តាមរយៈអនុរដ្ឋលេខាធិការ និងជាអ្នកនាំពាក្យ SSCA លោក ស៊ិន ចាន់សេរីវុត្ថា បានមានប្រសាសន៍ថា ក្រុមហ៊ុនអាកាសចរណ៍ទាំងជាតិ និងអន្តរជាតិ បានដំណើរការនៃជើងហោះហើរជិត ៥០ ០០០ជើងទៅកាន់អាកាសយានដ្ឋានអន្តរជាតិទាំងបីរបស់ប្រទេសកម្ពុជា ដោយកើនឡើងចំនួន១៤% ។ លោកបន្ថែមថា កម្ពុជាក៏បានរាយការណ៍ពីការកើនឡើង៣៧% នៃបរិមាណទំនិញដឹកជញ្ជូនតាមផ្លូវអាកាសមានចំនួនដល់ទៅជាង ៦៣ ០០០តោនក្នុងរយៈពេលពីខែមករា ដល់ខែតុលាផងដែរ។

មិនត្រឹមតែប៉ុណ្ណោះ អ្នកនាំពាក្យរូបនេះ បានបង្ហាញទំនុកចិត្តខ្ពស់ថា អាកាសយានដ្ឋានអន្តរជាតិសៀមរាបអង្គរ (SAI) ដែលទើបតែបានដាក់ឲ្យដំណើរការកាលពីអំឡុងខែវិច្ឆិកា ឆ្នាំ២០២៣ នោះនឹងកាន់តែជួយទាក់ទាញក្រុមហ៊ុនអាកាសចរណ៍អន្តរជាតិ ក៏ដូចអ្នកទេសចរ មកកាន់ប្រទេសកម្ពុជាបន្ថែមទៀត។ លោកថា ជាមួយនឹងផ្លូវរត់ប្រវែង ៣ ៦០០ម៉ែត្រ អាកាសយានដ្ឋានអន្តរជាតិ (SAI) កម្រិត 4E អាច​មានសមត្ថភាពចុះចតយន្តហោះស្ទើរតែគ្រប់ប្រភេទទាំងអស់មកពីជុំវិញពិភពលោក។

គួរឲ្យដឹងដែរថា បើតាមទស្សនាវដ្តី Fodor’s Travel ប្រាសាទកោះកេរ ដែលជាប្រាសាទមានវ័យចំណាស់មួយរបស់កម្ពុជា ក៏បានក្លាយជាអ្នកតំណាងតំបន់ទេសចរណ៍ទាំងអស់ក្នុងតំបន់អាស៊ីអាគ្នេយ៍ផងដែរ ត្បិតតែមានប្រាសាទកោះកេរតែមួយគត់ ដែលជាប់ក្នុងបញ្ជីគោលដៅទេសចរណ៍ទាំង ២៥តំបន់ជុំវិញពិភពលោក គួរតែទៅទស្សនាសម្រាប់ឆ្នាំ២០២៥ ខាងមុខ៕

The post ប្រាសាទអង្គរវត្ត ក្លាយជាគោលដៅវប្បធម៌ឈានមុខគេនៅអាស៊ី ខណៈការធ្វើដំណើរតាមយន្តហោះមានជិត ៥លាននាក់ នៅ១០ខែមកនេះ appeared first on .

ព្រះករុណា ព្រះបាទសម្ដេចព្រះបរមនាថ នរោត្តម សីហមុនី មានព្រះរាជឱង្ការរម្លឹកថា ព្រះករុណា ព្រះបរមរតនកោដ្ឋ ព្រះអង្គបានយកព្រះទ័យទុកដាក់ណាស់ ចំពោះការថែរក្សាសម្បត្តិវប្បធម៌ជាតិ ជាពិសេសប្រាសាទអង្គរវត្ត ដែលព្រះអង្គតែងតែនាំភ្ញៀវជាថ្នាក់ដឹកនាំប្រទេសជាច្រើនមាន  ព្រះមហាក្សត្រ-ប្រមុខរដ្ឋ-ប្រធានាធិបតី យាង និងអញ្ជើញមក ទស្សនាប្រាសាទអង្គរវត្តយើងនេះ។ ក្នុងពេលដែលព្រះអង្គនៅគង់ប្រថាប់ជាប្រធានក្រុមប្រឹក្សា ជាតិជាន់ខ្ពស់នៃកម្ពុជា(SNC) និងក្រោយៗមកទៀត ព្រះអង្គនៅតែបន្តនាំភ្ញៀវទៅទស្សនា ប្រាសាទអង្គរវត្តយើងនេះដែរ។

