តាមរយៈទំព័រហ្វេសប៊ុកផ្លូវការរបស់លោក ឃឹម ហ្វីណង់ អ្នកនាំពាក្យក្រសួងកសិកម្ម រុក្ខាប្រមាញ់ និងនេសាទ កាលពីថ្ងៃទី២៤ ខែធ្នូ ឆ្នាំ២០២៣ថា ខេត្តបាត់ដំបង ខេត្តបន្ទាយមានជ័យ ខេត្តពោធិ៍សាត់ និងខេត្តប៉ៃលិន គឺជាជង្រុកនៃកសិកផលយុទ្ធសាស្ត្ររបស់កម្ពុជា ដែលបម្រើឱ្យទាំងតម្រូវការសន្តិសុខស្បៀងនៅក្នុងស្រុក និងការនាំចេញទៅកាន់ទីផ្សារនៅលើពិភពលោក។

លោកបន្តថា តំបន់នេះត្រូវបានចាត់ទុកថាជាប៉ូលសេដ្ឋកិច្ចទី៤នៃកម្ពុជា ដែលជាប៉ូលកសិកម្ម និងជាផ្នែកមួយនៃគំនិតផ្តួចផ្តើម«ច្រករបៀងមច្ឆា និងអង្ករ»។

លោកបន្តទៀតថា យ៉ាងហោចណាស់មួយភាគបី(៣៤,៥%)នៃកសិកម្មកម្ពុជាទាំងមូលត្រូវបានផលិតចេញពីខេត្តទាំង៤នេះ ក្នុងនោះ ៩៧%នៃផ្លែក្រូច ៩០%នៃផ្លែមៀន ៧៦%នៃដំណាំពោត សុទ្ធតែចេញពីតំបន់នេះ។ ជាងមួយភាគបួននៃដំណាំស្រូវ ផ្លែទុរេន និងផ្លែប៊ឺ ក៏ត្រូវបានផលិតចេញពីទីនេះផងដែរ។

សូមជម្រាបថា ការដាក់ខេត្តចំនួន៤នេះជាប៉ូលសេដ្ឋកិច្ចទី៤ នៅភាគពាយ័ព្យដោយផ្សារភ្ជាប់នឹងច្រកមច្ឆា និងអង្ករ ដើម្បីកៀរគរវិនិយោគក្នុង និងក្រៅប្រទេស មកចូលរួមជំរុញផលិតកម្មការកែច្នៃ និងការនាំចេញកសិផល វារីវប្បកម្ម និងបសុសត្វទៅកាន់ទីផ្សារចិន និងអន្តរជាតិ។

ប៉ូលសេដ្ឋកិច្ចចំនួន៣ ដែលរាជរដ្ឋាភិបាលកម្ពុជាបានបង្កើតកន្លងទៅ រួមមានប៉ូលសេដ្ឋកិច្ចទី១ នៅភ្នំពេញ ទី២នៅខេត្តព្រះសីហនុ ទី៣នៅខេត្តសៀមរាប និងប៉ូលសេដ្ឋកិច្ចទី៤ គឺខេត្តទាំង៤នៃភាគពាយ័ព្យ៕

The post ខេត្តចំនួន៤នាប៉ែកពាយ័ព្យជាជង្រុកនៃកសិផលយុទ្ធសាស្រ្តរបស់កម្ពុជា ដែលបម្រើឱ្យតម្រូវការសន្តិសុខស្បៀង appeared first on .

ថ្លែងនៅក្នុងវេទិកា the 9th Global Economic Development Forum (GEDF) and Cambodia Business Leaders’ Summit នៅថ្ងៃទី១៩ឧសភា លោក ឈួន ដារ៉ា រដ្ឋមន្រ្តីប្រតិភូអមនាយករដ្ឋមន្រ្តី និងជារដ្ឋលេខាធិការក្រសួងពាណិជ្ជកម្មបានលើកឡើងថា រាជរដ្ឋាភិបាលប្រទេសកម្ពុជា និងរដ្ឋាភិបាលប្រទេសចិនបានជំរុញកិច្ចសហប្រតិបត្តិការកាន់តែស៊ីជម្រៅ មានការលើកកម្ពស់ជាដ៏រាប ដែលកាលពីមុនយើងមានកិច្ចសហប្រតិបត្តិការត្រឹមតែជាមិត្តដែកថែបទេ និងគ្រប់ជ្រុងជ្រោយ ប៉ុន្តែមកដល់ឥឡូវបានតម្លើងកម្រិតជាកិច្ចសហប្រតិបត្តិការត្បូងពេជ្រ ដែលកម្រិតនេះបានលើកឡើងកាលពីខែកុម្ភៈ ឆ្នំា២០២៣ កន្លងមកនេះ ដោយថ្នាក់ដឹកនំាចិននិងសម្តេចតេជោហ៊ុន សែន ក្នុងកំឡុងពេលសម្តេចអញ្ចើញទៅទស្សនៈកិច្ចជាផ្លូវរដ្ឋកន្លងទៅថ្មីៗនេះ។

