្រីមានឱកាសជោគជ័យច្រើនមែនទែន ហើយមកដល់ម៉ោងនេះបច្ចេកវិទ្យាមានការរីកចម្រើន ធ្វើមនុស្សប្រើបញ្ញាមិនប្រើកម្លំាង។ដូចនេះ ដល់ពេលសហគ្រិនស្ត្រីមានការកែលម្អរ ប្រឹងប្រែងធ្វើយ៉ាងម៉េចឱ្យសមត្ថភាពរបស់ខ្លួនអាចស្មើរឬអាចលើសសហគ្រិនបុរស»។

បើតាមលោកបណ្ឌិត តាន់ មុនីវណ្ណ សម្រាប់កម្ពុជានាពេលបច្ចុប្បន្នកំពុងមានការបើកចំហរហើយក៏ជាឱកាសមួយសម្រាប់ក្មេងស្រីៗ ដូចនេះនៅតាមគ្រួសារគួរមានការលើកទឹកចិត្តដល់កូនស្រីឱ្យមានការចូលរួមនៅក្នុងសង្គមឱ្យបានច្រើនកុំគិតបារម្ភឬដាក់គំនាបដល់កូនៗច្រើនពេក។

លោកបណ្ឌិតលើកឡើងថា កន្លងមកយើងដឹងហើយថាចំណុចខ្សោយរបស់ស្ត្រីមានការជាប់របំាងប្រពៃណីខ្លះ។ខ្ញុំអាចនិយាយបានថាជូនកាលស្ត្រីខ្លួនឯងមិនទាន់មានស្មារតីគ្រប់គ្រាន់នៅក្នុងការប្រកបអាជីវកម្មឬទៅកាន់តួនាទីធំៗ ហើយការជាប់គំនាបពីគ្រួសារនេះ មិនអនុញ្ញាតឱ្យស្ត្រីមានក្លាហាននិងចេញទៅក្រៅចូលរួមនៅក្នុងសង្គមបានច្រើន។ វិស័យអប់រំនៅប្រទេសខ្លះដាក់គំនាបទៅដល់ក្មេងស្រីមិនចង់ឱ្យទៅរៀនសូត្រ ហើយអ្នករកស៊ីនៅប្រទេសខ្លះទៀតស្ត្រីមិនអាចចេញទៅរកស៊ីប្រកបអាជីវកម្មអ្វីបាន។តែមកដល់ម៉ោងនេះសម្រាប់កម្ពុជាបានបើកចំហរទំាងអស់ ហើយខ្ញុំគិតថាវាជាឱកាសមួយសម្រាប់ក្មេងៗស្រី ហើយគ្រួសារនីមួយៗគួរតែហ៊ានឱ្យកូនឬលើកទឹកចិត្តដល់កូនស្រីឱ្យគាត់ចូលរួមច្រើននៅក្នុងសង្គម កុំគិតបារម្ភរឿងអ្វីច្រើនពេក ហើយកុំដាក់គំនាបដល់កូនៗច្រើនពេក ខ្ញុំគិតថាស្ត្រីនៅថ្ងៃអនាគតគាត់មានឱកាសច្រើនធ្វើកិច្ចការពាណិជ្ជកម្មដូចបុរស។

លោកបណ្ឌិតសង្កត់ធ្ងន់ថា «ដើម្បីឱ្យសហគ្រិនស្ត្រីអាចដើរទៅមុខបានលឿនថែមទៀតនោះខ្ញុំគិតថាវិស័យអប់រំជាវិស័យអាទិភាពហើយស្ត្រីខ្លួនឯងត្រូវពង្រឹងសមត្ថភាពនិងហ៊ានប្រឈមជាមួយនិងគំនាបផ្សេងៗដោយខ្លួនឯង ហើយភាគីខាងបុរសគួរតែគិតអំពីគុណតម្លៃនិងលើកទឹកចិត្តដល់ស្ត្រីឱ្យបានច្រើន ដើម្បីឱ្យយើងអាចកសាងសេដ្ឋកិច្ចនិងពាណិជ្ជកម្មមួយបានរវាងប្តីនិងប្រពន្ធកុំឱ្យដូចសម័យកាលពីដើមសេដ្ឋកិច្ចភាគច្រើនពឹងតែទៅលើគ្រួសារខាងប្តី»។