ព្រះមហាក្សត្រ ក៏បានថ្លែងអំណរគុណនិងវាយតម្លៃខ្ពស់ ចំពោះកិច្ចខិតខំប្រឹងប្រែង យកអស់កម្លាំងកាយចិត្តរបស់ដៃគូអភិវឌ្ឍន៍ជាតិ និងអន្តរជាតិ ព្រមទាំងមន្ត្រី បុគ្គលិក ភ្នាក់ងារ ពលករ និងឆ្មាំគ្រប់លំដាប់ថ្នាក់នៃអាជ្ញាធរជាតិអប្សរា ជាពិសេស សម្តេចវិបុលបញ្ញា សុខ អាន ក្រោមការដឹកនាំរបស់សម្តេចតេជោ ហ៊ុន សែន និងថ្នាក់ដឹកនាំជាច្រើនផ្សេងទៀត ដែលយើងមិនអាចបំភ្លេចបាន ចំពោះការលះបង់ពេលវេលា ប្រាជ្ញា ស្មារតី បំពេញភារកិច្ចដឹកនាំដោយការទទួលខុសត្រូវខ្ពស់ ធ្វើឱ្យរមណីយដ្ឋានអង្គរល្បីល្បាញនៅលើពិភពលោក។

ព្រះអង្គបានមានព្រះរាជឱង្ការសង្កត់ធ្ងន់ថា  ជោគជ័យដ៏ត្រចះត្រចង់នេះ ក៏បានបង្ហាញពីការអនុវត្ត និងការបន្តអនុវត្តគោល នយោបាយវប្បធម៌ជាតិដ៏ត្រឹមត្រូវរបស់រាជរដ្ឋាភិបាលកម្ពុជា ក្រោមការដឹកនាំដ៏ប៉ិនប្រសប់ និងឈ្លាសវៃរបស់ សម្តេចតេជោ ហ៊ុន សែន និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្ដ្រី ដែលជានិច្ចកាលតែងយកចិត្ត ទុកដាក់ខ្ពស់ ក្នុងការថែរក្សាការពារ អភិរក្ស និងអភិវឌ្ឍន៍មរតកវប្បធម៌ជាតិ។

ទន្ទឹមនឹងនេះ ព្រះអង្គមានព្រះរាជឱង្ការថា ការប្រារព្ធព្រះរាជពិធីសម្ពោធដាក់ឱ្យប្រើប្រាស់ជាផ្លូវការ «ស្ពានហាលខាងលិចនៃប្រាសាទអង្គរវត្ត» នៅចំពីមុខនៃប្រាសាទអង្គរវត្ត ដែលជាស្នាព្រះហស្ត និងជានិមិត្តរូបដ៏ខ្ពង់ខ្ពស់នៃមហាវីរក្សត្រ សម័យអង្គរ ព្រះបាទសូរ្យវរ្ម័នទី២ គឺជាព្រឹតិ្ដការណ៍ប្រវត្តិសាស្ត្រ មានតម្លៃជាសាកលពិតប្រាកដ។ ទាំងនេះ ពិតជាបានបង្ហាញយ៉ាងច្បាស់អំពីជោគជ័យជាប្រវត្តិសាស្ត្រថ្មីមួយទៀត នៃទំនាក់ទំនងការទូតដ៏ស្អិតល្មួតក្នុងរយៈពេល៧០ឆ្នាំកន្លងមកនេះ រវាងប្រទេសកម្ពុជា និងប្រទេសជប៉ុន ដែលផ្តើមជាផ្លូវការដំបូងក្នុងឆ្នាំ១៩៥៣។

