កាលពីព្រឹកថ្ងៃទី១៩ ខែកុម្ភៈ ឆ្នាំ២០២៥ ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ និងជាអនុប្រធានអចិន្ត្រៃយ៍គណៈកម្មាធិការជាតិអភិវឌ្ឍន៍ទេសចរណ៍ និងឯកឧត្តម វ៉ី សំណាង អភិបាល នៃគណៈអភិបាលខេត្ត បានអញ្ជើញជាគណៈអធិបតី ក្នុងកិច្ចប្រជុំត្រៀមរៀបចំព្រឹត្តិការណ៍បុណ្យទន្លេលើកទី៩ ឆ្នាំ២០២៥។ ជាលទ្ធផល នៃកិច្ចប្រជុំនេះបានសម្រេចដាក់ចេញនូវកីឡាចំនួន ១០ប្រភេទ ដូចខាងក្រោម៖

១.កីឡា ជិះកង់ ចម្ងាយ ៧៥គីឡូម៉ែត្រ ភ្នំពេញ-តាកែវ

២.កីឡា រត់កម្សាន្តមហាជន ៥០០នាក់

៣.កីឡា អុកចត្រង្គ មហាជន

៤.កីឡា កម្សាន្ត រែក បាយខុម លោតម៉ឹក

៥.កីឡា បាល់ទះ មហាជន

៦.កីឡា ប៉ូល (បេតង់) មហាជន

៧.កីឡា ទូក កានូ កាយ៉ាក មហាជន

៨.ការបង្ហោះគោមរួមគ្នា ៥០០គោម

៩.កីឡា គុនខ្មែរ

១០.កីឡា សម្ដែង ប៉ារ៉ាប៉ូទ័រ

សូមជម្រាបជូនថា បុណ្យទន្លេបានរៀបចំឡើងឆ្លាស់វេនតាមបណ្តាខេត្តនានា ដោយបុណ្យទន្លេលើកទី១ ប្រារព្ធនៅខេត្តក្រចេះ ក្នុងឆ្នាំ២០១៥ ។ លើកទី២ ប្រារព្ធនៅខេត្តកំពង់ចាម និងខេត្តត្បូងឃ្មុំ ក្នុងឆ្នាំ២០១៦។ លើកទី៣ ប្រារព្ធនៅខេត្តស្ទឹងត្រែង ក្នុងឆ្នាំ២០១៧។ លើកទី៤ ប្រារព្ធនៅក្រុងតាខ្មៅ ខេត្តកណ្តាល ក្នុងឆ្នាំ២០១៨។ លើកទី៥ ប្រារព្ធនៅខេត្តកំពង់ឆ្នាំង ក្នុងឆ្នាំ២០១៩។ លើកទី៦ បានរៀបចំនៅខេត្តបាត់ដំបង ក្នុងឆ្នាំ២០២០។ រីឯឆ្នាំ២០២១ និងឆ្នាំ២០២២ កម្ពុជា មិនបានប្រារព្ធទេដោយសារវិបត្តិកូវីដ-១៩។ ចំណែកបុណ្យទន្លេលើកទី៧ ប្រារព្ធឡើងវិញនៅខេត្តកំពង់ធំ ក្នុងឆ្នាំ២០២៣ និងលើកទី៨ ប្រារព្ធនៅខេត្តសៀមរាប ក្នុងឆ្នាំ២០២៤៕

The post ក្រសួងទេសចរណ៍ ដាក់ចេញកីឡាចំនួន ១០ប្រភេទ សម្រាប់ព្រឹត្តិការណ៍បុណ្យទន្លេលើកទី៩ ឆ្នាំ២០២៥ នៅខេត្តតាកែវ appeared first on .