លោកបណ្ឌិតបន្តថា មកដល់បច្ចុប្បន្ននេះនៅកម្ពុជាស្ត្រីដែលជោគជ័យនៅក្នុងសេដ្ឋកិច្ចនិងសង្គមមានច្រើន ហើយបើមើលទៅតាមសមាគមផ្សេងទៀតស្ត្រីបានចូលរួមច្រើន។ជាក់ស្តែងនៅពេលខ្ញុំចូលរួមក្នុងកម្មវិធីចែករំលែកចំណេះដឹងនៅតាមបណ្តាខេត្តខ្ញុំឃើញស្ត្រីចូលរួមច្រើនជាងបុរស៕អត្ថបទ៖សារេត

The post សហគ្រិនស្ត្រីមានឱកាសជោគជ័យកាន់ច្រើននាពេលខាងមុខផ្អែកលើគោនយោបាយនិងបច្ចេកវិទ្យារីកចម្រើន appeared first on .

ផ្សារ វីនសូ ​​ជា​ប្រភេទ​អាជីវកម្ម​​លក់​សម្ភារៈបរិក្ខា និង​ជា​ផ្សារ​ទំនើប​ខ្នាត​តូច​មួយ ដែល​លក់​ទំនិញ​ជាង​ ១ម៉ឺន​មុខ ជាមួយ​នឹង​គុណភាព​ល្អ ​​ហើយ​គ្រប់​មុខ​ទំនិញ​​មាន​តម្លៃ​ត្រឹម​តែ ១,១០​ដុល្លារ​ប៉ុណ្ណោះ។ មក​ទល់​បច្ចុប្បន្ន ផ្សារ វីនសូ មាន​ចំនួន ៥​សាខា​ហើយ ក្នុង​នោះ​មាន​ដូចជា ផ្សារ វីនសូ សាខាផ្សារដីហុយ, ផ្សារ វីនសូ សាខា​ចំការ​ដូង (ស្ទឹងមានជ័យ), ផ្សារ វីនសូ សាខាចោមចៅ, ​ផ្សារ វីនសូ សាខា​ច្បារអំពៅ និង​សាខា​ឈូកមាស ដែល​ទើប​​សម្ពោធ​ថ្មី​នេះ ស្ថិត​នៅ​ផ្លូវលេខ២០១១ ភូមិក្រាំងអង្ក្រង សង្កាត់ក្រាំងធ្នង់ ខណ្ឌសែនសុខ រាជធានីភ្នំពេញ។

ក្រុមហ៊ុន 168 វីនសូ ឯ.ក ​​ត្រូវ​បាន​បង្កើត​ឡើង តាំងពី​ខែកញ្ញា ឆ្នាំ២០១៩ ដោយមាន​សហស្ថាបនិក​ចំនួន​៣​រូប ក្នុង​នោះ​មាន​លោក ជ្រុយ យីន ជា​ប្រធានក្រុមហ៊ុន ខណៈ​ដែល​បណ្ឌិត តាន់ មុនីវណ្ណ និង​លោក Truong HUE HONG ជា​អគ្គនាយកក្រុមហ៊ុន។

សូម​ជម្រាប​ថា បណ្ឌិត តាន់ មុនីវណ្ណ ជា​បុគ្គល​ម្នាក់​ដែល​​មាន​តួនាទី​ជា​ច្រើន​នៅ​ក្នុង​សង្គម និង​នៅ​តាម​ក្រុមហ៊ុន​ជា​ច្រើន​​ទៀត។ លោកបណ្ឌិត ក៏​ជា​​អនុប្រធានសភាពាណិជ្ជកម្មកម្ពុជា និង​ជា​អគ្គនាយក​រង​នៃ​ក្រុមហ៊ុន ម៉ុង ឫទ្ធី​ គ្រុប ផង​ដែរ៕

The post កូនប្រសារអ្នកឧកញ៉ា ម៉ុង ឫទ្ធី បើកសម្ពោធផ្សារ វីនសូ សាខាឈូកមាស appeared first on .