ព្រះមហាក្សត្របានសម្ដែងនូវព្រះទ័យ កោតសរសើរក្រុមការងារបេសកកម្មសាកលវិទ្យាល័យសូហ្វីយ៉ា ដែលជាស្ថាប័នជំនាញជប៉ុន បានមកបំពេញការងារពាក់ព័ន្ធនឹងរមណីយដ្ឋានអង្គរ តាំងពីអំឡុងឆ្នាំ១៩៨៩ មុនការផ្តួចផ្តើមគំនិតដោយ រដ្ឋាភិបាលជប៉ុនក្នុងការបង្កើតអាយស៊ីស៊ី(ICC)អង្គរ នាឆ្នាំ១៩៩៣មកម្ល៉េះ។ ព្រះអង្គបន្ដថា ការចាប់ផ្ដើមការងារ ដំបូងផ្ដោតលើការអភិវឌ្ឍធនធានមនុស្ស ផ្នែកបេតិកភណ្ឌវប្បធម៌នៃកម្ពុជា នៅសាកលវិទ្យាល័យភូមិន្ទវិចិត្រសិល្បៈ និងជាបន្តបន្ទាប់បានចូលរួមដឹកនាំបំពេញការងារបណ្តុះបណ្ដាល និងអភិរក្សដោយផ្ទាល់ជាមួយអ្នកជំនាញកម្ពុជា នៅលើការដ្ឋាននានានៃរមណីយដ្ឋានអង្គរ រួមទាំងការស្ថាបនាសារមន្ទីរ ព្រះនរោត្ដម សីហនុ-អង្គរ កាលពីឆ្នាំ២០០៧ ផងដែរ ។

ព្រះអង្គក៏បានថ្លែងអំណរគុណ និងកោតសរសើរដ៏ស្មោះ ចំពោះប្រទេសជប៉ុន ដែលក្នុងរយៈពេល៣០ឆ្នាំកន្លងមកនេះ ក្នុងនាមជាសហប្រធាន បានដឹកនាំកិច្ចប្រជុំពេញអង្គ និងកិច្ចប្រជុំបច្ចេកទេសអាយស៊ីស៊ី (ICC)  អង្គរ-សំបូរព្រៃគុក ដោយស្មារតី ទទួលខុសត្រូវខ្ពស់ រួមចំណែកយ៉ាងធំធេងដល់ភាពជោគជ័យនៃអាយស៊ីស៊ី (ICC) អង្គរ។

សូមជម្រាបជូនថា ប្រាសាទអង្គរវត្តបានត្រូវបញ្ចូលទៅជាសម្បត្តិបេតិកភណ្ឌ វប្បធម៌ ពិភពលោក នៅថ្ងៃទី១៤ ខែធ្នូ ឆ្នាំ១៩៩២។ ក្នុងវរោឪកាសនោះ ព្រះមហាក្សត្រ ព្រះអង្គមានព្រះទ័យសង្ឃឹមថា ស្មារតីដើម្បីអង្គរ និងវប្បធម៌ជាតិនេះ នឹងនៅស្ថិតស្ថេរ ដើម្បីអនុញ្ញាត ឱ្យអាជ្ញាធរជាតិអប្សរា និងស្ថាប័នវប្បធម៌កម្ពុជាផ្សេងៗទៀត អាចនឹងបន្តដំណើរការល្អ បំពេញភារកិច្ចរបស់ខ្លួន ទទួលបានជោគជ័យដ៏ធំធេងក្នុងការងារអភិរក្សនិងអភិវឌ្ឍ រមណីយដ្ឋានប្រវត្តិសាស្ត្រអង្គរ ព្រមទាំងបេតិកភណ្ឌវប្បធម៌ និងធម្មជាតិពាក់ព័ន្ធផ្សេងៗទៀត សម្រាប់ជាឧត្តមប្រយោជន៍ជូនជាតិមាតុភូមិ និងប្រជារាស្ត្រកម្ពុជា