មន្ទីរទេសចរណ៍ខេត្តសៀមរាប បានបង្ហាញស្ថិតិអ្នកទេសចរចូលរួមកម្សាន្តក្នុងពិធីបុណ្យទន្លេលើកទី៨ នៅខេត្តសៀមរាប ដោយនៅថ្ងៃទី១ នាថ្ងៃទី១៥ ខែមីនា ទេសចរសរុបប្រមាណ ១៦១.២៧២ នាក់ ថ្ងៃទី២ នាថ្ងៃទី១៦ មានទេសចរសរុបប្រមាណ ២៩៦.២៧៩ នាក់។ ចំណែកថ្ងៃទី៣ នាថ្ងៃទី១៧ មានទេសចរសរុបប្រមាណ ៩៦.២៤៣ នាក់ ក្នុងនោះទេសចរជាតិ ប្រមាណ ៨៥.០០០ នាក់ និងទេសចរបរទេស ប្រមាណ ១១.២៤៣ នាក់។

ក្នុងពិធីបើកបុណ្យទន្លេលើកទី ៨ ក្រោមប្រធានបទ «ទន្លេដើម្បីសន្តិភាព និង ការអភិវឌ្ឍ» កាលពីល្ងាចថ្ងៃទី១៦ខែមីនា សម្តេចធិបតី ហ៊ុន ម៉ាណែត នាយករដ្ឋមន្រ្តី មានប្រសាសន៍ថា គោលបំណងនៃពិធីបុណ្យទន្លេ គឺដើម្បីជំរុញលើកតម្លៃ និងផ្សព្វផ្សាយសក្តានុពលទេសចរណ៍ខេត្តនានា តាមដងទន្លេ ជាពិសេស លើកទឹកចិត្តដល់ប្រជាជន នៅតាមបណ្តាខេត្តទាំងនោះ ឱ្យចូលរួមយ៉ាងសកម្ម ក្នុងការអភិវឌ្ឍទីក្រុងជាប់ដងទន្លេ និងការងារអភិវឌ្ឍទេសចរណ៍សហគមន៍។

សម្តេចធិបតីថ្លែងថា បុណ្យទន្លេមានតួនាទីយ៉ាសំខាន់ ដើម្បីបំផុសចលនាមហាជនឱ្យចូលរួមក្នុងការអភិរក្ស និងអភិវឌ្ឍន៍ធនធានទន្លេប្រកបដោយនិរន្តរភាព និងចូលរួមសម្រេចយុទ្ធសាស្រ្តពិពិធកម្មទេសចរណ៍ឱ្យកាន់តែសំបូរបែប ទាក់ទាញភ្ញៀវទេសចរឱ្យមកទស្សនាកម្ពុជា ឱ្យបានកាន់តែច្រើនថែមទៀត។

សូមជម្រាបជូនថា រាជរដ្ឋាភិបាលបានកំណត់យកខេត្តសៀមរាប ជាប៉ូលសេដ្ឋកិច្ចដ៏សំខាន់ដែលមានលក្ខណៈពហុវិស័យ ក្នុងចំណោមប៉ូលទាំង៥ សម្រាប់ទ្រទ្រង់សេដ្ឋកិច្ចទៅក្នុងសៀមរាប និងខេត្តដទៃទៀត ជាពិសេស វិស័យទេសចរណ៍ តាមរយៈការទាក់ទាញពីសក្តានុពលពីខេត្តសៀមរាប តភ្ជាប់ទៅកាន់សក្តានុពល និងគោលដៅទេសចរណ៍សំខាន់ៗដទៃទូទាំងប្រទេស ដែលតម្រូវឱ្យដាក់ចេញនូវវិធានការណ៍ពិសេស និងគន្លឹះក្នុងការទាក់ទាញក្នុងឆ្នាំ២០២៤ សម្រាប់កម្ពុជា ដោយកម្ពុជាបានដាក់ចេញនូវយុទ្ធនាការ “ទស្សនាសៀមរាប ឆ្នាំ២០២៤” និងត្រូវបានប្រកាស កាលពីថ្ងៃទី១៣ ខែវិច្ឆិកា ឆ្នាំ២០២៣ ក្នុងវេទិការដ្ឋាភិបាល-ឯកជន លើកទី១៩ នៅវិមានសន្តិភាព ដោយមានវិធានការចំនួន ៨ ក្នុងការស្តារវិស័យទេសចរណ៍ខេត្តសៀមរាបរួមមាន៖ ១. ការរៀបចំឡើងវិញក្រុមប្រឹក្សាទេសចរណ៍ ២. ការរៀបចំ និងដាក់ចេញផែនការសកម្មភាពជាក់លាក់ “ទស្សនាសៀមរាប ឆ្នាំ២០២៤” ៣. រៀបចំបដិសណ្ឋារកិច្ចតាមច្រកព្រំដែន ៤. ការពង្រីកវិសាលភាពបណ្ណព្រំដែន ៥. ការផ្ដល់ហិរញ្ញប្បទានដល់ប្រតិបត្តិករទេសចរណ៍នៅខេត្តសៀមរាប ៦. ការលើកទឹកចិត្តផ្នែកពន្ធដារ ៧. លើកលែងការពិន័យអន្តរការណ៍ជាប្រាក់ចំពោះការហួសសុពលភាពអាជ្ញាបណ្ណមគ្គុទ្ទេសក៏ទេសចរណ៍ និងអ្នកបកប្រែភាសាបន្តពីមគ្គុទ្ទេសក៏ទេសចរណ៍ និងទី៨. ការតភ្ជាប់ជើងហោះហើរដោយត្រង់ពីគោលដៅទេសចរណ៍ល្បីមកសៀមរាប៕