​កាលពី​ល្ងាច​ថ្ងៃទី​២៣ ខែ​វិច្ឆិកា ឆ្នាំ២០២២ ​​សហគ្រិនខ្មែរ (Khmer Enterprise) សហការជាមួយ​វិទ្យាស្ថាន​ជាតិសហគ្រិនភាពនិងនវានុវត្តន៍ ​(NIEI)​​​ បានរកឃើញម្ចាស់​ជ័យលាភីពានរង្វាន់សហគ្រិន​ថ្នាក់ជាតិ​ឆ្នាំ២០២២ ទាំង៤រូប គឺ៖
» លេខ១៖ លោក ឈរ រិទ្ធី (ខ្មែរ ហ្រ្វេស មិល ឯ.ក ខេត្តតាកែវ)
» លេខ២៖ លោកស្រី ទ្រី មុយគា (សហគ្រាសផលិតថ្នាំ ប៉េប៉េអឹម ភ្នំពេញ)
» លេខ៣៖ លោកស្រី ងន វ៉ាន់ថា (Color Silk Enterprise ភ្នំពេញ)
» លេខ៤៖ លោកស្រី ម៉ៅ សុធា (SHE Acrocam Products Co.,Ltd ភ្នំពេញ)។

បណ្ឌិត តាន់ មុនីវណ្ណ អនុប្រធានសភាពាណិជ្ជកម្មកម្ពុជា តំណាងគណៈកម្មការផ្តល់ពិន្ទុ​វគ្គផ្តាច់ព្រ័ត្រ​កម្មវិធី​ប្រកួតប្រជែង​ពានរង្វាន់សហគ្រិនថ្នាក់ជាតិឆ្នាំ២០២២ ​​បាន​ថ្លែង​ក្នុង​ពិធីបិទពានរង្វាន់​សហគ្រិនថ្នាក់ជាតិ​ឆ្នាំ២០២២ ​​ថា ​ឆ្នាំក្រោយ​នឹង​មានការប្រកួតពានរង្វាន់សហគ្រិន​អាស៊ាន នៅប្រទេសឥណ្ឌូនេស៊ី។ ដូច្នេះ​លោក​សូម​អំពាវនាវឱ្យអ្នកជាប់ ឬអ្នកមិនបានជាប់ ត្រៀមខ្លួនទៅប្រកួតពានរង្វាន់អាស៊ានឆ្នាំ២០២៣ ហើយ​ក្នុងនោះក៏មានពានរង្វាន់ទូទៅ និងពានរង្វាន់ពិសេសថែមទៀត។

លោក​បណ្ឌិត​ ក៏​សំណូមពរ​ដល់​ថ្នាក់ដឹកនាំ និង​គណៈកម្មការ​ថ្នាក់​ជាតិ ជួយ​រៀប​ចំ​បង្កើតឱ្យមានវគ្គណែនាំ​តម្រង់ទិសបន្ថែម មុន​ឱ្យ​បេក្ខជន​ឆ្នើម​ថ្នាក់​ជាតិ​ទាំង​អស់​ ទៅចូលរួមប្រកួតពានអាស៊ាន ដើម្បី​ធ្វើយ៉ាងណា​ឱ្យបានជោគជ័យទាំងអស់គ្នា សម្រាប់ជាតិយើង។

សូម​ជម្រាប​ជូន​ថា ពានរង្វាន់សហគ្រិនថ្នាក់ជាតិឆ្នាំ២០២២ ដែលរៀបចំដោយវិទ្យាស្ថានជាតិសហគ្រិនភាព និងនវានុវត្តន៍ (NIEI) និងសហគ្រិនខ្មែរ (KE) ឧបត្ថម្ភធំដោយធនាគារ ព្រីនស៍ បាន​ប្រព្រឹត្តទៅនៅថ្ងៃទី២៣ ខែវិច្ឆិកា ឆ្នាំ២០២២ នៅសណ្ឋាគារហ៉ីម៉ាវ៉ារីភ្នំពេញ។ កម្មវិធីនេះ គាំទ្រដោយ ក្រសួងសេដ្ឋកិច្ច និងហិរញ្ញវត្ថុ, ក្រសួងការងារ និងបណ្តុះបណ្តាលវិជ្ជាជីវៈ, ក្រសួងពាណិជ្ជកម្ម និង​ក្រសួងឧស្សាហកម្ម វិទ្យាសាស្រ្ត បច្ចេកវិទ្យា និងនវានុវត្តន៍៕