គួររំម្លឹកដែរថា «ស្ពានហាលខាងលិចប្រាសាទអង្គរវត្ត» ចាប់ផ្តើមជួសជុលឡើងវិញកាលពីអំឡុងឆ្នាំ២០១៦ ក្រោមកិច្ចសហការរវាងអាជ្ញាធរជាតិអប្សរា និងសាកលវិទ្យាល័យសូហ្វីយ៉ា នៃប្រទេសជប៉ុន។ ចាប់តាំងពីឆ្នាំ១៩៨៩មក សាកលវិទ្យាល័យសូហ្វីយ៉ា ប្រទេសជប៉ុន បានចូលរួមចំណែកជាមួយអាជ្ញាធរជាតិអប្សរា ធ្វើសកម្មភាពជាច្រើនជួយដល់មរណីយដ្ឋានអង្គរ ទាក់ទងនិងការបណ្តុះបណ្តាលធនធានមនុស្សផ្នែកបុរាណវិទ្យា និងផ្នែកស្ថាបត្យកម្ម ការធ្វើកំណាយស្រាវជ្រាវនៅប្រាសាទបន្ទាយក្តី កម្មវិធីអប់រំបេតិកភណ្ឌដល់ប្រជាពលរដ្ឋ និងសិស្សានុសិស្សរស់នៅជុំវិញតំបន់អង្គរ ការផ្តួចផ្តើមបង្កើតសារមន្ទីរព្រះនរោត្តមសីហនុអង្គរ ជាដើម៕

The post ព្រះមហាក្សត្រមានព្រះទ័យសង្ឃឹមថា ស្មារតីដើម្បីអង្គរ និងវប្បធម៌ជាតិនេះ នឹងនៅស្ថិតស្ថេរសម្រាប់ជាឧត្តមប្រយោជន៍ជូនជាតិមាតុភូមិ និងប្រជារាស្ត្រកម្ពុជា appeared first on .

គ្រឹះស្ថានអង្គរ បានបញ្ជាក់តាមរយៈសេចក្ដីប្រកាសព័ត៌មាន នៅថ្ងៃទី០១ ខែវិច្ឆិកា ឆ្នាំ២០២៣ថា គិតត្រឹមយៈពេល ១០ខែ ឆ្នាំ២០២៣នេះ កម្ពុជារកចំណូលបានចំនួន ២៧,៨៨២,៤៣៥ដុល្លារអាមេរិក ពីការលក់បណ្ណចូលទស្សនារមណីយដ្ឋានអង្គរ និងមានភ្ញៀវទេសចរបរទេសចំនួនសរុប ៦០២,៥៧០នាក់។

ដោយឡែក សម្រាប់តែខែតុលា ឆ្នាំ២០២៣នេះវិញ គ្រឹះស្ថានអង្គរ រកចំណូលបានចំនួន២,៩២៧,០៣៨ដុល្លារអាមេរិក ពីការលក់បណ្ណជូនភ្ញៀវទេសចរបរទេស ចូលទស្សនារមណីយដ្ឋានអង្គរ ចំនួន៦៣,០០៩នាក់។

ក្នុងរយៈពេល១០ខែ ឆ្នាំ២០២៣នេះ រាជរដ្ឋាភិបាល បានឧបត្ថម្ភមូលនិធិ នៃមន្ទីរពេទ្យគន្ធបុប្ផាកម្ពុជា បានចំនួនសរុប១,២០៥,១៤០ដុល្លារអាមេរិក ពីចំណែកនៃការលក់បណ្ណ ជូនភ្ញៀវទេសចរបរទេស ចូលទស្សនារមណីយអង្គរ ដើម្បីជួយក្នុងមូលនិធិ សម្រាប់សង្គ្រោះជីវិតកុមារកម្ពុជា។នេះបើតាមការបញ្ជាក់បន្ថែមពីគ្រឹះស្ថានអង្គរ។

សូមបញ្ជាក់ដែរថា កាលពីពេលថ្មីៗនេះ ក្រសួងទេសចរណ៍  បានឱ្យដឹងដែរថា សម្រាប់រយៈពេល៨ខែដើមឆ្នាំ២០២៣កន្លងទៅនេះ កម្ពុជាទទួលបានទេសចរអន្តរជាតិប្រមាណ ៣,៥ លាននាក់ កើនឡើង ២៥០,៨% ធៀបនឹងរយៈពេលដូចគ្នាឆ្នាំ២០២២។ ដោយឡែកបើធៀបរយៈពេលដូចគ្នាឆ្នាំ២០១៩ គ្រាមុនវិបត្តិកូវីដ-១៩ យើងឃើញថា ចំនួននេះនៅមានការថយចុះ ១៩,៧% នៅឡើយ ពោលគឺយើងទើបតែទទួលបានទេសចរអន្តរជាតិប្រមាណ ៨០% នៃកម្រិតមុនវិបត្តិ សម្រាប់រយៈពេល៨ខែឆ្នាំ២០២៣នេះ។ តាមការរំពឹងទុក កម្ពុជានឹងទទួលបានទេសចរអន្តរជាតិក្នុងរង្វង់ប្រមាណ៤,៥ លាន ទៅ ៥ លាននាក់សម្រាប់ពេញមួយឆ្នាំ២០២៣នេះ៕ អត្ថបទ៖ ពិសី