The post ៣ថ្ងៃពិធីបុណ្យទន្លេនៅខេត្តសៀមរាបទទួលបានភ្ញៀវទេសចរណ៍សរុបជាង៥សែននាក់ appeared first on .

ពិធីបុណ្យទន្លេលើកទី៧ នៅខេត្តកំពង់ធំ គឺប្រព្រឹត្តទៅរយៈពេល៣ថ្ងៃ ចាប់ពីថ្ងៃទី៨-១០ ខែមីនា ឆ្នាំ២០២៣ ក្រោមប្រធានបទ «ទន្លេរបស់យើង ដើម្បីបច្ចុប្បន្ន និងអនាគត (Our River for Now and Next)» ប៉ុន្តែប្រជាជនបានមកទស្សនាកម្សាន្តបណ្ដើរៗមុនថ្ងៃចាប់ផ្ដើមព្រឹត្តិការណ៍ទៅទៀត។

លោកប្រធានមន្ទីរទេសចរណ៍ខេត្តកំពង់ធំបានថ្លែងថា «ចំនួន​ប្រជាពលដ្ឋចូលរួមថ្ងៃទី៧ មានប្រមាណ១៨,៥០០នាក់ និងថ្ងៃទី៨ មានប្រមាណ៣៨៥,០០០នាក់ សរុប៤០៣,៥០០នាក់»។

លោក ថោង ខុន រដ្ឋមន្ត្រីក្រសួងទេសចរណ៍ បានបញ្ជាក់ថា នៅក្នុងព្រឹត្តិការណ៍ទេសចរណ៍ដ៏ធំមួយនេះ គឺមានការតាំងពិព័រណ៍សមិទ្ធផល មហោស្រពម្ហូបអាហារ និងភេសជ្ជៈ និងការតាំងពិព័រណ៍កសិទេសចរណ៍ ផលិតផលសហគ្រាសធុនតូចនិងមធ្យម ផលិតផលខ្មែរ ផលិតផលកសិកម្ម និងផលិតផលរបស់សហគមន៍ សរុបចំនួន៣០០ស្តង់។ ការរៀបចំពិព័រណ៍នេះ គឺជាការរួមចំណែកមួយក្នុងការប្រើប្រាស់ឱ្អស់លទ្ធភាពនៃវិស័យទេសចរណ៍ ដែលត្រូវបានចាត់ទុកថាជាការនាំចេញនៅនឹងកន្លែង ក្នុងការគាំទ្រដល់ការអភិវឌ្ឍវិស័យកសិកម្ម ពិសេសការបង្កើតឱកាសការងារសម្រាប់កសិករ សិប្បករ និងអ្នកផលិតតាមរយៈទីផ្សារទេសចរណ៍។