The post កូនប្រសារអ្នកឧកញ៉ា ម៉ុង ឫទ្ធី សំណូមពរឱ្យម្ចាស់ពានសហគ្រិនឆ្នាំ២០២២ ទៅប្រកួតកម្រិតអាស៊ាន appeared first on .

​លោកបណ្ឌិត តាន់ មុនីវណ្ណ ដែលជាកូនប្រសារ​របស់​អ្នកឧកញ៉ា ម៉ុង ឫទ្ធី ​​បាន​លើក​ឡើង​ក្នុង​កម្មវិធី Annual Big Event កាលពីថ្ងៃទី២៤ ខែតុលា ឆ្នាំ២០២១ ​​ថា​ លោក​ចាត់​ទុក​អ្នកឧកញ៉ា លី ហួរ ជា​​និមិត្ត​រូប (Role Model) ម្នាក់ ​​សម្រាប់​លោក។ លោកបណ្ឌិត​ បន្ត​ថា ​​ពេល​ដែល​បុគ្គលិក​​ល្អ​​លាឈប់ អ្នកឧកញ៉ា លី ហួរ បែ​ជា​ជប់​លៀង​​ឱ្យ និង​ជូន​ផ្ទះ​មួយ​ល្វែង​ថែម​ទៀត ដែល​ចំណុច​នេះ សូម្បី​លោក​ក៏​ធ្វើ​មិន​បាន​ដែរ។

“ខ្ញុំចាត់ទុក​អ្នកឧកញ៉ា លី ហួរ ជា Role Model ម្នាក់។ ពេល​ដែល​បុគ្គលិក​​ល្អ​របស់​គាត់​កាន់​​ផ្នែក​ហិរញ្ញវត្ថុ​លា​ឈប់ ​គាត់​ជប់​លៀង​ឱ្យ​ គាត់​ផ្តាំ​​ថា ប្អូន​ពេល​ប្អូន​ចេញ​ទៅ​កន្លែង​ផ្សេង ប្អូន​ត្រូវ​ធ្វើ​ឱ្យ​បាន​ល្អ​ជាង​នេះ​​ទៀត។ ចំណុច​នេះ ខ្ញុំ​ចង់​ស្រក់​ទឹកភ្នែក ខ្ញុំ​មិន​ដែល​ជួប​ថ្នាក់​ដឹកនាំ​ណា​ ធ្វើ​ល្អ​បែប​នេះ​ទេ ​សូម្បី​ខ្ញុំ​ក៏​ធ្វើ​មិន​បាន​ដែរ ព្រោះ​នៅ​ពេល​បុគ្គលិក​ល្អ​ចេញ យើង​ភាគ​ច្រើន​តែង​តែ​ខឹង ឬ​អន់​ចិត្ត។ លោក​​បន្ត​ថា ប្អូន​ចេញ​ទៅ ត្រូវ​ធ្វើ​ឱ្យ​ល្អ​ជាង​នេះ​ទៀត បើ​ប្អូន​ធ្វើ​ល្អ នោះ​ជា​កិត្តិយស​របស់​ក្រុមហ៊ុន លី ហួរ ព្រោះ​បាន​បណ្តុះ​បណ្តាល​មនុស្ស​បាន​ល្អ។ លើស​ពី​នោះ គាត់​បាន​ហៅ​កូន​ស្រី​គាត់..សុភារី (ឧកញ៉ា លី សុភារី) កូន​យក​សោរ​ផ្ទះ​មក..គាត់​ឱ្យ​ផ្ទះ​មួយ​ល្វែង​ថែម​ទៀត​ ជាង​១០​ម៉ឺន​ដុល្លារ។ ពិត​ជា​អស្ចារ្យ​ណាស់ ខ្ញុំ​ពិត​ជា​មិន​ដែល​ធ្លាប់​ជួប​មែន”។ បណ្ឌិត តាន់ មុនីវណ្ណ បាន​បន្ថែម។