The post ១០ខែឆ្នាំនេះ៖ កម្ពុជាបានចំណូលជាង ២៧លានដុល្លារ ពីការលក់បណ្ណចូលទស្សនាអង្គរ ជូនភ្ញៀវទេសចរបរទេស appeared first on .

បើតាមការឱ្យដឹងពីសហភាពសហព័ន្ធយុវជនកម្ពុជា បានឱ្យដឹងថា បេះដូងក្រដាសចំនួន ១លាន ដែលបងប្អូនបានបត់ដោយផ្ទាល់ដៃ គឺជាការបង្ហាញចេញពីទំហំទឹកចិត្ត និងក្ដីស្រលាញ់ ដើម្បីគាំទ្រដល់អត្តពលិកដែលមានពិការភាពនោះ នឹងត្រូវយកទៅធ្វើការបំបែកឯតទគ្គកម្ម «បេះដូងច្រើនជាងគេលើពិភពលោក» នាថ្ងៃទី១១ ខែមេសា ឆ្នាំ២០២៣ វេលាម៉ោង ៤រសៀលតទៅ នៅបរិវេណប្រាសាទអង្គរវត្ត។

ជាមួយគ្នានេះ បើតាមទំព័រហ្វេសប៊ុក របស់យុទ្ធនាការ BeyondTheGames  ក៏បានបង្ហាញដែរថា បេះដូងនីមួយៗ​ ដែលអ្នកបានចូលរួមបត់មានតម្លៃស្មើនឹងថវិកាចំនួន ៥០០ រៀល ដែលថវិកាទាំងនោះនឹងត្រូវបរិច្ចាគដោយដៃគូបរិច្ចាគទាំង៥ របស់យើងទៅកាន់អត្តពលិកដែលមានពិការភាព តាមរយៈគណៈកម្មាធិការជាតិប៉ារ៉ាឡាំពិកកម្ពុជា។ អ្វីដែលពិសេសជាងនេះទៅទៀត ការចូលរួមបត់បេះដូងនេះ បានបង្ហាញអំពី «ភាសាបេះដូង» ដែលមិនអាចកាត់ថ្លៃបានរបស់ប្រជាពលរដ្ឋកម្ពុជាក្នុងការសហការគ្នា ដើម្បីគាំទ្រអត្តពលិករបស់យើង។

បេះដូងក្រដាសចំនួន ១លាន ដែលបេះដូងមួយមានតម្លៃស្មើនឹង ៥០០រៀល មិនត្រឹមតែធ្វើឡើងក្នុងគោលបំណងដើម្បីបំបែកឯតទគ្គកម្មពិភពលោកតែមួយមុខប៉ុណ្ណោះទេ តែបេះដូងនេះគឺតំណាងឱ្យបេះដូងខ្មែរដែលលោតព្រមគ្នាក្នុងចង្វាក់តែមួយសម្រាប់បង្ហាញទៅពិភពលោកឱ្យបានឃើញពីស្មារតី និងទំហំចិត្តរបស់ពលរដ្ឋខ្មែរដែលគាំទ្រដល់កីឡាករខ្មែរដែលមានពិការភាព ហើយក៏ដើម្បីអបអរសាទរកម្ពុជាធ្វើជាម្ចាស់ផ្ទះរៀបចំ ព្រឹត្តិការណ៍កីឡាស៊ីហ្គេម និងប៉ារ៉ាហ្គេម ឆ្នាំ២០២៣ផងដែរ។