ក្រៅពីនេះ មានការសម្តែងទស្សនីយភាពសិល្បៈចម្រុះបុរាណ-សម័យ ដែលមានការចូលរួមពីសិល្បករ-សិល្បការនីជាតិ និងថ្នាក់ក្រោមជាតិ ព្រមទាំងមានសកម្មភាពកីឡាដែលរួមមាន៖ កីឡារត់ប្រណាំងកម្សាន្ត៣គម និង៥គម កីឡាបាល់ទាត់ឆ្នេរខ្សាច់ កីឡាបាល់ទះឆ្នេរខ្សាច់ កីឡាប៉េតង់ ប្រដាល់គុនខ្មែរ កីឡាបាល់ទាត់លើតុ ដែលសកម្មភាពកីឡាទាំងនេះនឹងបង្ហាញអំពីការចូលរួមអបអរសាទរដល់ព្រឹត្តិការណ៍កីឡាស៊ីហ្គេមលើកទី៣២ និងអាស៊ានប៉ារ៉ាហ្គេមលើកទី១២ ឆ្នាំ២០២៣ ដែលនៅសល់តែ៥៧ថ្ងៃទៀតប៉ុណ្ណោះ កម្ពុជាយើងនឹងត្រូវធ្វើជាម្ចាស់ផ្ទះលើកដំបូង។ យ៉ាងណា លោករដ្ឋមន្ត្រីធ្លាប់បង្ហាញការរំពឹងទុកថា រយៈពេល៣ថ្ងៃនៃពិធីបុណ្យទ​ន្លេនៅខេត្តកំពង់ធំនេះ​នឹងទទួលបានភ្ញៀវទេសចរយ៉ាងតិច១លាននាក់៕ អត្ថបទ៖ ពិសី

The post លោក ថោង ខុន រំពឹងថា ភ្ញៀវទេសចរយ៉ាងតិច១លាននាក់ នឹងទៅកម្សាន្តពិធីបុណ្យទ​ន្លេនៅខេត្តកំពង់ធំ appeared first on .

ពិធីបុណ្យទន្លេលើកទី៧ នឹងប្រព្រឹត្តទៅចាប់ពីថ្ងៃទី៨-១០ ខែមីនា ឆ្នាំ២០២៣ ក្រោម​ប្រធានបទ៖ ទន្លេរបស់យើង ដើម្បី​បច្ចុប្បន្ន និងអនាគត (Our River for Now and Next) ក្រោម​កិច្ចសហការរៀបចំរបស់គណៈកម្មការអន្តរក្រសួង ដើម្បីរៀបចំពិធី​​បុណ្យទន្លេលើកទី៧ នៅ​ខេត្តកំពង់ធំ។

ក្នុងកិច្ចប្រជុំរបស់គណៈកម្មការអន្តរក្រសួងដើម្បីរៀបចំពិធីបុណ្យទន្លេលើកទី៧ នារសៀលថ្ងៃទី៣១ ខែមករា ឆ្នាំ២០២៣ លោក ថោង ខុន រដ្ឋមន្ត្រីក្រសួងទេសចរណ៍ បានឱ្យដឹងថា​​ពិធីបុណ្យ​​ទន្លេ​លើក​ទី​៧នេះ គឺមាន គោលបំណងជំរុញលើក​​តម្លៃ និងផ្សព្វផ្សាយសក្តានុពលទេសចរណ៍​​​ខេត្តនានាតាមដង​​ទន្លេ ជាពិសេសលើកទឹកចិត្តដល់ប្រជាជននៅតាមបណ្តា​ខេត្ត​​ទាំង​​នោះ​​​ឱ្យចូលរួមយ៉ាងសកម្មក្នុង​​ការអភិវឌ្ឍទីក្រុង​​ជាប់​​ដងទន្លេ ការងារអភិវឌ្ឍទេសចរណ៍សហគមន៍។