ទង្វើខាង​លើ​នេះ បណ្ឌិត តាន់ មុនីវណ្ណ ​​យល់​ថា​នេះ​ហើយ​ ដែល​ហៅ​ថា “ទុក​ទៅ..កំពង់នៅ​”។ នេះ​ហើយ​ជា​ចំណុច​ដែល​យើង​គួរ​​ធ្វើ​តាម ​​បាន​ន័យ​ថា​ ទង្វើ​របស់​ថ្នាក់​ដឹក​នាំ​របៀប​នេះ​ គឺ​ធ្វើ​ឱ្យ​​​អ្នក​ដែល​នៅ​ជាមួយ​ក្រុមហ៊ុន​បន្ត​ ​​គឺ​កាន់​តែ​មាន​ជំនឿ​ចិត្ត​លើ​ថ្នាក់​ដឹក​នាំ​មួយ​កម្រិត​ថែម​ទៀត ហើយ​ចំណុច​នេះ ក៏​ជា​ចំណុច​ដែល​លោក​​រៀនសូត្រ​តាម។

​សូមជម្រាបជូនថា ​​អ្នកឧកញ៉ា លី ហួរ ជាមហាសេដ្ឋីមួយរូប​នៅកម្ពុជា ​​​​ដែល​​កាន់​កាប់​ក្រុមហ៊ុន​បុត្រសម្ព័ន្ធ​ជា​ច្រើន​ដូចជា ក្រុមហ៊ុន លី ហួរ អ៉ិចឆេង, ក្រុមហ៊ុនសេវាបញ្ចាំ លីហួរ ផនសប, បុរីវិមានភ្នំពេញ ទាំង ១០គម្រោង​នៅក្នុងរាជធានីភ្នំពេញ, លី ហួរ លីស៊ីស ក្រុមហ៊ុនជួល លក់ និងផ្តល់ឥណទានសម្រាប់​ទិញ​រថយន្ត, ក្រុមហ៊ុនសេវាកម្មវេលុយទូទាំងប្រទេស លី ហួរ ផេប្រ៉ូ(លីហួរវេលុយ), ក្រុមហ៊ុនធនារ៉ាប់រង លី ហួរ, ក្រុមហ៊ុនវិនិយោគចម្រុះក្នុងផ្នែកកសិ-ឧស្សាហកម្ម ទេពី​អាហ្គ្រូ​ ដូចជា ដំណាំកៅស៊ូ និងគ្រាប់ស្វាយចន្ទី​ និងធនាគារ SBI លី ហួរ ជាដើម៕

The post បណ្ឌិត តាន់ មុនីវណ្ណ សរសើរអ្នកឧកញ៉ា លី ហួរ រឿងម្យ៉ាង ថាគ្មាននរណាអាចធ្វើដូច appeared first on .

អនុប្រធាន​សភា​ពាណិជ្ជកម្មកម្ពុជា​​រូប​នេះ ​​បាន​លើក​ឡើង​ក្នុងកម្មវិធីតម្រង់ទិស​ជំនាញសិក្សា​និងការងារ នៅវិទ្យាស្ថានតេជោសែន សាធារណការ និងដឹកជញ្ជូន សម្រាប់​សិស្ស​និស្សិត​ប្រមាណ ៥០០​នាក់ ​​កាលពី​ថ្ងៃទី​០៦ ខែកុម្ភៈ ឆ្នាំ២០២២ ថា លោក​មាន​៨​ចំណុច ​​ដើម្បី​ចែក​រំលែក​ដល់​​​សិស្ស​និស្សិត​ ហើយ​ជា​រឿង​ដែល​យុវជន​ត្រូវ​ធ្វើ ដូច​ខាង​ក្រោម៖

១. ហ៊ានអភិវឌ្ឍខ្លួនលើចំណេះដឹង៖ កុំអាលស្តាប់អ្នកជោគជ័យខ្លាំងពេក នាំឱ្យបែកអារម្មណ៍ ប៉ុន្តែត្រូវផ្តោត​លើ​ការ​សិក្សា​អភិវឌ្ឍ​ខ្លួន​ ឱ្យ​មាន​ចំណេះ​ដឹង​ច្បាស់​លាស់​សិន។