លោក ឈួន ដារ៉ា មានប្រសាសន៍ថា «ចិនមានការវិនិយោគច្រើននៅកម្ពុជា មានក្នុងវិស័យកាត់ដេរសម្លៀកបំពាក់ និងស្បែកជើង និងឧបករណ៍ឧស្សាហកម្មមួយចំនួន ប៉ុន្តែបើសិនជាធ្វើទៅបានដោយយោងទៅលើពាណិជ្ជកម្មសេរីរវាងកម្ពុជា ចិន ខ្ញុំសូមស្នើរថាអ្នកវិនិយោគចិនអាចងាកមួយផ្នែកតូចទៅរកឧស្សាហកម្មសម្រាប់បម្រើឱ្យការងារដែលយើងហៅថា Food Processing ដែលនៅកម្ពុជាមានសក្តានុពលខ្លំាងហើយយើងអាចនាំចេញទៅខាងក្រៅបានច្រើននិងមានទិសដៅនំាចេញជិត ពិសេសយើងមានប៉ូលសេដ្ឋកិច្ចទី៤មួយ ស្ថិតនៅប៉ែកពាយ័ព្យនៃប្រទេស អ៊ីចឹងទេ យើងអាចទៅវិនិយោគនៅតំបន់ទំាងនោះគឺផ្តល់សក្តានុពលឱ្យច្រើន»។

លោកបន្តថាកម្ពុជាស្វាគមន៍អ្នកវិនិយោគ ពិសេសអ្នកវិនិយោគចិនមកធ្វើការរកស៊ីបន្ថែមទៀតហើយសង្ឃឹមថានឹងបានផលប្រយោជន៍ច្រើន ពីព្រោះយើងឃើញថាអ្នកវិនិយោគចិនទំាងឡាយដែលមកវិនិយោគនៅកម្ពុជាគឺភាច្រើនតែងតែបានផលប្រយោជន៍ មិនមានការខាតបង់ហើយរត់ចេញទៅវិញនោះទេ មានតែការពង្រីកមុខរបរជាបន្តបន្ទាប់។នេះបង្ហាញថាបានផ្តល់ផលប្រយោជន៍ ពិសេសផ្តល់ផលប្រយោជន៍ទំាងសងខាងរវាងកម្ពុជានិងចិន។

លោក បញ្ជាក់ថា នេះបញ្ជាក់ឱ្យឃើញថាពាណិជ្ជករចិនប្រុងមកធ្វើការវិនិយោគឬធ្វើពាណិជ្ជកម្មនៅកម្ពុជា ពិតជាមានលក្ខណៈអំណោយផលកើនឡើងជាលំដាប់ បើប្រៀបធៀបទៅនិងបណ្តាប្រទេសផ្សេងៗយើងឃើញថាចិនមានសក្តានុពលទំាងដើមទុនវិនិយោគក៏ដូចជាកិច្ចការរកស៊ីនៅពេលដែលយើងនាំចូលវត្ថុធាតុដើមពីប្រទេសចិនស្រាប់ ខណៈបច្ចុប្បន្ននេះវិនិយោគិនចិនបានមកវិនិយោគនៅកម្ពុជាមានប្រមាណ៨៥% បន្ទាប់ពីប្រទេសទំាងពីរកិច្ចសហប្រតិបត្តិការទ្វេភាគីកាន់តែល្អ។

សូមបញ្ជាក់ថា ទំហំពាណិជ្ជកម្មសរុបកម្ពុជា-ចិនក្នុងឆ្នាំ២០២២ សម្រេចបានទំហំទឹកប្រាក់ប្រមាណ ១១ ៦៨៦ លានដុល្លារអាម៉េរិក កើនឡើង៥% ធៀបនឹងឆ្នាំ២០២១។ ក្នុងនោះកម្ពុជានាំចេញទៅប្រទេសចិន បានជាង ១ ២៤០ លានដុល្លារអាមេរិក និងនាំចូលពីប្រទេសចិនមកវិញជាង ១០ ៤៤៥ លានដុល្លារអាម៉េរិក៕
អត្ថបទ៖សារេត

The post កម្ពុជា ចង់ឃើញវិនិយោគិនចិនចូលមកបណ្តាក់ទុន វិនិយោគលើផ្នែក Food Processing នៅប៉ូលសេដ្ឋកិច្ចទី៤ appeared first on .