លោក ថោង ខុន បានរំលឹកថា នៅកម្ពុជាមានខេត្តជាច្រើនដែលមានទីក្រុងជាប់​ដងទន្លេ និងសម្បូរដោយ​សក្តានុពល​ទេសចរណ៍វប្បធម៌ កសិទេសចរណ៍ ទេសចរណ៍ជនបទ ទេសចរណ៍ធម្មជាតិ អេកូទេស​​ចរណ៍ ដែលគ្រប់គ្រង​ដោយ​ប្រជាសហគមន៍។

លោក ថោង ខុន ថ្លែងថា «យើងចង់រំលេចឱ្យឃើញពីវប្បធម៌ ប្រវត្តិសាស្ត្រ អរិយធម៌ ធម្មជាតិ ការរស់នៅរបស់ ប្រជា​ជន និងអប់រំដល់ប្រតិបត្តិការទេសចរណ៍ ភ្ញៀវទេសចរ ប្រជាពលរដ្ឋ យុវជន សិស្សានុសិស្សឱ្យ យល់ដឹងពី​​ចំណុច​ទាំង​​អស់នេះ»។

លោក ងួន រតនៈ អភិបាលខេត្តកំពង់ធំ ព្រមជាមួយនឹងរបាយការណ៍ត្រៀមរៀបចំហេដ្ឋារចនា សម្ព័ន្ធនានាក្នុងក្រុង និង​តាម​ដងស្ទឹង ក៏បានជំរុញឱ្យប្រជាពលរដ្ឋចូលរួមក្នុងការសម្អាត អនាម័យ បរិស្ថានតាមផ្ទះសម្បែង ភូមិដ្ឋាននានា ការតុប​តែង​​លម្អតាមគ្រប់គ្រឹះស្ថាន ស្ថានសាធារណៈ និងឯកជន សកម្មភាពកីឡាឱ្យបានច្រើន និងបានចាត់​ឱ្យមន្ទីរអប់រំខេត្ត​សហការរៀបចំក្រុមប្រកួតកីឡា ដើម្បីជំរុញសកម្មភាពឈានឆ្ពោះទៅកាន់ព្រឹត្តិការណ៍ស៉ីហ្គេមនាពេលខាងមុខនោះ។

គួរបញ្ជាក់ថា ពិធីបុណ្យទន្លេឆ្នាំនេះនឹងផ្តល់ជូនសកម្មភាពសំខាន់ៗចំនួន៣ ដូចខាងក្រោម៖ ១. សម្ដែង​ទស្សនីយភាព​សិល្បៈ របាំជនជាតិភាគតិចកួយ ការប្រគុំតន្ត្រី និងការបាញ់កាំជ្រួចអបអរសាទរពិធីបុណ្យទន្ល។ ២. មហោស្រពម្ហូបអាហារខ្មែរ ព្រម​ទាំងការបង្ហាញផលិតផលទេសចរណ៍ និងគម្រោងអភិវឌ្ឍន៍ទេសចរណ៍របស់ខេត្តតាមដងទន្លេ និងការតាំងពិព័រណ៍ ផលិ​ត​ផលសិប្បកម្ម កសិទេសចរណ៍ និងផលិតផលក្នុងស្រុក។ ៣. សកម្មភាពកីឡា ដោយមានការចូលរួមពីសំណាក់​កីឡាករ-កីឡាការនី​ជាតិនិងអន្តរជាតិ។ល។

The post បុណ្យទន្លេនៅខេត្តកំពង់ធំ ផ្ដោតសំខាន់​លើការផ្សព្វ​​ផ្សាយ​​​ពីទេសចរណ៍ វប្បធម៌ ប្រវត្តិសាស្ត្រ បរិស្ថាន កីឡា appeared first on .