២. ត្រូវចាប់យកមុខវិជ្ជាណាមួយឱ្យបានច្បាស់លាស់៖ មនុស្សម្នាក់​យ៉ាង​ហោចណាស់ ក៏​មានជំនាញ​មួយ​ច្បាស់ដែរ ដូច្នេះ​បើ​ដឹង​ថា​ខ្លួន​ពូកែ​មុខ​វិជ្ជា​អ្វី គួរ​តែ​ចាប់​​​យក​មុខវិជ្ជា​នោះ​ឱ្យ​បាន​ច្បាស់​លាស់។

៣. ត្រូវដាក់ទិសដៅរបស់ខ្លួន៖ តើ​អនាគត​ខ្លួន​ចង់ក្លាយជាអ្វី? ជាមន្ត្រីរាជការ សហគ្រិនភាព ឬបុគ្គលិក​វិស័យឯកជន? ជាពិសេស​ ត្រូវ​ចេះ​សិក្សា​ស្វែង​យល់​ពី​គោលនយោបាយ​របស់​រាជរដ្ឋាភិបាល និង​សម្រួច​ខ្លួន​ទៅ​តាម​គោលនយោបាយ​នោះ។

៤. ត្រៀមខ្លួនសម័យបដិវត្តន៍ឧស្សាហកម្ម ៤.០៖ ត្រូវយល់ដឹងពីបច្ចេកវិទ្យាទំនើបៗឱ្យបានច្រើន ទាក់​នឹង​​​បរិបទ​ការងារ​ថ្មី ដែល​ប្រើប្រាស់​បច្ចេកវិទ្យា​ជំនួយ។

៥. ត្រូវចេះ IT និងភាសាអង់គ្លេស៖ ចំណេះដឹង​ទាក់ទង​នឹង​​ Computer និង​ភាសាអង់គ្លេស ជា​អ្វី​ដែល​មិន​អាច​ខ្វះ​បាន សម្រាប់​មនុស្ស​សម័យ​ថ្មី ដូច្នេះ​ត្រូវ​តែ​ខិត​ខំ​សិក្សា​ឱ្យ​បាន​ជ្រៅ​ជ្រះ ឬ​អាច​ប្រើ​ការ​បាន។ ​

៦. ត្រូវចេះសិក្សាជាក្រុម និងរៀនរបៀបធ្វើការជាក្រុម៖ នៅ​បរទេស​ គេ​ចូល​ចិត្ត​ធ្វើ​ជា​ការ​ក្រុម ព្រោះ​វា​អាច​បានលទ្ធផលខ្ពស់ ប៉ុន្តែ​​​បរិបទ​កម្ពុជា​លោក​យល់​ឃើញ​ថា មនុស្ស​ដូច​ជា​ពិបាក​ពេល​ធ្វើការ​ជាក្រុម ដូច្នេះ​យុវជន​សម័យ​ថ្មី​ ត្រូវ​អភិវឌ្ឍ​ខ្លួន​ និង​ត្រូវ​រៀន​សម្រប​ខ្លួន​​ ឱ្យ​ចេះ​ធ្វើការ​ជា​ក្រុម។

៧. ត្រូវមានមនុស្សម្នាក់​ជា​និមិត្ត​រូប​ (Idol) ដើម្បីធ្វើគម្រូតាម៖ មនុស្ស​ជោគជ័យ​ម្នាក់ តែង​​មាន​មនុស្ស​អស្ចារ្យ​ម្នាក់​​​​ជា​និមិត្ត​រូប ​​បើ​មិន​មាន​ទេ នោះ​មាន​ន័យ​ថា​ យើង​គ្រាន់​តែ​​ជា​មនុស្ស​សាមញ្ញ ​គ្មាន​ការ​ខិត​ខំ និង​គ្មាន​ការ​ប្តេជ្ញា​ចិត្ត​នោះ​ទេ។