លោកឧកញ៉ាលឹមហេង អនុប្រធានសភាពាណិជ្ជកម្មកម្ពុជាមានប្រសាសន៍ថា ប៉ូលសេដ្ឋកិច្ចទី៤ជាប៉ូលសេដ្ឋកិច្ចល្អប្រសើរមួយ ដែលផ្តោតលើវិស័យកសិកម្មមានមច្ឆានិងស្រូវមានគោលដៅនាំចេញអង្ករនេះឯងដែលកន្លងមករាជរដ្ឋាភិបាលបានកំណត់នាំចេញអង្ករឱ្យបាន១លានតោនក្នុងមួយឆ្នំា តែយើងធ្វើមិនទាន់បាន។ ដូច្នេះបើយើងមានប៉ូលសេដ្ឋកិច្ចទី៤ នេះបន្ថែមទៀតខ្ញុំគិតថាមិនយូរទេ យើងអាចឈានដល់នាំចេញអង្ករបាន១លានតោន ឬលើសតាមរយៈប៉ូលសេដ្ឋកិច្ចនេះហើយក៏ដូចជាខាងមច្ឆាយើងនាំចេញបានតិចតួច។ ដូច្នេះបើយើងមានប៉ូលសេដ្ឋកិច្ចថ្មី ជាការលើកទឹកចិត្ត ហើយជាគោលដៅមួយសម្រាប់ទាក់ទាញអ្នកវិនិយោគទំាងក្នុងស្រុកនិងបរទេសឱ្យវិនិយោគនៅក្នុងប្រទេស។

លោកឧកញ៉ា លឹម ហេង សង្កត់ធ្ងន់ថា«ខ្ញុំគិតថាប៉ូលសេដ្ឋកិច្ចទី៤នេះឬការកំណត់ឡើងនេះជាផលប្រយោជន៍រួមសម្រាប់ប្រទេសកម្ពុជា។កសិផលនិងវត្ថុធាតុដើមក្នុងស្រុកជាច្រើនដែលមិនទាន់បានកែច្នៃឱ្យអស់លទ្ធភាពហើយកំពុងខ្វះទីផ្សារនាំចេញ ស្របពេលការអនុវត្តកិច្ចព្រមព្រៀងពាណិជ្ជកម្មសេរីជាមួយចិននេះនឹងធ្វើឱ្យការនាំចេញនឹងមានភាពល្អប្រសើរសម្រាប់កម្ពុជា»។