ពាក់ព័ន្ធ ការត្រៀមបំបែកឯតទគ្គកម្មពិភពលោកនេះនេះ នៅមុននេះបន្តិច ឯកឧត្តម ហ៊ុន ម៉ានី ប្រធានសហភាពសហព័ន្ធយុវជនកម្ពុជា (ស.ស.យ.ក) ក៏បានទៅទទួលសូមស្វាគមន៍ តំណាងស្ថាប័ន Guinness World Records ដែលបានមកដល់ក្រុងសៀមរាប នាព្រឹកថ្ងៃ ១១ ខែ មេសា ឆ្នាំ ២០២៣ ដើម្បីត្រួតពិនិត្យ និងរាប់ “បេះដូងច្រើនជាងគេលើពិភពលោក” ដែលតាំងបង្ហាញនៅប្រាសាទអង្គរវត្ត ដើម្បីដាក់បញ្ចូលក្នុងការបំបែកឯតទគ្គកម្ម។

ជាមួយគ្នានេះ ឯកឧត្តម ហ៊ុន ម៉ានី ក៏បានបញ្ជាក់ថា នៅសល់ត្រឹមតែប៉ុន្មានម៉ោងទៀតប៉ុណ្ណោះ ការបំបែកឯតទគ្គកម្ម “បេះដូងច្រើនជាងគេលើពិភពលោក” នឹងធ្វើឡើងជាផ្លូវការនាថ្ងៃទី១១ ខែមេសា ឆ្នាំ២០២៣ វេលាម៉ោង ៤រសៀលតទៅ នៅបរិវេណប្រាសាទអង្គរវត្ត ដូច្នេះលោក ក៏សូមអញ្ជើញបងប្អូនប្រជាពលរដ្ឋចូលរួមទាំងអស់គ្នាដើម្បីជាសក្ខីភាពនៃការបំបែកឯតទគ្គកម្មពិភពលោកនេះថែមទៀត។

គួរបញ្ជាក់ដែរថា នៅឆ្នាំ២០២៣ ដែលចំខួប ១០ឆ្នាំនៃព្រឹត្តិការណ៍អង្គរសង្រ្កាន្ត ក្រៅពីរៀបចំបេះដូងក្រដាសដើម្បីបំបែកឯតទគ្គកម្មពិភពលោក កម្ពុជាក៏បានត្រៀមរាំម៉ាឌីហ្សូនដើម្បីបំបែកឯតទគ្គកម្មពិភពលោក Guiness World Records ម្តងទៀតផងដែរ ដោយកាលឆ្នាំ២០១៥ កម្ពុជាបានរាំម៉ាឌីហ្សូនដែលមានអ្នករាំ ២០១៥នាក់សម្រាប់បំបែកឯកត្តកម្មពិភពលោកម្តងរួចមកហើយ។នេះបើតាមការឱ្យដឹងបន្ថែមពី សហភាពសហព័ន្ធយុវជនកម្ពុជា៕ អត្ថបទ៖ ពិសី

The post ដឹងទេថា បេះដូងក្រដាស១លាន ឈរត្រៀបត្រាបង្អួតសម្រស់នៅប្រាសាទអង្គរ មានអត្ថន័យដូចម្តេច? appeared first on .

សេចក្តីសម្រេចចុះហត្ថលេខាដោយសម្តេចតេជោ ហ៊ុន សែន នាយករដ្ឋមន្រ្តី នៅថ្ងៃទី២០ ខែមេសា ឆ្នាំ២០២២ សម្រេចប្រគល់ភារកិច្ចឲ្យលោក អូន ព័ន្ធមុនីរ័ត្ន ឧបនាយករដ្ឋមន្ត្រី រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ ជាប្រធានគណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ លោក ថោង ខុន រដ្ឋមន្ត្រីក្រសួងទេសចរណ៍ ជាអនុប្រធានអចិន្ត្រៃយ៍ និងមានសមាជិកចំនួន ៣៥រូប។

