នាឱកាសនោះ សម្តេចបាន​ប្រគល់ភារកិច្ចជូនក្រសួងរៀបចំដែនដី នគរូបនីយកម្ម និងសំណង់ ដើម្បីបញ្ចប់ការងារវាស់វែង និងចុះបញ្ជីដីធ្លីជូនប្រជាពលរដ្ឋ ដែលគិតមកដល់បច្ចុប្បន្ននេះការវាស់វែងដីសរុបបាន​ចំនួន ១៣ ៩៥៦ ៤៧៩ ក្បាល​ដី ស្មើនឹង ១០៣ភាគរយនៃក្បាលដីប៉ាន់ស្មាន, ​ចេញបណ្ណបន្ថែម ២លាន ៦សែនបណ្ណ សរុប​ចំនួន ៩ ៦៤១ ៨៥៧បណ្ណ និងចែកវិញ្ញាបនបត្រសម្គាល់ម្ចាស់អចលនវត្ថុ សរុបចំនួន ៨ ៧៦៥ ៤១៩បណ្ណ។

ជាមួយគ្នានេះ សម្តេចធិបតី ហ៊ុន ម៉ាណែត បានថ្លែងដូចនេះថា «ជាលទ្ធផលក្នុងរយៈពេលជិត ៣ឆ្នាំមកនេះ យើងបានវាស់វែងបន្ថែមចំនួន ៦.៣លានក្បាលដី ចឹងសរុបតាំងពីអាណត្តិមុនមកដល់ពេលនេះបាន ១៤លានក្បាលដី, យើងបានចេញបណ្ណបន្ថែម ២.៦លានបណ្ណ សរុបទាំងអស់ជិត ១០លានបណ្ណ ដែលយើងបានចេញ ហើយបានចែកវិញ្ញាបនបត្រសម្គាល់ម្ចាស់អចលនវត្ថុជិត ៩លានបណ្ណ ស្មើនឹង ៨៦%នៃក្បាលដី»។

ជាថ្មីម្តទៀត សម្តេចធិបតី ហ៊ុន ម៉ាណែត ក៏រំពឹងថា ការវាស់វែង ការកំណត់ព្រំដី ការចុះបញ្ជី និងការចែកវិញ្ញាបនបត្រសម្គាល់ម្ចាស់អចលនវត្ថុជូនប្រជាពលរដ្ឋនឹងចប់សព្វគ្រប់នៅចុងឆ្នាំ២០២៧ខាងមុខនេះ ដើម្បីផ្តល់ភាពងាយស្រួលជូនពលរដ្ឋ និងឱ្យប្រជាពលរដ្ឋមានបណ្ណកម្មសិទ្ធក្នុងដៃតែម្តង ដែលនេះជាការប្តេជ្ញាចិត្តរបស់រាជរដ្ឋាភិបាល។

យ៉ាងណាមិញ សម្តេចធិបតី បានបញ្ជាក់បន្ថែមថា យុទ្ធនាការវាស់វែង និងផ្តល់បណ្ណកម្មសិទ្ធិដីធ្លីជូនប្រជាពលរដ្ឋក្នុងក្របខណ្ឌទូទាំងប្រទេស គឺជាយុទ្ធសាស្ត្រគន្លឹះ និងជាអាទិភាពខ្ពស់បំផុតមួយរបស់រាជរដ្ឋាភិបាល ក្នុងគោលបំណងផ្តល់សុវត្ថិភាពផ្លូវច្បាប់លើការកាន់កាប់ដីធ្លី ការពារសិទ្ធិស្របច្បាប់របស់ម្ចាស់កម្មសិទ្ធិ និងកាត់បន្ថយទំនាស់ដីធ្លីនៅតាមមូលដ្ឋានឱ្យបានជាអតិបរមា។ ជាងនេះទៅទៀត សមិទ្ធផលនេះ គឺជាគ្រឹះដ៏រឹងមាំដែលធានាដល់ការគ្រប់គ្រងដែនដី ធ្វើបច្ចុប្បន្នភាពទិន្នន័យសុរិយោដី ការពារទ្រព្យសម្បត្តិសាធារណៈរបស់រដ្ឋ ក៏ដូចជាការទាក់ទាញការវិនិយោគផងដែរ ៕ អត្ថបទ៖ហ្សាលីន

The post សម្ដេចធិបតី រំពឹងថា ការចែកប័ណ្ណកម្មសិទ្ធដីធ្លីនៅទូទាំងប្រទេស នឹងចប់សព្វគ្រប់នៅចុងឆ្នាំ២០២៧ appeared first on .