លោក ថោង ខុន ក៏អំពាវនាវ និងក្រើនរំលឹកដល់រដ្ឋបាលថ្នាក់ក្រោមជាតិ និងផ្នែកឯកជនក្នុងវិស័យទេសចរណ៍ចូលរួម​ផ្សព្វ​ផ្សា​យ និងអនុវត្តនូវវិធាន​ការនានារបស់រាជរដ្ឋាភិបាល ក្រសួងសុខាភិបាល និងក្រសួងទេសចរណ៍ឲ្យបានខ្ជាប់ខ្ជួន ដើម្បី​​បង្ការការពារ និងរក្សាបាននូវសុវត្ថិភាព ទំនុកចិត្ត និងផ្ដល់ភាពកក់ក្ដៅជូនភ្ញៀវទេសចរដែលធ្វើដំណើរ​​កម្សាន្ត​នៅកម្ពុជា រួមចំណែកក្នុងការជំរុញផ្សព្វផ្សាយ «កម្ពុជា ជាគោលដៅទេសចរណ៍សុវត្ថិភាព និងផ្តល់ភាពកក់ក្តៅ» ។

គួររម្លឹកថា តាំងពី​ឆ្នាំ​ ២០១៥ ​មក​រាជរដ្ឋាភិបាល​តាមរយៈ​ក្រសួង​ទេសចរណ៍​ បាន​ចាប់ផ្ដើម​រៀបចំ​ពិធីបុណ្យ​​ទន្លេ​ ដើម្បី​ជំ​រុញ​​​កំណើន​ទេសចរ​តាម​ដង​ទន្លេ​កម្ពុជា​ឱ្យ​ក្លាយ​ទៅជា​គោលដៅ​ទេសចរណ៍​ប្រកប​ដោយ​ឧត្តមភាព។ ពិធីបុណ្យ​​ទន្លេ​លើក​ទី​៧ ដែល​គ្រោង​រៀបចំ​នៅ​ខេត្ត​កំពង់ធំ​ តាំងពីឆ្នាំ២០២១ បន្ទាប់ពីខេត្តបាត់ដំបង​​ ត្រូវបានលុបចោល២ឆ្នាំជាប់គ្នា ដោយសារ​បារម្ភ​ពី​ការឆ្លង​​រាលដាលនៃជំងឺ​កូវីដ​ ១៩​។

គួរ​បញ្ជាក់ថា ខេត្តកំពង់ធំ​មាន​តំបន់​រមណីយដ្ឋាន​វប្បធម៌​ប្រវត្តិសាស្ត្រ​សំខាន់ៗ​ចំនួន​ ៤ រួមមាន តំបន់​ប្រាសាទ​សំបូរព្រៃ​គុក​​ស្ថិត​នៅ​បណ្តោយ​ស្ទឹងសែន​ក្នុង​ភូមិ- ឃុំ-ស្រុក​សំបូរ ចម្ងាយ ​២៨ ​គីឡូម៉ែត្រ​ភាគ​ឦសាន​នៃ​ទី​រួម​ខេត្ត​,​តំបន់​ប្រាសាទ​គុកនគរ នៅ​ភូមិ​ត្រដក់​ពង ឃុំ​ពង្រ ស្រុក​តាំងគោក មាន​ចម្ងាយ​ ៨៦ ​គីឡូម៉ែត្រ​​ពី​ទី​រួម​ខេត្ត​,​ តំបន់ភ្នំ​សន្ទុក ស្ថិតនៅ​ភូមិ-ឃុំ​កកោះ ស្រុក​សន្ទុក​មាន​ចម្ងាយ​ ១៧ ​គីឡូម៉ែត្រ​ពី​ទីរួម​ខេត្ត និង​តំបន់​រមណីយដ្ឋាន​​បឹងសំរឹទ្ធិ ដែល​មាន​ទីតាំង​ស្ថិតនៅ​ក្នុងភូមិ​ដូង ឃុំ​បល្ល័ង្ក ស្រុក​បារាយណ៍ ខេត្ត​កំពង់ធំ​ ៕ អត្ថបទ៖ ពុធិកា

The post ខេត្តកំពង់​ធំ​ នៅតែ​​ជាម្ចាស់​ផ្ទះបុណ្យ​ទន្លេលើក​ទី៧ នៅ​ឆ្នាំ២​០២៣ ក្រោយខកខាន២​ឆ្នាំជាប់គ្នា appeared first on .