ក្នុងនោះ លោកស្រី ភឿង សកុណា រដ្ឋមន្រ្តី​ក្រសួង​វប្បធម៌ និង​វិចិត្រ​សិល្បៈ​ លោក សាយ សំអាល់ រដ្ឋមន្រ្តីក្រសួងបរិស្ថាន ជាអនុប្រធាន ខណៈដែលរដ្ឋមន្រ្តីក្រសួងជាសមាជិកចំនួន ៧រូបទៀត រួមមាន៖ លោកទេសរដ្ឋមន្រ្តី ស៊ុន ចាន់ថុល រដ្ឋមន្ត្រីក្រសួងសាធារណការ និងដឹកជញ្ជូន លោក លឹម គានហោ រដ្ឋមន្រ្តីក្រសួងធនធានទឹក និងឧតុនិយម និងជាប្រធានអាជ្ញាធរទន្លេសាប លោក ជា វ៉ាន់ដេត ​រដ្ឋមន្ត្រី​ក្រសួង​ប្រៃសណីយ៍ ​និង​ទូរគមនាគមន៍ លោក ម៉ម ប៊ុនហេង រដ្ឋមន្រ្តីក្រសួងសុខាភិបាល លោក ឈិត សុខុន រដ្ឋមន្រ្តីក្រសួងធម្មការ និងសាសនា លោក ប៉ាន សូរស័ក្តិ រដ្ឋមន្រ្តីក្រសួងពាណិជ្ជកម្ម និងលោក ម៉ៅ ហាវណ្ណាល់ រដ្ឋមន្រ្តីទទួលបន្ទុករដ្ឋលេខាធិការដ្ឋាន អាកាសចរស៊ីវិល។

ជាមួយគ្នានេះ លោក ទៀ សីហា ដែលជាអភិបាលខេត្តសៀមរាប ក៏ត្រូវបានតែងតាំងជាសមាជិកប្រចាំការផងដែរ។

ការបង្កើតគណៈកម្មការគ្រប់គ្រង និងអភិវឌ្ឍន៍ទេសចរណ៍សៀមរាប-អង្គរ គឺដើម្បីដឹកនាំ សម្របសម្រួល និងត្រួតពិនិត្យការអភិវឌ្ឍគោលដៅទេសចរណ៍ខេត្តសៀមរាប ដោយអនុវត្តតាមផែនការមេអភិវឌ្ឍន៍ទេសចរណ៍ខេត្តសៀមរាប ឆ្នាំ២០២១-២០៣៥ ឱ្យមានប្រសិទ្ធភាពសំដៅ បង្កើនភាពប្រកួតប្រជែង និងធានាបាននូវនិរន្តរភាព។

បើតាមអនុក្រឹត្យនេះ ការគ្រប់គ្រង និងការអភិវឌ្ឍទេសចរណ៍នៅតាមតំបន់ទេសចរណ៍អាទិភាពត្រូវមានអង្គភាពគ្រប់គ្រង គោលដៅទេសចរណ៍ដោយឡែក ដែលស្ថិតក្រោមការគ្រប់គ្រងរបស់ គ. អ. ទ. ស.។ អង្គភាពគ្រប់គ្រងគោលដៅទេសចរណ៍ដោយឡែក ត្រូវបានបង្កើតឡើងតាមតំបន់ចំនួន៦ ដូចខាងក្រោម៖

១៖ តំបន់ឧទ្យានជាតិភ្នំគូលែន
២៖ តំបន់ទេសចរណ៍ជុំវិញតំបន់ការពារប្រាសាទបន្ទាយស្រី
៣៖ តំបន់បេតិកភណ្ឌអង្គរ
៤៖ តំបន់ក្រុងសៀមរាប
៥៖ តំបន់បឹងទន្លេសាប
៦៖ តំបន់ទេសចរណ៍សៀមរាបថ្មី។

The post លោក អូន ព័ន្ធមុនីរ័ត្ន ត្រូវបានតែងតាំងជាប្រធានដឹកនាំអភិវឌ្ឍន៍ទេសចរណ៍សៀមរាប-អង្គរ appeared first on .