អ្នកឧកញ៉ា លី ឃុនថៃ ប្រធានក្រុមប្រឹក្សាភិបាលសមាគមផលិតស្បែកជើងនៅកម្ពុជាមានប្រសាសន៍ថាប៉ូលសេដ្ឋកិច្ចទី៤ ខ្ញុំគិតថាវាផ្តល់អត្ថប្រយោជន៍ជាច្រើនដល់សេដ្ឋកិច្ចប្រទេសកម្ពុជា,លំហូរចូលនៃការវិនិយោគ,ជំរុញការនាំចេញនាំចូលឱ្យមានកំណើនល្អ ពិសេសបើកទីផ្សារកាន់តែធំទូលាយ។
អ្នកឧកញ៉ាសង្កត់ធ្ងន់ថា«ប៉ូលសេដ្ឋកិច្ចទី៤នេះនៅពេលខាងមុខនិងលេចចេញជារូបរាងយើងជឿថាការប្តេជ្ញាចិត្តរបស់ថ្នាក់ដឹកនាំ ថាអាចដំណើរការទៅមុខបានដោយរលូននិងជោគជ័យ ។ប៉ូលសេដ្ឋកិច្ចទី៤នេះជួយធ្វើឱ្យក្តីសង្ឃឹមរបស់យើងកាន់តែល្អទៅពេលខាងមុខ។លើសពីនេះជួយជំរុញការនាំចេញលើគ្រប់វិស័យឱ្យមានការកើនឡើងទ្វេដងនិងថែមទំាងជួយទាក់ទាញអ្នកវិនិយោគមកពីចិននិងពីប្រទេសផ្សេងទៀត»។
ពាក់ព័ន្ធនិងការទាក់ទាញអ្នកវិនិយោគទំាងក្នុងស្រុកនិងបរទេសនេះបើតាមលោកឧកញ៉ាលឹមហេងចង់បានការលើកលែងពន្ធមួយចំនួនពីប្រមុខរាជរដ្ឋាភិបាលដើម្បីផ្តល់ឱកាសឱ្យអ្នកវិនិយោគមានលទ្ធភាពប្រកួតប្រជែងទីផ្សារជាមួយបណ្តាប្រទេសនៅក្នុងតំបន់។
លោកឧកញ៉ា លឹម ហេង មានប្រសាសន៍ថា«ដើម្បីទាក់ទាញអ្នកវិនិយោគក្នុងស្រុកនិងបរទេស បើសិនមានការលើកទឹកចិត្តនិងមានការកំណត់ពីតំបន់ឬប៉ូលសេដ្ឋកិច្ចស្តីពីកសិកម្ម រាជរដ្ឋាភិបាលគួរពិចារណាលើកទឹកចិត្តដើម្បីទាក់ទាញអ្នកវិនិយោគតាមរយៈការលើកលែងពន្ធដូចជាពន្ធកាត់ទុកផ្សេងៗ, ពន្ធលើVATនិងពន្ធនាំចេញ ធ្វើឱ្យយើងអាចប្រកួតប្រជែងក្នុងការនាំចេញនៅថ្នាក់តំបន់ ពិសេសបណ្តាប្រទេសសមាជិកអាស៊ាន ដែលជាប្រទេសនាំចេញផលិតផលកសិកម្ម វត្ថុធាតុដើមនិងការកែច្នៃផ្សេងទៀតដូចកម្ពុជានាំចេញនៅពេលបច្ចុប្បន្ននេះ៕

អត្ថបទ៖សារេត

The post ប៉ូលសេដ្ឋកិច្ចទី៤ កម្ពុជាអាចនាំអង្ករ​បាន១លានតោនក្នុងមួយឆ្នាំ និងជំរុញការនាំចេញគ្រប់វិស័យ appeared first on .

សម្តេចតេជោនាយករដ្ឋមន្រ្តីបានថ្លែងបញ្ជាក់ថា «គម្រោងប៉ូលសេដ្ឋកិច្ចទី៤នេះ ស្ថិតក្រោមគំនិតផ្តួចផ្តើមរបស់សម្តេច និងលោកប្រធានាធិបតីចិន ស៊ី ជីនពីង ដោយផ្តោតលើគម្រោងមច្ឆា និងអង្ករ ដោយសារខេត្តទាំង៤នេះសម្បូរទៅដោយស្រូវ និងត្រី»។

បើតាមសម្តេចតេជោ ខេត្តទាំង៤នេះ ក៏ត្រូវបង្កើនផលិតផលផ្សេងៗទៀតផងដែរដើម្បីចូលរួមជាមួយទីផ្សារតំបន់ និងពិភពលោក។

នៅក្នុងវេទិកាជំរុញពាណិជ្ជកម្មវិនិយោគនិងទេសចរណ៍កម្ពុជា-ចិន កាលថ្ងៃទី១០ខែកុម្ភៈ ឆ្នាំ២០២៣ នៅទីក្រុងប៉េកាំង ប្រទេសចិន សម្តេចតេជោ ហ៊ុន សែន បានធ្វើការណែនាំឲ្យវិនិយោគិនចិនចាប់យកឱកាសបណ្តាក់ទុននៅភូមិភាគពាយព្យប្រទេសកម្ពុជាដែលនឹងត្រូវកំណត់ជាប៉ូលសេដ្ឋកិច្ចទី៤ របស់ប្រទេសដែលគ្របដណ្តប់ លើខេត្តចំនួន៤នេះផងដែរ។