នាឱកាសនោះ សម្តេចធិបតី ហ៊ុន ម៉ាណែត នាយករដ្ឋមន្ត្រីនៃកម្ពុជា បានថ្លែងថា គិតមកដល់ពេលនេះ ក្រសួងរៀបចំដែនដី នគរូបនីយកម្ម និងសំណង់ កំពុងពន្លឿនការចែកប័ណ្ណកម្មសិទ្ធិដីធ្លីជូនប្រជាពលរដ្ឋ ខណៈបច្ចុប្បន្នចែកបាន២លានក្បាលដីហើយ និងនៅសល់៥លានក្បាលដីទៀតដែលក្រសួងកំពុងជំរុញពន្លឿនជូនប្រជាពលលរដ្ឋ។

សម្ដេចធិបតីបានបន្តថា៖« ដើមឡើយ ប្រជាពលរដ្ឋភាគច្រើនមិនមានកម្មសិទ្ធិដីធ្លីនោះទេ ពួកគាត់មានត្រឹមតែសិទ្ធិកាន់កាប់ ប្រើប្រាស់ អាស្រ័យផលប៉ុណ្ណោះ ដូច្នេះរាជរដ្ឋាភិបាលបានជំរុញកន្លងមកច្រើនហើយដែរ ពិសេសនៅឆ្នាំ២០១១ សម្ដេចតេជោ ហ៊ុន សែន ដែលជាអតីតនាយករដ្ឋមន្ត្រី បានដាក់ចេញគោលនយោបាយវាស់វែងដីធ្លី»។

សម្ដេចធិបតី បានបន្តទៀតថា លោក សាយ សំអាល់ រដ្ឋមន្ត្រីក្រសួងដែនដី បានដាក់ចេញគោលការណ៍យុទ្ធសាស្ត្រ ហើយសម្ដេចធិបតីក៏បានចារឯកភាពផ្ដល់គោលការណ៍រួចហើយដែរ។ទន្ទឹមគ្នានេះ សម្ដេចធិបតី ក៏បានណែនាំឱ្យប្រើប្រាស់កម្លាំងសរុប ទាំងថ្នាក់កណ្ដាល ទាំងថ្នាក់រាជធានី-ខេត្ត ដើម្បីបំពេញកិច្ចការចែកប័ណ្ណកម្មសិទ្ធិដីធ្លីឱ្យប្រជាពលរដ្ឋឱ្យបានលឿន កុំឱ្យកកស្ទះ ដើម្បីប្រជាពលរដ្ឋយកទៅប្រើប្រាស់ផងដែរ។

សូមរម្លឹកដែរថា កាលពីពេលកន្លងទៅ សម្តេចតេជោ ហ៊ុន សែន អតីតនាយកដ្ឋមន្រ្តីកម្ពុជា ក៏ធ្លាប់បានណែនាំដល់ស្ថាប័នពាក់ព័ន្ធទាំងអស់ ត្រូវពន្លឿនការចុះបញ្ជីក្បាលដីជូនប្រជាពលរដ្ឋនៅទូទាំងប្រទេសឱ្យបានសម្រេច១០០ភាគរយ នៅឆ្នាំ២០២៣ ដោយមិនត្រូវពន្យារពេលទៀតឡើយ ដើម្បីជំរុញអភិវឌ្ឍន៍ទីផ្សារដីធ្លីប្រកបដោយប្រសិទ្ធភាពខ្ពស់ កាត់បន្ថយភាពក្រីក្រ ស្ថេរភាពសង្គម និងការអភិវឌ្ឍន៍សេដ្ឋកិច្ចអោយបានប្រសើរឡើង៕ អត្ថបទ៖ រង្សី  

The post នាយករដ្ឋមន្រ្តី ជំរុញឱ្យស្ថាប័នពាក់ព័ន្ធ ពន្លឿនការចែកប័ណ្ណកម្មសិទ្ធិដីធ្លីជូនប្រជាពលរដ្ឋឱ្យបានឆាប់ appeared first on .