៨. ត្រូវចេះថែរក្សាសុខភាពរបស់ខ្លួនឱ្យបានល្អ៖ សុខភាព​ នៅ​តែ​ជា​រឿង​សំខាន់ ទោះ​បី​ថ្នាក់​ដឹកនាំ​កំពូលៗ​​ក៏​តែង​គិត​ពី​សុខភាព​ និងថែ​ទាំ​​កាយ​សម្បទារ​ឱ្យ​បាន​មាំមួន​ផង​ដែរ ដូច្នេះ​ក្នុងនាម​យុវជន មិន​អាច​ប្រងើយ​កន្តើយ​មិន​គិត​ពី​សុខភាព​របស់​ខ្លួន​នោះ​ទេ។

សូមបញ្ជាក់ថា បណ្ឌិត​​ តាន់ មុនីវណ្ណ ​​​កើត​ឆ្នាំ​១៩៧៣​ ហើយ​ម្តាយ​​​បាន​ស្លាប់​​នៅ​សម័យ​ប៉ុលពត ​ខណៈ​ដែល​លោក​​រស់​នៅ​តែលតោល​ ក្នុង​ស្ថានភាព​លំបាក​​​ជា​ច្រើន​ឆ្នាំ។ ប៉ុន្តែ​​ដោយសារ​ការ​ខិតខំ​ប្រឹង​ប្រែង​​ប្តេជ្ញា​ចិត្ត​ក្នុង​ការ​រៀនសូត្រ លោក​បាន​បញ្ចប់​ការសិក្សា​​ជា​ច្រើន​ដូចជា បរិញ្ញាបត្រ​ច្បាប់, អនុបណ្ឌិត​ ចំនួន​២ ​ផ្នែក (គ្រប់គ្រង និង​ធុរកិច្ចរដ្ឋបាល) និង​បណ្ឌិត​ ចំនួន​២ ផ្នែក (ច្បាប់ និង​ធុរកិច្ចរដ្ឋបាល)។

បច្ចុប្បន្ន​ បណ្ឌិត​​ តាន់ មុនីវណ្ណ មាន​​តួនាទី​ក្នុង​សង្គម​ជា​ច្រើន​ដូចជា ​អនុប្រធាន​សភា​ពាណិជ្ជកម្ម​កម្ពុជា សមាជិក​ក្រុមប្រឹក្សា​ពាណិជ្ជកម្ម​កម្ពុជា-ថៃ សមាជិក​ក្រុមប្រឹក្សា​ពាណិជ្ជកម្ម​ចិន-អាស៊ាន សមាជិក​ក្រុមប្រឹក្សាភិបាល​សមាគម​ពាណិជ្ជកម្ម​អាស៊ីអាគ្នេយ៍ សមាជិក​ក្រុមប្រឹក្សា​ពាណិជ្ជកម្ម​អាស៊ាន​ឥណ្ឌា សមាជិក​សមាគម​អ្នក​សាងសង់​អាស៊ាន ទី​ប្រឹក្សា​ជាន់​ខ្ពស់​នៃ​សមាគម​អភិវឌ្ឍន៍​លំនៅដ្ឋាន​ អគ្គលេខាធិការ​សមាគម​អ្នក​សាងសង់​កម្ពុជា ទី​ប្រឹក្សា​ភិបាល​​សមាគម​ស្ត្រី​កម្ពុជា​ ក្រុមប្រឹក្សា​បណ្តុះ​បណ្តាល​ថ្នាក់​ជាតិ​នៃ​ទីស្តី​ការ​គណៈរដ្ឋមន្ត្រី​ សមាជិក​មេធាវី នៃ​​គណៈ​មេធាវី​កម្ពុជា។ ​រីឯតួនាទីឯកជន លោក​គឺជា​អគ្គនាយករង​ក្រុមហ៊ុន ម៉ុង ឫទ្ធី គ្រុប និង​ជាម្ចាស់​​ក្រុមហ៊ុន​ចំនួន​១០ ផងដែរ៕

The post កូនប្រសារអ្នកឧកញ៉ា ម៉ុង ឫទ្ធី ផ្តាំយុវជនឱ្យធ្វើរឿង៨ចំណុច កុំទាន់ស្តាប់អ្នកជោគជ័យច្រើនពេក appeared first on .