សម្តេចតេជោ ហ៊ុន សែន បានថ្លែងថា៖«ការបង្កើតឡើងច្រករបៀងហៅថា «មច្ឆានិងអង្ករ»ឬហៅសាមញ្ញថា«ត្រីនិងអង្ករ»នៅទិសភាគពាយ័ព្យនៃប្រទេសកម្ពុជា។ សម្តេចចាប់អារម្មណ៍ខ្លាំងណាស់ហើយក្នុងជំនួបជាមួយលោក ស៊ី ជីនពីង ថាសម្តេចមានបំណងដាក់ខេត្តភាគពាយ័ព្យប្រទេសទៅជាតំបន់ ប៉ូសេដ្ឋកិច្ចទី៤។ ការណ៍នេះក៏ព្រោះថា តំបន់នេះជាតំបន់ដែលមានសក្ដានុពលទាំងស្រូវទាំងត្រី ហើយតំបន់នេះក៏មានការវិនិយោគយ៉ាងច្រើនរបស់មិត្តចិនដែលក្នុងនោះមានមានខេត្តចំនួន ៤ ដែលត្រូវបានគ្របដណ្ដប់ជាប៉ូល សេដ្ឋកិច្ចទី៤។

ក្នុងជំនួបជាមួយប្រធានាធិបតីចិននោះ សម្តេចតេជោ ហ៊ុន សែន គូសបញ្ជាក់ប្រាប់លោក ស៊ី ជីនពីងថា កន្លងមកកម្ពុជាមានប៉ូលសេដ្ឋកិច្ច៣រួចមកហើយគឺរាជធានីភ្នំពេញគឺជាប៉ូលសេដ្ឋកិច្ចទីមួយ,ប៉ូលសេដ្ឋកិច្ចទី២របស់កម្ពុជា ជាគឺខេត្តព្រះសីហនុនិងប៉ូលសេដ្ឋកិច្ចទី៣ គឺខេត្តសៀមរាបហើយប៉ូលសេដ្ឋកិច្ចទី៤គ្របដណ្ដប់លើខេត្តចំនួន ៤ គឺខេត្តពោធិ៍សាត់ បាត់ដំបង បន្ទាយមាន ជ័យនិងខេត្តប៉ៃលិន។

សម្តេចតេជោនាយករដ្ឋមន្រ្តីបានបង្ហាញក្តីសង្ឃឹមយ៉ាងមុតមាំថា តំបន់នេះនឹងក្លាយទៅជាតំបន់អភិវឌ្ឍន៍ប្រកបដោយសក្ដានុពល ដែលសម្តេចសង្ឃឹមថាអ្នកវិនិយោគទាំង កម្ពុជាក្តីទាំងមិត្តចិនក្តីអាចចាប់យកឱកាសតំបន់នោះទៅជាតំបន់កែច្នៃឬជាតំបន់វិនិយោគផ្សេងៗទៀតដែលអាចទៅរួច។

គួររម្លឹកបន្ថែមទៀតថា នៅក្នុងជំនួបទ្វេភាគីរវាងសម្តេចតេជោ ហ៊ុន សែន និងលោក លី ខឺឈាង អតីតនាយករដ្ឋមន្រ្តីចិន កាលថ្ងៃទី ១០ ខែកុម្ភៈកន្លងទៅ មេដឹកនាំនៃប្រទេសទាំងពីក៏បានឯកភាពគ្នាសិក្សាបង្កើត(ច្រករបៀងមច្ឆានិងអង្ករ)អភិវឌ្ឍន៍កសិកម្មអេកូឡូស៊ីទំនើប,ពន្លឿនផែនការអភិវឌ្ឍន៍កសិកម្មទំនើបស្វែងរកកិច្ចសហប្រតិបត្តិការកសិកម្មឌីជីថល និងគាំទ្រការធ្វើទំនើបកម្មវារីវប្បកម្ម,ចម្ការត្រូពិកនិងវិស័យសក្តានុពលផ្សេងទៀត។

បើតាមរបាយការណ៍ពីក្រសួងពាណិជ្ជកម្ម ក្នុងប៉ុន្មានឆ្នាំកន្លងមកនេះទំហំពាណិជ្ជកម្មទ្វេភាគីកម្ពុជា-ចិនបានកើនឡើងគួរឲ្យកត់សម្គាល់គឺកើនលឿនជាងទំហំគោលដៅដែលបានកំណត់ដោយរដ្ឋាភិបាលប្រទេសទាំងងពីរ ខណៈនៅឆ្នាំ២០២២កន្លងទៅ តួលេខនៃទំហំពាណិជ្ជកម្មរវាងប្រទេសទាំងពីរមានរហូតទៅដល់ ១៤,៥០០លានដុល្លារអាមេរិកដែលមានកំណើនរហូតដល់១៩ភាគរយ៕

The post សម្តេចតេជោ ហ៊ុន សែន និងប្រធានាធិបតីចិន ផ្តួចផ្តើមបង្កើតប៉ូលសេដ្ឋកិច្ចទី៤នៅកម្ពុជា appeared first on .