គេហទំព័រ Touropia បានសរសេរថា ” នៅពេលគេនិយាយពីទីតាំងបុរាណវិទ្យា ទេសចរមិនចង់ខកខាន ចូលទៅទស្សនាអង្គរវត្ត ដែលស្ថិតប៉ែកខាងជើងប្រទេសកម្ពុជានោះទេ។ ទីនោះគឺជាសំបុកវប្បធម៌ដ៏ល្អយ៉ាងអស្ចារ្យលើពិភពលោក។ ទីនោះ មានសំណង់ប្រាសាទអង្គរវត្ត ប្រាសាទបាយ័នដែលមានថ្មធំៗតម្រៀបគ្នាចេញជាព្រហ្មមុខ៤ និង ប្រាសាទតាព្រហ្ម ដែលជាប្រាសាទពុទ្ធសាសនា ដែលហ៊ុមព័ទ្ធទៅដោយដើមឈើធំៗ”។

Touropia បានដាក់រាជធានីភ្នំពេញ ជាប់ចំណាត់ថ្នាក់ទី២០ និងខេត្តព្រះសីហនុ ជាប់ចំណាត់ថ្នាក់ទី២៨។ ដោយឡែក កោះបាលី នៃប្រទេសឥណ្ឌូនេស៉ី ជាប់ចំណាត់ថ្នាក់លេខ២ និង ឆ្នេរសមុទ្រហាឡុងបេយ៍ របស់ប្រទេសវៀតណាម ជាប់ចំណាត់ថ្នាក់លេខ៣, ក្រុងបាងកក នៃប្រទេសថៃ ជាប់ចំណាត់ថ្នាក់លេខ៤ និងទីក្រុងបាកាន នៅមីយ៉ាន់ម៉ា ជាប់លេខ៥។

1. Angkor, Cambodia
2. Bali, Indonesia
3. Halong Bay, Vietnam
4. Bangkok, Thailand
5. Bagan, Myanmar
6. Ifugao Rice Terraces, Philippines
7. Borobudur, Indonesia
8. Luang Prabang, Laos
9. Ko Phi Phi, Thailand
10. Singapore
11. Komodo National Park, Indonesia
12. Mount Kinabalu, Malaysia
13. Boracay,Philippines
14. Yangon, Myanmar
15. Hoi An, Vietnam
16. Taman Negara, Malaysia
17. Palawan, Philippines
18. Inle Lake, Myanmar
19. Chiang Mai, Thailand
20. Phnom Penh, Cambodia
21. Gili Islands, Indonesia
22. Kuala Lumpur, Malaysia
23. Phuket, Thailand
24. Vang Vieng, Laos
25. Hanoi, Vietnam
26. Perhentian Islands, Malaysia
27. Sapa, Vietnam
28. Sihanoukville, Cambodia
29. Vientiane, Laos

The post ប្រាសាទអង្គរវត្ត ជាប់ចំណាត់ថ្នាក់លេខ១ ជាទីតាំងដ៏ល្អបំផុតនៅអាស៊ី appeared first on .

ជុំវិញបវិវេណ​ប្រាសាទ​បុរណ​អាយុ​កាល​រាប់ពាន់ឆ្នាំ​នេះ មានការ​ដាំដើមឈើ​ជាមួយ​ផ្កាចម្រុះពណ៌ រួម​ទាំង​សួន​ស្មៅយ៉ាង​ស្រស់​បំព្រង​ ជា​ចំណែក​​​ទាក់ទាញ​ចិត្ត​ពេល​ភ្ញៀវ​ដើរ​កម្សាន្ត។

គួរ​បញ្ជាក់ថា តាំងពីឆ្នាំ​២០១៩ អជ្ញាធរអប្សរា​បានចាប់ផ្តើម​រៀបចំកែប្រែសោភ័ណ​មុខ​ខាង​មុខ​ប្រាសាទ​អង្គរ​វត្ត និង​បរិវេណ​ជុំវិញ​ដោយ​រៀបចំ​ជា​ផ្លូវ​ថ្មើរជើង សួនច្បារ ទីលានទទួល​បដិសណ្ឋារកិច្ចថ្មីយ៉ាង​រៀបរយ ដើម្បី​ប្រែក្លាយទីរមនីយដ្ឋាន​ទេសចរ​របស់ខ្មែរ​​ស័ក្ដសមជាសម្បត្តិបេតិកភណ្ឌពិភពលោក៕

The post ប្លែក​ភ្នែក​ទៅលេង​អង្គរវត្ត​ម្តងនេះ រៀបចំ​កាន់តែ​ស្អាត នឹង​ផ្លាស់ប្តូរអារម្មណ៍ភ្ញៀវ​ទេសចរ​មិន​ខាន​ appeared first on .